الفصل الرابع

فضلت حكمت تجري بسرعة والولد بيجري وراها وأول ما وصلت الشارع الرئيسي.. بتعدي الطريق بسرعة من غير ما تاخد بالها خبطتها عربية فوقعت قدام العربية مغمى عليها... والناس اتجمعت واتلمت حواليها.

كمال ينزل من عربيته بسرعة وقلق ويقرب منها.

**كمال بقلق:** يا آنسة يا...

**واحد من الناس اللي واقفين:** مش تخلي بالك يا أستاذ؟

**كمال يبص له بضيق:** هي اللي طلعت قدامي مرة واحدة.... أنا كنت سايق براحة.

**واحدة من الناس:** الخبطة بسيطة أنا شوفتها... الأستاذ فرمل أول ما شافها.... هي بس تلاقيها مخضوضة، خد يا أستاذ الريحة دي فوقها بيها.

كمال ياخد منها البرفان ويفوقها... حكمت بدأت تفوق.

**كمال بقلق:** أنتِ كويسة؟

**حكمت بتعب:** إيه اللي حصل؟ أنا فين؟

**واحدة من الناس:** مش تاخدي بالك يا بنتي؟ كنتي هتضيعي نفسك وتضيعي الشاب معاكي... الحمد لله أهي جت سليمة.

حكمت حاولت تقوم راحت مصرخة من رجلها.

**كمال بقلق:** مالك فيكي إيه؟

**حكمت بدموع:** رجلي مش قادرة أقف عليها.

كمال يمسك رجليها عشان يشوفها بس هي تزق إيده بخوف.

**كمال بابتسامة:** متقلقيش أنا دكتور، هطمن بس أحسن تكون مكسورة.

حكمت بصت له بكسوف...... وبعدت إيدها وهو بص على رجلها.

**كمال بابتسامة:** الحمد لله... جزع بسيط بس عاوز يتربط، ممكن تسندي عليا وتركبي العربية هاخدك المستشفى اللي على أول الشارع أربطهالك.

حكمت بدموع تسند عليه وتقوم وتركب العربية وهو يشكر الناس الواقفين ويركب ويمشي.

كمال يبص لها وهي قاعدة مكسوفة: أنا آسف.. بس أنتِ اللي كنتي بتجري وطلعتي قدامي مرة واحدة.

**حكمت بكسوف ودموع:** أنا اللي آسفة، أنا فعلاً كنت بجري، كان فيه ولاد مش محترمين بيعاكسوني فكنت بجري منهم.

**كمال بضيق:** وأنتِ ليه كنتي ماشية لوحدك في الشارع الجانبي ده... وكنتي رايحة فين؟

**حكمت:** كنت رايحة لبابا شغله .... هو شغال في المستشفى اللي رايحين ليها (وتبص للأرض بحزن زي الأطفال) المفروض ياخدني ونخرج عشان أتفسح معاه وأشتري هدوم، أديني لا هتفسح ولا هشتري هدوم.

**كمال بابتسامة:** معلش متزعليش، هم يومين راحة وتقدري تمشي ... وابقي اخرجي واتفسحي زي ما أنتِ عاوزه.

**حكمت بحزن:** لا ما خلاص .... عيد ميلادي هيكون خلص.

**كمال باستغراب:** عيد ميلادك؟

**حكمت بابتسامة:** آه ما النهارده عيد ميلادي.. وعلشان كده أبويا كان هيفسحني.

**كمال بابتسامة:** كل سنة وأنتِ طيبة.

**حكمت بكسوف:** وأنت طيب (وتبص له بابتسامة تطير عقله) أنا آسفة إني عطلتك وخليتك توصلني المستشفى.

**كمال بنظرة كلها إعجاب:** متتأسفيش أنا مبسوط قوي باللي حصل عشان اتعرفت عليكي.

حكمت تبص للأرض بكسوف وكمال ياخد باله فيبتسم ويتنحنح.

**كمال:** هو أنتِ اسمك إيه؟

**حكمت بابتسامة:** حكمت.

**كمال:** وأنا كمال... أنتِ في كلية إيه؟

**حكمت بابتسامة وبراءة:** أنا لسه واخدة الثانوية العامة ومستنية النتيجة... بس إن شاء الله ناوية أدخل تربية علم نفس... أنا بحب قوي علم النفس (وتبص له باهتمام) هو أنت صحيح دكتور؟

**كمال بابتسامة:** أيوه...... أنا في سنة خامسة كلية طب.

**حكمت:** اااه أنا برضه بقول شكلك صغير على إنك تكون دكتور (وتبص له تاني قوي) بس أنت إزاي بتتدرب في المستشفى وأنت متخرجتش لسه؟

**كمال بابتسامة:** بتدرب هناك.

**حكمت:** ااااه... يعني ممكن تكون تعرف أبويا، هو شغال ممرض هناك في المستشفى.

**كمال بابتسامة:** ممكن أكون اعرفه وممكن معرفوش أصل المستشفى كبيرة.

**حكمت بابتسامة:** صح (وتبص له باهتمام) بس أنت إزاي بتتدرب في مستشفى كبيرة كده... دي مستشفى استثماري كبيرة وصاحبها دكتور غني قوي.... مش بيشتغل فيها أي حد.

**كمال بابتسامة:** ما صاحب المستشفى الغني قوي دا يبقى أبويا.

**حكمت بصدمة:** يالهوي بجد! أنت ابن صاحب المستشفى؟

**كمال يبص لها ويبتسم:** أيوه أنا ابن صاحب المستشفى مالك استغربتي ليه كده؟

**حكمت:** لا عادي (وتبص له باستغراب) بس أنت يعني راكب عربية عادية .... وشكلك عادي زينا مع إن أبوك غني قوي.

**كمال يضحك قوي:** وهو اللي أغنياء بيبقى شكلهم إزاي؟

**حكمت بابتسامة:** يعني عربيات آخر موديل ويكلموا الناس من طرف مناخيرهم..... ومش هيساعدوا واحدة زيي.... ويركبوها عربيتهم.

**كمال يبص لها باستغراب:** مين اللي قالك كده؟.... وبعدين يعني إيه واحدة زيك؟.... ما أنتِ عادية زي باقي الناس.

**حكمت بضحك:** أيوه أنا زي باقي الناس لكن أنت اللي مش زيهم أنت واحد غني (وتبص له وتبتسم) أنا مش بحسد على فكرة.

**كمال بضحك:** اااه مهو واضح إنك مش بتحسدي.... أنتِ بتقرّي بس.

حكمت تضحك قوي وهو يبص لها بإعجاب شديد.

**حكمت باستغراب:** أنت رايح على فين المستشفى اهي؟

**كمال بارتباك:** اه معلش ماخدتش بالي.

ويوقف العربية وينزل بسرعة ويفتح الباب ليها ويسندها وهي تبتسم وتمسك في كتفه عشان تنزل من العربية ... وهو بيمشي بيها عشان يدخل المستشفى بس هي تقف.

**حكمت:** أنت رايح فين؟

**كمال يبص لها:** هندخل عشان يشوفوا رجلك.

**حكمت بضحك:** يشوفوا رجلي أنا في المستشفى دي؟ أنت عاوزهم يشغّلوا أبويا باقي عمره عندهم ببلاش... عشان يسدد فاتورة علاجي؟ يا عم المستشفى دي للناس الأغنياء بس... لكن اللي زيي أنا... بيروحوا مستشفيات الحكومي.

**كمال بابتسامة:** تعالي بس معايا ومالكيش دعوة.

**حكمت:** لا يا عم متشكرين أنا هدخل لأبويا وهو ياخدني يوديني أي مستوصف.

**كمال ينفخ بضيق:** بصي بقى أنا مبحبش أتحايل على حد (وراح باصص ليها قوي) هتخشي معايا بذوق وإلا أشيلك؟

حكمت برقت وبعدت عنه: تشيلني! لاااا هدخل لوحدي.

وتسند على كتف كمال وهو عمال يبص لها ويبتسم على شكلها وهي عمالة تتلفت حواليها وراحوا لعند الاستقبال.

**موظف الاستقبال باستغراب:** دكتور كمال خير؟

**كمال بابتسامة:** خير... بص أنا بس خبطت الآنسة بعربيتي ورجلها فيها جزع، هات كرسي متحرك ودخلها أوضة ونادي دكتور عظام واهتموا بيها جداً.

**موظف الاستقبال:** تحت أمرك يا دكتور (ونادى على نيرس اللي جابت كرسي متحرك وقربت من حكمت).

**النيرس:** اتفضلي اقعدي هنا يا آنسة.

حكمت بقلق تبص لكمال فيشاور ليها برأسه فتقعد على الكرسي ولسه النيرس بتزق الكرسي حكمت مسكت إيد كمال، اللي حس إن قلبه اتخطف أول ما كف إيديها لمس كف إيده وبص لها قوي.

**حكمت بقلق:** لا احنا متفقناش إنك هتسيبني... أنت تفضل معايا لحد ما يخرجوني .... أحسن ياخدوني أنا وأبويا رهن عندهم.

**كمال يضحك قوي على كلامها:** متخافيش أنا جاي معاكي... مش هسيبك.

حكمت تشاور له إنه يوطي ويقرب منها فيبص لها قوي ويوطي وهي توطي صوتها وتكلم بوشوشة.

**حكمت:** هو ممكن تخلي حد ينادي على أبويا أحسن زمانه قلقان عليا؟

**كمال بابتسامة ويوطي صوته زيها:** حاضر بس هو أبوكي اسمه إيه؟

**حكمت بصوت واطي:** اسمه علي صالح شغال في العمليات.

**كمال بابتسامة وصوت واطي:** حاضر هبعت حد ينادي عليه بس هو أنتِ بتوطي صوتك ليه؟

**حكمت باستغراب:** مش عارفة (وتبص له قوي) طيب أنت موطي صوتك ليه؟

**كمال بابتسامة:** مش عارف (وبصوا هم الاثنين لبعض وبصوا للنيرس وموظف الاستقبال اللي بيبص لهم باستغراب وراحوا ضاحكين قوي).

**كمال يقف وهو بيضحك:** يلا خديها على الأوضة وأنا هجيب الدكتور وأجي.

وتمشي حكمت مع النيرس وهي عينيها على كمال وهو باصص عليها بابتسامة. وبعد فترة حكمت كان الدكتور كشف عليها وربط ليها رجليها وكتب ليها على مرهم وخرج وسابهم.

**كمال بابتسامة:** ألف سلامة عليكي شوفتي طلعت حاجة بسيطة إزاي؟

**حكمت بزعل أطفال:** مهي الحاجة البسيطة دي ضيعت عليا الخروجة.

**كمال:** يا ستي تتعوض معلش متزعليش.

**حكمت:** يلا الحمد لله.

**كمال يبص لها بابتسامة:** بس تعرفي أنا مبسوط قوي بالحادثة دي؟

**حكمت بضيق:** بقى مبسوط إنك خبطتني؟

**كمال بابتسامة:** بصراحة اه (ويبص لها بإعجاب) مهو لو مخبطكيش ماكنتش هشوف أجمل عيون وأحلى ابتسامة.

حكمت تبص له وتبتسم بكسوف ... وهو يبص لها قوي ويبتسم، ويتفتح الباب مرة واحدة.

**علي بخوف:** حكمت مالك يا بنتي فيكي إيه حصلك إيه؟

**حكمت:** اهدي يا بابا أنا كويسة دا جزع بسيط في رجلي.

**علي:** دول قالوا إن في عربية خبطتك.... هو فين اللي خبطك دا وأنا هخرب بيته؟

**كمال بكسوف يحرك إيده على شعره:** هو أنا اللي خبطتها يا عم علي بس والله هي اللي طلعت قدامي مرة واحدة.

علي يبص وراه ويشوف كمال.

**علي بصدمة:** دكتور كمال! معلش يا ابني أنا ماخدتش بالي منك.

**كمال بابتسامة:** ولا يهمك يا عم علي وحمد لله على سلامة الآنسة حكمت وأنا آسف جداً إني خبطتها.

**حكمت:** هو ملوش ذنب يا بابا أنا اللي طلعت قدام العربية.

**علي بلوم:** وليه كده يا بنتي؟ أنا مش قولتلك أكتر من مرة تاخدي بالك من الطريق؟

**حكمت بزعل أطفال:** والله يا بابا كان في عيال بيعاكسوني وكنت بجري منهم فطلعت قدام العربية وماخدتش بالي من الطريق.

**كمال بابتسامة:** الحمد لله جت سليمة.... والدكتور شافها وطمنا عليها هي عندها جزع بسيط ويومين بس.. وهتبقى كويسة.

**علي:** كتر خيرك يا دكتور أنا مش عارف أشكرك إزاي.

**كمال:** تشكرني على إيه يا عم علي؟ (ويبص لحكمت بإعجاب) المهم إن احنا اطمنا على الآنسة حكمت.

وهم واقفين سمعوا صوت من وراهم.

**دكتور محمود باستغراب:** كمال أنت بتعمل إيه هنا؟ (ويبص على حكمت وعلي) فيه حاجة؟

**كمال بابتسامة:** أبداً يا بابا دا أنا خبطت الآنسة بعربيتي وأنا جاي.... فجبتها عشان نطمن عليها.

**محمود بضيق:** مش تاخد بالك يا كمال وتسوق براحة؟

**علي:** حصل خير يا دكتور.. دكتور كمال كتر خيره جابها لهنا وخلي الدكتور يكشف عليها.

**محمود يبص له قوي:** مش أنت شغال هنا في المستشفى؟

**علي بابتسامة:** أيوه يا دكتور أنا علي... اللي شغال في العمليات... ودي حكمت بنتي.

**محمود:** اااه طيب ألف سلامة (ويحط إيده في جيبه ويطلع مبلغ من المال ويقرب من علي ويحطه في إيده وحكمت كانت باصة عليه وعينيها كلها اتملت حزن ودموع وبصت للأرض وكمال بص ليها وحس بزعلها).

**محمود:** خد يا علي هات لبنتك حاجة حلوة وهي مروحة.

**علي وهو بيبعد عن إيده اللي فيها الفلوس:** متشكر يا دكتور كتر خيرك..... دا احنا عايشين من خيرك.

**محمود يقرب ويحط الفلوس في إيده:** دي حاجة بسيطة عشان سلامة بنتك.

**علي بكسوف ياخد الفلوس:** متشكرين يا دكتور.

محمود يخرج من الأوضة بس يقف ويبص لكمال: أنت مش هتروح يا كمال؟

كمال كان بيبص لحكمت اللي دموعها نزلت وحس بضيق لما شاف دموعها