One Night to Contracted One

“Talaga ba, Allanna? Magiging ninang na ako?!”

Natawa ako sa reaction ni Gale. Lumaki pa ang kaniyang mga mata sa harap ng camera't nasakal ang kaniyang nobyo na nananahimik sa kaniyang tabi. Tumawag kasi siya para i-tour ako sa Paris, doon kasi sila magpapasko ni Eriko.

“Eh nasaan na si Giel? Nasabi mo na ba sa kaniya? Iba rin, sabi na nga ba't may nangyayari sa inyo. Masyado ka pang pa-virgin kapag tinatanong kita.” Napairap naman siya. "Nauna ka pang magka-anak kaysa sa'kin."

Umiling ako't natawa. “Hindi pa siya nakakauwi. Mamaya niya pa malalaman. Kung anu-ano na naman ang lumalabas sa bibig mo. O siya, sige na at ihahanda ko na ang mga pagkain.”

“Sige. Mukhang nakangiti ka na habang naghahanda ng pagkain.”

“Syempre,” aniya ko. “Sinong hindi sasaya sa anghel na nabuo namin? Sana nga lang ay maging masaya rin si Giel.”

“Syempre matutuwa ‘yon! Kinabog niyo pa ang super slow-burn romance, e.”

“Sige na, sige na. Ibababa ko na 'tong call,” sabi ko. “Merry Christmas ulit.”

Tumayo na ako’t pinatay ang kalan, inilabas ko na rin sa oven ang brownies na in-bake ko at saka niluto na ang ibang mga putahe.

Nakangiti habang pakanta-kanta kong inilapag sa mesa ang mga pagkain para sa noche buena. Nakakatuwang isipin na tanggap na ako ni Giel, at kasabay pa no’n ay ang batang nabuo sa aking sinampupunan.

Isang napakagandang gabi talaga para salubungin ang pasko’t ipaalam kay Giel ang balita.

Kumuha ako ng isang lumpia at kinagatan ito saka isinalin ang powder ng dalandan sa pitsel, at hinalo ng kutsara.

Anong oras kaya ang uwi ni Giel?

Napatingin na lamang ako sa orasan. Ilang minuto na lamang at alas-dose na.

Mayamaya lang ay narinig ko na ang pagbukas ng gate. Napangiti na lamang ako’t inayos ang suot kong damit. Mahigpit din ang hawak ko sa pregnancy test at sa resulta na nakuha ko sa OB sa aking bulsa.

Marahas na bumukas ang pinto dahilan ng pag-igtad ko. Napakunot ang aking noo nang tunog ng paghahalikan ang sumalubong sa aking pandinig.

Bigla ay naramdaman ko ang pagsikip ng aking dibdib.

“Hmm…I missed you, Giel.”

Nakatulala’t hindi ko alam kung ano ang dapat kong gawin. Nanginig ang aking mga tuhod at napahawak sa aking sinampupunan.

“G-Giel?” nanginginig na tawag ko. Agad naman silang napatingin sa kinatatayuan ko’t naitulak niya ang babae.

“A-Allanna…mali—”

Naibagsak ko ang hawak kong kutsara sa mesa. “Merry Christmas!”

Mas isiniksik ko sa aking bulsa ang regalo ko sa kaniya’t kasabay no’n ay ang sunod-sunod na pagpatak ng aking mga luha. Napatingin ako sa babaeng kasama niya.

Kaya pala…

“I'm happy for the two of you,” saad ko’t pinalis ang aking mga luha. “Nakapaghanda na ako para sa inyo. Mag-enjoy sana kayo.”

Agad akong naglakad palabas ng bahay. Ilang ulit kong narinig ang pangalan ko sa bibig ni Giel ngunit mas binilisan ko ang aking paglalakad palayo sa kanila, sa bahay na iyon.

Akala ko ba ay ako na…ako na ang mahal niya?