Chapter 5 : The Missing Signature

Makati City. 11:42 ng umaga.

Malamig ang conference room ng law office sa 28th floor ng Ayala Avenue. Glass ang buong pader, kita sa labas ang mga gusali na nakabilad sa araw. Sa gitna ng mahabang mesa, sampung folder ang nakahanay, makakapal, may color tab at may nakadikit na post-it.

Nasa isang dulo ng mesa si Martha Rivera. Katabi niya si Jayson Villafuerte. Naka white polo si Jayson, nakatupi ang manggas hanggang siko, nakangiti na parang tapos na ang lahat bago pa man magsimula. Sa kabila, nakaupo ang senior lawyer ng Rivera Group, dalawang corporate secretary na may laptop, at ang notary public na nakaabang lang.

Inilapag ng lawyer ang unang folder sa harap ni Martha.

"Mrs. Rivera, ito po lahat ng napag-usapan natin last week. Nandito na lahat ng final drafts," bungad ng lawyer at binuklat ang cover page.

Tumango si Martha at kinuha ang ballpen.

Sumingit si Jayson habang nakatingin sa mga papel, "Wala nang problema dito, Attorney? Malinis na lahat para sa transfer?"

"Based sa initial review ng team, malinis po, Sir Villafuerte. Wala nang kulang."

"Good." Ngumiti si Jayson kay Martha at tinapik ang balikat nito. "Pirmahan mo na. Para matapos na tayo ngayong araw."

Isa-isang pinirmahan ni Martha ang mga dokumento. Special Power of Attorney. Corporate Resolution. Authority to Represent. Board Consent. Mahigit tatlumpung pahina ang dumaan sa kamay niya. Bawat pirma, may pirma din ang secretary bilang witness. Ang ingay lang ng aircon at ng ballpen ang maririnig sa loob.

Pagkatapos ng halos apatnapung minuto, isinara ng lawyer ang huling folder. Tinanggal niya ang salamin at pinunasan ang lente gamit ang panyo. Hindi siya nakangiti kagaya kanina.

"May problema po tayo," pag-amin ng lawyer.

Nawala ang ngiti ni Jayson. Umayos siya ng upo.

"Anong problema? Kanina malinis. Ngayon may problema na?"

Kumuha ang lawyer ng isa pang folder na mas makapal, may tatak na ESTATE FILES sa gilid. Binuklat niya sa gitna at itinulak papunta sa kanila.

"Nireview ng legal at accounting yung huling disposition ng assets ni Mr. Leonardo Rivera, Mrs. Rivera. Standard procedure bago ang final transfer."

Yumuko si Martha para basahin. "Meron ba kayong nakitang mali?"

"Wala pong mali sa documents, Ma'am. Maliwanag po ang lahat."

"Kung walang mali, ano yung problema?" singit ni Jayson, medyo mataas na ang boses.

Huminga ang lawyer bago sumagot, "Majority ng personal assets, lupa, shares, at controlling interest ng Rivera Group, hindi na po nakapangalan sa inyo, Mrs. Rivera."

Natigilan ang buong mesa. Yung dalawang secretary, nagkatinginan.

Martha ang nag-angat ng tingin, "Hindi nakapangalan sa akin? Kanino?"

"Naipasa na po ang karamihan sa iisang legal heir."

"Sinong heir?" tanong ni Martha.

Kinuha ng lawyer ang Certified Asset Register at isa-isang tinuro.

"Hacienda Rivera."

"Rivera Construction Holdings."

"Rivera Aggregates."

"Dalawang commercial building sa Quezon City."

"Pitumpu't dalawang porsiyento ng controlling shares ng buong Rivera Group."

Tinaas ng lawyer ang huling pahina. Malaki ang pangalan sa ibaba.

*CELINE D. RIVERA*

Humigpit ang hawak ni Martha sa ballpen.

"Hindi sinabi sa akin ni Leonardo yan," bulong niya.

"Nakasaad po ito sa Revised Estate Distribution na ginawa niya dalawang taon bago siya pumanaw, Ma'am. Notarized. May pirma po niya at ng dalawang witness," sagot ng lawyer.

Si Jayson, nakaupo pa rin pero kita sa panga niya ang pag-igting. Pinisil niya ang armrest ng upuan.

"Ano ibig sabihin niyan, Attorney?" tanong ni Jayson.

"Ibig sabihin po, Mrs. Rivera can only transfer yung properties na nakapangalan pa sa kanya. Yung mga nasa listahan na yan, hindi po kasama."

"At yung iba?" tanong pa ni Jayson.

"Hindi po maaaring ilipat nang wala ang may-ari."

"Bakit hindi? May SPA naman si Martha."

"Dahil nasa legal age na po si Miss Celine Rivera, Sir. Under the law, kailangan ang personal na pirma niya sa bawat Deed of Assignment at Share Transfer. Hindi po puwede ang SPA ng magulang."

Inilapag ng lawyer ang huling dokumento. Isang blankong pahina na may linya lang sa baba.

*OWNER'S SIGNATURE*

*CELINE D. RIVERA*

Walang pirma. Blangko.

"Kung wala po ang pirma ni Miss Celine, hindi po matatapos ang transfer," dagdag ng lawyer.

Tumayo si Jayson mula sa upuan. Tinulak niya ng bahagya ang mesa.

"Ano sinasabi mong hindi matatapos? Legal requirement?"

"Opo. Requirement po ng SEC at ng Registry of Deeds."

"Hindi ba puwedeng SPA? Anak niya naman si Celine."

"Hindi na po, Sir. Legal age na po si Miss Celine. Twenty-one na po siya. Kailangan personal appearance at personal signature."

"Magkano ang maililipat sa akin kung ganyan?" tanong ni Jayson, diretso na.

Binuklat ng lawyer ang computation sheet.

"Tinatayang dalawampu't walong porsiyento lamang po ng total assets, Sir Villafuerte."

"Ano?" Tumaas ang boses ni Jayson.

"Ang natitirang pitumpu't dalawang porsiyento, mananatili po kay Miss Celine Rivera."

Isang segundo ang lumipas na walang kumibo. Nakatingin lang ang notary sa mesa.

Pagkatapos, kinuha ni Jayson ang crystal paperweight sa gitna at ibinagsak sa sahig.

CRASH!

Tumalsik ang bubog sa tiles. Napatayo ang secretary sa gulat.

"Lahat ng plano natin, masisira dahil lang sa pirma ng babaeng yun?" sigaw ni Jayson, namumula na ang leeg.

Walang sumagot sa mesa.

Humarap si Jayson kay Martha, tinuro ang mga papeles.

"Bakit hindi mo alam to? Bakit hindi mo alam kung kanino nakapangalan ang kumpanya ng asawa mo?"

"Jayson, hindi ko rin alam," sagot ni Martha, nanginginig ang boses.

"Lahat ng taon na magkasama tayo, hindi mo man lang inalam?"

Yumuko si Martha, hawak pa rin ang ballpen. "Naniwala lang ako sa sinabi ni Leonardo noon."

Isinara ni Jayson ang folder ng malakas. Pak!

Napatingin ang lawyer sa kanya.

"Attorney, labas muna kayo," utos ni Jayson, pinipigilan ang galit.

"Yes, Mr. Villafuerte," sagot ng lawyer at mabilis na kinuha ang laptop. Sumunod ang dalawang secretary at ang notary. Isa-isa silang lumabas at isinara ang p***o ng conference room.

Naiwan si Martha at Jayson sa loob. Amoy pa ng kape ang mesa at may bubog pa ng crystal sa sahig.

Lumapit si Jayson sa upuan ni Martha at hinila ang upuan palapit sa kanya.

"Hindi puwedeng ma-delay to," sabi ni Jayson, mahina pero mariin.

Martha ang nagtaas ng kilay, "Bakit? Maayos naman lahat. Tayo naman ang nagpapatakbo ng Rivera Group."

"Gusto ko lang matapos na. Ayoko ng sabit."

"Teka lang." Tinulak ni Martha ng bahagya ang folder palayo. "Bakit ba atat ka na mailipat lahat sa pangalan mo? Tayo naman ang hawak. Hawak pa rin natin ang kumpanya. Kahit nakapangalan kay Celine ang karamihan, anak ko naman siya. Tayo pa rin ang nagpapatakbo ng lahat."

Hindi kumibo si Jayson. Nakatingin lang sa blankong pirma ni Celine.

"Meron ka bang hindi sinasabi sa akin?" tanong ni Martha, diretso na.

Sandaling hindi kumilos si Jayson. Pagkatapos, ngumiti siya. Yung ngiti na halos isang taon na niyang ginagamit kay Martha tuwing gusto niyang pakalmahin ito.

"Wala. Gusto ko lang maging maayos na lahat para sa inyong mag-ina."

Tinitigan ni Martha ang mukha ni Jayson. Tatlong buwan pa lang mula nang ilibing si Leonardo. Halos isang taon pa lang mula nang maging sila ni Jayson.

Ngayon lang may bumara sa lalamunan niya na hindi niya mapangalanan. Tumango siya, pero hindi na gumaan ang pakiramdam niya.

Habang nakatingin siya sa lalaking katabi niya, isang tanong ang paulit-ulit na umiikot sa isip niya.

Kung kami naman pala ang may hawak ng Rivera Group at walang umaagaw, bakit ganun na lang ito kaatat na ilipat sa pangalan niya?