الحلقة الخامسة

كمال يبص لمحمود:** لا يا بابا... هروح.

محمود يهز رأسه ويمشي... فكمال رجع يبص لحكمت لقاها بتحاول تقوم من على السرير.

**كمال بخوف:** أنتِ رايحة فين؟... ارتاحي شوية.

**حكمت بضيق:** متشكرة أنا عاوزه أروح بيتنا (وتبص لعلي بحزن) أنا عاوزه أمشي يا بابا.

**علي يقرب منها ويساعدها تقوم:** تعالي يا بنتي... ولا استني خليكي قاعدة... لما أروح أوقف تاكسي... أنتِ مش هتقدري تقفي على رجلك.

**كمال بسرعة:** مفيش داعي لتاكسي يا عم علي أنا هوصلكم.

**علي:** كتر خيرك يا دكتور... أنت عملت اللي عليك وزيادة احنا هناخد تاكسي ونروح.

**كمال وهو عينه على حكمت اللي باصة للأرض بحزن:** اسمح لي أوصلك يا عم علي... ولا أنت مش عاوز تعزمني أشرب شاي عندكم؟

**علي بابتسامة:** يا خبر دا أنت تنورنا يا دكتور كمال.

**كمال بابتسامة:** دا نورك يا راجل يا طيب... اتفضلوا العربية واقفة قدام المستشفى.

ومشيت حكمت مع أبوها وراحوا ركبوا عربية كمال، حكمت طول الطريق باصة من الشباك ودموعها نازلة... وعلي عمال يتكلم مع كمال..... وكمال بيرد عليه.... بس كل عينه في المرايا بيبص على حكمت اللي دموعها نازلة .... ومرة واحدة كمال وقف العربية.

**كمال:** معلش يا عم علي هعطلكم شوية بس هنزل أشتري حاجة من هنا وهاجي بسرعة.

**علي بابتسامة:** اتفضل يا دكتور.

وينزل كمال من العربية ويغيب ربع ساعة ويجي يحط حاجة في شنطة عربيته ويركب ويمشوا لبيت علي.... علي بيفتح باب الشقة: ادخلي... براحة يا بنتي (ويبص على كمال) اتفضل يا دكتور كمال أهلاً وسهلاً.

**كمال بابتسامة:** أهلاً بيك يا عم علي (ويقف مرة واحدة) معلش أنا نسيت حاجة في العربية هنزل أجيبها وأجي.

وينزل كمال بسرعة... وعلي يقف مستغرب ويبص لحكمت.

**علي:** الله هو رايح فين؟

**حكمت تدخل تقعد:** تلقيه مشي يا بابا... أنت صدقت إنه هيشرب شاي عندنا؟

خرجت الجدة فاطمة.

**فاطمة:** أنتم رجعتم؟ (وتبص لرجل حكمت المربوطة) يالهوي إيه اللي حصل؟ مالك يا حكمت؟

**حكمت:** رجلي اتجزعت يا تيتا.

يخبط الباب ويبصوا عليه يلاقوا كمال واقف وشايل علبة كبيرة في إيده وكيس هدايا.

**كمال بابتسامة:** سلام عليكم.

**علي باستغراب:** وعليكم السلام اتفضل يا دكتور (ويبص لفاطمة اللي واقفة مستغربة) دكتور كمال يا أمي.

**فاطمة بابتسامة:** أهلاً وسهلاً اتفضل يا ابني.

كمال يدخل وهو عينيه على حكمت اللي بتبص له باستغراب.

**كمال يبص لعلي:** أنا عرفت إن النهارده عيد ميلاد الآنسة حكمت... وبسببي معرفتش تخرج ولا تحتفل بيه... فحبيت أعوضها بحاجة بسيطة لو تسمحوا ليا.

**علي:** تعبت نفسك ليه يا ابني.... كفاية اللي عملته في المستشفى وإنك وصلتنا لحد هنا.

**كمال بابتسامة:** دي حاجة بسيطة يا عمي وأتمنى حضرتك متكسفونيش... وتسمح لي آكل حتة من التورتة مع كوباية الشاي.

**فاطمة تقرب وتأخذ العلبة من إيده:** اتفضل يا ابني اقعد... تسلم إيدك.

ويقعدوا كلهم مع كمال... وحكمت كانت الابتسامة رجعت لوشها وحست بسعادة لوجود كمال... والاحتفال البسيط اللي عملوا ليها .... وبعد ما قطعوا التورتة وشربوا الشاي، كمال يقف قدام حكمت بابتسامة وهو ماسك بإيده كيس الهدية.

**كمال:** كل سنة وأنتِ طيبة دي هدايا بسيطة... أتمنى تعجبك.

**فاطمة:** ليه كده يا ابني... دا كتير قوي كفاية الجاتوه اللي جبته.

**كمال بابتسامة:** دي حاجة بسيطة يا تيتا.

**علي:** يا دكتور كمال.... كتر ألف خيرك... بس كده كتير قوي.

**كمال:** لو سمحت يا عم علي.... متكسفش إيدي أرجوك.

علي يبص لحكمت ويشاور ليها برأسه...

**كمال بابتسامة:** كل سنة وأنتِ طيبة.

**حكمت بابتسامة:** متشكرة... وأنت طيب.

كمال يرجع يقعد ويبص لعلي وفاطمة: أنا بصراحة مبسوط جداً إني اتعرفت عليكم وإني موجود وسطكم (ويكمل بحزن) بصراحة أنا لقيت وسطكم جو العيلة اللي مفتقده من بعد موت أمي الله يرحمها.... فياريت يا عمي تعتبرني زي ابنك.... وتسمح لي أبقى آجي أزوركم.

**فاطمة:** البيت بيتك يا ابني تنورنا في أي وقت.

**كمال:** متشكر قوي يا تيتا.

ويقوم يقف وهو عينيه على حكمت.

**كمال:** استأذن أنا.... ومتشكر جداً على السهرة الحلوة دي (ويبص لحكمت بابتسامة) وآسف على الخبطة .... كل سنة وأنتِ طيبة.

**حكمت بكسوف:** وأنت طيب متشكرة قوي.

**كمال بابتسامة:** سلام عليكم.

**الكل:** وعليكم السلام ورحمة الله وبركاته.

وخرج علي مع كمال عشان يوصله... وقربت فاطمة من حكمت.

**فاطمة بابتسامة:** شكله طيب وابن حلال.

**حكمت بسرحان:** اااه... قوي يا تيتا.

**فاطمة تبص لها:** والنبي إيه .. مالك يا بت بتكلمي بسهوكة كده؟

**حكمت بارتباك:** أبداً والله أنا بتكلم عادي خالص أهو.

**فاطمة بابتسامة:** طب يا ختي افتحي الهدايا لما نشوف جواها إيه.

حكمت تمسك الكيس وتفتحه وتبص لجدتها قوي: دا موبايل يا تيتا!

**فاطمة باستغراب:** إيه الموبايل دا يا بت؟ حاجة عيب؟

**حكمت بضحك:** حاجة عيب إيه بس.... دا تليفون محمول.

**فاطمة باستغراب:** اااه دا اللي مع البت صاحبتك... اللي بتجيلك هنا.

**حكمت بابتسامة:** أيوه هو يا تيتا.

ويدخل علي ويبص على حكمت اللي ماسكة الموبايل وفرحانة.

**حكمت بابتسامة:** بص يا بابا دكتور كمال جابلي موبايل.

علي يبص لها بضيق... ويقعد وهو ساكت ومضايق، فاحكمت وفاطمة يبصوا ليه.

**فاطمة:** مالك يا علي؟

**علي باستغراب:** مش مرتاح يا أمي... (ويبص لهم) ليه دكتور كمال يعمل كل دا معانا..... علشان خبطها؟ مهو أخدها المستشفى وشافوا رجلها وربطها ... وأبوه أداني فلوس علشان ابنه اللي خبط بنتي ... لكن يسيب شغله ويصمم يوصلنا بنفسه للبيت ويجيب تورتة... ويقعد يحتفل بعيد ميلادها وموبايل هدايا... ليه كل دا؟ غرضه إيه؟

**فاطمة:** هيكون غرضه إيه يعني يا علي ... الواد شكله طيب... وباين عليه بيتصرف بسلامة نية... وميقصدش حاجة من اللي في رأسك دي.

**علي بقلق:** يارب تكون سلامة نية يا أمي (ويبص لحكمت اللي قاعدة حزينة) حكمت يا بنتي، اللي حصل النهارده ظروف واتحطينا فيها بس الدكتور كمال لا هو من توبنا ولا احنا من توبه...

**حكمت بابتسامة حزينة:** عارفة يا بابا متقلقش عليا (وتقوم تقف بشويش) أنا هروح أطمن على ماما وهدخل أرتاح.

وتقوم حكمت وتدخل أوضة مامتها ويبص علي لفاطمة.

**فاطمة:** مالك يا علي إيه القلق كده يا ابني؟

**علي يتنهد:** خايف عليها يا أمي، حكمت صغيرة ومشاعرها لسه بتتكون، خايف قلبها يتعلق باللي مش ليها واللي مش من توبها... حكمت قلبها مش حمل جراح ووجع قلب.

**فاطمة بابتسامة:** متخافيش يا علي... حكمت عاقلة ومتربية.. وكرامتها في السماء..

**علي يتنهد:** ربنا يسترها.

حكمت اطمنت على أمها... ودخلت أوضتها ونامت على السرير ومسكت الموبايل في إيدها... وبقت تفكر يا ترى كمال جاب الموبايل ليه ...... بيعوضها عن الخبطة... زي الفلوس اللي أبوه أداها لأبوها... لا أنا مش هقبل أنا لازم أرجعه ليه... بس هرجعه ليه إزاي... أنا هشوفه فين تاني أصلاً... وعند الفكرة دي وعينها اتملت دموع مش عارفة سببها إيه... حطت التليفون جنبها بضيق ودموعها نازلة..... بس بعد شوية لقيت التليفون بيرن جنبها استغربت... هي ماخدتش بالها إن التليفون فيه خط فمسكته وبتبص عليه لقيت مكتوب كمال... فاتصدمت وفضلت باصة للتليفون لحد ما سكت بس بعد شوية رجع يرن تاني.