الرهان الرابح

الفصل الأول: الرهان الرابح

في تمام الثامنة مساءً، كانت أضواء قاعة المناسبات تتلألأ في عتمة الليل، وتنحدر السجادات الحمراء المصنوعة بعناية لتستقبل الحاضرين، بينما تعلو في الأرجاء أصوات الموسيقى المبهجة التي تملأ المكان دفئًا واحتفالاً.

ولجت من الباب الزجاجي الضخم فتاةٌ في العقد الثاني من عمرها، تحيد بنظرها نحو الزينة الفاخرة التي طالما حلمت بها. كانت ترتدي فستانًا بنيّ اللون يتميز بالبساطة والأنشطة الأنيقة، ينسدل برقة ليبرز ذوقها الرفيع، وينتهي بحذاء ذي كعبٍ عالٍ نسبياً انتقتْه بعناية ليُداري قِصر قامتها ويمنحها إطلالة واثقة. تقدمت بخطوات متزنة نحو منصة العروسين، والابتسامة تعلو وجهها، تحمل بين يديها مباركة صادقة لصديقة عمرها التي ظنت أنها تشاركها فرحتها.

اقتربت من العروس المفترشة مقعدها الكريستالي الناصع، وقالت بنبرة ضاحكة ومرحة:

— "ألف مبروك يا حبيبتي.. كده برضه؟ مش اتفقنا نعملها سوا هنا في نفس القاعة؟ إيه ده! أنتِ جبتي فستان زي اللي كنت مختاراه لخطوبتي بالظبط؟ بس يجنن عليكي بصراحة.. هو فين العريس اللي حضرتك مخبياه عني يا جزمة؟ ههههههه."

نظرت إليها سارة بجمودٍ شابه بعض الارتباك، ثم ابتسمت ابتسامة باهتة وقالت:

— "الله يبارك فيكي يا مريم.. ثواني وجاي أهو.. أهو جه."

التفتت مريم تبحث ببطء بين الحضور المتراصين حول الطاولات، ثم وقعت عيناها على هيئة ألفَتها جيداً، فضحكت بخفة وهي تقول:

— "أهو فين يا بنتي مش شايفاه؟ إيه ده! عمر؟ أنت هنا من إمتى؟ معدتش عليا تاخدني ليه؟ ههههههه قوم يا ابني من مكان العريس، بتقولك جاي هييجي يتخانق معاك!"

نظرت سارة إليها بنبرة حازمة خالية من أي مزحة، وقالت ببرود:

— "يقوم إزاي؟ وهو العريس!"

سقط الخبر على مسامع مريم كدلوٍ من الماء البارد في يومٍ شديد البرودة. انجمعت حواسها، وتجمّدت الدماء في عروقها. نظرت إليه ثم إليها، تتنقل بعينيها بين البدلة السوداء الأنيقة التي خططت لشراء مثلها، وبين فستان سارة البراق. لم تقوَ على الاستيعاب؛ بدا العالم حولها وكأنه ينسحب ببطء ويُغرقها في طنينٍ مكتوم.

سألت بصوتٍ ضعيف مكسور، تخنقه العبرات:

— "هو العريس إزاي؟ مش فاهمة.. إيه المقلب الرخم ده؟"

ردت سارة بجمودٍ قاسي وقاطعت تخيلاتها:

— "ده بجد مش هزار."

احمرّت عينا مريم وتصاعدت دقات قلبها بجنون، وشعرت بطعنة نادرة الغدر تتغلغل في صدرها. اهتزت نبرتها وهي تواجههما بالتفاصيل التي حفظتها عن ظهر قلب:

— "هو العريس؟! وأنتِ العروسة؟! نفس فستاني اللي وريتهولك.. نفس القاعة اللي اتفقنا نحجزها.. البدلة اللي أنا مختاراها ليك، ونفس الشبكة اللي خليتني أختارها! وفي نفس التاريخ اللي كنا محددينه؟! هي دي الظروف اللي حصلت وعلشانها اتأجلت خطوبتنا؟ وأنتِ يا صاحبتي عملتي فيا كده؟! آاااه.. علشان كده كنتِ مخبية عني كل حاجة؟ وتقوليلي مفاجأة؟ كل ده ليه؟! عملت فيكم إيه؟ انطقي!"

تراجع عمر خطوة إلى الخلف، واضعًا يديه في جيب بنطاله، ثم نطق لأول مرة بنبرة مستهترة لا تحمل أي قدر من الندم:

— "سوري يا مريم.. مكنش ينفع أخسر الرهان، بس بصراحة.. يستاهل."

في تلك اللحظة، تعالت أصواتٌ من أطراف القاعة؛ إنهم زملاؤهم في الجامعة الذين تجمهروا يرقبون المشهد باستمتاع. تقدم أحدهم مبتسمًا بسخرية وقال بصوتٍ مرتفع:

— "إيه يا مريم؟ مش هتسمعينا حاجة؟ كلنا عارفين إن صوتك حلو، ولا هتبخلي على أصحابك؟"

تعالت ضحكات الجميع في القاعة، وتصاعدت الهمسات المستهزئة ونظرات الشماتة الموجهة نحوها. أردف آخر وهو يلوح بيده:

— "هتغني إزاي بس بَقى؟"

في حين أضاف زميلٌ آخر بشماتة واضحة:

— "يا عيني على حب ولا طالش!"

تسمرت مريم في مكانها، وعيناها تنظران إلى القاعة التي تحولت فجأة إلى حلبة لسخرية الجميع منها. لكن شيئًا ما داكنًا توهج في أعماقها؛ رفضت أن تسقط أمامهم، تمالكت نفسها بأقصى ما تملك من قوة، وضغطت على أعصابها حتى كادت أناملها تتصلب، ثم رفعت رأسها وقالت بابتسامة مصطنعة ثابتة:

— "لا إزاي؟ هغني طبعًا.. طبعًا! هو أنا عندي أغلى منكم؟ أنا بس.. بس مكنتش عاملة حسابي، دقائق هجهز نفسي."

أثناء خطوتها للابتعاد عن التجمهر، لمحها والد عمر وهو يقف بالقرب من المدخل، فتقدم نحوها بخطوات هادئة ونبرة ملؤها الود واللطف:

— "مريم! إزيك يا بنتي، وإزي والدك؟"

رمقته مريم بحيرة شديدة؛ كيف يتكلم بكل هذا الود والترحاب، وقد أخبرها عمر سابقاً برفض والده الصارم لمحاولاته لاتمام الخطبة، وأنه السبب الرئيسي في تأجيلها مراراً وتكراراً؟

ردت مريم بحزنٍ كتمته في أعماقها:

— "الحمد لله بخير.. إزيك يا عمو؟"

تطلع والد عمر نحو العروسين بنبرة شوبها الأسى والأسف، وقال:

— "الحمد لله.. كنت أتمنى تكوني مكانها، لكن النصيب بقى. أكيد باباكي رفض بسبب استهتار عمر، بس أنتِ بتعملي إيه هنا؟"

اتسعت عينا مريم بتعجب وصدمة في بداية الأمر، ثم بدأت أجزاء الصورة تترابط في ذهنها سريعا. أدركت حجم الكذبة والخدعة التي عاشت فيها. أطلقت ضحكة قاطعة ومجروحة هزت أركانها، وقالت:

— "آاااه من النصيب يا عمو.. وآه من الغدر! هو فهمك إن بابا رفض؟"

ضحكت مرة أخرى بنبرة مريرة وهي تتابع:

— "ابنك نصاب أوي يا عمو! أنا كنت جاية خطوبة صاحبتي.. طلع العريس خطيبي أنا! مبروك يا عمو.. مبروك!"

تركته وذهبت مسرعة، بينما وقف الرجل في ذهولٍ تام لا يفهم ما يجري حوله، لكن مرارة حديثها ونبرتها المكسورة جعلتاه يشعر بأن هناك أمورًا كثيرة مظلمة لا يعلم عنها شيئاً.

أسرعت مريم نحو المرحاض الخالي، وأغلقت الباب خلفها. وهناك، أمام المرآة المصقولة وتحت الضوء الأبيض الساطع، انهمرت دموعها المحبوسة بغزارة لتغسل قسوة الخيانة. غسلت وجهها بماء بارد، ومسحت آثار الدموع بعناية، ثم أردفت تعيد رسم الابتسامة على وجهها بثبات؛ فلن تمنحهم متعة رؤية انكسارها.

في تلك اللحظة، فتحت الباب إحدى الفتيات التي شهدت الموقف بالخارج وتتبعتها لتطمئن عليها. تقدمت ندى ونظرت إليها بقلق:

— "اهدي يا مريم.. اهدي، أنتِ عارفة كام واحد من اللي بره مستني يشوفك كده؟ أنا حذرتك كتير منها ومنه، لكن أنا مكنتش أتخيل يعملوا كده! كلمتك كتير لما شفته علشان أمنعك تيجي، لكن باباكي رد عليا وعرفت إنك نسيتِ التليفون في البيت.. اهدي كده، أقولك امشي ومتدخليش تاني."

ردت مريم بثباتٍ صلب وعينين تلمعان بالحدّة:

— "خلاص يا ندى، اللي حصل حصل.. أنا كويسة، هبقى كويسة وهيشوفوا. هاتي تليفونك والهاند فري."

نظرت إليها ندى بحيرة واستخرجت الهاتف:

— "أهم.. بس هتعملي إيه بيهم؟"

قالت مريم بنبرة ملؤها التحدي والصرامة:

— "هغني.. ونشوف رهان مين الرابح!"

بحثت مريم في قائمة الأغاني بالهاتف حتى عثرت على أغنيتها المنشودة. وضعت سماعات الأذن واستمعت إليها لمرات معدودة لضبط الإيقاع والأنفاس، ثم خلعت السماعات، واستجمعت شتات قوتها، وخرجت باتجاه المسرح الصغير وسط دهشة الجميع الذين ظنوا أنها هربت ولن تجرؤ على المواجهة ثانية.

أمسكت بالمايكروفون، وساد الصمت في القاعة بينما بدأت الموسيقى تصدح في الفضاء النقي، لتنطلق مريم بصوتٍ عذبٍ قويّ يخالطه شجنٌ دفين:

"ثمن الخيانة خيانة.. وياريت أقدر أخون

أيوه كان حبك أمانة.. بس كان لازم يهون

لو في الظلام سيبني وارحل مع ضيك

ولا شيء حيغصبني إني أكون زيك

حقدر على الأحزان وأتعلم النسيان

وفوق غدرك أكون..

جاير أنين الليل يهزم ساعات صوتي

لكن محال الريح ترميه في تيارك

أعيش بقلب جريح.. ولا عمره حيختارك

كان حبك أمانة.. كان لازم يهون

يمكن أشتاق وألاقي ذكرى تصحي حنيني

لكن عمري اللي باقي.. عمرك ما حتلاقيني

بكرة يجيلك يوم تلقى نفسك مكاني

تصحى وأنا في النوم وتداول راح فين زماني؟

كان حبك أمانة.. كان لازم يهون

ثمن الخيانة.."

مع آخر نبرة من صوتها، خيم الذهول على القاعة بأكملها، وتحولت نظرات الشماتة والسخرية بين الحضور إلى انبهارٍ وإعجابٍ شديد بشجاعتها وقوة صوتها. تقدمت خطوتين نحو العريس المتفاجئ، ومدت يدها بالمايكروفون إليه، ثم قالت بابتسامة ساخرة وواثقة:

— "مبروك.. تعيش وتاخد غيرها!"