البارت السابع

... كمال كان عرف إن حكمت دخلت كلية تربية زي ما كانت بتتمنى.... فراح الكلية وفضل يدور عليها بين الطالبات... لحد لما شافها واقفة بتحاول تنقل الجدول وعمالة تشب عشان تشوف... فرح وقلبه دق وراح وقف وراها.

**كمال بابتسامة ويقرب ويتكلم بصوت واطي:** مش هتعرفي تنقليه .... عاوز حد طويل يا قصيرة.

**حكمت بصت وراها بصدمة:** كمال!!!

**كمال يبص لعيونها وملامحها بشوق:** الله هو أنا اسمي حلو قوي كده؟ (فضلوا واقفين وبيبصوا لبعض، قلوبهم وعينيهم هم اللي بيتكلموا... بس لاحظ نظرات اللي حواليهم).

**كمال بتنهيدة حب:** هاتي أنقلك الجدول.

وأخد الكشكول والقلم منها ووقف ينقل الجدول وهي باصة ليه وجواها فرحة كبيرة إنه واقف قدامها، وبعد ما نقل الجدول خرجوا يمشوا جوه الجامعة.

**كمال بابتسامة:** عاملة إيه؟

**حكمت بكسوف:** الحمد لله (وتبص له) أنت بتعمل إيه هنا؟

**كمال بارتباك:** عندي محاضرات.

**حكمت بابتسامة:** محاضرات في كلية تربية؟

**كمال بضحك:** مركزة قوي أنتِ... ما تمشيها محاضرات.

**حكمت بضحك:** تؤ ماينفعش... هاااا بتعمل إيه في كلية تربية؟

**كمال يتنهد ويبص لها:** كان في ناس غاليين عليا عرفت إنهم دخلوا كلية تربية فجيت أشوفهم (ويبص لها بحب) أصلهم كانوا وحشوني قوي.

حكمت اتكسفت وابتسمت وحطت وشها في الأرض... ومشيت وهو مشي جنبها.... وفضلوا يتكلموا ويضحكوا... كلام كله عادي بس كانوا مبسوطين ومش عاوزين اليوم يخلص... بس كمال فضل يروح لحكمت كل يوم الكلية... وهي كانت بتستناه.... ورجعت تاني ضحكتها وفاطمة حست بسعادتها.. وكمال كمان السعادة رجعت لحياته... كان بيخلص محاضراته ويجري على كليتها.... كان بيتجنن لو عدى يوم من غير ما يشوفها.... بس محدش فيهم اعترف بمشاعره... مكنوش محتاجين يقولوا الكلمة... كل واحد فيهم كان حاسس بمشاعر التاني... وفضلوا طول السنة الدراسية وهم بيتقابلوا كل يوم.

بس في يوم كان الامتحانات ابتدأت وحكمت وكمال عندهم امتحان في نفس اليوم والوقت، فكمال قالها إنه مش هيعرف يروح ليها ... بس حكمت كان امتحانها سهل فخلصت بدري وخرجت... ومقدرتش تروح البيت من غير ما تشوف كمال فقررت تروح ليه هي الكلية وتفاجئه... وفضلت تدور عليه لحد ما لقيته واقف مع مجموعة من الولاد والبنات بيتكلموا ويضحكوا... فبتقرب منهم بس لقيت بنت من اللي واقفين مسكت في إيده وبتقرب منه تكلمه في ودانه وبتدلع عليه... فوقفت مكانها وعينها بقيت كلها دموع .. وكمال بيص جنبه فشافها... وهي أول لما لقيته شافها راحت لافة وماشية بسرعة بس كمال شد إيده من البنت وجري وراء حكمت.

**كمال بيجري وراها:** حكمت حكمت استني أنتِ رايحة فين؟

**حكمت بضيق:** همشي.

**كمال يقف قدامها:** هتمشي ليه؟ أنتِ مش جاية عشان تشوفيني؟

**حكمت بضيق وعصبية:** لقيتك مشغول وواقف مع البنات تضحك وتهزر وسايبهم يدلعوا عليك وتتعلق في كتفك.. قلت معطلكش.

**كمال بص لها قوي وابتسم بخبث:** طيب وإيه المشكلة؟ دول أصحابي.... وواخدين على بعض يعني عادي إنها تقرب مني وتمسك إيدي وممكن تبوسني كمان... وبعدين أنتِ مسألتيش هي مين... مش ممكن تكون حبيبتي؟

حكمت بصت له بغضب شديد بس ماقدرتش تتكلم ولسه هتمشي من قدامه وهي متعصبة.

**كمال يقف قدامها وهو بيضحك:** استني بس متتعصبيش كده أنا بهزر معاكي والله (حكمت تقف وتربع إيدها وتودي وشها الناحية التانية... بتداري دموعها... فكمال قرب منها بحب وطلع منديل أداهولها) أنا آسف والله ... متزعليش هم بالنسبة ليا مش أكتر من زمايل... لما لقينا أنا وأصحابي الشباب واقفين جم وقفوا معانا... وأنا ماعرفتش أكسفهم علشان اللي مسكت إيدي دي تبقى بنت عمتي وزي أختي بالظبط مش أكتر من كده والله (ويبص لها قوي ويبتسم) وأنا ليا حبيبة واحدة بس خطفت قلبي من أول مرة شوفتها فيها لما خبطتها بعربيتي... بس هي قاسية بعدت عني وجننتني شهرين... كنت بلف فيهم حوالين نفسي علشان نفسي أشوفها أو أكلمها.... لحد ما بدأت الدراسة... وبقيت أخلص محاضراتي وأخرج أجري أروح كليتها.... علشان أشوفها وأكلمها... والنهارده اكتشفت إنها بتغير عليا يعني تبقى بتحبني زي ما أنا بحبها وبموت فيها (ويبص لها بحب وهي مكسوفة) هاااا عرفتي مين هي حبيبتي؟

**حكمت بكسوف:** تؤؤؤ.

**كمال بابتسامة:** تؤؤؤ؟ (فيبتسم ويوطي صوته) طب لو قلتلك أول حرف من اسمها تعرفي؟

**حكمت بابتسامة:** ممكن.

**كمال بابتسامة بصوت واطي:** بس اوعي تروحي تقوليلها.... أول حرف من اسمها.... حكمت علي صالح.

حكمت تضحك قوي بكسوف وهو يضحك على ضحكها وبعدين يبص لعينها بكل حب: أنا بحبك اوووي يا حكمت.

حكمت وشها يحمر وتبتسم... وهم واقفين تقرب منهم بنت وتقف جنب كمال وهي عينيها على حكمت وبتبص لها باستغراب وضيق.

**ماهي:** كمال أنت رحت فين... الشباب بيسألوا عليك.

**كمال يبص لها ويبعد عنها ويقرب يقف جنب حكمت:** معلش يا ماهي اعتذري لهم لأني همشي.

**ماهي تبص لحكمت بضيق وغيرة:** طيب مش تعرفني بالآنسة؟

**كمال بابتسامة يبص لحكمت:** دي ماهي بنت عمي وزي أختي... (ويبص لماهي) ودي حكمت (ويرجع يبص لحكمت بحب) مراتي.

حكمت وماهي برّقوا عينيهم بصدمة.

**ماهي بصوت عالي وصدمة:** مراتك!

**كمال:** يخرب بيت صوتك... مراتي باعتبار ما سيكون يعني هي حبيبتي... والبنت اللي هكمل حياتي معاها.

**ماهي تبص لها بغيظ بتحاول تداريه:** اااه أهلاً.. إيه المفاجأة دي؟ (وتبص لكمال بضيق وغيرة) ماكنتش أعرف إنك بتحب.

كمال يقرب من حكمت اللي واقفة مكسوفة ويمسك إيدها لأول مرة وهي تتصدم وتبص على كف إيدها اللي حضن كف إيده بتملك ويبص لها بحب.

**كمال:** قريب الدنيا كلها هتعرف إنها مراتي وحبيبتي (ويبص لماهي.. ويشد حكمت ويمشي) عن إذنك يا ماهي واعتذري للشباب.

ياخد حكمت ويمشي بسرعة وفرحة، وماهي تفضل واقفة تبص عليهم بغضب وضيق شديد.

**ماهي بغضب:** بقى بتحب يا سي كمال وبتعرفني بيها بكل بجاحة... وبتقولي مراتك... بس أنا هعرف إزاي أبعدك عن الجربوعة دي.... أنت بتاعي ملكي... ليا أنا وبس.

حكمت ماشية معاه فرحانة: أنت بتجري ليه كده... احنا رايحين فين؟

**كمال بفرحة:** رايح بيتكم.... عند عم علي.

**حكمت بصدمة واستغراب تقف:** رايح لبابا ليه؟

**كمال يقف قدامها ويبتسم بحب:** هقوله احجز لي بنتك يا عم علي عشان بحبها وهتجوزها أول ما أخلص امتحانات، أصل أنا مقدرش أعيش من غيرها.

**حكمت تتكسف قوي وتبص للأرض:** كمال بلاش تقول الكلام دا بتكسف ومبعرفش أتكلم.

**كمال يبص لها بحب:** كده يبقى مش هتتكلمي خالص يا حياتي لأني مش هبطل أقولك على مشاعري وإحساسي بيكي... ويلا بقى علشان نلحق عم علي.

**حكمت:** استني بس يا كمال... ماينفعش تروح تقول لبابا قبل ما تقول لأهلك وتعرف رأيهم إيه.

**كمال يقف قدامها بابتسامة:** نفسي تغيري الفكرة اللي في رأسك عن أهلي دي... أبويا راجل متفتح مش معقد ومبيدخلش في قراراتي وعمره ما هيعترض على جوازي من البنت اللي اخترتها.

**حكمت بابتسامة:** مادام مطمن كده يبقى تكلّمه الأول... وبعدها تكلّم أبويا.

**كمال يتنهد:** حاضر يا حكمت... تعالي نروح نقوله دلوقتي (ويشد إيدها تاني).

**حكمت بضحك:** يالهوي نروح فين... يا كمال أعقل الأمور مش تتاخد كده.

**كمال يتنهد:** يالهووووي أنا... يا بنتي رايحين وامشي معايا..

**حكمت:** ماينفعش أولاً احنا في فترة امتحانات... نصبر على الأقل لما نخلص... ساعتها أنت هتكون خلصت الكلية وفاضل الامتياز... وتكلم أبوك ساعتها بقلب جامد.

**كمال بابتسامة:** هو أنتِ يا حبيبتي على طول بتحسبيها صح كده؟... فعلاً عندك حق الأفضل نستني لما أسبوعين الامتحانات يخلصوا وتكون كمان نادية أختي رجعت من السفر.

**حكمت:** هي أختك مسافرة فين؟ تعرف أنا معرفش حاجة عن حياتك.

**كمال يمسك إيدها:** تعالي نقعد في مكان وأحكيلك كل حاجة.

**حكمت بابتسامة تبص لإيدهم:** طب سيب إيدي يا دكتور.. أنت استحليتها ولا إيه؟ كل شوية تمسكها .... (وتسحب إيدها وتقف قدامه بابتسامة) ممنوع اللمس أو الاقتراب إلا بعد إغلاق المأذون الدفتر اللي هيكتب فيه أسامينا.

**كمال يتنهد بحب ويبتسم:** برضه عندك حق... بس أعمل إيه قلبي اللي بيحرّكني... بس هانت يا حبيبتي كلها أسبوعين وأخلص امتحان.. وآجي أخطبك... لااااا أخطبك إيه أنا مش هخطبك... أنا هجوز على طول، مينفعش أضيع لحظة وأنتِ مش جنبي وفي حضني.

**حكمت بكسوف وتغطي وشها بإيدها:** يوووه يا كمال.. بجد مش تقول كده تاني.

**كمال بضحك:** في دي بقى مقدرش أوعدك... أصلك حلوة قوي وأنتِ مكسوفة كده.

**حكمت بابتسامة:** طب يلا يا دكتور قدامك ساعة واحدة ولازم أروح.

**كمال:** يلا يا قلب الدكتور.

حكمت تضحك بكسوف وتمشي وهو يمشي جنبها.

وفي الفيلا... دخلت ماهي وهي متعصبة.. وراحت قعدت بغضب جنب مامتها (سلوى سيدة مغرورة... عايشة في زمان جدها الباشا.. وأن المجتمع فيه أسياد وفيه عبيد).

**سلوى:** مالك يا ماهي.. راجعة بدري ليه؟ مش قولتي هتتغدي مع أصحابك؟

**ماهي بغضب:** سي كمال ابن أخوكي سد نفسي.

**سلوى وهي بتقلب في مجلة:** ليه عمل إيه؟ اعترض على لبسك برضه؟

**ماهي بغضب:** لا.... البيه مبقاش شايفني أصلاً... وطلع اللي شاغله الفترة اللي فاتت.. حتة بت جربوعة مشغلهاش خدمة عندي... لا وإيه؟ الأستاذ بيقدمها ليا وبيقولي مراتي!

**سلوى تبص لها بصدمة:** مراته!

**ماهي بتريقة:** اه بيقولي باعتبار ما سيكون...(وتكمل بغضب) لا وإيه بيقدمني ليها ويقولها زي أختي.

**سلوى تضحك قوي:** ودا اللي مزعلك؟... دا بيشتغلك عاوزك تغيري.. عشان تسمعي كلامه ويتحكم فيكي... سيبك منه هيتسلى يومين ويرجعلك.

**ماهي بنرفزة:** لا يا ماما كمال ماكنش بيقول كده عشان أغير... هو أصلاً مبيفكرش كدة، كمال بيحب البت دي فعلاً... أنتِ ماشوفتيش كان بيبص ليها إزاي؟ ولا إيده وهو ماسك إيدها... تحسي إنه ملك الدنيا في إيده...

**سلوى باهتمام:** يعني إيه شايفك أخته؟ هو ما بيحبكيش؟

**ماهي:** حب إيه يا ماما؟ أنا وكمال ما فيش بيننا أي feeling، علاقتي بكمال إنه هو دا اللي ينفع أتجوزه لأن ما فيش قدامي أحسن منه.. وكمان المستشفى لازم تكون كلها في إيدي وبتاعتي مش كام سهم.

**سلوى بابتسامة:** صح برافو عليكي طالعة ليا.

**ماهي بضيق:** بس دا كله بيبوظ دلوقتي بوجود الجربوعة اللي معاه... كمال مش بيفكر زينا... المشاعر مهمة عنده... قبل كده كنت مطمنة أن ما فيش حد في حياته وهيتجوزني لما أنكل محمود يقوله... لكن دلوقتي لا، كمال بيحب.

**سلوى:** متقلقيش كده كمال مش هيقدر يعصي محمود أخويا... ومادام البت جربوعة زي ما بتقولي محمود مش هيوافق...

**ماهي:** وافرضي بقى كمال صمم يتجوزها؟

**سلوى بشر:** ساعتها بقى الموت هيكون أقرب ليها من كمال... (وتبص لماهي) أنتِ متعرفيش مين البت دي؟

**ماهي بغضب:** وأنا هعرف الأشكال دي منين؟... تلقيه عرفها من المستشفيات الحكومية اللي متطوع فيها...

**سلوى:** مش مهم أنا لو لقيت إن الكلام اللي قولتيه دا بجد هعرف أبعدها عنه...(وتبص لماهي وتبتسم) متزعليش نفسك أنتِ يا قطة وقومي غيري هدومك وروحي اسهري وفرفشي.

**ماهي بابتسامة:** اوكي.

تطلع ماهي وسلوى ترفع سماعة التليفون.

**سلوى:** ألووووو... أنا هستناك في الفيلا تعال علشان عاوزاك ضروري (وقلفت التليفون) شكلك طالع لأمك يا كمال... غبي... بس أنا مش هسمح إنك تتجوز غير بنتي... وهعرف إزاي أبعدك عن البت دي.