الرابع

قبل أربـع ساعات

— حااااااااااسب!

اخترق صوت بسّام أذن يحيـى كصفعةٍ مباغتة، فرفع رأسه ليفاجأ بشاحنة نقلٍ ثقيل تشق الطريق نحوهم بسرعةٍ مرعبة. تحركت يده بغريزة النجاة وانحرف بالمقود محاولًا تفادي الاصطدام، لكن السيارة فقدت اتزانها وانزلقت إلى منطقة منخفضة على جانب الطريق.

وفي لحظةٍ خاطفة…

انفتح الباب المجاور ليحيـى بعنف، فانقذف جسده إلى الخارج متدحرجًا على الأرض عدة مرات، بينما استمرت السيارة في اندفاعها قبل أن تشتعل النيران بها وتنفجر.

لم تمضِ سوى لحظات حتى ظهر رجلٌ يترقب الطريق كما لو أنه ينتظر وقوع مثل تلك الكوارث. اقترب سريعًا من يحيـى، سحبه إلى منطقة بعيدة عن الأنظار، ثم أخرج هاتفه واتصل بأحدهم.

جاءه الصوت من الطرف الآخر:

— هاا، عندك جديد؟

ابتسم الرجل ابتسامةً جشعة وقال:

_الجديد كله هنا… حتة بشواتي متدبّش فيها مقص.

= راجل ولا ست؟

_شاب… في حدود التلاتين. آخده المستشفى ولا أسيبه؟

ساد الصمت لثوانٍ قبل أن يأتيه الرد حاسمًا:

= تسيب إيه يا غبي؟ هو إحنا بنلاقي جثة كل يوم؟ إيه ظروفه؟ معاه ورق؟

_واقع من عربية موديل السنة، والعربية بقت حتة فحمة أهي… ولأ، مفيش معاه أي إثبات شخصية.

= طيب ربنا يسترها… حد شافك؟

_لا متقلقش، حظه العِثِر موقعه بعيد عن كاميرات المحطة، متخافش… مش باين.

= طيب العِدّة معاك، مش كده؟! إديله واحدة «دورميكيوم» عشان لو لسه فيه الروح، واطلع بيه المستشفى على طول وأنا هبلغ الدكتور عز وجايين حالًا.

_ماشي، بس متتلكعش… بسرعة قبل ما دمه يبرد.

= ماشي… وجهزه على ما نوصل، سلام.

أنهى الشاب المكالمة، ثم حمل جسد يحيـى ووضعه داخل سيارته الخاصة، وحقنه بإبرة مخدّرة، وانطلق به نحو المستشفى الخاصة بهم.

دلف إلى المستشفى وهو يحمله، ثم وضعه على ترولي وسحبه نحو غرفة العمليات، ونقله إلى سريرٍ معدني، وبدأ في خلع ملابسه وإلباسه ثوب العمليات، ثم قيّد يديه بالأصفاد يمينًا ويسارًا.

دخل الأطباء إلى المستشفى المهجور، فخلع الطبيب سترته وشمّر عن ذراعيه، ثم حمحم بقوة وهو يتفحص جسد يحيـى المُسجّى أمامه وقال بتقييم:

— عال أوي… شكله بصحته ولسه ومش محتاج تحاليل…

قاطعه مساعده ساخرًا:

— ده على أساس إن إحنا بنشتغل بالتحاليل أوي… شوف شغلك يا دكتور قبل ما مفعول البنج يروح ويصحى!

أومأ الطبيب وقال:

— جهزته يا عيسوي؟!

هز الآخر رأسه نافيًا:

— لسه مجيتش جنبه.

— طيب يلا هات القلم وجهز التلج فورًا.

أعطاه القلم، فبدأ الطبيب يحدد مواضع الكِلى والكبد والقلب، ليقول الآخر متعجبًا:

— إيه ده يا دكتور؟! إنت كده هتفضّيه!!

قال الطبيب بلا اكتراث:

— شوف شغلك وإنت ساكت… يلا ناولني المشرط.

همّ بالتقاط المشرط، لكن رنين هاتفه ارتفع معلنًا عن مكالمة من زوجته، فأجاب سريعًا:

— إيه؟ في إيه؟!

_إلحق يا عز… رامي عمل حادثة!

جحظت عيناه واتسعتا، فالتفت إليهم قائلًا:

— سيبوا كل حاجة زي ما هي!

ثم التقط سترته مهرولًا نحو الخارج.

نظر الاثنان إلى بعضهما باستغراب، فقال أحدهما:

— طب وبعدين؟ هنسيبه كده؟!

تمتم الآخر بلا مبالاة:

— يا عم اربط الحمار مطرح ما يقول صاحبه… مش هو قال سيب كل حاجة زي ما هي؟ أهم حاجة إنت خد بالك لا يتعفن مننا ونروح كلنا في داهية.

ثم انصرف، بينما أخرج الآخر سيجارة وأشعلها، وجلس يتصفح هاتفه، ثم ألقاها أرضًا وداسها بقدمه، وصعد إلى سريرٍ آخر بالغرفة حتى غلبه النعاس.

بدأ يحيـى يستعيد وعيه ببطء…

تململ في مرقده، وشعر بشيء يعتصر يديه وقدميه، فحاول تحريكهما دون جدوى، ليزداد توتره ويبدأ في المقاومة بعنف.

فتح عينيه أخيرًا…

راح يتفحص المكان من حوله، ثم رفع رأسه قليلًا فرأى جسده ممددًا على سرير معدني، وأطرافه مقيدة بالأغلال.

جحظت عيناه وهو يتذكر الحادث.

أطبق جفنيه بقوة وقد أدرك ما يحدث.

وقع في قبضة عصابة تتربص بمصابي الحوادث…

ارتعش جسده كله وبدأ يحدث ضجة أيقظت الآخر من نومه، فاقترب منه مذهولًا وقال:

— هو إنت لسه حي؟! يا دي الهباب اللي أنا فيه!

ثم أسرع يجلب حقنة مخدّرة أخرى، وهمّ بحقنه بها.

صرخ يحيـى متوسلًا:

— أبوس إيدك… أنا عندي عيال!

نظر إليه الرجل بلا مبالاة.

تابع يحيـى برجاء:

— عشان خاطر ربنا بلاش… فكّني وأنا هديك اللي إنت عايزه!

تمتم الرجل بضيق:

— اسكت بقا يا عم خليني أخلص… واثبت عشان أعرف أديك الحقنة.

بدأ يحيـى يتحرك بعشوائية، فصرخ به:

— اثبت بقولك!

قال يحيـى بسرعة:

— أبوس إيدك… إنت كبيرك تاخد خمسة تلاف في عملية زي دي… أنا هديك خمسين ألف جنيه!

توقف الرجل فجأة ونظر إليه:

— بتقول كام؟!

— ولو عايز أكتر أنا موافق… بس خرجني من هنا.

ابتلع ريقه وقال:

— هاخد مية ألف.

— موافق… بس بسرعة.

بدأ بفك قيوده وهو يسأل بلهفة:

— بس هاخد الفلوس إزاي؟! إوعي تكون نصاب وتبلغ عني!

قال يحيـى بسرعة:

— والله العظيم… وحياة ولادي هجيبهم لك… بس خليني أخرج.

فك قيوده بالكامل.

قفز يحيـى من فوق السرير، والتقط ثيابه من الأرض وارتداها بعشوائية، وهو يركض نحو الباب ثم التفت وسأل:

— اسمك إيه؟!

— عيسوي السيد أبو فروة… والفلوس لو متحولتش بكرة هتزعل.

أومأ يحيـى وخرج يركض وسط التيه…

لكن فجأة—

ارتطم شيء ثقيل برأسه.

سقط أرضًا غارقًا في دمائه.

صرخ الرجل الآخر في عيسوي:

— إنت اتهبلت؟! بتفكه عشان يبلغ عننا ونروح في حديد؟!

ارتجف عيسوي وقال:

— قاللي هيديني مية ألف!

سبّه الآخر بعنف:

— مية عفريت يركبوك… يلا شيل معايا.

اقتربا منه، لكن عيسوي شهق فجأة:

— في ناس جاية!

ركضا هاربين…

وتركا يحيـى ملقى وسط دمائه.

بعد دقائق توقفت أمامه سيدة عجوز وبرفقتها شاب.

تمتم الشاب:

— شكل الاتنين اللي جريوا دول هما اللي عملوا فيه كده.

قالت والدته:

— شيله يا مصعب… خلينا ناخده البيت بسرعة.

ساعدها مصعب، وقال:

— مش الأحسن نوديه المستشفى؟

قالت بهدوء:

— المستشفى يعني سين وجيم… وده شكله وراه حكايات كتير. نعالجه ولما يفوق يمشي.

أخذاه إلى منزلهما.

بدأت السيدة تضمد جراحه، فقال مصعب:

— تسلم إيدك يا أمي.

قالت:

— اقعد معاه على ما أعمله حاجة ياكلها… أول ما يفوق يعوض الدم اللي نزفه.

جلس مصعب بجواره طويلًا…

حتى غلبه النعاس.

وبعد ساعاتٍ طويلةٍ لم يعرف لها عدداً…

بدأ وعي يحيـى يعود إليه ببطءٍ شديد، كأنّه يصعد من قاع بحرٍ سحيق إلى السطح. شعر بثقلٍ هائلٍ يطبق على رأسه، ووجعٍ نابضٍ ينتشر في جسده كله، بينما كانت أنفاسه تخرج متقطعة كأنها تُنتزع منه انتزاعاً.

حاول أن يفتح عينيه، لكن جفنيه بديا وكأنهما حُشدا بالحجارة، احتاج إلى عدة محاولات حتى استطاع أخيراً أن يرفع أهدابه ببطء.

تراقص الضوء أمامه للحظات، ورأى سقفاً غريباً لا يعرفه، وجدراناً بسيطة لا تشبه أي مكانٍ يألفه. تحرك ببصره المرتبك حوله، ثم حاول الاعتدال فهاجمه ألمٌ حاد جعله يتأوه بصوتٍ خافت.

على مقربةٍ منه كان يجلس شاب قد غلبه النعاس، لكنه انتبه فور سماعه للصوت، فرفع رأسه والتقت عيناه بعيني يحيـى، ليبتسم براحةٍ واضحة وقال:

— فوقت؟ حمد الله على السلامة.

التفت إليه يحيـى ببطء، وقد بدا كمن انتُزع لتوّه من حلمٍ ثقيل، ثم سأله بصوتٍ أجش ومتعب:

— أنا… فين؟

ابتسم الشاب ومد يده إليه في ودٍّ وقال:

— إنت في بيتنا… لقيناك مرمي على الطريق وجبناك هنا.

ثم مال نحوه قليلًا وسأله بلطف:

— وإنت اسمك إيه؟

توقفت أنفاس يحيـى للحظة.

ظل ينظر إليه دون أن يجيب.

ثم بدأ يفتش داخله…

عن اسم.

عن وجه.

عن ذكرى.

عن أي شيء يخبره من يكون.

لكن كل ما وجده كان فراغاً موحشاً.

تجهمت ملامحه شيئاً فشيئاً، وارتبكت عيناه وهو يجيل بصره حوله كمن يبحث عن نفسه بين الأشياء.

ثم رفع عينيه إلى الشاب وقال بصوتٍ تائهٍ اختلط فيه الذعر بالحيرة:

— أنا… مين؟

ابتلع ريقه بصعوبة، وأردف بعد لحظة صمتٍ موجعة:

— مش… عارف.