The Disguised Maid In The Wolf's Den

Sa isang silid ng isang mumurahing hotel, naalimpungatan si Agnes nang maramdaman ang pagdapo ng isang mainit-init at makalyong palad sa kanyang binti, paakyat sa kanyang hita.

Kahit hilo at hindi kumportable sa kanyang nararamdaman ay pilit pa rin niyang iminulat ang kanyang mga mata at pilit inaninag ang humahaplos nang masagwa sa kanya.

Gayon na lang ang gulat niya nang pagmulat ay tumambad sa kanya ang baku-baku at pangit na mukha ng isang matandang lalaki.

"Ahhh!!!"

Kasabay ng kanyang pagsigaw ay ang pagbalikwas nang bangon ng dalaga. Umurong siya nang husto sa pinaka-dulo ng kama.

"Shhh..... Relax ka lang iha. Kahit may-edad na 'ko, patutunayan ko sa 'yong kaya ko pa ring magpaligaya ng mas bata sa 'kin, he he he he." Malisyosong wika ng matanda na nagsisimula nang gumapang papalapit kay Agnes.

Siya si Agnes Zara Dela Fuentes, 22 years old. Hindi siya mahilig mag-party na pagkatapos ay magigising na lang sa hindi n'ya kama, kaya ngayon ay nagtataka siya kung bakit nagising s'ya sa hindi pamilyar na silid na ito.

Suyang-suya at diring-diri si Agnes sa mahalay na intensyon ng matanda sa kanya. Nagpalinga-linga siya sa paligid hanggang sa dumako ang paningin niya sa nightstand.

"Sandali lang!" Nang kalahating metro na lang ang layo ng matanda ay pinigilan ito ng dalaga sa pamamagitan ng pagharang niya ng kanyang paa sa mukha nito.

Hindi naman nagalit ang matanda, bagkus ay tila na-excite pa ito. "Ito ba ang gusto mo, hmm? Gusto mo bang paa mo muna ang unahin ko? Walang problema!" At sinimulan nang halik-halikan ng matanda ang talampakan ni Agnes.

Napa-ngiwi sa pandidiri ang dalaga, ngunit kailangan muna niya itong tiisin.

"S-sandali.... Bago tayo magsimula, sabihin mo muna sa 'kin kung paano ako napunta sa kuwartong 'to, anong ginawa n'yo sa 'kin? bakit ako nahihilo, may pinainom ba kayo sa 'kin?"

"Hmm?.... no~ hindi kami, kundi ang mabait mong kapatid..." Wika ng matanda habang ikinikiskis sa magaspang at tila makalyo n'yang mukha ang maputing talampakan ng dalaga. Sa gaspang ng mukha nito, pakiramdam ni Agnes ay masusugatan pa ang talampakan n'ya.

"K-kapatid? Pe-pero, wala naman akong kap–" natigilan ang dalaga nang biglang maisip kung sino ang posibleng tinutukoy ng matanda na siya ring nagdala sa kanya sa lugar na iyon.

Inaya si Agnes nito para i-selebra ang pagtatapos niya ng dalawang taong kurso niya. Nagtataka pa nga siya kung bakit biglang itong bumait sa kanya gayong hindi naman sila magkasundo. Sinagot pa nito ang gastos sa kanilang celebration sa isang club, iyon naman pala....

'Maylene' Nag-ngalit ang mga ngipin ni Agnes habang ibinubulalas ang pangalan ng gumawa nito sa kanya.

Si Maylene ay anak ng madrasta ni Agnes at sa kanilang villa rin nakatira, kaya sa paningin ng mga tao ay parang kapatid na rin n'ya ito.

Hindi maganda ang pag-uugali ni maylene, at kahit na ito ang dapat na nakikisama kay Agnes ay feeling may-ari pa ito ng Villa, at ginagawa ang kung ano ang maibigan niya. Hinahayaan lang ito ng ama ni Agnes dahil hindi na rin daw iba ito at parang anak na rin daw n'ya si maylene.

Ngunit hindi akalain ni Agnes na bagaman hindi sila magkasundo ay gagawan s'ya ng ganito kasama ni Maylene. Hindi n'ya naisip na pagpa-planuhan siya nito nang ganito.

"Sige ituloy mo na..."

Sa kanyang pahintulot ay sinimulan muli ng matanda ang paghalik-halik sa kanyang talampakan at paa habang dahan-dahan namang inaabot ni Agnes ang lampshade sa nightstand.

Nang makuha na ang lampshade ay dahan-dahan itong iniangat ni Agnes, ngunit nang ipinalo na n'ya ito sa ulo ng matandang lalaki ay nagulat siya nang masalo iyon ng matanda.

"He he he he.... akala mo, ha. Isa rin ba ito sa gusto mo? Gusto mo ba ay 'yung may sakitan muna? Sige ba! Pero pagtapos mo.... ako naman, ha?"

"Hindi! Ang gusto ko, ako lang!" Pagkasabi niyon ay sinipa ito ni Agnes sa mukha. Nabitiwan ng matandang lalaki ang lampshade na sinamantala naman ng dalaga.

Dalawang beses pinalo ni Agnes sa ulo ang matandang lalaki bago ito mawalan ng malay.

Pagtayo ni Agnes sa kama ay bigla siyang naliyo kaya kumapit at gumabay s'ya sa dingding. Hinanap n'ya ang kanyang bag, nang makita iyon ay tinawagan n'ya ang driver nila sa Villa para magpasundo. Dali-daling umalis si Agnes sa silid na iyon.

Naghintay na lamang ang dalaga sa isang convenience store ng susundo sa kanya.

Nakatalungko ito sa isang sulok na puwesto. Dahil sa hilo ay nakasubsob ang kanyang ulo sa mesa.

Sa di-kalayuan ay may lalaking Kanina pa pala nagmamatyag kay Agnes. Napansin ng lalaki na tila madali-dali itong targetin dahil mukhang may dinaramdam ito, bagay na magandang samantalahin.

Nang makitang hindi na gumagalaw si Agnes, at tila nakatulog na ito ay dahan-dahan nang lumapit ang lalaki.

Tumingin-tingin muna siya sa paligid. Nang makitang nasa may bungad ang iilan lang na customer ng convenience store ay umaksyon na ito.

Sinubukan niyang damputin nang pasimple ang shoulderbag ni Agnes na nakapatong lang sa mesa. Natuwa ang lalaki nang makuha niya iyon nang walang hirap nang hindi nakakahalata ang dalaga.

Aalis na sana ito nang magawi ang kan'yang mga mata sa makikinis at mapuputing hita ni Agnes. Naka above the knee na dress ang dalaga kaya pag-upo ay lilihis talaga iyon hanggang sa kanyang hita.

Tila nang-gigil ang lalaki at napapakagat pa ng kanyang labi. Muli siyang lumingon sa paligid. Nang makitang walang nakakapansin sa ginagawa niya ay inabot n'ya ang mga hita ni Agnes.

Ngunit bago pa man sumayad ang mga kamay niya ay may dumakma niyon at sabay pinilipit. Napasigaw sa sakit ang lalaki na nagpagising sa dalaga.

Nang makita ang lalaki ay naalarma si Agnes kaya agad itong tumayo, ngunit agad din siyang napasalampak ng upo nang umikot bigla ang kanyang paningin.

"Ma'm Agnes!"

Nabitiwan ng kararating lang na lalaki ang nagtangka kay Agnes at agad inalalayan ang dalaga.

Sinamantala ito ng lalaki at agad tumakbo, tangay ang bag.

"Buwisit!" Tangka sanang hahabulin ng lalaki ang tumakas na magnanakaw nang pigilan ito ng dalaga.

"Huwag na Ged. Hayaan mo na. Wala naman masyadong laman 'yon, nandito din sa 'kin ang cellphone at wallet ko...... Samahan mo na lang ako sa hospital."

Biglang nag-alala si Ged at matamang tiningnan si Agnes. "B-bakit, anong nangyari sa 'yo? May sakit ka ba?"

"Sa sasakyan ko na lang s-sasabihin."

Habang tumatakbo ang sasakyan ay hirap na ikinuwento ni Agnes ang nangyari sa kanya.

"Ang sama niya! Ire-report ko 'to kay Ser Edward!" Nang-gagalaiti'ng wika ni Ged. Lalo niyang binilisan ang pagmamaneho nang malaman ang kalagayan ng dalaga.

"Ged, huwag na.... Marami nang.... intindihin si daddy, ayoko nang dagdagan pa." Mahinang wika ni Agnes. Nakapikit ito habang nakasandal sa sasakyan, tinitiis ang udyok na sumuka dahil sa discomfort na kanyang nararamdaman.

"Tsk.... Hindi bale, malapít na ang bakasyon ko. Sasabihin ko kay tatay na ako na muna ang maghahatid-sundo sa 'yo, para mabantayan at maprotektahan na rin kita." Biglang may naalala si Ged. "Oo nga pala.... Natapos mo na nga pala ang course mo."

Si Ged ay anak ni Mang Berto, ang family driver ng pamilya ni Agnes. Matagal na sa serbisyo si Mang Berto kaya subok nang mapag-kakatiwalaan ito.

Paaral si Ged ng pamilya Dela Fuentes na hindi naman pinanghihinayangan ng ama ni Agnes na tapunan ng pera, dahil matalino naman ito at isa ring tapat sa kanilang pamilya.

Magkababata si Ged at Agnes, kaya hindi lang ito mag-amo, magkaibigan din ang mga ito. Minsan ay ma'm Agnes ang tawag ni Ged sa dalaga bilang pag-galang na rin dito.

"Anong balak mo kung ayaw mong isumbong si Maylene kay ser Edward? Alam mo, hindi ko pa ganu'n katagal kilala si Maylene, pero may kutob akong uulit pa 'yon." Humigpit ang pagkakahawak ni Ged sa manibela sa yamot.

Pagdating sa hospital ay tila namroblema pa ang doktor na tumingin kay Agnes. Nagtagal bago mabigyan ng nararapat na gamot ang dalaga na ipinagtaka ni Ged.

Nang bumuti-buti na si Agnes ay ipinaliwanag ng doktor kung bakit. "Ang drugs na nainom mo ay wala dito, restricted at ban dito sa Pilipinas. Bumibilib lang ako sa 'yo dahil nakayanan mo ang drugs na iyon. Ang lakas ng fighting spirit mo, iha. Ngayon...... paano at saan ka nakainom nu'n?"

Biglang nag-react si Ged matapos marinig ang sinabi ng doktor. "Ang sama-sama niya! Ire-report ko siya sa mga pulis!" Tumayo ito at tila handa nang puntahan at sugurin si Maylene, ngunit agad napigilan ni Agnes.

"Maghulus-dili ka Ged, hindi natin siya ire-report sa mga pulis.... Hayaan mo 'kong gumanti sa kanya." Lumamig ang mga mata ng dalaga. Tila ngayon pa lang ay nagpaplano na ito kung paano gaganti kay Maylene. "Sa ngayon ay kailangan ko munang umuwi. Hindi ako umuwi kagabi, baka nasa bahay na si daddy."

Pagbalik sa Villa ay hinanap agad ni Agnes si Maylene sa mga katulong. "Si Maylene?" Malamig niyang tanong sa isa na puro kolorete ang mukha.

Bahagyang natakot ang katulong. Hindi sila sanay na makitang magalit ang dalaga. "M-ma'm Agnes, na-nando'n po siya sa lo–" Hindi pa man natatapos ang katulong ay iniwan na ito ni Agnes at nagtuloy na sa loob ng Villa.

Inabutan ni Agnes si Maylene sa malaking sala. Nangingingain ito ng berries habang nagso-social media sa kanyang mamahaling I-phone.