الثالث

كانت الشمس قد نثرت خيوطها الذهبية ليعمّ ضوءها الكون بأكمله، معلنةً عن قدوم صباحٍ جديد تتخلله بدايات ونهايات، وما بينهما يذوب القلب ذوبانًا.

كان الجميع حاضرون بشقة زينب بعد استقبال المولود الجديد، حيث كانت صافيه تقوم برعاية زينب، وتُسر تحمل المولود، وغزل تساعد «أم حسين» في تدبير شؤون المنزل.

نهض «علي» عن مقعده وهو يتحدث إلى عبدالقادر قائلًا:

— اللي جابلك يخليلك يا قدّورة، وحمد الله على سلامتهم.

نهض عبدالقادر احترامًا لوالده وقال:

— الله يسلمك يا با، ويبارك في عمرك، يتربى في عزك إن شاء الله.

تمتم الأب وهو يتجه باتجاه باب الشقة:

— يتربّوا في عزك إنت وأمهم يا ابني، هنزل أنا بقى أريح شوية قبل صلاة الضهر.

— اتفضل يا حج.

نهض سليمان بدوره ليربت على كتف أخيه قائلًا:

— اتجدعن يا قدّورة، حمد لله على سلامتهم.

— الله يسلمك يا سليمان، رايح المحل ولا إيه؟!

أومأ سليمان موافقًا وقال:

— أيوة، هروح أبص بصّة كده وأجي أريح شوية، سي يحيى منيمناش الليل.

ابتسم عبدالقادر وقال:

— صحيح، إنت مكلمتش يحيى؟ اطمنت عليه وصل ولا لسه؟

— والله راح عن بالي خالص، بس أكيد وصل، دي الساعة داخلة على 11.

— طب كلّمه كده قبل ما تنزل، ألا أنا اتلهيت أنا كمان.

أخرج سليمان هاتفه وقام بالاتصال بهاتف يحيى، ليقطب حاجبيه قائلًا:

— التليفون مقفول!

— طيب جرّب تاني كده، جايز قاعد في حتة مفيش فيها شبكة.

حاول سليمان مرات عديدة دون فائدة، فنظر إلى أخيه وقال:

— برضو مقفول!

ساورهم الشك وانتابهم القلق، ليقول سليمان:

— أنا هكلم «حنّا» أسأله إذا كان راحلهم ولا لأ.

على الفور نطق عبدالقادر قائلًا:

— أيوة فكرة، كلّمه.

قام سليمان بالاتصال بـ«حنّا» أمين مخازن القماش بالمصنع الذي يتعاملون معه، فأجاب قائلًا:

— أيوة يا عم سليمان، كنت لسه هكلمك، التسليم اتأخر والريس رؤوف مستعجل وعمّال يسأل على يحيى وعبدالقادر.

ازدادت خفقات قلبه ليردف مستفهمًا:

— هو يحيى لسه موصلش؟! ده طالع من الساعة 5 الفجر.

— لأ، لسه محدش جه، أعمل إيه دلوقتي في البضاعة بتاعتكوا؟ أقفل وأروح ولا أستنى شوية؟

لم يُجب سليمان، بل أنهى المكالمة على الفور، ليعاود الاتصال بهاتف يحيى، ولكن الهاتف ما زال مغلقًا، مما جعله يضطرب، ونظر إلى شقيقه بخوف وقال:

— وبعدين يا عبدالقادر؟! يحيى تليفونه مقفول وحنّا بيقول إنه مراحش!! هنتصرف إزاي؟

مسح عبدالقادر وجهه بضيق وتوتر وقال:

— طيب خلينا نستنى شوية بدل ما نوتر روحنا عالفاضي، ولو مجاش أخبار تبقى إنت تسافر له.

أومأ سليمان وهو يحاول إخفاء توتره وقال:

— تمام، معاك حق، أنا هنزل دلوقتي ولو في جديد هبلغك.

نزل سليمان إلى شقته ليصطدم بغزل، حيث كانت تفتح الباب، فنظر لها وقال:

— مالك يا غزل؟ بتعيطي ليه؟!

جففت وجهها وقالت وهي تنظر للأرض:

— مفيش حاجة يا عمو سليمان.

— لأ في، حد مزعلك ولا إيه؟!

سالت دمعاتها تلقائيًا وقالت:

— لأ أبدًا، أنا قلبي مقبوض بس وحاسة إني مش عارفة أتنفس، قولت أنزل أصلي ركعتين.

أطلق تنهيدة حارة وقال:

— ربنا يستر يا بنتي، إنتِ طالعة؟

أومأت بتأكيد وقالت:

— أيوة، هطلع أطمن على زوبة ويحيى وأمشي بعدها.

ثم رفعت ناظريها إليه وقالت بقلق:

— كلمت يحيى ولا لأ يا عمو؟!

مسح وجهه بضيق وزفر مطولًا ثم قال:

— والله يا غزل مش عارفين نوصل له، تليفونه مقفول، وبكلم الناس اللي مفروض يستلم منهم بيقولوا مجاش، ربنا يستر.

عادت عيناها لتدمع من جديد، وازدادت ضربات قلبها وقالت بخوف:

— طيب وبعدين؟ ما تكلم حد من المرور طيب تسألهم على نمر العربية، وهما يشوفوا إذا كانت عدت ولا لأ.

تهلل وجهه وقال:

— عفارم عليكي يا غزل، كانت تايهة عني فين الفكرة دي.

على الفور أخرج هاتفه ليباغته اتصال من هاتف يحيى، ليجيب على الفور قائلًا بلهفة:

— ألو.. أيوة يا يحيى.

— ألو، السلام عليكم، حضرتك أستاذ سليمان؟

— أيوة أنا، مين حضرتك؟!

زم الرجل شفتيه بأسف وقال:

— التليفون ده لقيناه على طريق مصر إسكندرية عند محطة الزكي بتاعة البترول، كان مرمي على الأرض...

قاطعه سليمان قائلًا:

— ده تليفون أخويا يحيى الهنداوي!

أكمل الرجل بأسف:

— الحقيقة في حادثة هنا على الطريق، والتليفون كان مرمي على الأرض، وإحنا مش عارفين نوصل لصاحب التليفون ولا للي عمل الحادثة...

وكأن الأرض ضاقت عليه بما رحبت حتى أصبح لا يستمع إلى ما قيل، ليسقط الهاتف من بين يديه أرضًا وهو يقول:

— يحيى عمل حادثة.

شقّت صرخاتها سكون الكون، ليجتمع الكل على صوته وهم يتساءلون:

— في إيه يا سليمان؟ مالها غزل؟!

تحدث سليمان وهو يشعر بأن الأرض تميد به فقال:

— يحيى عمل حادثة، واحد كلمني من تليفونه دلوقتي وبلغني.

هرع الكل باتجاه موقع الحادث، والقلق يأكل دواخلهم وقد أخذ منهم كل مأخذ، خاصة عندما رأوا سيارات الإسعاف والشرطة والحشود الغفيرة تجتمع على جانبي الطريق، ودخان كثيف يغطي المكان من حولهم.

ترجّل الأب وسليمان وعبدالقادر ويُسر من السيارة يركضون بلهفة وخوف وأمل بداخلهم أن يكون الخبر غير صحيح، ليتقدم منهم الشرطي وهو يمسك بمحفظة تعرّفت يُسر إليها فورًا وقالت:

— دي محفظة يحيى.

نظر الشرطي إليها وغمرهم جميعًا بنظرات آسفة قبل أن يردف قائلًا:

— يحيى علي كامل الدمنهوري؟!

أومأ الأب مؤكدًا وقال:

— أيوة يا حضرة الظابط، ابني جراله إيه؟! وعربيته فين؟!

نظر الظابط إلى الدخان الكثيف ثم أعاد النظر إليهم ليقول:

— عربية يحيى (س ص ج 6541)؟!

أومأ سليمان قائلًا:

— أيوة صح.

تمتم الظابط آسفًا وقال:

— الكاميرات اللي في محطة البترول رصدت العربية وقت ما اصطدمت بتريلا وانقلبت في منطقة منخفضة، مما أدى لاشتعالها وتفحمها، وتم نقل الجثة لمشرحة مستشفى الهلال المركزي... البقاء لله.

سقط الأب مغشيًا عليه، قبل أن يهرع إليه أبناؤه يحملونه مسرعين باتجاه المستشفى.

بعد إفاقة الأب كانوا يتسارعون نحو المشرحة ليستوقفهم الطبيب قائلًا بفظاظة:

— يا جماعة الزحمة دي ملهاش لازمة، وبعدين للأسف الجثة متفحمة، يعني منصحش حد يدخل يشوفها أصلًا.. ياريت تخلصوا الإجراءات وتستلموا الجثة وتتفضلوا.

كان الحزن قد مزّق قلوبهم وبدّد أرواحهم حتى أصبحوا كالموتى؛ لا ينطقون ولا يسمعون، بل يكادوا لا يفقهون شيئًا ولا يشعرون.

عادوا إلى المنزل يحملون جثمانه المشوّه، لينتشر على الفور خبر موته، ويبدأوا في إجراءات الدفن والعزاء.

كانت «غزل» كالقالب المصمت، لم تنتج عنها أية ردة فعل، فكانت تجلس بالعزاء تتشح بالسواد في صمت وهدوء، حتى إنها لم تذرف دمعة واحدة.

لقد كانت تعاني من أولى مراحل الصدمة النفسية، ألا وهي «الإنكار»، حيث إنها لم تكن تصدق ما يدور حولها، لتتحدث بشرود إلى عمتها وتقول:

— بتعيطي ليه يا عمتي؟ يحيى كويس والله وراجع بإذن الله.. أكيد الخبر ده مش صحيح!

طالعها الجميع بشفقة وأسف، ما عدا «يُسر» التي كانت تنظر إليها بغضب وضيق يتخللهما تعجب من حزنها غير المبرر من وجهة نظرها، لكنها لم تعقب.

همست إليها صافيه وقالت:

— قومي يا غزل ارتاحي إنتِ.

— إشمعنا أنا؟!

نطقت بها غزل بحدة جعلت الكل ينتبه لها، وقد دخلت في ثاني مراحل الصدمة وهي «الغضب»، فأردفت قائلة:

— إشمعنا أنا اللي مفيش فرحة بتكمل لي أبدًا؟! ليه كل ما أحب حد أتحرم منه يا عمتي؟! ده مش عدل أبدًا!!

احتضنتها صافيه لتنفجر باكية وهي تتشبث بها، فقالت صافيه:

— قومي معايا يا غزل.

نهضت غزل برفقة عمتها، ثم دخلت إلى غرفتها، وجلست صافيه إلى جوارها وهي لا تزال تضمها إلى صدرها وقالت:

— اجمدي يا غزل، الناس كلها خدت بالها منك ومن كلامك، وأنا عارفة إنه غصب عنك، بس لازم تاخدي بالك من تصرفاتك يا حبيبتي.

أجهشت غزل باكية وهي تضرب موضع قلبها بقبضتها وتصرخ بألم:

— محدش حاسس بالنار اللي جوايا.. يحيى مات يا عمتي، يحيى خلاص راح ومش هشوفه تاني، أنا كنت راضية أعيش العمر كله أحبه من بعيد لبعيد، بس أشوفه وأعرف إنه بخير...

ثم صرخت قائلة:

— ليه يا رب؟ يا رب إنت عارف إني محبيتش غيره، بتحرمني منه ليه؟!

وانتقلت إلى مرحلة «المساومة»، ليتهادى صوتها حزينًا بائسًا:

— يا رب يكون كل ده كابوس وأصحى منه.. يا رب رجعهولي، وأنا مش عايزة حاجة من الدنيا تاني.. يا رب خدني أنا ويحيى يكون عايش وبخير.

ضمتها صافيه بقوة وهي تقول ببكاء:

— استغفري ربنا يا غزل يا بنتي، مش كده.

اعتلّ قلبها وشعرت أن روحها ستفارق جسدها وأنها هالكة لا محالة، لتزداد نوبات بكائها وتقول:

— مش عارفة يا عمتي، مش قادرة أتخيل إني مش هشوفه تاني.. ليه مات وسابني؟

هاجمتها مرحلة «الاكتئاب» فأردفت بهدوء:

— مات وسابني خلاص، يعني حياتي ملهاش لازمة بعده.. أعيش أو أموت مش فارقة.

ربتت صافيه على وجنتها قائلة:

— بعد الشر عليكي يا حبيبتي.. وحدّي الله.

أومأت غزل بهدوء وقد وصلت لآخر مراحل الصدمة وهي «التقبّل» وقالت:

— ونعم بالله.. ربنا يرحمه ويغفر له، لو سمحتي يا عمتي أنا عايزة أفضل لوحدي.

أومأت صافيه بموافقة، وقبلت رأسها قبل أن تنصرف خارج الغرفة وتتركها بمفردها، حيث جلست تبكي وتنتحب بصمت وقد انعدمت لديها جميع المشاعر، حتى الألم ما عادت تشعر به.

ـــــــــــــــــــــــــــــــــــــــــــــــــــــــــــــــ