الفصل الثامن والثلاثون

مرت الأيام والأسابيع سريعة ومبهجة، وجاء اليوم الموعود؛ حيث تم التعارف الرسمي بين العائلتين، ونال رامي قبول واستحسان الجميع نظراً لأخلاقه وجديته، وتمت الموافقة عليه وتحديد موعد الخطبة في القريب العاجل، وقرأوا الفاتحة وسط زغاريط وفرحة عارمة. فرحت ليلى كثيراً بعريسها، وشعرت في أعماقها أنه العوض الجميل والونيس الصادق الذي انتظرته طويلاً ليشاركها دربها.

بعد استقرار الأمور، نزلت عاليا للعمل في الشركة مرة أخرى واستقبلها الموظفون بحفاوة. التقت بالعم سيد (عامل البوفية) الذي ابتسم لها بترحيب حار، فقالت له بمداعبتها المعتادة: "شوفت يا عم سيد.. فضلت أقولك لسه بدري ونرتبط وأنت تتقل عليا وتتمنع! اهو أنا اتجوزت وطيرت من إيدك خلاص ههههه".

ضحك العم سيد من قلبه ودعا لها بالتوفيق والسعادة؛ فكان يفرح كثيراً بكلماتها التي تجبر خاطره وتلطف يومه ومعاملتها الطيبة الاصيلة معه.

أنهت كلامها معه ودخلت مكتبها بكامل نشاطها، لتدخل عليها السكرتيرة شيماء بابتسامة واسعة: "حمد الله على السلامة يا عاليا.. ألف مبروك يا لوزة ونورتي مكتبك! اتفضلي استلمي بقى الشغل". ووضعت أمامها كومة ضخمة من الملفات والأوراق.

نظرت عاليا للملفات بصدمة وقالت: "إيه يا شيماء الاستقبال ده؟ ليه كدا بس من أولها!".

ضحكت شيماء: "ههههه معلش.. شغلك محدش بيعرف يعمله بدقتك وبنفس الطريقة، ربنا يعينك ويقويكي".

عاليا بتنهيدة مرحة: "حسبي الله.. طيب ابعتيلي مج كبير قهوة سادة علشان أظبط دماغي".

شيماء: "من عينيا حاضر".

بدأت عاليا تفتح الأوراق وتقرأ بتركيز، وترتب أفكارها وتنجز مهامها بهمة. وفجأة دقت ليلى الباب ودخلت قائلة: "إيه يا عاليا.. إيه الأخبار عندك؟".

علقت عاليا بتذمر طريف: "آه.. ما دي آخره اللي ياخد إجازات ويتجوز! بتنتقموا مني؟ كل دي ملفات وشغل متراكم!".

طمأنتها ليلى: "يا بنتي مش لازم يخلصوا كلهم النهارده خالص.. براحتك ومتضغطيش نفسك في أول يوم".

عاليا: "شغالة اهو وربنا يسهل ويهونها".

في تلك اللحظة، دخل حازم المكتب وقال بعملية: "أهلاً يا عاليا، منورة الشركة.. خلصتي ملف الإسماعيلية؟".

عقدت عاليا حاجبيها: "إسماعيلية إيه؟".

هتف حازم بمزاح وصدمة: "الله أكبر! إنتي معندكيش فكرة عنه أصلاً؟ أنا قايل لشيماء تنبهك تخلصيه أول حاجة وله الأولوية!".

عاليا: "مقالتش حاجة خالص.. تلاقيها نسيت من دربكة الشغل، استنى أطلعه من النص.. آه اهو، هو ده؟".

حازم بجدية: "أيوه بالظبط.. اشتغلي عليه الأول وعاملي عليه فوكس؛ علشان الجماعة مستعجلين جداً وإحنا أجلنا الميعاد كذا مرة. بصي.. لو مش هتلحقي تخلصيه هنا خديه معاكي البيت، المهم يكون جاهز ومكتمل قبل الميتنج (Meeting) بتاع بكره الصبح".

عاليا باحترافية: "خلاص تمام مفيش أي مشكلة وهيخلص.. والباقي في حاجة تانية ليها أولوية قصوى؟".

حازم: "لا الباقي مش مستعجلين عليه أوي، قدامنا أسبوع ويخلصوا براحتنا".

عاليا: "بارك الله فيك وطمنتي".

التفتت ليلى نحو حازم وقالت بابتسامة: "حبيبي تسلم.. يلا يا حازم نسيبها مع الملفات والدفاتر، دي هتنشأ بينهم قصة حب وإعجاب دلوقتي من كتر الاندماج ههههه".

ضحك حازم والتفت نحو الباب قائلاً بنبرة طريفة يملؤها الغيظ: "آه قصة حب.. أنا أصلاً متغاظ منكم أنتوا الاتنين وعاوز أحب وأعيش الأجواء دي أنا كمان! اشمعنى أنا اللي قاعد سنجل في الشركة دي!".

ضحكت الفتاتان على مظهر حازم، وغادرت ليلى معه، بينما انغمست عاليا في عملها بروح متفائلة مستقرة، وهي تشعر بأمل يملأ الأفق، وثقة بأن القادم في حياتها وحياة أسرتها سيكون أجمل وأروع تحت ظل الحب والوفاء.

غاصت عاليا بين ملفاتها الغارقة في الأرقام والتقارير، ولم تعد تشعر بما يدور حولها من حركة، إلى أن اخترق سكون مكتبها صوت رنين هاتفها الملح.

أجابت وعيناها ما زالتا معلقتين بالأوراق: "ألو.. أيوة يا مي.. الساعة كام؟ إيه ده! لحقت تبقى خمسة؟ لا أنا لسه في الشغل.. وأنتِ خلصتِ؟ خلاص عدي عليا ونروح البيت سوا.. لا مش هنعرف نخرج النهارده، لسه ورايا غدا هعمله.. ههههه أيوة أيوة، يلا نص ساعة والاقيكي قدامي.. باي يا حبيبتي".

بعد ساعة تقريباً، كانت الفتاتان تدلفان من باب الشقة، وضعت عاليا حقيبتها بتعب بينما ارتمت مي على الأريكة بتنهيدة مجهدة.

التفتت مي قائلة: "هتعملي أكل إيه بقى يا ستّو عاليا؟".

ردت حائرة: "مش عارفة والله ومحتارة.. أنتِ رأيك إيه؟ ممم.. خلاص خلاص عرفت! هعمل صينية فراخ بالبطاطس في الفرن، سريعة وتجنن".

صفقت مي بخفة: "تصدقي؟ كنت لسه هقولهالك حالا!".

ضحكت عاليا: "عيب يا بنتي.. ده إحنا توينز (Twins) وعقلنا واحد!".

دندنت مي بمرح: "صاحبي توب توب.. بحبه حب صحيح!".

انطلقت الفتاتان إلى المطبخ؛ حيث بدأت عاليا في تجهيز الطعام بمساعدة مي وسط أحاديث ضاحكة لا تنتهي عن الشغل والذكريات. وبعد أن انتهت من إدخال الصينية إلى الفرن، أعدت طبقاً من الكريم كراميل ووضعته بمهارة، ثم شرعت في تحضير عصير الفراولة والموز باللبن، ذلك المزيج المنعش الذي يعشقه حسام وتعشقه هي أيضاً. وفور انتهائهما من كل شيء، جلستا في الصالة أمام التلفاز لتستريحا قليلاً، حتى قطع خلوتهما اتصال جديد.

أشارت عاليا بسبابتها: "ثواني يا مي.. ده حسام بيصل".

أجابت بنبرة دافئة: "أيوة يا حبيبي..".

جاء صوت حسام عبر الطرف الآخر: "أنا خلصت الشغل اهو وعديت على السوبر ماركت أجيب الحاجات الناقصة للبيت.. كنتِ بتقوليلي عاوزه إيه الصبح؟".

أملت عليه الطلبات التي تنقصها، ثم تذكرت وأضافت: "حبيبي متنساش النسكافيه، وحاجة للصداع علشان عندي شغل كتير لسه هكمله.. لا هنا في قهوة خلاص.. ماشي هات معاك.. هههه أيوة طبعاً ده أساسي.. الحاجة الحلوة! هههه طيب خلاص.. برطم برطم براحتك! يلا باي متتأخرش".

انفجرت مي ضاحكة فور إغلاق الخط: "بيبرطم برضه؟".

ضحكت عاليا بقوة: "ههههه أيوة، كان الله في عونه والله وبيصعب عليا أوقات.. بيجي فاصل ومش قادر. قلتله ننزل نجيب الطلبات دي سوا في الويك إيند (Weekend)، بس هو أصر وقال لما يكون يوم إجازة كاملة علشان متعبش".

علقت مي بواقعية: "عندك حق، إنتِ أصلاً مكنتيش هتلحقي مع ضغط ملفاتك".

قامت عاليا متجهة للمطبخ: "فعلاً.. هروح أحط الكريم كراميل في الثلاجة يسقع، زمانه برد وبقى تمام".

نظرت لها مي بإعجاب: "أنا أموت وأعرف إنتِ اتعلمتِ الطبخ ده كله إمتى وفين؟".

ردت عاليا بغمزة ماكرة: "عن طريق الإنترنت يا بنتي.. سر المهنة الإلغائي!".

هتفت مي بضحكة مقلوبة: "يقطع النت على النتيت على اللي عينتّو عليه بالمنظر ده! ده إنتِ بقيتي شيف!".

عاليا: "هههههه هموت.. فصلتيني ضحك! هروح أنا بقى آخد دوش سريع وأغير هدومي عشان ريحة البصل والأكل علقت فيا.. خدي راحتك مش هتأخر عليكي".

مي: "ماشي يا لوزة.. هكمل أنا الفيلم عقبال ما تخلصي".

بعد فترة وجيزة، سُمع صوت مفتاح الباب يعلن وصول حسام. دخل حاملاً الأكياس، ووضعها في المطبخ ثم خرج للصالة ملقياً السلام.

حسام: "أهلاً يا مي.. إزيك وإيه الأخبار؟".

مي بمزاح: "الحمد لله يا حسام.. معلش بقى اتعود على وجودي في الرايحة والجاية!".

ابتسم حسام برحابة صادقة: "يا سلام يا بنتي! ده إحنا من يوم ما وعينا على الدنيا وإحنا مع بعض إخوات وأصحاب والبيت بيتك.. هي عاليا فين؟".

مي: "تسلملي يارب.. عاليا جوه في الدوش وزمانها جاية".

حسام: "طيب تمام.. هروح أغير هدومي سريعاً وأجي ناكل، لأني واقع من الجوع بجد".

خرجت عاليا بعد قليل برائحة منعشة، وقالت بحماس: "معلش يا ميوش اتأخرت عليكي.. يلا بينا نجهز السفرة قبل ما حسام يخرج".