الحلقة الثالثه

تقول حكمت بحزن: "يا تيته... (تبص لها فاطمة قبل ما تكمل كلامها)".

تقول فاطمة: "اسكتي أنتِ أنا بتكلم مع ندى. (وتقوم تقف وتقرب من ندى اللي بصت ليها بخوف ورافعة إيديها بسرعة لطرحتها وبلوزتها وفضلت تشد فيهم بحركة لا إرادية... وعينيها متعلقة بفاطمة اللي بتقرب منها... فاطمة راحت عندها بابتسامة ومسكت إيديها وطبطبت عليها ونزلتها من على الطرحة... ورفعت إيديها علشان تشيل الطرحة، فندى رفعت إيديها تاني بسرعة ومسكت بطرحتها بقوة وعينيها المليانة دموع متعلقة بعين فاطمة... فاطمة ابتسمت لها بحنان وطمنتها بعينيها، فندى غمضت عينيها بحزن وسابت الطرحة وبصت للأرض... ودموعها نازلة. فاطمة شالت الطرحة وشافت الحرق، غمضت عينيها بحزن ولما شافت دموع ندى نازلة... نزلت لمكان الحرق وراحت تبوسها... وشافت شعرها الطويل وفردته على ظهرها)".

تقول فاطمة بحنان دافق: "بسم الله ما شاء الله، زي القمر يا ندى. (وترفع وشها بإيديها) أنتِ جميلة قوي... وهنا أنتِ في بيتكِ مع إخواتكِ وجدتكِ مفيش حاجة تداريها ولا تتكسفي منها وسطينا... مش عاوزه أشوفكِ لابسة طرحتكِ تاني في البيت... عاوزاكي تلبسي براحتكِ وافردي شعركِ الطويل ده وانسي جرحكِ ده، أنتِ ما شاء الله زي القمر".

نظرت إليها ندى بابتسامة ومسحت دموعها.

تعود فاطمة إلى مقعدها قائلة: "بس أنا عاوزكم تتخانوا شوية، أطباقكم دي تخلص كلها، وأنتِ يا بت يا أميرة كلي كويس".

تقول أميرة بفرحة وبابتسامة وهي تنظر إلى ندى: "هاكل الأكل كله يا تيتا".

ترد فاطمة: "آه كليه كله، عاوزاكم بطات كده ومدملجين زي ستكم فاطمة، (وتبص لحكمت) مطلعش للبت الخايبة حكمت اللي مش باين في جسمها صدر من ورك".

تشهق حكمت وهي تنظر إلى جسدها مستنكرة، بينما تعلو ضحكات الفتاتين ويقعدوا يأكلوا ويتكلموا ويهزروا.

وفي الليل، استلقت الفتاتان في غرفتهما.

تنظر أميرة إلى السرير بفرحة: "أول مرة أحس إني مرتاحة وليا بيت وأهل".

تستلقي ندى بجوارها متبسمة: "أنا كمان مرتاحة... أول مرة أعرف يعني إيه يكون لينا بيت وعندنا أهل... وأول مرة أقعد وأنا مش مستخبية في الطرحة علشان محدش يشوفني وأخاف يقرفوا مني".

تنظر إليها أميرة بحزن: "أنتِ يا ندى اللي كنتِ ظالمة نفسكِ، أنتِ زي القمر والجرح أه موجود بس مش مغير في شكلكِ".

ترد ندى بابتسامة حزينة: "قمر مشوهة... (وتبص لها بابتسامة) بس سيبكِ أنتِ من الكلام ده... خلينا نفكر في المهم، إحنا مش عاوزين نتقل على أبلة حكمت، عاوزين ندور على شغل نشتغله جنب الدراسة".

تسأل أميرة بحيرة: "هنشتغل إيه؟"

تجيب ندى: "مش عارفة، أهو ندور يا أميرة".

وفي أثناء حديثهما، تدخل حكمت قائلة: "أنتم نمتوا يا بنات؟"

تعتدل ندى في جلستها: "لا يا أبله لسه صاحيين، اتفضلي".

تدخل حكمت وتستلقي في المنتصف بينهما: "هااا قولولي بتتكلموا في إيه؟"

تقول أميرة بابتسامة: "كنا بنفكر ندور على شغل".

تنظر إليهما حكمت قائلة: "شغل إيه؟ إحنا مش اتكلمنا واتفقنا؟ أنتم تخلوا بالكم من دراستكم وبس وماتفكروش في حاجة غيرها".

تنظر إليها ندى قائلة: "إحنا يا أبلة حكمت مش عاوزين نتقل على حضرتكِ أكتر من كده، كفاية إن حضرتكِ فتحتي لينا بيتكِ".

تنظر إليها حكمت وتقرص أذنها بخفة: "أنا مش عاوزه أسمع الكلام ده مرة تانية أنتِ فاهمة؟ (وتضمهم ليها ويناموا على صدرها بحب) أنتم بناتي والبيت ده بيتكم".

تضحك أميرة قائلة: "إخواتكِ يا أبلة متخليش تيتا تزعل".

تضحك حكمت: "أيوه صح إخواتي، كله إلا زعل تيتا".

ترفع ندى رأسها وتنظر إليها قائلة: "هو أنا ممكن أسألكِ سؤال يا أبله؟"

يجيب حكمت بابتسامة: "اسألي".

تسأل ندى: "هو حضرتكِ ليه متجوزتيش؟"

تلتفت إليها أميرة مؤيدة: "صحيح يا أبلة أنا من زمان وأنا نفسي أسألكِ السؤال ده... حضرتكِ ما شاء الله جميلة وطيبة قوي وألف من يتمناكي، وأكيد في كتير اتقدموا لكِ".

تتنهد حكمت وتسند رأسها إلى الخلف: "أنا فعلاً أتقدم ليا ناس كتير بس مكنتش اقدر أتجوز أي حد منهم... وأنا قلبي مع واحد تاني".

تبتسم ندى وتسألها: "حضرتكِ كنتي بتحبي يا أبله؟"

ترتسم على شفتي حكمت ابتسامة حزينة: "ولسه بحب... (وتبص ليهم) أنا عيشت أجمل قصة حب ".

تسأل أميرة باهتمام: "وليه متجوزتيش حبيبكِ يا أبله؟"

تغرورق عينا حكمت بالدموع: "دي حكاية طويلة قوي".

ترجوهما ندى: "احكي لنا يا أبله".

وتضيف أميرة: "أيوه يا أبله بالله عليكي احكي لينا من الأول... امتي اتعرفتوا؟ وحبيتوا بعض إزاي؟ وليه متجوزتيش؟"

تبتسم حكمت وتتنهد بعمق قائلة: "هحكلكم... الحكاية بدأت من وأنا عندي 18 سنة، كان يوم عيد ميلادي، يومها كان أول مرة أشوف كمال

حكمت تبتسم وتتنهد: الحكاية بدأت من وأنا عندي 18 سنة، كنت عايشة مع بابا وماما وتيتا في إسكندرية... كنا عايشين على قدنا بس كنا مبسوطين... ماما كانت ست طيبة قوي بس كانت على طول تعبانة... لحد ما بقت على طول نايمة في السرير ما بتتحركش... وبابا كان شغال ممرض في مستشفى خاص كبيرة... فكان دخلنا بسيط... أنا كنت لسه مخلصة امتحانات الثانوية العامة... وبعدها كان عيد ميلادي.. بابا اتفق معايا أفوّت عليه في المستشفى علشان يأخدني يشتري ليا لبس جديد... يبقى هدية لعيد ميلادي وعلشان يبقى عندي لبس أدخل بيه الجامعة.... أنا يومها كنت فرحانة قوي أصل أنا قليل لما كنت بشتري حاجة جديدة... لأن ظروفنا مكنتش قد كده... ما هم ما كانش عندهم غيري بس تعب أمي وعلاجها كان بياخد فلوس... كنت لما بشتري لبس جديد ببقى فرحانة زي العيال الصغيرة لما يفرحوا بلبس العيد... يومها نزلت من البيت ورحت ركبت سيرفيس... ونزلت في محطة قريبة من مكان المستشفى... وأخذتها مشي لحد المستشفى... بس قلت أمشي من شارع جانبي هادي بعيد عن العربيات والزحمة عشان أوصل بسرعة... بس وأنا ماشية جات عربية فيها ولدين وفضلوا يغلسوا عليا.

### فلاش باك

**الشاب الأول:** القمر ماشي لوحده ليه؟

**الشاب الثاني:** ما تيجي يا جميل أوصلك بدل ما أنتِ ماشية لوحدك كده وبالمرة نتعرف على بعض.

حكمت مشيت وهي بتحاول تبعد عنهم... بس هما فضلوا ماشيين وراها... وهي فضلت تبص حواليها على أي حد يساعدها... بس الشارع كان فاضي ومافهوش حد... الشباب قربوا منها بالعربية وراح واحد منهم مطلع إيده من الشباك ومسكها فصرخت وبعدت بعيد.

وقفت حكمت بعصبية: يا حيوان يا قليل الأدب لو راجل انزل من العربية وأنا أربيك!

العربية وقفت ونزل واحد منهم وقرب منها وعينه مليانة خبث وشَر.

**الشاب باستهزاء وهو بيقرب منها:** أديني نزلت يا جميل يلا تعالي قربي بقى وريني هتربيني إزاي؟

حكمت بتحاول ترسم القوة على وشها... بس من جواها كانت خايفة... هبّشت في شنطتها بشويش وأول ما قرب منها... طلعت قزازة صغيرة مليانة فلفل أسمر مركز، حطاها دايماً في شنطتها للحماية الشخصية... وأول ما الولد قرب منها راحت رشة منها في عينه... راح مَصوّخ وبعد عنها وهي طلعت تجري للشارع الرئيسي.

بس الشاب الثاني فتح العربية ونزل يجري وراها.

**الشاب الثاني بغضب:** يا بنت الـ..... طب والله مانا سايبك