أشباح الماضى فى الممرات

نزلت رانيا من البرج وهي تشعر بإنها حققت انتصاراً غير متوقع، فالقبول في شركة بحجم "الفريدة" وفي قطاع حيوي كـ "إدارة الأزمات" لم يكن بالأمر الهين، خاصة تحت قيادة رجل بصرامة كريم الألفي.

بمجرد وصولها إلى مقهى قريب من الشركة، وجدت صديقتها المقربة "مي" تنتظرها على أحر من الجمر، وعيناها تلمعان بالفضول.

قفزت مي من مكانها فور رؤية رانيا وقالت بعصبيتها اللطيفة المعتادة:

– "إيه يا بنتي التأخير ده كله؟ حسيستيني إنك كنتِ بتتفاوضي على ميزانية الدولة! احكيلي بسرعة، البعبع عمل فيكي إيه؟"

جلست رانيا وأخذت نفساً عميقاً، ثم ابتسمت وهي تتذكر موقف "الإنعاش اليدوي" وقالت بتلقائية:

– "البعبع ده يا مي طلع شخصية جادة زيادة عن اللزوم، من النوع اللي بيمشي بالمسطرة، بس بصراحة؟ ذكي جداً وبيفهمها وهي طايرة!"

ضيقت مي عينيها بنظرة خبيثة وقالت:

– "أوبا! شكلنا كده مش بس اتعينا، شكلنا معجبين بالمدير من أول يوم ولا إيه؟"

ضحكت رانيا وقالت وهي تلّوح بيديها بنفي سريع:

– "معجبين إيه يا مي انتِ كمان! ده راجل لو ابتسم وشوشنا هتتكهرب من المفاجأة! وبعدين أنا رايحة أشتغل وأثبت نفسي، مش رايحة أدور على مشاعر.. أنا الشغل بالنسبة لي مسألة حياة أو موت بعد وفاة بابا الله يرحمه، ولازم أكون قد المسؤولية."

ترطب وجه مي بالدفء وقالت وهي تربط على يد صديقتها:

– "الله يرحمه يا حبيبتي، وأنا واثقة إنك هتبقي أشطر واحدة هناك.. بس قوليلي، هو الشغل هيبدأ من بكرة على طول؟"

هزت رانيا رأسها وهي ترشف من العصير:

– "أيوه، الساعة تمانية الصبح بالدقيقة، وقالي لو تأخرت دقيقة هتبقى التخشيبة مكتبي!"

في هذه الأثناء، وفي الطابق المخصص لمدراء القطاعات داخل الشركة، كان كريم يجلس في مكتبه الفخم، وأمامه صديقه المقرب ومستشاره "حسام".

كان حسام يبتسم بسخرية وهو يرى كريم يعيد قراءة ملف رانيا للمرة الثالثة، فقال بنبرة هادئة وممزوجة بالدعابة:

– "إيه يا كريم؟ الملف فيه سحر ولا إيه؟ أول مرة أشوفك مهتم بموظفة جديدة للدرجة دي من أول المقابلة!"

رفع كريم عينيه بنظرة صارمة كعادته وقال ببرود:

– "مش قصة اهتمام يا حسام.. البنت ذكية وسريعة بديهة، وحلت مشكلة الاستقبال بأسلوب غير تقليدي.. إحنا محتاجين النوعية دي في قطاع الأزمات."

ابتسم حسام وقال وهو يغمز بعينه:

– "ماشي يا سيدي.. بس برضه أول مرة أشوفك بتعدي كلمة 'تخشيبة' و'إنعاش يدوي' لموظف وتحتفظ بهدوءك! البنت دي كسر الجمود اللي عندك يا كريم."

قبل أن يرد كريم، طُرِق باب المكتب ودخل أحد المدراء التنفيذيين للشركات الحليفة، وكان يرافقه شاب أنيق، يحمل ملامح مألوفة، لكن وجهه كان يعكس تحفزاً غريباً.

قال المدير الضيف:

– "أستاذ كريم، أحب أعرفك بـ 'آسر'، ابن عمك من الفرع الثاني للعيلة، وهيكون معانا ممثل في الشراكة الجديدة بين الشركتين."

وقف كريم وصافح آسر برسمية وهدوء حذر، فالعلاقة بين فرعي العائلة كانت دائماً تشوبها المنافسة والبرود.

قال آسر وهو يبتسم ابتسامة غامضة، ثم أخرج من جيبه ملفاً صغيراً وضعه على الطاولة:

– "أهلاً يا كريم.. مبسوط إننا هنشتغل سوا، بالذات لما عرفت إن عندكم طاقات جديدة انضمت للشركة.. زي الأنسة رانيا مثلاً."

توقفت حركة كريم تماماً، وشخصت عينياه بحدة نحو آسر، بينما تابعت نبرة آسر الخبيثة:

– "أصل رانيا.. كانت خطيبتي زمان يا كريم!"

ساد صمت جاف ومكهرب في الغرفة، وتبادل حسام وكريم نظرة خاطفة، بينما بدت على وجه كريم ملامح جمود مخيف أخفى خلفه بداية عاصفة غير متوقعة!