الحلقة السادس

فضلت باصة للتليفون لحد ما سكت بس بعد شوية رجع يرن تاني.

حكمت: ألو.

كمال بابتسامة: حكمت.

حكمت: أيوة.

كمال: ازيك؟

حكمت باستغراب: الحمد لله، هو أنت جبت الرقم منين؟

كمال بضحك: أنتِ ناسية إني أنا اللي اشتريت الموبايل وركبت فيه الخط وسجلت رقمك عندي ورقمي عندك؟

حكمت: ليه؟

كمال باستغراب: ليه إيه؟

حكمت: ليه اشتريت الموبايل.. وليه سجلت الرقم... وليه عملت كل اللي عملته معايا النهارده.... وليه بتكلمني دلوقتي؟

كمال بضحك: إيه ماسورة "ليه" اللي اتفتحت دي؟ (ويسكت ويتنهد) بصراحة يا حكمت مش عارف... لما كنا في المستشفى ولقيتك هتمشي مع عم علي.... وحسيت إني مش هشوفك تاني ولا هكلمك خوفت... وضقت فقلت لازم أوصلكم... وطول الطريق بفكر إزاي أكلمك تاني وأشوفك... بعد ما تروحوا بيتكم.... فشوفت معرض الموبايل وجتلي الفكرة.... لقيت إن دي الطريقة الوحيدة... اللي هعرف أكلمك بيها (ويسكت شوية )... حكمت هو أنتِ زعلتي؟ أنتِ ليه مش بتردي؟

حكمت بدموع مكتومة: أنا عاوزه أشوفك بكره.

كمال باستغراب: بكره! بس أنتِ لسه تعبانة.. والمفروض متتحركيش.

حكمت: أنا كويسة، هستناك بكره الساعة 3 على البحر في ميامي.

كمال: طيب ما أعدي آخدك عشان متتعبيش.

حكمت: لا أنا هاجي لوحدي... مع السلامة.

كمال بخوف: حاضر يا حكمت مع السلامة.

وتاني يوم في الميعاد حكمت راحت مع إن رجلها بتوجعها بس استحملت الألم.... وأول ما وصلت للمكان لقيت كمال واقف مستنيها أول ما شافها .... قلبه دق قوي وابتسم وفضل عينه عليها لحد ما وصلت لعنده.

كمال بابتسامة: ازيك يا حكمت، رجلك عاملة إيه دلوقتي؟

حكمت بكسوف وضيق: الحمد لله (ونزلت عينها للأرض بتداري دموعها وراحت فاتحة شنطتها وطلعت منها علبة الموبايل) اتفضل.

كمال بصلها باستغراب: إيه دا؟

حكمت: الموبايل اللي أنت جبته امبارح.

كمال بضيق: ليه يا حكمت؟... لو زعلتي عشان اتصلت بيكي فأنا آسف... أنا بس كنت عاوز أسمع صوتك.

حكمت بدموع: مش عشان كده بس (حكمت بصت ليه وعيونها كلها دموع) علشان أنت مش ملزوم تدفع العوض عن الخبطة اللي خبطتها ليا.... لأن أنا اللي كنت غلطانة مش أنت (وبصت للأرض وابتسمت بحزن) غير إن والدك دافع تعويض وأدى لأبويا فلوس واحنا في المستشفى.

كمال بحزن: أنتِ ليه حسبتيها كده؟.... أنا مجبتهوش ليكي تعويض أنا جايبه هدية.

حكمت تبص له: أنت متعرفنيش علشان تجيبلي هدايا غالية كده.... وحتى لو تعرفني أنا مش هقدر أقبلها.... لأني مش هقدر أهديك هدايا زيها.

كمال: بس أنا يا حكمت مش عاوز هدايا... أنا عاوز...

حكمت تبص له: عاوز إيه؟

كمال يسكت شوية ويبص لها: أنا مش عارف أنتِ هتصدقيني ولا لا... أنا كل اللي كنت عاوزه إني أطمن عليكي، أسمع صوتك... أكلمك... حكمت أنا الشوية اللي اتكلمتي معايا فيهم واحنا في العربية... والساعة اللي قعدتها معاكم في بيتك... كانوا أجمل وقت بقضيه في حياتي من وقت طويل قوي.... حكمت أنا هقولك اللي حاسه، أنا معجب بيكي وصدقيني أنا مش عاوز غير إني أشوفك وأكلمك وأطمن عليكي... اديني فرصة يا حكمت.

حكمت بدموع: ماينفعش .... أنا وأنت مفيش أي فرصة ممكن تجمعنا.

كمال بحزن: ليه؟ أنا والله ما بتسلى ولا بضحك عليكي أنا فعلاً معجب بيكي... ومش عاوز أقول حبيتك علشان متقوليش بضحك عليكي.

حكمت بدموع: بتحبني!.... يا دكتور كمال أنا فين وأنت فين؟ أنت الدكتور كمال ابن الدكتور محمود صادق صاحب مستشفى صادق الاستثماري.... وأنا حكمت.... حكمت بنت علي الممرض اللي بيشتغل في المستشفى اللي أبوك صاحبها.... علي اللي لما أبوك عرف إنك خبطت بنته طلع من جيبه شوية فلوس وأداهم له (وتبص له بدموع) احنا مفيش أي حاجة تنفع تربطنا ببعض... لا إعجاب.. ولا أي حاجة... احنا الاثنين دنيتنا مختلفة... وبعيدة عن بعض.

كمال بحزن: أنا مايهمنيش كل اللي بتقوليه دا يا حكمت، مايهمنيش أنتِ بنت مين وأنا ابن مين... مايهمنيش إني غني... لأن الفلوس مش مهمة في حياتي... أنا بشتغل وبصرف من مرتبي.... أنا اللي يهمني إنك أنتِ البنت اللي قلبي حبها.

حكمت: لو أنت مايهمكش.... أهلك يهمهم ومش هيقبلوا دا.

كمال: وأنتِ مين قالك إنه مش هيقبلوا؟ أنا أبويا مابيفكرش كده... مش علشان اتصرف بالطريقة دي في المستشفى يبقى بيفكر كده... اعتبريه سوء تصرف غير مقصود... أبويا طول عمره عايش بره وحياته كلها شغل ... مبيعرفش يتعامل مع الناس...

حكمت: أنا مش هقدر أعيش على أمل إن أهلك مختلفين وهيوافقوا إن بنت الممرض تبقى عروسة لابنهم، مش هقدر أعيش في حلم ممكن يقلب كابوس.

كمال بضيق: قولي إنك مش متقبلاني ولا معجبة بيا، بلاش تقولي حجج فيا وفي أهلي... حكمت أنتِ ليه عاوزه تجرحيني؟

حكمت بدموع: ربنا وحده اللي عارف إحساسي إيه... وعارف أنا زي ما كلامي بيجرحك فهو قبل ما يجرحك بيدبحني... أنا عمري ما قللت من نفسي قدام أي حد... طول عمري فخورة بأبويا وشغله وبحياتي وظروفي.... (وتتنهد بحزن ودموع وتقرب منه وتحط التليفون جنبه) صدقني كده أحسن لينا احنا الاثنين... (وترجع خطوتين وتبص له) أنا متشكرة على كل حاجة عملتوها علشاني امبارح يا دكتور كمال، عن إذنك.

وأدته ظهرها وهتمشي.

**كمال بحزن:** حكمت ماتمشيش... (تقف حكمت دقيقة من غير ما تبص له وتكمل مشي) طب خليني أوصلك...

**حكمت بابتسامة وسط دموعها:** طريقنا مختلف يا دكتور.

ومشيت حكمت وهي عمالة تعيط وكمال باصص عليها بحزن وحاسس إن قلبه بيوجعه.... ورجعت حكمت البيت ودخلت أوضة مامتها اللي نايمة على السرير مبتتحركش، وراحت طالعة جنبها على السرير وحطت رأسها على صدرها ودموعها نازلة على خدها.

**حكمت بدموع:** أنا تعبانة يا ماما.... حاسة إني مجروحة.... بس اللي تعبني إني أنا اللي جرحته وجرحت نفسي.... أنا شفت الصدق في عينه وهو بيتكلم.... بس خوفت يا ماما وجرحته وهربت.... فكرت إني لما أبعد دلوقتي قبل ما أتعلق بيه أكتر قلبي مش هيوجعني.... بس ماكنتش أعرف إني اتعلقت بيه وحبيته وأن قلبي هيوجعني قوي كده (وتضم نفسها لحضن أمها بحزن) أنا محتاجاكي قوي يا ماما.... ياريتك تقدري ترفعي إيدك وتضميني، محتاجة لحضنك قوي.

حكمت فضلت تتكلم وهي عمالة تعيط. كمال كانت حالته زيها... فضل واقف على البحر مكان ما كانوا واقفين... مروحش علشان عارف إنه مش هيلقى حد في بيته يرمي نفسه في حضنه.... فضل باصص للبحر بحزن وتعب.

مر شهر على آخر مقابلة بينهم... حكمت كانت متغيرة ودايماً حزينة.... وفاطمة ملاحظة دا وشايفاها مكسورة... حاولت تخفف عنها... وكمال كان كل يوم يروح العمليات عشان يقابل علي... ويحاول يعرف منه أخبار حكمت.... وعلي كان حاسس بمشاعره لحكمت.... بس كان عارف إن ماينفعش حاجة تربط بين بنته وبين كمال... فكان بيهرب من مقابلته أو من الإجابة عن أسئلته.

بس كمال كان هيتجنن وعاوز يشوف حكمت.... كان بيرود يقف بعربيته قدام شارعهم... وبيتمنى يشوفها. فضل شهور الإجازة بيروح يقف بالساعات على أمل يلمحها.

وبدأت الدراسة