الفصل السابع والخمسون

وفي دولة كندا كان يرتب ثيابه بعناية، داخل حقيبة كبيرة، فقد قرر المغادرة عقب محادثته مع والده ليلة أمس، مان يعلم منذ البداية أن قرار والده المفاجئ هذا سيكون له تبعات، وهاقد بدأت بالظهور، كان يعلم أن من الصواب العودة للبحث عن أولاد عمومته، لكن هل سيرضون ويتقبلون العذر الذي جعلهم يغادرون البلاد، وتركهم بمفردهم، والأمر الذي زاد من حيرته هو حديث والده، ليتذكر المكالمة التي دارت بينه وبين والديه ليلة أمس

" سليم : السلام عليكم ورحمة الله وبركاته، ازيك يابابا، حضرتك كويس

مصطفى : بخير يا سليم يا حبيبي، انت عامل ايه، خلصت ولا لسة

سليم : والله لسة يا بابا، رائف كان بيقول لحضرتك يفضل هو في الفرع اللي هنا بدال منخسره، وهو له مكانته زي ما حضرتك عارف، وانا انزل أبدأ الشغل عندك

يجيبه بعد تنهيدة وصل صداها له : إنت لازم تنزل يا سليم، وخلي رائف عندك يتصرف

سليم : ليه يا بابا إيه اللي حصل!

مصطفى : خالك حسن بقاله فترة يكلمني وعاوز يجي يشوف والدتك ويشوفكم، ووالدتك رافضة تقابل حد منهم نهائي،

وكمان لسة مفيش أخبار عن ولاد عمك، وأنا مخنوق، كنت فاكر إن الأمور هتمشي بسلاسة، لكن للأسف كل مادى تتعقد

سليم : حضرتك عارف من البداية إن الموضوع مش سهل أبدا يا بابا، على العموم أنا هحجز واجي لحضرتك في أقرب وقت، بس خلي بالك من نفسك، يلا في رعاية الله

بعد غلق الهاتف ظل مترددا في طلبه كثيرا، لكن حسام صديقه وحده من يستطيع مساعدته، سوف يطلب منه أن يطلب من مروان رفيقه البحث عنهم، لا يوجد حل آخر، ليرفع هاتفه مقررا طلب رقم رفيقه، وبعد ثوان معدودة كان أتاه الرد

حسام: أهلا يا سليم ازيك يا بني، إيه خلاص خلصت مصلحتك وطنشتني

ليجيبه بضحكة رجولية : لا والله بس مشغول عاوز اخلص عشان انزل، انت عارف بابا مبقاش له في الشغل الثقيل ده، ميقدرش يواصل عليه

حسام : يا سيدي  ربنا يديله الصحة يارب، المهم إيه سبب الاتصال المفاجئ ده

سليم :حسام أنا طالب منك خدمة عمري ما هنساها لك طول عمري

حسام : خدمة إيه يا سليم! قول يا ابني انت قلقتني

سليم: في الحقيقة أنا ليا ولاد عم بندور عليهم من زمان، حصلت حادثة وفقدناهم، وبابا فضل يدور عليهم فترة لحد ما عرف إنهم عائشين، بس هما في خطر، وفضلنا سنين ندور عليهم لكن للأسف ملقينهمش، هما المفروض حاليا يكون عندهم 28 سنة ده الكبير، والصغيرة تقريبا 19 أو 20 سنة، ممكن يعني تطلب من مروان يشوف ليا الموضوع ده، وهكون شاكر لك طول عمري

حسام : بس يا هبل خدمة إيه، والله انت لو قدامي لضربك، عادي بكرة أكلم مروان واخليه يشوف لك الموضوع، بس ابعت ليا أسمائهم بالتفصيل وملكش دعوة

سليم :تسلم يا صاحبي، أسمائهم " محمد محمود الألفي، وأخته رؤى محمود الألفي"

كام يخبره بالأسماء ولكنه لم يدري عن الصدمة التي تملكته، وشلت حواسه، صمت قليلا حتى ظن الطرف الآخر عن انقطاع المكالمة، ليبعد الهاتف عن أذنه ليرى المكالمة لا زالت مستمرة، ليناديه مرة أخرى

- إيه يا حسام روحت فين، ألوو، انتبه للهاتف في يده وقرر الإجابة

حسام: أيوة معاك يا سليم، انت متأكد من الأسماء كدة مضبوط  اديها لمروان، متقلقش انت،

بس انت مقرر هتيجي امتى؟

سليم : في أول طيارة بإذن الله، بس الوضع هنا صعب شوية، يعني ممكن أدامي أسبوع، على حفلة عيد ميلاد هنا هكون موجود

حسام : يتحدث ساخرا، يعني أنا عارف عيد ميلاد هنا ده إمتي! يا ذكي

سليم : بضحكة عالية، أه صح معاك حق، ده هيكون بعد يومين يا باشا

حسام : اه قول كدة، مش تقولي يوم عيد ميلاد هنا، خلاص كدة يلا انت سلام، وأنا هضبط لك الدنيا، وبإذن الله تيجي تلاقينا جبناهم لك

ويغلق المحادثة عقب هذا،

يقطع أفكاره دخول صديقه للغرفة محدثا إياه عن موعد سفره وسبب هذا القرار المفاجئ

رائف : خلاص جهزت كل حاجة يسليم، وهتمشي بكرة

يجيبه وهو يرتب أغراضه، سليم: أيوة بإذن الله، وانت خلص وحصلني، أنا خدت رنا معايا عشان ميحصلش صدام تاني بينكم، وبما تيجي مصر أوعدك أعلمها لك الأدب

رائف: خلاص مبقتش تفرق

******

كان يجلس على مكتبه، يضع رأسه بين راحتي يديه، من يراه يجزم أن مشاكل الحياة اجتمعت لتتقاتل على وجهه، ينظر له صديقه نظرة مشفقة على ما وصل إليه حال رفيقه، الذي لم يبدأ حياته بعد، يقرر الحديث معه قليلا، علَه يتمكن من التخفيف عنه قليلا، ويتمكن من إخراجه من طور الحزن الذي طغى على وجهه،

.....: محمد، مالك بس يا صاحبي؟        يصمت قليلا ثم يتابع،

انت مش قولت لي امبارح انك هتروح لخطيبتك عشان تحل الموضوع ده !

امال مالك بس شايل هم الدنيا ليه، احكي  وخرج اللي جواك، وبإذن الله ترتاح

محمد:  يرفع رأسه بعيون بدى عليها الإرهاق لعدم النوم، ثم يتنهد تنهيدة ثقيلة تنم عن عمق الألم الذي يعانيه، ثم يشرع في الحديث عله يستطيع تفريغ شحنة الحزن التي تعتمل داخله،

- تعرف يا حسين أنا عمري ما كنت اتخيل إني اتخدع في حد بالطريقة دي،  أول مرة احس إني غبي، أنا فعلا كنت رايح عشان اوفق الأمور، وكان عندي استعداد اجهز أوضتي ونتجوز فيها، بس اللي سمعته خلاني كرهت حتى نفسي

حسين : إيه اللي سمعته خلاك تغير رأيك!  وكمان تلغي الخطوبة خالص!

يتنهد وهو يسرد له ما سمعه ليلة أمس

محمد:

"استمع لما جعله يقف كالصنم في موضعه.. لم يستطع الحركة من هول الكلمات التي استمع إليها...

كانت هي بالداخل تتحدث مع والدتها بحديث يدور محوره حول حياتها معه.. وماذا تنوي بعد ذلك

سناء : بت يا جميلة انتِ عارفة هتتكلمي مع محمد  في إيه لما ييجي.. ولا انتي ناوية تكملي عك

جميلة: عك إيه يا ماما.. أنا مش هسيب محمد.. وإن كان على أخته اللي واقعة ليا في البخت.. أنا عارفة ازاي هطفشها.. لما اتجوز محمد أنا عارفة أنا هعمل إيه كويس

سناء: هتعملي إيه.. انتي ناوية تخليه يرمي أخته يا بت.. يبقي انتي متعرفيش محمد.. محمد يستحيل يعمل كدة حتى لو متجوز  ملكة جمال يا بنت بطني

جميلة: أنا مش هخليها تفضل معايا أبدا.. مش كفاية هي السبب في اني جوازي يتأخر من أخوها

سناء: طب قفلي على كلامك ده وراضي خطيبك بدل ما يسيبك ويطفش

جميلة : مش هيقدر أصلا...

وعند هذه النقطة لم يعد يحتمل سماع المزيد من هذه الترهات التي تؤذي مشاعره، في هذه اللحظة يشعر أنه أحمقا كبيرا، كيف لم يستطع أن يميز شخصية الفتاة التي اختارها حتى تصير شريكة حياته"

وبعدها دخلت ومبينتش لهم إني سمعت حاجة خالص، وخليت الموضوع جه من عندي إني مش جاهز فالوقت الحالي

حسين : ياااه ايه ده كله، ده أنا كنت فاكر ان الموضوع مش مستاهل، وقلت لما تحكي أحاول اقنعك نروح لهم ونصلح الموضوع، طلع الموضوع إن ربنا كان رايد لك الخير، عشان كدة روخت وسمعت الكلام اللي سمعته، كانت اختك هتعاني وانت كمان هتعاني، بس ربك كريم، عموما متزعلش ربنا يعوضك باللي أحسن منها

محمد : تعرف يا حسين أنا لما أخدت الخطوة دي امبارح، مزعلتش  بالعكس ارتاحت، حسيت بحمل تقيل اتشال من على اكتافي، أنا مش هنكر إني زي أي واحد بصراحة بصيت للشكل الخارجي، يعني هي حلوة وشكلها كويس، قلت اللبس أنا هعودها على اللي انا عاوزه، بس للأسف اللي ده مستحيل، وفي كل الأحوال هيكون الفشل الأساس، لأن يا إما في الخطوبة هتزهق وتقول لك انت متشدد، وده زي محصل معايا، يا إما بعد الجواز وتقول خنقتني أنا متعودة على كدة، لا هو هيقبل، ولا هي هتستحمل، وفي الآخر هيفشل الجواز

حسين : عندك حق، بس كنت كلمت اخوها قلت له عشان محدش يغلطك

محمد : اتصلت عليه وهقابله بعد الشغل واتكلم معاه، وربك يسهل

مرت  بعض الوقت وخان موعد وقت الراحة، ليقرر النزول لجلب كوب من القهوة، علَه يخفف من حدة الصداع الذي يشعر به من كثرة التفكير، وقلة النوم، يراه بالأسفل عند دخوله من المبنى ليقرر الحديث معه قليلا

يتجه صوبه مناديا إياه بصوت ليس بالمرتفع ولا بالمنخفض، ليلتفت له وابتسامة تشملت على وجهه ببساطة،

محمد : حسام بيه، أهلا بحضرتك

ثم يؤشر لع بعرض ما يملكه على سبيل الدعوة ،

اتفضل قهوة يبادله الابتسامة، حسام : تسلم يا محمد، كلك واجب، بس أنا لسة شارب، خلصت وطالع ولا إيه!

محمد : أيوة خلاص، اتفضل خضرتك

حسام : بصراحة كنت عاوز اشكرك على اللي عملته مع البنات، بس بصراحة مكنتش عارف اسمك بالكامل، وكمان اتجرجت اسأل عليه، قولت هروح اسأل على محمد وخلاص، ده شعب مصر كله اسمه محمد

يختم حديثه بضحكة على حديثه، فيجيبه الآخر

محمد :عندك حق بصراحة، بس ولا تزعل أنا اسمي محمد محمود الألفي، وأحمد بيه عرفه من يومها

وهاقد تأكدت الشكوك لديه، وأصبح الشك يقينا، ليكمل حتى يتمكن من أخذ كامل المعلومات التي يريدها،

حسام : وكمان اشكر الآنسة رؤى، يضع يده على رأسه علامة على التفكير ختى يتذكر، كان اسمها رؤى صح!

محمد : أيوة صح

لينظر له حسام نظرة بها بعض الألفة : تعرف يا محمد انت فيك شبه من واحد اعرفه، اللي يشوفكم يقول إنكم اخوات، قرايب، ولاد عم

محمد : شبهي أنا! غريبة بس بيقولوا يخلق من الشبه اربعين، عموما فرصة سعيدة، هستأذن عشان ارجع شغلي

يتركه ويغادر وهو ظل في موضعه يبتسم براحة، فقد وجد مبتغاه

انتهي الفصل،