الخامس

أنا مين؟!.. مش عارف.

خرجت الكلمات من بين شفتيه متقطعة، ضائعة، كأنها صادرة عن رجلٍ استيقظ في عالمٍ لا يعرف عنه شيئًا.

تجمّد مصعب للحظة وهو يطالعه بعدم استيعاب، ثم قطّب حاجبيه وقال بدهشة:

— مش عارف؟! يعني إيه مش عارف؟!

رفع يحيى يده ببطء نحو رأسه وضغط عليها محاولًا انتزاع أي ذكرى، أي صورة، أي اسم… لكن الفراغ كان سيد الموقف.

أغمض عينيه للحظات ثم فتحهما مجددًا، وعيناه تحملان ارتباكًا خالصًا لا أثر فيه لادعاء أو مزاح.

وقال بصوتٍ خافت:

— والله… مش فاكر حاجة… ولا عارف أي حاجة.

ثم سكت قليلًا كأنه يبحث داخل نفسه عن شيءٍ مفقود، قبل أن يضيف بشرودٍ موجع:

— حاسس إن دماغي… صفحة بيضا.

اتسعت عينا مصعب شيئًا فشيئًا، ثم تمتم بذهول:

—معقول… تكون فقدت الذاكرة؟!

التقط يحيى الجملة كأنها شيءٌ ثقيل أُلقي فجأة فوق صدره، فنظر إليه مصدومًا بينما أكمل مصعب بتفكير:

— أكيد الضربة اللي خدتها على دماغك أثّرت على الذاكرة.

قطّب يحيى حاجبيه وقال بتوتر:

— ضربة؟!.. مين ضربني؟! وإيه اللي حصل أصلًا؟

تنهد مصعب ثم جلس قبالته وقال بهدوء:

— إمبارح لقيناك مرمي على الطريق… غرقان في دمك. وكان في شابين بيجروا من بعيد، ملحقناش نشوف وشوشهم… غالبًا هما اللي عملوا فيك كده.

توقف لحظة ثم سأله بحذر:

— إنت فعلًا مش فاكرهم؟

هز يحيى رأسه ببطء، وعيناه ما زالتا تدوران في المكان كأنه يراه لأول مرة:

— لأ… مش فاكر أي حاجة.

زمّ مِصعب شفتيه آسفًا وتابع قائلًا: أكيد ضربوك عشان يسرقوك، لأن إحنا وإحنا بنغيّر لك هدومك مكانش فيهم أي حاجة، ولا فلوس ولا تليفون، ده حتى مفيش معاك بطاقة ولا أي إثبات شخصية!

حملق بهِ يحيـي بدهشة وقال: يعني إيه؟! يعني هفضل تايه كده ومش عارف أنا مين؟!

أخذته سَوْرةٌ من الغضب ليقول مِصعب محاولًا تهدئته: اصبر بس واستهدي بالله، إنت عشان الجرح لسه جديد ودماغك مش موزونة لسه مش فاكر حاجة، بس يومين تلاتة وإن شاء الله كل حاجة هتبقى زي الفل.

انتبها على دخول والدة مِصعب للغرفة وهي تمنحهما ابتسامةً بشوشة، ثم دنت منهما لتجلس إلى جوار يحيـي وتقول بفرحة: إنت فوقت يا ضنايا، حمد لله على السلامة.

ابتسم لها لا إراديًا وأومأ قائلًا: الله يسلمك يا حجة.

ربتت على ظهرهِ بحنان وقالت: هعملك بقى حاجة تتقوّت بيها عشان تعوض الدم اللي نزل منك...

قاطعها قائلًا: لا لا، مش عايـز.

أردفت ببساطة: لا، مفيش حاجة اسمها مش عايز، ولو على الفطار يا سيدي ابقى عوّضه بعد رمضان، ليس على المريض حرج.

قطّب حاجبيه متعجبًا وقال: هو إحنا في رمضان؟!

نظرت إليه السيدة باستغراب، ثم نظرت إلى ولدها لينظر إليها بأسف ويقول: الباشمهندس مش فاكر حاجة يا أمه.

أعادت النظر إليه بحسرة وقالت: يا حبيبي يا ابني! أكيد الضربة اللي خدتها في دماغك دي هي اللي خلتك تنسى، منهم لله اللي أذوك، ربنا يأذيهم في نور عنيهم.

لم يُجبها يحيـي، بل ظل ينظر إلى الفراغ شاردًا، لتربت على كتفه بمواساة وقالت: ولا يهمك يا حبة عيني، يومين إن شاء الله وهتبقى زي الفل.. بس أهم حاجة تاكل وتتغذى عشان تسترد عافيتك بسرعة، وأنا هعملك شوية أكلات كده وخلطات من اللي بتقوي الذاكرة....

ليقاطعها يحيـي مردفًا بتهكم: ويفيد بإيه اللي هيقوي الذاكرة وهي مش موجودة أساسًا.

ثم ربت على كفها قائلًا: ريّحي نفسك يا حجة ومتعمليش حاجة.

نظرت إليه بحزنٍ وأسى وقالت: طيب متزعلش نفسك يا حبيبي وسيبها لله، وبإذن الله هتبقى زي الفل.

أومأ موافقًا ومنحها ابتسامةً هادئة ثم قال: ونعم بالله.

عادت لتقول بإصرار: وأنا هجيبلك دلوقتي تاكل، ويا سيدي بكرة ابقى صوم معانا.

ثم انصرفت لتحضر له الطعام، بينما قال هو مخاطبًا مِصعب: هو النهارده كام رمضان؟!

النهارده 3 رمضان، متخافش هتلحق تصوم إن شاء الله.

أومأ بهدوء لينظر إليه مِصعب ويقول: إمبارح وإحنا بندوّر في هدومك لقينا ده.

قالها وهو يتجه نحو خزانته ويخرج منها شيئًا ليضعه بيد يحيـي الذي تطلّع إليه وقال: مصحف!

أومأ مِصعب قائلًا: لقيناه في جيب الجاكيت من جوه، يا عالم إنت مريت بإيه وربنا نجاك بسبب المصحف ده.

أومأ يحيـي موافقًا وقال: معاك حق.

دخلت والدة مصعب تحمل آنية الطعام، ليحملها ابنها عنها ويضعها أمام يحيـي قائلًا: يلا بسم الله.

بدأ يحيـي بتناول طعامه شاردًا بما آل إليه حاله، منشغلًا بما هو آتٍ.

ـــــــ

مرت الأيام كفيلةً بأن تضمّد جراح الجميع وتُشفى علّاتهم، حيث عاود الجميع ممارسة حياته الطبيعية والتأقلم على أن يحيـي لم يعد موجودًا بينهم.

باشرت يُسر حياتها بهدوء، وقد بدأت استعادة حياتها السابقة، فنزلت إلى شقة صافيه وطرقت الباب، لتفتح لها صافيه وهي تبتسم بلطف وقالت: إزيك يا سوسو، تعالي ادخلي.

أعطتها يُسر طفلتها نور وهي تقول: لأ معلش مش فاضية دلوقتي، خلي نور معاكي على ما أروح أشوف ماما وأرجع.

أومأت صافيه بموافقة وقالت: وماله يا حبيبتي، هو إحنا عندنا كام نوارة يعني، يلا روحي إنتِ وابقي سلّمي على مامتك.

الله يسلمك.

قالتها يُسر وهي تنزل درجات السلم لتصطدم بـ سليمان الذي قال ضاحكًا: على مهلك، كنتِ هتقعي، رايحة فين كده ومستعجلة؟

ابتسمت يُسر وأردفت: رايحة عند ماما.

قال بنبرة ودودة: طيب تعالي أوصلك.

لا، شكرًا، مش عايزة أعطلك، أنا هروح وأجي طوالي إن شاء الله.

قال معترضًا: لأ والله مينفعش، تعالي أوصلك بسرعة.

نزلت خلفه لتستقل السيارة إلى جواره، ليبادر هو بالحديث قائلًا: زياد رجع من الحضانة ولا لسه؟!

أيوة جه وقاعد مع جده، كان مصمم ييجي معايا بس أنا مرضيتش لأنه شقي ومش بيسكت، وإنت عارف الوضع هناك مش مستحمل أصلًا.

حك ذقنه بإبهامه بتفكير وقال: وإيه أخبار جوز أمك وإخواتك؟

تنهدت لتردف: والله ما أعرف عنهم حاجة من زمان، أهي رايحة أطمن عليهم، كنت عايزة أشتري لهم شوية حاجات قبل ما أروح بس لقيت الفلوس اللي معايا مش هتكفي، قولت مرة تانية بقى.

على الفور استلّ جزدانه من جيب سرواله وأخرج منه الكثير من النقود ليمد يده إليها وهو يقول: مش عيب عليكي تكونوا محتاجين حاجة وتخبي! خدي هاتيلهم اللي هما عاوزينه كله.

تصنعت الحرج وقالت: لأ طبعًا، إيه اللي حضرتك بتقوله ده يا عمو؟! أنا مش ممكن آخد الفلوس دي أبدًا.

أوقف السيارة ورفع يده عن المقود لينظر إليها بضيق قبل أن يردف قائلًا: إيه اللي إنتِ بتقوليه ده؟! هو إنتِ مش مسؤولة مننا زي نور وزياد ولا إيه؟! وإخواتك زي ما كانوا مسؤولين مننا أيام يحيـي الله يرحمه، هيفضلوا مسؤولين مننا دلوقتي برضو، واللي يعوزوه يجيلهم.

التقطت النقود من بين يديه وهي تتصنع الضيق وقالت: بس دي أول وآخرة، بعد كده مش هقدر آخد حاجة منك.

يا ستي لما نبقى نيجي لبعدين ربنا يساويها، يلا وصلنا أهو.

نظرت إلى جانبها ثم أعادت النظر إليه وقالت: هديلهم الفلوس بقى وهما يجيبوا اللي عاوزينه، لأني مش هلحق أشتري لهم حاجة، بجد مش عارفة أقولك إيه يا عمو!

مسح جانبي شاربه العريض بإصبعيه الإبهام والسبابة وأردف بزهو فقال: متقوليش حاجة خالص، سلّمي عليهم بس.

أومأت بابتسامة لتردف بعدها بلطف وتقول: يوصل، عن إذنك.

ترجلت من السيارة ليتطلع هو في أثرها بشغف ويتفحصها بإعجاب لم تُخفِه نظراته، ليقول: رهوان… يخربيت أبوكي!

حمحم بعدها بقوة ليستعيد همّته قبل أن يدير طارة القيادة عائدًا إلى المنزل.