الفصل الحادي عشر

كان الصمت مميتًا، لا يقطعه سوى نظرات "الزعيم" الحادة المثبتة على خيال الرجل المقتول أمامه.

قال بصوتٍ جهوري هزّ أركان المكان بقوة: "دي آخرة أي حد يشكك في اختياراتي!"

التمعت عيناه بقسوة وصرامة وهو يتابع تحذيره: "داغر ده ابني.. ولو أي حد فكر يقول عليه أي كلمة، حتى بينه وبين نفسه، يبقى ميلومش إلا نفسه."

قطع هذا الجو المشحون صوت خطوات راكضة تقترب بسرعة جنونية.

اقتحم أحد رجاله المكان، يلهث بشدة وأنفاسه تكاد تنقطع، ليصرخ برعب: "الحقنا يا زعيم.. كارثة حصلت.. كارثة!"

في مكان آخر، كان التوتر سيد الموقف. وقف "ليث" يطالع غسق بملامح يكسوها الاستغراب والغضب المكتوم.

قال بنبرة حادة: "أنا مش فاهم شرط إيه ده اللي أنقذ حياتي! أنا لازم أعرف كل حاجة دلوقتي، لازم تحكيلي كل حاجة."

نظرت إليه "غسق" بعينين تملؤهما الشفقة والحنان، واقتربت منه بخطوات مهزوزة.

قالت بصوت مكسور: "متخافش يا أخويا، أنا اشتريت حياتنا.. بس الأول عايزاك تهدى وأنا هحكيلك كل حاجة."

أغمضت عينيها بألم، وعادت بذاكرتها إلى الوراء.. إلى تلك اللحظة التي قلبت حياتها رأسًا على عقب.

(فلاش باك)

وقف "داغر" أمامها ببرود تام، برود كان يخفي خلفه بركانًا يغلي من الداخل.

قال بنبرة خالية من المشاعر: "في أوامر جاتلي بقتل أخوكي، ولازم أنفذها.. معنديش خيار تاني."

هنا، انهارت حصون "غسق". سقطت على ركبتيها ودموعها تنهمر كالسيل، وتشبثت بقدميه وهي تترجاه بانهيار.

صرخت بين شهقاتها المتلاحقة: "بالله عليك سيبه في حاله! بالله عليك ده الحاجة الوحيدة الحلوة اللي بقيالي، أنا معنديش غيره!"

رفعت عينيها الغارقتين في الدموع وقالت: "متأذيهوش.. وأنا مستعدة أعملك أي حاجة أنت تعوزها."

بالنسبة لـ "داغر"، كانت هذه الكلمات بمثابة الفرصة التي جاءت على طبق من ذهب.

رغم أنه كان قد تراجع بالفعل عن قتلها بسبب تلك الصورة التي جمعتها به وهم صغار، إلا أنه قرر استغلال الموقف.

قال بمكر: "بصي.. أنا يعتبر عاديت الزعيم عشانك لأنه طلب مني أقتلك، بس أنا شفقت عليكي."

توقف لثانية قبل أن يتابع بصرامة: "بس أنا مش هبقى رحيم للدرجادي وأتحدى الزعيم عشانك إنتي وأخوكي من غير مقابل."

اقترب منها خطوة وأضاف: "لازم يكون عندي مبرر قوي إني مقتلكيش إنتي وأخوكي.. مبرر أحطه قدام الزعيم ويقتنع بيه."

ردت "غسق" بلهفة ودموعها لا تتوقف: "إيه هو؟ أنا تحت أمرك في اللي تطلبه."

انحنى "داغر" لمستواها، ابتسم بسخرية خفيفة وقال: "شاطرة.. الشرط هو إنك تكوني حامل!"

تراجعت "غسق" للخلف بصدمة، واتسعت عيناها بقلق وهي تحاول تجميع حروفها بصعوبة: "تـ.. تقصد إيه؟"

ضحك "داغر" باستهزاء ووقف مجددًا: "متخافيش، مش هقدر أخليكي تحملي بالسرعة دي.. أنا مش طرزان يعني!"

رمقها بنظرة تقييمية من قمتها لقاعها وأضاف ببرود: "ثم إنك مش من نوعي المفضل، ودقت منك كتير قبل كده ومعجبونيش."

بدأت أنفاسها تنتظم قليلًا، وحل الاستغراب محل الخوف وهي تنتظر بقية حديثه.

أكمل بجدية: "إحنا هنتجوز، نكتب ورقتين.. بحيث لو الزعيم كشفنا في يوم من الأيام، أقوله إنك مراتي وكنتي حامل وقتها، وبعدتك عن كل حاجة عشان متطلعيش في وشه تاني."

ابتلعت ريقها وسألته بحذر: "طيب.. وبالنسبة لليث؟ هيبقى إيه تبريرك لعدم قتله؟"

ابتسم "داغر" بغموض مخيف وقال: "لا، ليث ده قصة تانية خالص.. لو اتأكدت منها، الزعيم نفسه ممكن يقتلني لو لمست شعرة منه! والموضوع ده أصلا ميخصكيش فمتدخليش فيه."

(عودة للواقع)

نظرت "غسق" في عيني أخيها وأنهت حديثها: "شرط داغر إنه يتجوزني.. وأنا وافقت."

كانت كلماتها كطعنة خنجر أصابت قلب "ليث". صرخ بعدم تصديق: "إزاي يعني توافقي على حاجة زي دي؟ إنتي هبلة؟"

حاولت تهدئته قائلة: "الزعيم كان طالب موتي وموتك.. دي فترة مؤقتة وهننفصل."

رد "ليث" بانفعال وغيرة واضحة: "بس مش هتعيشي معاه!"

قاطعهم صوت "داغر" الذي تدخل في حديثهم ببروده المعتاد: "متدخلش أنت بس.. وجهز نفسك عشان تشهد ع العقد."

احتقن وجه "ليث" بالغضب، وتوعد لداغر في نفسه قائلًا: (لما أشوف هتوصلها إزاي وهتكتب عليها إزاي.. مبقاش أنا ليث لو سيبتك تتهنى بيها .. غسق ليا أنا ومستحيل تبقى لغيري).

وفي مكان لا يقل توترًا، كانت "شغف" لا تزال غارقة في ذكرياتها الصادمة مع "زين".

هتفت بصدمة وعدم استيعاب: "زين أنت بتقول إيه؟ أنت عارف أنت بتطلب مني إيه؟"

استكملت بانهيار: "إزاي عايزني أتجسس على أمي، وكمان أجيبلك دلائل تدينها وممكن أوصلها لحبل المشنقة بإيدي؟ أنت إزاي أصلا تفكر في حاجة زي دي؟"

ولأول مرة، فقد "زين" قناعه الهادئ وتخلى عن بروده.

صرخ بعصبية وصوت عالٍ أرجف قلبها: "مالك خايفة عليها أوي كده ليه؟! دي متستاهلش.. حتى بعد كل اللي شوفتيه؟!"

اقترب منها وعيناه تشتعلان بالغضب: "أطفال وستات وشباب وشيوخ.. كلهم قتلتهم بدم بارد، وهي حتى متعرفش قتلت مين ومقتلتش مين!"

تنفس بصعوبة وأردف: "أنا وريتك صورة واحدة بس من خوفي على مشاعرك.. لكن في بلاوي كتير أمك بتعملها إنتي متعرفيش عنها حاجة."

هدأت نبرته قليلًا، لكنها أصبحت أكثر جدية وعمقًا: "ثم إني هقولك على معلومة إضافية.. ودي كانت السبب الرئيسي اللي خلاني أطلب منك تدخلي."

نظر في عينيها مباشرة وقال: "وإلا أنا ميمشيش شغلي حتة عيلة صغيرة زيك.. أنا أعرف أعمل كل حاجة وأجيب اللي أنا عايزه."

أكمل بصدق مرير: "بس خوفي عليكي هو اللي خلاني أعمل كده وأدخلك في الحوارات دي."

سكتت "شغف" للحظة، وعقلها يدور في دوامة من التساؤلات، لتسأله بحيرة وتوجس: "أنت تقصد إيه؟ أنا مش فاهمة!"

نظر إليها "زين" نظرة طويلة وقال بهدوء يحمل ألف معنى: "قصدي..."