الحلقة الثانية

تجيب حكمت: "أنتم كان المفروض تسيبوا الملجأ من شهرين فاتوا، لكن أنا أجلتها لحد ما تخلصوا امتحانات... بس لازم النهارده نخرج".

تقول أميرة بنبرة خوف: "النهارده على طول كده؟ يعني خلاص هنمشي؟ طب استنوا علينا لحد ما نلاقي مكان تاني ونشوف هنسكن ونعيش إزاي".

تضع حكمت يدها على كتف أميرة وتطمئنها: "متقلقيش يا أميرة، أنا مش هسيبكم... أنتم هتعيشوا معايا في بيتي، أما هنعيش إزاي ف اللي ربنا هيرزقني بيه هنعيش منه، أنا عندي مرتبي على شوية فلوس محوشاهم هيساعدونا نعيش وأنتم تكملوا دراستكم".

تنظر أميرة وندى لبعضهما باستغراب، ثم يرجعان ينظران إلى حكمت.

تقول ندى: "وحضرتكِ ذنبكِ إيه يا أبله؟ إحنا مش عاوزين نسبب لكِ مشاكل مع أهلكِ، هما أكيد مش هيقبلوا بنات غريبة تعيش معاهم وكمان يتحملوا مصاريفهم".

تبتسم حكمت قائلة: "أنا عايشة مع جدتي، هي ست كبيرة وطيبة هتحبكم وتعتبركم أحفادها، وأنا قلت ليها وهي مستنياكم في البيت... أما باقي المصاريف أنا مش عايزة واحدة فيكم تتكلم في الموضوع ده تاني، أنتم بناتي ومسؤولين مني. (وتضمهم ليها بحنان) أنا جيت الملجأ هنا وأنتم صغيرين، حسيتكم بناتي اللي مخلفتهومش، وتعلقت بيكم أكتر من أي حد في الملجأ، أنتم بناتي وأنا مقدرش أبعد عنكم".

تقول أميرة بابتسامة: "حضرتكِ يا أبله أمنا وأحن حد علينا، ربنا عوضني بيكي عن حنان أهالينا اللي اتحرمنا منه".

تضمها ندى قائلة: "إحنا مش عارفين لو ربنا مبعتكيش لينا يا أبله مصيرنا هيكون إيه... أنتِ أحن من أهلي اللي معرفش هما فين".

تقول حكمت والدموع في عينيها متظاهرة بالجدية: "وبعدين معاكم بقى؟ أنتم هتخلوني أعيط ليه؟ (وتبصلهم وترسم الجدية على وشها) اتفضلوا قوموا جهزوا هدومكم وحاجاتكم على ما أروح أخلص أوراق خروجكم من هنا علشان نروح سوا على بيتكم الجديد".

ترد أميرة وندى بفرح: "حاضر يا أبله".

تخرج حكمت وتترك ندى وأميرة لتجهيز أغراضهما. وبعد مرور ساعة، خرجتا برفقتها من باب الدار، واستقللن سيارة أجرة أوصلتهن إلى منزل قديم يقع في حارة شعبية، وصعدن مع حكمت إلى شقتها في الطابق الثالث.

تفتح حكمت الباب قائلة: "تعالوا يا بنات ادخلوا. (وتقفل الباب وتنادي) يا تيتا.. يا تيتا، إحنا جينا".

تخرج سيدة مسنة من المطبخ، يفيض وجهها طيبة وحنانًا، وتنظر إلى الفتاتين بنظرات متفحصة. وقفت ندى وأميرة في وجل وخوف، بينما بدت حكمت مبتسمة.

تقول الجدة فاطمة بابتسامة: "أنتم هتفضلوا واقفين كده؟ تعالي يا بت أنتِ وهي بوسوا إيد جدتكم وعرفوني بنفسكم".

تقترب أميرة وندى بخجل، فتبتسم الجدة لهما.

تقبل أميرة يد الجدة قائلة: "أنا أميرة".

ترد فاطمة مبتسمة: "أنتِ اللي عاوزه تدخلي طب وتبقي دكتورة؟"

تجيب أميرة بابتسامة: "أيوه أنا يا تيتا".

تضع فاطمة يدها على وجه أميرة بحنان: "ربنا يكرمكِ يا حبيبتي وتحققي اللي نفسكِ فيه".

ثم تلتفت نحو ندى الواقفة بخجل شديد، مطأطئة رأسها، وتشد في طرحتها وتشد في رقبة التيشيرت اللي لابساه. وحكمت بصت لها بحزن وضمتها لحضنها بحنان. ندى اتفاجئت بس حست بالأمان في حضنها وعينيها اتملت دموع.

تقول فاطمة بابتسامة: "وأنتِ أكيد ندى... نورتي بيتكِ يا حبيبتي".

ترفع ندى يد الجدة لتقبلها قائلة: "منور بحضرتكِ يا تيتا".

تقترب حكمت وتضع يديها على كتفي الفتاتين: "يلا يا بنات ادخلوا الأوضة اللي هناك دي، حطوا حاجتكم وغيروا هدومكم وتعالوا علشان نجهز الغدا سوا".

ترد الفتاتان بابتسامة: "حاضر يا أبله".

دخلت الفتاتان غرفتهما، بينما ظلت حكمت وفاطمة تنظران إليهما.

تقول فاطمة بحزن: "شكلهم طيبين أوي وغالبة. (وتبص لحكمت بحنان) ربنا يجعله في ميزان حسناتكِ يا حكمت ويجازيكي كل خير عن طيبة قلبكِ".

تقترب حكمت منها وتقبل رأسها: "مفيش أطيب من قلبكِ أنتِ يا بطوط".

تبتسم فاطمة وتلمس وجهها: "يلا يا حبيبتي ادخلي أنتِ كمان غيري هدومكِ وتعالي ساعديني".

ترد حكمت بابتسامة: "حاضر يا أحلى تيتا".

دخلت فاطمة المطبخ، بينما توجهت حكمت إلى غرفتها. وفي أثناء وقوف فاطمة في المطبخ، سمعت صوت الجيران من الشباك وهما بيتكلموا على السلم.

تقول أم فاروق: "هما مين البنات اللي كانوا مع حكمت وطلعوا معاها دول؟"

تجيب أم نبيل: "سألتها وهي طالعة، قالت بنات جايباهم من الملجأ معاها".

تتساءل أم سامية مستنكرة: "ملجأ؟ ودول جايباهم معاهم هنا ليه؟ وإيه الشنط اللي كانوا ماسكينها في إيديهم؟ (وتخبط على صدرها) يا لهوي! المصيبة لتكون جايباهم يعيشوا معاها هنا وسطينا".

تقول أم فاروق بغضب: "يعيشوا وسطينا؟ ده أنا أفضحههم بقى! جايبة بنات حرام يعيشوا وسط بناتنا وعيالنا؟"

تضيف أم نبيل: "آه يا أختي، جايباهم يعيشوا معاها وداخلة بيهم ولا هاممها حد، بس والله ما أنا ساكتة، هي حصلت تجيب عيال الشوارع يسكنوا وسطينا؟"

تعقب أم سامية: "ده لا يمكن يحصل أبدًا، معلم صابر ييجي يشوفلي حل، بنات لا نعرف قرعة أهاليهم منين يعيشوا وسطينا؟ وإحنا ناقصين بلاوي!"

وهما واقفين بيتكلموا دخل الشيخ صالح البيت وكان طالع لشقته.

قالت أم فاروق: "أهو الشيخ صالح جه وهو ما يرضوش الحال المايل، وما يرضاش بالغلط، إحنا نقوله وهو يتصرف معاهم".

يسأل الشيخ صالح باستغراب: "خير إن شاء الله، في إيه يا أم فاروق؟"

تقول أم سامية: "يرضيك يا شيخ صالح اللي بتعمله حكمت؟"

يستفسر الشيخ صالح: "خير، مالها الأستاذة حكمت عملت إيه؟"

تجيب أم نبيل: "جايبة معاها بنتين من الملجأ ال إيه علشان يعيشوا معاها هي والست فاطمة، وطلعت بيهم على شقتها! بقى يرضيك يا شيخنا تدخل بيتها بنات منعرفش هما ولاد حلال ولا جم من حرام، ولا نعرف أصل أهالهم منين يسكنوا معانا وسط بناتنا؟"

ينظر الشيخ صالح إلى الأرض بضيق قائلاً: "استغفر الله العظيم. (ويرفع رأسه ويبص لهم بغضب) اتقوا الله، حرام عليكم! هتقابلوا ربنا إزاي وأنتم بتتكلموا في حق اليتيم؟ ده الرسول صلى الله عليه وسلم قال: (إن اليتيم إذا بكى اهتز لبكائه عرش الرحمن، فيقول الله تعالى لملائكته: يا ملائكتي! من ذا الذي أبكى هذا اليتيم الذي غيبت أباه في التراب، فتقول الملائكة: ربنا أنت أعلم. فيقول الله تعالى لملائكته: يا ملائكتي اشهدوا أن من أسكته وأرضاه أنا أرضيه يوم القيامة)".

تقول أم نبيل بضيق: "الرسول كان يقصد اللي أهاليهم ماتوا، لكن دول أهاليهم رموهم واتربوا في الملجأ".

يرد الشيخ صالح: "وأنتم عرفتم منين إن أهاليهم رموهم؟ تعرفوا إيه عنهم علشان تظلموهم وتتكلموا في حقهم؟ مش يمكن أهاليهم ماتوا وملهمش حد؟ ويمكن تايهين من أهاليهم ومعرفوش يوصلوا ليهم؟ وحتى لو أهاليهم غلطوا في حقهم وسابوهم... هما ذنبهم إيه؟ (ويبص لهم أوي بضيق) وبعدين مين اللي قال إن اليتيم هو اللي أهله ماتوا بس؟ اليتيم هو اللي اتحرم من العطف والحب والحنان وهو طفل قبل ما يبلغ... اتقوا الله وبطلوا تتكلموا بالباطل عنهم وتظلموهم... سيبوهم يعيشوا وسطينا يمكن ربنا يكرمكم ويوسع رزقكم عشانهم، اتعلموا من الأستاذة حكمت وعطفها عليهم، عاملوهم بالحسنة، العطف على اليتيم علاج لقسوة القلوب... (ويبص لهم أوي) ربنا يسامحكم ويسامحنا ويجعل وجودهم وسطينا شفيع لينا ويجعلنا جيران الرسول في الجنة".

ومشى وسابهم واقفين يبصوا لبعض بكسوف.

فاطمة كانت واقفة بتسمع... أول ما سمعت الشيخ صالح اتنهدت وابتسمت... وبتلف لقت حكمت واقفة وعينيها كلها دموع.

تقول حكمت بحزن: "الناس مش هتتغير يا تيتا، هايفضلوا يبصوا لغيرهم على إنهم أقل منهم. ذنبهم إيه البنات؟ كانوا هيحسوا بإيه لو واقفين هنا وسمعوا كلامهم؟"

ترد فاطمة بابتسامة حانية: "لو فضلنا نبص ونسمع للناس مش هنعرف نعيش يا بنتي... لازم تعلميهم ميهتموش لكلام الناس، علميهم ميخافوش ولا يتكسفوا من ظروفهم... وطول ما هما بيتقوا ربنا مبيخافوش غير من اللي خلقهم... خليهم يثقوا في نفسهم ويتعلموا يتفوقوا يبقوا أحسن من أي حد... بكره لما يكبروا وينجحوا الناس هتجري وراهم ومش هيفتكروا مين هما وفين أهاليهم... من النهارده البنات دول مسؤوليتنا، البنات دول بقوا إخواتكِ الصغيرين وأحفادي".

تضحك حكمت قائلة: "إخواتي إيه بس يا تيته؟ ده أنا لو اتجوزت كنت خلفت قدهم، دول بناتي".

ترد فاطمة بتريقة: "ليه؟ كنتي هتتجوزي وأنتِ في اللفة يا أختي؟ (وتبص لها بضيق) بطلي تكبري نفسكِ أنتِ لسه صغيرة في عز شبابكِ... ويلا روحي شوفي البنات وبطلي رغي وهاتيهم علشان نحط الأكل أنا خلصت خلاص".

تقترب حكمت منها وتقبلها: "تسلم إيدكِ يا ست الكل، أروح أجيب البنات ونيجي نحضر السفرة".

تخرج حكمت وتتوجه إلى الغرفة التي فيها الفتاتان، تطرق الباب وتدخل فتجدهما جالستين على السرير بمجرد رؤيتها.

تسأل حكمت بابتسامة: "إيه يا بنات قاعدين كده ليه؟"

تقول أميرة بخجل: "ما إحنا مش عارفين نعمل إيه".

ترد حكمت مبتسمة: "تخرجوا تعملوا أي حاجة، شغلوا التلفزيون، ادخلوا المطبخ، اعملوا أي حاجة، ده بيتكم دلوقتي تتحركوا فيه براحتكم".

تقول ندى باستحياء: "مش عاوزين نضايقكم يا أبله".

تقترب منها حكمت بزعل: "إيه الكلام ده يا ندى؟ إحنا اتفقنا إن من النهارده البيت ده بيتكم وأنا أمكم".

تظهر فاطمة عند باب الغرفة قائلة: "قلت أختهم الكبيرة! يلا يا بت أنتِ وهي بلاش دلع وتعالوا خرجوا الأكل".

تضحك الفتاتان وحكمت، ويخرجن لمساعدة فاطمة في إعداد المائدة، وجلس الجميع حول طاولة صغيرة يتناولون الغداء.

وفي أثناء تناول الطعام، تنظر فاطمة إلى ندى باستغراب قائلة: "الطرحة وبلوزة برقبة كده؟ ده الجو حر قوي يا حبيبتي، فكي عن نفسكِ وخليكي براحتكِ مفيش معانا رجالة في البيت".

تتوقف ندى عن الأكل وتغرورق عيناها بالدموع، وتنظر إلى أميرة وحكمت بخوف.