11 / حين لا يحتمل الانتظار

.نور كانت مستنية عمر، قاعدة على الكنبة، إيديها على ركبها، وكل جزء في جسمها متوتر كأنه مشدود بسلك رفيع، منتظر أي حركة، أي صوت، أي خطوة. أعصابها كانت مرهقة من التفكير وقلة النوم، وكان قلبها بيخبط بسرعة، كأنه عارف حاجة هي مش حابة تواجهها. كل ثانية كانت تمرّ كانت بتزود شعورها بالقلق، وكل مرة كانت تتخيل فيها عمر قريب منها، كانت بتحس بنفس الوقت بخطر ممكن يجي من أي تصرف غلط.

كانت عايزة تشوفه، تحس بردود أفعاله بنفسها، كانت حاسة إنه لما هتبص في عينيه، عمره ما هيقدر يكذب عليها، مهما حاول. أهم حاجة عندها كانت الصدق، حتى لو الحقيقة هتزعلها أو هتوجعها. سرحانة في تفكيرها، كانت بتعيد كل لحظة من اللي حصل، كل كلمة قالها، كل تأخير، وتحاول تقنع نفسها إن قلبها ساعات بيخوفنا من غير سبب حقيقي.

الباب خبط فجأة، قلبها وقع من مكانه. قامت تجري تفتح… ريم..!

وحشتيني! صرخت جوه نفسها، وحست بالراحة لما شافت ريم واقفة قدامها. حضنتها بسرعة، دموعها نزلت على خدودها من غير تحكم، كأن الحضن ده هو كل اللي محتاجاه عشان تحس بالأمان. حضن يخبيها من خوفها وزعلها، حضن تقول فيه من غير كلام: "أنا تعبانة".

– عاملة إيه يا نور؟ وحشتيني، غصب عني والله… كتروا الشغل عليا ومعرفتش آخد أجازة غير بعد ٨ شهور… طمنيني عليكي، قالت ريم بصوت هادي، بس عينيها كانت بتدور على الحقيقة، على أي علامة ممكن تكشف حاجة.

نور اتسمّت بسرعة لما سمعت اسم عمر، ملامحها اتغيرت من غير ما تحس، وقالت بسرعة كأنها بتحاول تغلق باب الموضوع:

– كله كويس، متقلقيش.

ريم كانت زي أختها، بتحس بكل حاجة من غير ما تتقال، وشافت إن في حاجة غلط، فسألتها بهدوء:

– عمر عمل حاجة زعلتك، صح؟

نور حاولت تهدى، وقالت بنبرة هادئة:

– بصراحة هو معملش حاجة، بس أنا اللي ساعات ببقى أوفر شوية.

سكتت ريم، وملامحها بقت عصبية، كأنها بتحاول تقرر تقول ولا تسكت. فجأة سألت:

– داليا؟

نور اتخضت من السؤال، قلبها دق بسرعة، وقالت:

– عرفتي إزاي؟

– احكيلي، بس الأول إيه اللي حصل؟ ريم حاولت تهدى صوتها.

نور حكت كل حاجة… كل التفاصيل، كل حركة، كل لمسة، كل كلمة من داليا لعمر، وهي بتحاول تمسك نفسها من البكاء، تحكي من غير ما تعترف قد إيه قلبها اتوجع. ريم كانت ساكتة، سنانها متشددة، عيونها مليانة غضب، وقالت أخيرًا:

– أنا كنت عاوزة أحكي، بس افتكرته راجل ومش هيزعلك.

نور اتخضت، قالت بسرعة:

– انتي تقصدي إيه؟ إيه اللي كنتي هتحكيه؟ وليه محكتيهوش؟

ريم قربت منها وقالت بصوت دافئ:

– اهدي يا حبيبتي… أنا هحكيلك كل حاجة، وهنفكر مع بعض هنعمل إيه.

حكتلها ريم على المشهد اللي شافته، قرب داليا من عمر، همسها في ودنه، نور دموعها بدأت تنزل، وريم طبطبت عليها بسرعة كأنها بتقول لها: "نور، بس كل ده مش معناه إنه بيخونك معاها، هو ملمسهاش، واللي انتِ شفته مش معناه إنه بيكدب عليكي، ممكن فعلاً يكون ودّاها المستشفى ورجعوا الصبح. حاولي تسأليه، وهو لو كدب عليكي… انتي هتحسي بكل ده."

نور مكنتش قادرة تفكر، حسّت فجأة إنها لوحدها في وسط صحراء واسعة، من غير أي حماية، ولا حتى ظل تستند عليه. قلبها كان بيدق جامد من الألم والشك والخوف، وكل ثانية كانت بتحاول تهدي نفسها، لكن كل ثانية كانت تزود شعورها بالخيانة والخذلان.

الباب خبط تاني، نور رفعت راسها بسرعة، وقامت ريم تفتح… وأول ما الباب اتفتح، عمر كان واقف جايب لنور ورد، رافعهم قدامه، عشان أول ما تفتح الباب تلاقيهم. قلب نور اتوقف للحظة، لكنها حاولت تهدي نفسها.

– مين؟ سألت ريم، نازلة دمعة من خدها، لكن صوتها هادي.

عمر سمع صوت غير نور، نزّل الورود براحة، ولقي ريم قدامه، ونظراته اتوترت، دقات قلبه زادت بسرعة، قال لنفسه: "إيه اللي حصل؟ ريم…؟"

– اتفضل، نور جوه، قالت ريم ببرود، بس صوتها داخليًا كان فيه فضول وقلق.

دخلت نور، قعدت جنب عمر، وأخدت الورود، حاولت تمسح دموعها، وقالت:

– شكراً.

عمر شايف دموعها، سكوتها مرعبه، مش عارف هي مضايقة من اللي حصل ولا ريم حكت حاجة، حس قلبه بيتقطع. قبل ما ريم تفتح الباب، نور قالت لها: "ده أكيد عمر… حاولي تتعاملي كأنك متعرفيش حاجة."

عمر قال لريم: – حمد الله على السلامة.

– شكراً… هتروحوا الجامعة؟ ردّت ريم.

عمر ونور في نفس اللحظة: – آه.

نور قامت عشان عمر ميحسش إن ملامحها متغيرة، دخلت وراها ريم، وقالتلها بهمس: "لازم تسأليه، وتواجهيه بكل اللي جواكي." نور هزّت راسها بالموافقة.

أول ما طلعوا من الباب، عمر جاي يمسك إيد نور، بس بعدت إيدها بشكل لا إرادي، كأنها اتكهربت من لمسة إيده. عمر اتخض وبصلها بخوف، كأنها عرفت اللي حصل عند داليا، أو ريم حكتلها حاجة.

– نور، في إيه؟ سألها بصوت خائف.

– آسفة يا عمر… إيدي وجعاني… معلش بلاش. قالت بصوت خافت، لكنها مليان حزن.

راحوا الجامعة، وطول اليوم نور ساكتة، مستنيه يتكلم، وهو مستنيها تسأله، بس لا هي سألت… ولا هو اتكلم. وهم ماشيين في طريقهم لبيت نور، وقفت فجأة. كانت أخيرًا قررت تسأله عن اللي حصل امبارح، بس لما فتحت بُقّها… الكلام طلع في اتجاه تاني.

– عمر… اوعى تسيبني. اوعى تتغير معايا.

عمر قرب منها، كأنه أخيرًا لقاها اتكلمت، صوته كان هادي بس مستعجل: – حبيبتي ليه بتقولي كده؟ لو وجودي مع داليا امبارح ضايقك، أنا ممكن أحكيلك اللي حصل.

نور ردت بسرعة، قبل ما قلبها يسبقها: – لا… متحكيش أي حاجة. في اللحظة دي، نور كانت مرعوبة… مش من الحقيقة… من الكدب. كانت عارفة إنه لو حكى، هيكدب، وعارفة إنها مش هتصدق غير إحساسها. اختارت الشك… على إنها تسمع كدبة وتعيش بيها.

أول ما وصلوا قدام بيتها، نور قربت منه وحضنته جامد… بس لأول مرة، الحضن وجعها، كأنه مش مكانها، ريحة داليا كانت في هدومه. بعدت عنه ببطء، وبصّت له. أول ما عينيها جت في عينيه، قالت بصوت واطي بس ثابت: – عمر… أنا مش عاوزة أكمل.

عمر اتلخبط: – نكمّل إيه؟

– أنا وإنت… مش هينفع نكمّل.

لفّت، دخلت البيت من غير ما تستنى ردّه، وقفلت الباب وراها. عمر فضل واقف قدّام الباب المقفول، لأول مرة يحس إن اللي ضاع منه مكانش لحظة ضعف… كان نور نفسها.