وليتني مت قبل هذا

في منزلٍ عريقٍ بحيٍّ راقٍ بالإسكندرية، تجتمع أسرةٌ ميسورة الحال حول مائدةٍ فخمةٍ تحتوي على كل ما لذَّ وطاب احتفالًا بفطور أول أيام شهر رمضان المبارك. كان يترأس المائدة كبير الأسرة «علي الهنداوي»، رجلٌ ذو هيبةٍ ووقار، قد زيَّن الشيب رأسه ليفصح عن بلوغه السبعين عامًا أو يزيد.

يجاوره عن يمينه ولده الأكبر «سليمان»، ذو الأربعين عامًا، وزوجته «صافية» تجلس أمامه على الجانب الآخر من المائدة، يتبعه الأخ الأوسط «عبدالقادر» الذي يبلغ خمسةً وثلاثين عامًا، وزوجته «زينب» تجلس إلى جانب «صافية»، ويتلوه الأخ الأصغر «يحيى» ابن الثلاثين عامًا، وتجلس أمامه زوجته «يُسر» التي تحمل طفلتها الرضيعة «نور»، وإلى جانبها طفلها «زياد».

حمحم الأب بقوة وهو يبسط ساعديه ويثنيهما في حركةٍ سريعة استعدادًا لتناول الطعام، وقال بصوتٍ قوي:

— كل سنة وإنتوا طيبين يا ولاد.. يلا بسم الله.

ردد الجميع دعاء الإفطار، وبدأوا بتناول فطورهم، وكلٌّ منهم يستعيد ذكريات الأعوام الماضية، ليقول «علي»:

— ادعوا لزاهية، الله يرحمها.. النهارده تالت رمضان نفطر من غيرها.

دعا الجميع لها بالرحمة، ليبادر سليمان قائلًا:

— ربنا يطولنا في عمرك يا با، ودايمًا متجمعين على حسك.

هنا برز صوت يُسر تقول:

— أظن بكرة الفطار عندك يا عمو سليمان، إحنا متعودين على كده، وبعد بكرة عند عمو قدّورة.

رمقها سليمان بنظراتٍ خاطفة متفحصة قبل أن يقول:

— أكيد إن شاء الله، هو شهر في السنة اللي بنتجمع فيه.

تداخل صوت زينب وهي تقول:

— وإنتِ حسبتي الحسبة كده يا ست يُسر وطلعتي نفسك منها؟ مش ناوية تعزمينا يوم ولا إيه؟

— لا يا زيزي، ما إنتِ عارفة إني مليش في جو العزومات والطبخ وكده، لو تحبوا تفطروا دليفري ماشي.

لوت زينب جانب شفتيها بسخرية وقالت:

— دليفري؟! لأ ياختي منجلكيش في دليفري، إحنا رمضان بالنسبة لنا طبيخ كتير وحلل ودوشة وحاجات كده متفهميش فيها إنتِ يا بتاعة الدليفري.

أومأت يُسر بموافقة وقالت:

— خلاص هبقى أشوف، ولو كده هخلي «غزل» تبقى تطبخ معايا.

انتبه «علي» ونظر إلى صافية قائلًا:

— أومال صحيح فين غزل يا صافية؟!

تنهدت صافية بيأس وقالت:

— غلبت معاها يا حج والله إنها تقعد تفطر معانا، بس هي بتتكسف زي ما إنت عارفها.. قاعدة بتفطر جوه مع «أم حسين».

صدح صوته الجهور مناديًا:

— غزززززل!

انتبهت «غزل» إلى ندائه، لتنهض سريعًا عن الطعام وتذهب إلى الخارج، تتهادى خطواتها باستحياء، ونظرت إليه بابتسامةٍ هادئة وأردفت:

— نعم يا عمو علي؟

ابتسم هو باتساع وقال:

— مبتقعديش تفطري معانا ليه؟! عايزاني أزعل منك؟!

افتر ثغرها عن ابتسامةٍ صافية وقالت:

— لأ طبعًا يا عمو، مقدرش على زعلك، بس أنا بفطر مع خالتي أم حسين عشان متفطرش لوحدها.

أومأ موافقًا وقال:

— ماشي يا آنسة غزل.. وهو كذلك.

برز صوت يُسر متأففًا فقالت:

— غزل خدي نور شيليها لأني مش عارفة أفطر منها.

نظرت إليها غزل بتعجب، وهمّت بقول شيءٍ ما قبل أن يهمس إليها «يحيى» قائلًا:

— وهي غزل مش هتفطر ولا إيه؟! هاتي نور أشيلها أنا.

هنا تفوه الأب قائلًا:

— روحي يا غزل كملي فطارك يلا، ولما تخلصي فطار اعمليلي كوباية شاي حلوة من إيديكي.

أشارت غزل إلى عينٍ تلو الأخرى وأردفت:

— من عنيا حاضر.

حمحم سليمان بصوته الغليظ قائلًا:

— الحمد لله.. ربنا يديمها علينا نعمة ويحفظها من الزوال.. كل سنة وإنتوا طيبين جميعًا، والفطار بكرة عندي إن شاء الله.

أومأ الجميع موافقين ليقول «عبدالقادر»:

— بإذن الله أنا ويحيى نازلين القاهرة بكرة عشان نستلم البضاعة الجديدة.. لو لحقنا الفطار خير، ملحقناش تتعوض بقى.

أومأ سليمان بتفهم وقال:

— إن شاء الله.. بس قبل ما توصلوا كلموا التاجر وبلغوه إنكم على وصول عشان يجهز لكم البضاعة ومتتأخروش شبه النوبة اللي فاتت.

قال يحيى:

— أنا هكلمه على بيات كمان عشان يكون على علم بسفرنا ليه بكرة ويجهز الخامات كلها من دلوقتي.

هز سليمان رأسه بتأييد وقال:

— عفارم عليك.. يلا أستأذن أنا عشان ألحق المغرب.. سفرة دايمة يا با.

— يدوم عزك يا بني.. ها يا زينب قربتي ولا لسه؟!

قالها متوجهًا بحديثه نحو زينب وهو يشير برأسه إلى بطنها المنتفخ، فقالت:

— والله يا حج ما أنا عارفة.. بس هانت أهي.

أومأ مبتسمًا وقال:

— ربنا معاكي.. أومال سيف اتأخر ليه؟ مش قولتوا هيخرج من الدرس أذان المغرب؟!

ليقاطع حديثه دخول «سيف» محدثًا صخبًا، وقال:

— السلام عليكم.. جعاان يا ماما إلحقيني.

ضحك الجميع، فقال جده:

— ابن حلال، لسه جايبين في سيرتك، يلا اغسل وشك وإيديك وتعالى كُل بسرعة.

نهضت يُسر عن الطعام وقالت منادية:

— غزل.. يا غزل.

قالت صافية:

— عايزة غزل في إيه يا يُسر؟

— تيجي تشيل نور على ما أغسل إيديا.

طالعها يحيى مستاءً وقال:

— هاتي نور وأنا أشيلها، وروحي اغسلي إيديكي.

ثم قال بغضب:

— مش كل شوية يا غزل يا غزل، البنت مش شغالة عندنا.

خرجت غزل من المطبخ تقول:

— أفندم يا أبلة يُسر.. عاوزة حاجة؟!

نظرت يُسر إليها بتجهم وعبس وجهها فقالت:

— إيه أبلة دي؟ هو إنتِ شايفاني إيه؟!

نظر إليها الجميع بضيق، فقال يحيى:

— خلاص يا يُسر بقى.. روحي إنتِ يا غزل خلاص.

أومأت غزل بموافقة وانصرفت، لينهض يحيى عن المائدة ويلتقط طفلته من بين يدي أمها ويقول بضيقٍ واضح:

— كل سنة وإنت طيب يا حج، وبعودة الأيام.

ثم نظر إلى يُسر وقال:

— أنا طالع.. خلصي وتعالي.

صعد يحيى إلى شقته ليجد زوجته تتبعه على الفور، فنظر إليها بضيق وقال:

— مش هتبطلي حركاتك السخيفة دي بقى يا يُسر؟! قولتلك مية مرة بلاش تضايقي حد بأسلوبك ده، وبالأخص غزل.

قاطعته وقد اشتعل فتيل غضبها وقالت:

— أيوه.. إشمعنا غزل بقى اللي هتموت عليها كده ومش عايز حد يمسها بكلمة؟!

نظر إليها متعجبًا وقال:

— برضو يا يُسر؟! رجعنا لنفس الحوار الأهبل ده؟! قولتلك مليون مرة غزل دي أختي.. أنا اللي مربيها ومن وهي عيلة صغيرة لسه، من أول ما بدأت تيجي عند صافية من سنين السنين.. وبعدين كلنا هنا بنعتبرها من أهل البيت، وهي بتحب الكل هنا وبتعاملهم بعشم وأخوية.. وإنتِ عارفة إن أبويا بيعزها ودايمًا يقول «بت يتيمة متكسروش خاطرها».

ثم تمتم باستنكار:

— وبعدين يبقى فيه تمييز شوية، يعني ده أنا أكبر منها بكذا سنة!

نظرت إليه باستخفاف وقالت:

— بس دلوقتي مبقتش عيلة صغيرة يا يحيى، وبصراحة بقى أنا لما بشوفها هنا بتغم والعفاريت بتركبني.

قلّب كفيه متعجبًا وقال:

— لا حول ولا قوة إلا بالله.. وأنا مالي بقت عيلة ولا مبقتش عيلة؟! أنا مال أبويا؟ هو أنا هتجوزها؟! وبعدين بقولك أختي.. فاهمة يعني إيه أختي؟! ثم يعني إيه لما بتشوفيها هنا بتتغمي؟! إنتِ عايزاها تبطل تزور عمتها عشان خاطرك ولا إيه؟!

قالت بجدال:

— بس الزيارة بتبقى يوم ولا اتنين.. دي لما بتيجي عند صافية كأنها لزقت بغرا...

قاطعها بعصبية وصاح متشنجًا فقال:

— يُسر بقولك إيه، أنا مش رايق لكلام النسوان ده عالمسا.. تقعد يوم، تقعد شهر، هي مش قاعدة على قلبك.. وإنتِ عارفة إن هي بتيجي تقعد مع صافية تونّسها، مش جاية عياقة.. وهعيدها لكِ لآخر مرة.

ثم أشار بإصبعه باتجاه رأسها وقال:

— الكلام الفاضي اللي حطاه في دماغك ده هيتعبك.. كبّري عقلك كده واعرفي إنتِ إيه وهي إيه، هتلاقي نفسك ارتحتي.

راقتها كلماته، فاقتربت منه لتلتصق به بغنج، وراحت تعبث بأزرار قميصه وهي تنظر له بخبث وقالت:

— قوللي إنت أنا إيه وهي إيه؟!

هز رأسه يائسًا ثم ابتسم وأحاطها بكلتا يديه يقربها منه أكثر وقال:

— عليا الطلاق إنتِ مجنونة ومخك ضارب.. بقى يا عبيطة حد يتجوز برنسيسة زيك ويبص لأي واحدة خلقها ربنا؟! حتى لو كانت حورية نازلة من الجنة.

ابتسمت بسعادة ليستكمل حديثه قائلًا:

— وبعدين يا يُسر إنتِ مراتي وأم ولادي.. يعني كل حاجة بالنسبة ليا.. أول واحدة حبيتها، وأول واحدة عرفتها، وأول واحدة لمستها.. هااا.

قال الأخيرة غامزًا إياها بعينه وهو يضحك بعبث ويقول:

— واخدة بالك إنتِ يا جميل؟

صدحت ضحكاتها عاليًا ليقول:

— الله أكبر.. بقولك إيه أنا داخل أريح شوية.

أومأت بموافقة، ليسير باتجاه الغرفة وينظر خلفه ليجدها ما زالت بمكانها فقال:

— يا بت بقولك داخل أريح شوية.

ضحكت بشدة وقالت:

— الله.. مش تقول.

قال مشاكسًا:

— ما هو الفجر مبيقولش.. الفجر بيدخل على طول.

ـــــــــــــــــــــــــــــــــــــــــــــــــــــــــــــــ

بالأسفل في شقة «صافية»، كانت تجلس «زينب» تحمل طبقًا كبيرًا من الحلويات الشرقية تتناوله بنهم وهي تثرثر قائلة:

— شوفتي السهونة اللي اسمها يُسر وعمايلها.. بت تحسي إنها راضعة سم والعياذ بالله.

أتاها صوت «غزل» من خلفها وهي تلتقط طبق الحلويات من بين يديها وتقول:

— يعني تفضلي صايمة طول النهار يا زوبة وتضيعي صيامك على ست يُسر دي؟! اتقي الله.

نظرت إليها زينب وقالت:

— يُسر.. وما أدراكِ بيُسر ياختي، دي مية من تحت تبن، حرباية وبتتلون على كل لون شوية.. اسأليني أنا، أنا اللي عرفاها وحفظاها.. سيبك من عمتك دي، خايبة وقلبها قلب خصاية وبيتضحك عليها بكلمتين.

غمزتها غزل بمشاكسة وقالت:

— يا واد يا شبح إنتِ.. بس إيه رأيك في الأكل النهارده؟! كان فخامة مش كده؟!

لوت زينب شفتيها وقالت:

— بوريه منك يا بت، وإنتِ طالعة لعمتك مبتحبيش تجيبي في سيرة حد.. غيرتي الموضوع في ثانية.

نظرت صافية وغزل إلى بعضهما البعض ضاحكتين، فهزت صافية رأسها بيأس وقالت:

— ما هو ده الصح يا زينب، وإحنا هنستفيد إيه لما نتكلم على دي ودي.. دعي الخلق للخالق.

مصمصت زينب شفتيها وقالت:

— طيب يا شيخة خضرا إنتِ وبنت أخوكي، فوتكوا بعافية بقى، أطلع أجهز لقدّورة هدومه عشان ماشي بدري.. تصبحوا على خير.

مشت زينب بخطواتٍ متثاقلة تجر قدميها جرًّا حتى صعدت إلى شقتها، فقالت غزل التي كانت تنظر في أثرها:

— يا ساتر منها.. ربنا ما يوقعنا في لسانها.

ربتت صافية على كتفها وقالت:

— زينب طول عمرها بتحب الكلام الكتير، مش جديد عليها يعني.. المهم قومي يلا نامي عشان هصحيكي على السحور، وإنتِ لو صحيتي مش هيجيلك نوم تاني، خليكي تمشي بكرة وإنتِ فايقة.

تثاءبت غزل وقالت:

— آه والله فكرتيني.. والله يا عمتو على عيني إني أسيبك.

غمزتها صافية وقالت:

— يا بت؟! على عينك إنك تسيبيني أنا برضو؟!

ابتسمت غزل بحزن وأردفت وهي تنظر للأمام بألمٍ داخلي يسكن بين أضلعها:

— مش فارقة يا عمتي.. القلب اتكسر من زمان، وسيبت زي ما سيبتش واحد.

ربتت صافية على خدها برفق وقالت:

— كله نصيب يا غزل يا بنتي.. ربنا يعوض عليكي باللي يريح قلبك ويسعدك.

أومأت غزل بهدوء ونهضت لتدلف إلى غرفتها، وتدثرت بغطائها جيدًا، وشردت تفكر بهِ، مهلك قلبها ومؤرق مضجعها، قبل أن يغلبها النعاس وتستسلم لسلطانه.