الفصل الثالث والاربعون

اتسعت عينا عاليا بدهشة: "تصدق؟ الكلام ده أنا قلته بالملي قبل كدا لمي وهي بتتجوز!".

حسام بابتسامة: "لأنه إحساس صادق وحقيقي، وإحنا الاتنين بنحس بيه مع بعض".

طأطأت رأسها وقالت بصوت منخفض: "خايفة في يوم تتغير وتبطل تحبني بنفس الشغف ده.. وحبك ليا يقل مع الوقت والروتين".

رفع وجهها بأصابعه وقال بيقين: "أنا أعرفك من وإحنا في ابتدائي.. أكتر من 20 سنة دلوقتي يا عاليا، عمري ما شغفي بيكِ قل لحظة واحدة، ورغم بعدك عني وسفرك اللي قعد 10 سنين كاملة، عمري ما نسيتك، ولما رجعتِ وحطيت عيني في عينك، حسيت كأني سايبك امبارح بالظبط.. حبي ليكي ملوش تاريخ صلاحية".

عاليا بتأثر: "أنا جايز إحساسي بيك مكنش واضح ولا مفهوم من زمان عشان كنا عيال، بس دلوقتي بقى قوي جداً لدرجة إني مقدرش أتخيل حياتي من غيرك ثانية واحدة، ولا عارفة اتعلقت بيك كدا ازاي وإمتى بالسرعة دي".

حسام بنبرة حالمة: "عارفة نفسي في إيه دلوقتي؟".

عاليا: "في إيه؟".

حسام: "نفسي في بيبي (Baby) منك.. يكون شبهك في كل حاجة، ويكون جزء مني ومنك يملأ علينا البيت".

ابتسمت عاليا بخجل من هذا التخيل الدافئ: "بس ساعتها هتحبه أكتر مني وتنساني!".

حسام: "أنتِ دايماً الأولى والأصل، وهحبه هو عشان حتة منك وجزء من حبنا.. وحبي ليكي عمره ما يتأثر أو يقل حتى لو خلفنا 12 عيل!".

ضحكت عاليا بصوت عالٍ: "يا لهوي! 12 عيل مرة واحدة؟! وه.. يا وقعة مربربة!".

انفجر حسام ضاحكاً على طريقتها الكوميدية: "دلوقتي بس تأكدت إنك كنتِ عايشة بره مصر! أنتِ بتجيبي الكلام والإيفيهات دي منين بالظبط؟".

عاليا بغمزة: "عن طريق الإنترنت يا فندم!".

قلدها حسام بنبرة مكي الساخرة: "يقطع النت على النتيت على اللي عينتّو عليه!".

عاليا وهي لا تستطيع منع ضحكاتها: "وبتتريق عليا كمان؟ ده أنت مسخرة يا راجل والله! ههههه".

اشترى لها الفشار وسارا يتحدثان في خططهما للمستقبل، حتى انتهت سهرتهما السعيدة وعادا إلى بيتهما بقلوب راضية.

في صباح اليوم التالي، كانت الشمس قد تخللت الستائر. وقفت عاليا بجوار السرير تهزه برفق: "اصحى يلا يا حسام.. اتأخرنا والوقت فات!".

حسام متظاهراً بالنوم العميق، وتمتم بصوت مبحوح ومغلق العينين: "شويف كمان بس يا عزة.. سيبيني أنام".

تراجعت عاليا سريعا خطوتين، واشتعلت عيناها بالغضب والغيرة: "عزة؟! عزة مين دي يا حسام! قوملي هنا حالا واصحى.. اصحى وبص في عيني! أنت بتخوني من دلوقتي؟ أنا هقتلك يا حس...".

وفجأة، وبحركة سريعة مباغتة، سحبها حسام من يدها بقوة ليسقطها على السرير ويصبح فوقها بالكامل محاصراً إياها بابتسامة خبيثة: "كنتِ بتقولي إيه بقى؟ هتقتليني؟".

عاليا بتلعثم وتوتر من قربة المفاجئ: "ابعد يا حسام.. مين عزة دي اعترف حالا بدل ما أطين عيشتك!".

حسام بمكر: "آه.. عزة دي قصة حب عنيفة وسرية كدا من زمان".

امتلأت عيناها بالدموع بصدق وقالت بنبرة مكسورة: "وكمان بتكلمني عنها كدا عادي وبكل بجاحة؟ مصارحتنيش ليه من الأول قبل ما نتجوز؟".

كتم حسام ضحكته وقال بمرح: "عزة مفيش منها اتنين في مصر.. تمشي الكيلو في ساعتين.. قصدي (عربة النقل الكبيرة) يا جاهلة!".

برقت عيناها وفهمت اللعبة، فصرخت: "أنت بتشتغلني وتعمل فيا مقلب!".

حسام بنبرة عاشقة: "أنا مفيش في حياتي ولا قلبي غيرك.. ولا قبلك ولا بعدك يا عاليا".

عاليا بنبرة طفولية متأكدة: "بجد يا حسام؟ يعني مفيش عزة بجد؟".

حسام: "عاليا وبس هي اللي دخلت قلبي، وقفلت الباب من جوه ورمت المفتاح في البحر كمان". ثم أكمل بغمزة وهو يشد الغطاء عليهما: "إيه رأيك بقى نكمل نوم الشوية دول؟".

انتفضت عاليا مسرعة، وأمسكت بالوسادة وأخذت تضربه بها بخفة وهي تضحك: "آه يا مكار يا غشاش! كل الفيلم ده عشان أسيبك تنام وتتهرب؟ طب قوم بقى قوم.. مفيش نوم هنا خلاص!".

ضحك بشدة وهو يحمي وجهه بالوسادة: "خلاص خلاص صحيت اهو واستسلمت!".

بعد نصف ساعة، كان حسام واقفاً بكامل أناقته ومستعداً للنزول: "ها.. خلصتِ؟".

عاليا وهي تقف أمام المرآة: "بلف الطرحة بس.. إيه رأيك في الدريس (Dress) ده؟ عليّ حلو؟".

حسام بإعجاب صادق: "يجنن عليكي وما شاء الله قمر.. أجي أظبطلك الطرحة طيب؟".

عاليا بضحكة: "خليك مكانك أرجوك عشان نلحق ننزل.. خليني أخلص.. اهو كدا تمام يلا بينا".

انطلقا بالسيارة، وتوقف حسام فجأة أمام محل حلويات كبير واشترى علبة شوكولاتة فاخرة لمنة.

ضحكت عاليا: "ههههه لو رحت من غير الشوكولاتة دي، منة عندها استعداد ترجعك من على الباب تاني!".

حسام: "آه والله تعملها.. أختي وعارفها كويس، اتفضلي دي علبتك".

عاليا بدهشة: "دي ليا أنا؟ طب خليها لمنة و...".

حسام مقاطعاً: "أنا جايب لها علبتها الكبيرة، وجايب ليكي أنتِ كمان.. يلا خديها خلينا نطلع ولا هنفضل واقفين على السلم كتير؟".

عاليا بدموع دافئة: "ربنا يخليك ليا ويديمك في حياتي".

الجزء الرابع: مواجهة منة وعودة دكتور رامز

فتحت منة الباب بعبوس مصطنع: "كل ده تأخير؟ الصلاة قربت وأنتوا لسه واصلين!".

حسام ضاحكاً: "طب استني ندخل الأول وناخد نفسنا وبعدين ابدأي المحاضرة!". ناولها علبة الشوكولاتة: "اتأخرت عشان كنت بجيبلك دي".

ابتسمت منة فوراً واتسعت عيناها: "لا.. إذا كان كدا ماشي وسماح! الله.. ده النوع اللي بحبه جداً! ادخل ادخل بسرعة.. يا ماماااا! حسام وعاليا وصلوا.. إزيك يا لولو!".

حسام متهكماً: "شوف البت مثبتاني ساعة على الباب، وأول ما شافت الشوكولاتة اتحولت 180 درجة!".

منة بضحك: "الله! مش بطمن على مستقبلي الغذائي برضه؟".

حسام بغمزة: "ممم.. مستقبلك اه؟ لا اطمني أوي وخالص الفترة الجاية".

منة بتوتر وقلق مفاجئ: "إيه؟ مالك في إيه بنبرتك دي؟".

دخلت الأم ورحبت بعاليا وحسام بحفاوة شديدة، وبعد السلام والحديث القصير، ذهب حسام مع حازم ووالده للصلاة وعادوا. وأثناء تناول الطعام في جو عائلي مبهج، قرر حسام فتح الموضوع بجدية.

حسام: "منة.. في عريس متقدملك وكلمني في الشغل، وهو شخص محترم جداً وأنا سألت عليه كتير وتأكدت من طليعته، وعاوز يجي يتقدم رسمي ويعمل خطوبة".

سقطت الملعقة من يد منة، واعتلت الصدمة وجهها واحمرت وجنتاها خجلاً. أكمل حسام كلامه بابتسامة: "العريس يبقى الدكتور رامز اللي عندك في الكلية.. عارفاه طبعاً مش كدا؟".

منة بتلعثم وتوتر شديد: "احم.. ممم.. أه، عارفاه طبعاً.. دكتور عندنا في القسم.. أه".

حسام: "طيب إيه رأيك؟ أحدد معاه ميعاد يجي يقابلنا ولا مش موافقة؟".

منة بتوتر متزايد: "أه.. قصدي لا.. قصدي معرفش! اللي تشوفه أنت وحضرته.. اسأل ماما الأول".

انفجرت الأم وعاليا بالضحك، وقالت الأم: "ههههه فكرتيني بـ ياسمين أختك لما جوزها اتقدم لها وهو جارنا وعارفينه وعارفها من صغرهم، ولما سألناها قالت: مين ده؟ أول مرة أسمع عنه! وهما كانوا متفقين أساساً!".

منة بخجل شديد: "قصدك إيه يا ماما؟ والله العظيم ما اتفقت مع حد ولا أعرف حاجة!".

عاليا مهدئة: "بيهزروا معاكي يا منة مالك اتوترتِ كدا؟ قوليلي بجد إيه رأيك فيه كشخص؟ بتشوفيه كل يوم في الكلية وتعامله عامل ازاي؟".

حسام بضحك: "ربنا يكملك بعقلك يا بنتي! يا أولاد فاكرين عاليا يوم قراية الفاتحة كانت بتقول للناس: مين ده أول مرة أشوفه في حياتي!".

ضحكوا جميعاً على الطاولة، وعقبت عاليا: "واضح إن الإنكار صِفة أبدية وجينات في حواء أول ما تتوتر وتتكسف!".

بعد الانتهاء من الطعام، أخذ حسام أخته منة إلى الشرفة (البلكونة) ليتحدث معها بهدوء بعيداً عن الأعين، بينما دخلت عاليا مع والدته المطبخ لتساعدها في تنظيف الأطباق وتحضير الحلوى.

في المطبخ، قالت عاليا وهي ترتب الكاسات: "إيه رأيك يا طنط نجيبلك غسالة أطباق هنا في المطبخ؟ هتريحك جداً وتوفر عليكي مجهود ووقت كبير".

الام باعتراض قديم: "يا بنتي أنا مقتنعش بنضافة المواعين غير لما أغسلها بإيدي كدا وتحت المية الصابون!".

عاليا بإقناع: "والله يا طنط بتنضف حلو جداً وبتعقم ب حرارة عالية، والاطباق بتطلع بتلمع ونضيفة وزي الفل.. أنا عندي في الشقة مريحاني أوي وموفرة عليا وقت كبير كان هيضيع في وقفة المطبخ. بنخلص أكل وأحطهم فيها وأروح ألبس أو أرتب البيت، بدل وقفة الحوض اللي بتتعب الرجلين والضهر، وفي العزومات الكبيرة بتبقى منقذة".

الأم بتفكير: "والله كلامك يدخل الدماغ.. شكلك ه تخليني أفكر في الموضوع ده بجد".

عاليا: "تستاهل كل جنيه يدفع فيها والله يا طنط، وهجيبهالك بنفسي".

في الشرفة، نظر حسام لمنة بحنان: "بصي يا منة.. اتكلمي براحتك ومتتكسفيش مني خالص، لو مش موافقة ومش مرتاحة قوليلي ونقفل الموضوع، ولو في حد تاني في حياتك أو...".