الفصل الثاني والأربعين

أمسك رامي هاتفه متنهداً، وقال بنبرة يحاول جعلها هادئة: "ها يا حبيبتي.. كدا تمام في تقسيم الشغل مع المهندس؟ ولا تحبي نعدل أي حاجة تانية في التصميم قبل ما نعتمدها؟".

ردت ليلى بنبرة مترددة: "ممم.. لا كدا تمام أوي، نبدأ بقى ننزل نجيب الفرش والأثاث.. قولي هتفضي نفسك إمتى عشان ننزل سوا؟".

صمت رامي لثوانٍ قبل أن يجيب بأسف: "بصي يا حبيبتي.. أنا طبعاً نفسي نجهز كل ركن سوا ودي أمنية حياتي، لكن ظروف الشغل مضغوطة جداً الفترة دي زي ما أنتِ عارفة، ده إحنا حتى بنتقابل بالعافية ويادوب نص ساعة!".

علقت ليلى بضيق وملمح حزن: "بس ده بيتنا ومستقبلنا يا رامي.. لازم نختار حاجتنا سوا ونكون مع بعض في خطوة زي دي".

رامي محاولاً التهدئة: "بصي، هحاول أكون معاكي على قد ما أقدر طبعاً ومش هسيبك، بس عشان الوقت إنتِ ممكن تاخدي معاكي ماما، أو عاليا أختك، أو طنط مامتك.. هما ذوقهم وعينهم حلوة وهيفيدوكي".

تنهدت ليلى بقلة حيلة: "طيب.. ماشي يا رامي".

أغلقت الهاتف بنبرة حملت ضيقاً مكتوماً، ونظرت إلى والدة رامي الجالسة بجوارها، والتي فهمت على الفور ما دار في المكالمة من نبرة ابنها.

اقتربت الأم منها وهزت كتفها برفق: "متزعليش يا حبيبتي.. رامي شغله صعب ويادوب بيلحق يتنفس، بس أنا معاكي اهو خطوة بخطوة ومش هسيبك، ولو في أي حاجة مش عاجباكي في الألوان أو توضيب الشقة قوليلي فوراً ومتتكسفيش، ده بيتك أنتِ أولاً وأخيراً".

ابتسمت ليلى بامتنان وخجل: "كله كويس يا طنط تسلميلي، أنا عارفة والله إنه مشغول وضغط الشغل عليه كبير، بس كان نفسي نعمل التفاصيل دي سوا.. بس الحمد لله حضرتك موجودة ومش مقصرة، وهقول لعاليا أختي تنزل معانا، ولو نسرين تقدر تيجي كمان يبقى حلو أوي".

أومأت والدة رامي بترحيب: "هقول لنسرين طبعاً يا حبيبتي وتيجي معانا، وعاليا مش هتقصر".

ليلى بابتسامة: "تسلميلي يارب يا طنط، ربنا يخليكي ليا".

في المساء، كانت عاليا تجلس مع ليلى، فالتفتت إليها تضحك بقوة: "آه ياني يا رجلي! رجعنا تاني للتجهيز وسنينه والمشي في المحلات! ههههه تصدقي رامي ده فاته نص عمره، وفلت من المرار ده واللف على المعارض!".

ليلى بفضول: "ليه يعني يا بنتي؟ ده متعة!".

عاليا متهكمة بمرح: "متعة إيه! أحب أقولك هتموتي يا سوسو من اللف والتفاصيل، وهتكرهي الألوان والفرش!".

ليلى ضاحكة: "الله يبشرك بالخير يا شيخة! ما كنت أخلي عمو عبد الله يجهز كل حاجة من حساب الشركة ويريّحنا من الليلة دي كلها!".

ضربتها عاليا على كتفها بخفة: "أنتِ عبيطة يا بنتي؟ دي ذكريات بيتك وشقتك يا هبلة! لازم تجيبي كل حاجة بنفسك وعلى ذوقك تاتش بتاتش (Touch by touch).. عارفة؟ أنا وحسام لغاية النهارده بنقعد نفتكر أيام التجهيز والخناقات على الألوان ونموت على روحنا من الضحك، ونتفرج على الصور ونفتكر تعبنا.. دي بتبقى أحلى أيام".

ليلى بنبرة حالمة: "ما هو أنا كان نفسي أعمل ذكريات زي دي مع رامي".

عاليا بحنان أخوي: "متقلقيش، هتعملوا ذكريات تانية أحلى بكتير لما تتجمعوا في بيت واحد.. متستعجليش، الأيام جاية كتير وهتشبعوا من بعض".

ليلى: "تفتكري يا عاليا؟".

عاليا بيقين: "طبعاً يا بنتي قولي يارب.. يلا بينا بقى نتحرك عشان ورايا غدا في البيت لسه هيتعمل وحسام زمانه راجع".

ليلى بمداعبة: "يا خلاصي! الشيف الشاطر.. أشطر كتكوت في الدنيا يا ناس!".

عادت عاليا إلى منزلها مسرعة، ودلفت إلى المطبخ تبدأ في تجهيز الطعام، لكن حسام وصل مبكراً عن موعده. استقبلته عند الباب بابتسامة واعتذار: "حمد الله على السلامة يا حبيبي.. معلش لسه الأكل مجهزوش، اتأخرت مع ليلى في المحلات".

احتضنها حسام برقة: "ولا يهمك يا جميل ولا تشغلي بالك، هروح أغير هدومي سريعاً وأجي أساعدك في المطبخ".

بعد قليل، وقف بجوارها يقطع الخضار، فالتفتت إليه قائلة بابتسامة حنين: "فاكر يا حسام وإحنا بنجيب أوضة المطبخ والفرش بتاعها؟".

تنهد حسام بابتسامة: "ياااه.. يالله على السنين! ده كان يوم حكاية!".

(عادت بها الذاكرة فجأة إلى الوراء..)

كان حسام يقف في معرض الأثاث ويشير إلى خزانة: "يا بنتي ما هي حلوة ومناسبة اهي!".

عاليا باعتراض: "لا طبعاً! اللون ده مش هيليق خالص مع لون المطبخ الأساسي اللي اخترناه".

حسام وهو يشير لقطعة أخرى: "طب ناخد التصميم ده؟".

عاليا بقلة حيلة: "حسام.. بذمتك ده يليق على نظام المطبخ؟ يا حبيبي أنا عاوزه حاجة مختلفة ومودرن (Modern).. بص على اللي هناك ده كدا؟".

حسام بإعجاب: "الله.. جميل فعلاً".

عاليا بتردد: "لا بس تحسه صغير مش هياخد الأطباق كلها".

تدخل العامل في المعرض بتهذيب: "يا فندم ممكن حضرتك تختاري التصميم اللي يعجبك، وإحنا بناخد المقاسات بالملي ونعمله مخصوص ليكم، وباللون اللي تختاروه كمان".

حسام بارتياح: "بيتهيألي ده حل كويس أوي ويقفل الخناقة دي".

عاليا بسعادة: "خلاص مفيش مشكلة.. تعالى بقى نشوف المكتبة والـ...".

حسام مقاطعاً بضحكة: "والمرجيحة!".

عاليا بضحك: "هههههه أيوة، المرجيحة طبعاً!".

حسام بمداعبة: "أنا هتجوز طفلة يا ناس! مرجيحة في الصالة!".

عاليا بدلال: "لو سمحت.. ده الركن الخاص بتاعي وأحط فيه اللي يعجبني، الركن بتاعك هات فيه اللي تحبه!".

نظر في عينيها بحب: "أنا هحطك أنتِ كدا قدامي في الركن بتاعي وأفضل أبص ليكي وبس.. مفيش أحسن من كدا في الدنيا".

احمر وجهها وقالت: "حسام.. لسه في ركن مهم أوي، فاكره؟".

حسام بجدية دافئة: "طبعاً.. ركن الصلاة. أنا خليت واحد صاحبي مهندس يصممه وهنعمله زي ما أنتِ عاوزه بالظبط عشان نصلّي فيه سوا".

(عادت إلى الواقع) على صوت حسام وهو يبتسم: "بس كانت أجمل فكرة عملناها، والمرجيحة كمان طلعت حاجة رومانسية آخر حاجة في السهرات".

عاليا بابتسامة: "فعلاً.. طيب يلا بينا الأكل خلص وخلاص غرفته".

جلسا يتناولان الطعام، وبدأ حسام يضع الأطباق الفارغة على السفرة متسائلاً: "هي لسه ليلى وراها حاجات كتير ولا إيه؟ الفرح قرب والوقت بيجري".

عاليا: "إحنا حالياً بنجيب أدوات المطبخ والحاجات الرفيعة، وسيبنا الأوض الكبيرة قدام شوية، يمكن رامي يقدر يفضى ويروح معاها ويختاروا".

حسام: "بصراحة هيفوته كتير أوي لو محضرش التفاصيل دي.. دي بتبقى متعة تانية".

عاليا: "أه والله.. أنا قلتلها كدا برضه، بس أنت عارف طبيعة شغله عاملة ازاي في المواقع. أنت كمان كنت مشغول جداً وقت فرحنا، بس الحمد لله كنت معايا في كل خروجة وكل حاجة بنجيبها".

حسام بامتنان: "ده كان من حسن حظي والله إني أشاركك كل حاجة".

تذكرت عاليا شيئاً فقالت: "على فكرة، طنط مامتك كلمتني النهارده وعزمانا على الغدا بكره.. اعمل حسابك نروح بدري، بكره إجازتك ونقضي اليوم كله معاهم".

حسام: "ماشي مفيش مشكلة، بس سيبيني أنام براحتي شوية الصبح عشان مهدود".

عاليا: "ماشي يا سيدي.. هروح أنا بقى أعمل طبق فشار ونتفرج على فيلم".

حسام وهو ينظر للساعة: "لا.. إيه رأيك ننزل نتمشى شوية على النيل؟ لسه بدري والجو برا يجنن".

عاليا بحماس: "خلاص.. أشطب المطبخ سريعاً وأغير هدومي وننزل".

أنهت عملها في خفة، وبدلت ملابسها وخرجا معاً. على كورنيش النيل الساحر، كان يمسك بيدها ويسيران وسط نسمات الهواء العليلة.

نظرت إليه عاليا وقالت بنبرة هادئة: "كدا بقالنا سبع شهور جواز عدوا هوا.. إيه رأيك في التجربة؟ مبسوط معايا ولا ندمان؟".

توقف حسام ونظر في عينيها بصدق: "الفكرة كلها في الشخص اللي بتتجوزيه يا عاليا.. مدى التفاهم والحب اللي بينكم هو اللي بيحدد. لو الحاجات دي موجودة، الحياة بتكون حلوة وأبسط مما نتخيل، وأسعد لحظاتك بتكون لما تكوني قريبة منه، وكل المشاكل بتتحل في ثواني لأنه مش هيهون عليكي زعله ولا هيهون عليه زعلك.. وأنا اخترت حد بحبه من كل قلبي، مفيش حاجة توصف فرحتي وإحساسي بيكِ اللي بيكبر كل يوم".

اتسعت عينا عاليا بدهشة: "تصدق؟ الكلام ده أنا قلته بالملي قبل كدا لمي وهي بتتجوز!".