البارت الثالث عشر

عمر بضيق وغضب:

ـ اتأخرتِ عليَّ ليه يا ميرنا؟ هو إحنا كنا متفقين إننا نتقابل؟! إحنا مش سيبنا بعض امبارح والموضوع انتهى.

اقتربت منه ميرنا بدلال وقالت:

ـ إنت قولت يا نأجل الفرح يا نسيب بعض... وأنا مقدرش أبعد عنك يا حبيبي، وهفضل معاك، وهستنى لما أنكل عبد الحميد وطنط مديحة يرجعوا ونعمل فرحنا. إنت كان عندك حق، ما ينفعش نتجوز وهم مش موجودين.

كان شريف وأمل يقفان على مقربة منهما، وقد سمعا كل ما دار بينهما.

همس شريف بصوت منخفض لا تسمعه سوى أمل:

ـ يا بنت اللئيمة!...

ثم نظر إلى أمل وأكمل:

ـ البت دي مش سهلة... وزي ما إحنا أخدنا بالنا من عمر وريم، هي كمان أخدت بالها ومش هتسيبهم.

قالت أمل بحزن:

ـ ريم كده فهمت أخوك غلط... أكيد فاكرة إنه بيلعب بيها، ومش هتديله فرصة يكلمها.

وقف عمر مصدومًا، لا يعرف ماذا يقول لميرنا.

اقتربت منه ميرنا أكثر، وتعلقت بذراعه وهي تقول:

ـ ما تسبنيش يا عمر... أنا على طول لوحدي، ومليش غيرك. وهعمل كل اللي يعجبك ويرضيك. أنا قولت لبابي امبارح إني مقدرش أعيش من غير عمر... أنا أموت نفسي لو بعدت عني.

ما إن قالت "أموت نفسي"، حتى عاد بعمر الزمن إلى الوراء...

تذكر فرح، وكيف ضحت بحياتها من أجل أن يقترب منها ويحبها... وكيف ماتت بعد أن أنجبت ساندي.

وبالطبع، كانت ميرنا تعرف جيدًا ما الشيء الذي يخشاه عمر أكثر من أي شيء آخر... وكانت تقصد أن تذكره به، وتخيفه من أن تكرر ما فعلته فرح.

أما أمل وشريف، فقد فهما لعبتها جيدًا، وتبادلا نظرات الضيق.

لمحت ميرنا نظراتهما، فتركت ذراع عمر والتفتت إليهما.

ميرنا:

ـ أنطي حبيبتي... آيم سوري على اللي حصل امبارح. أنا مليش دعوة ببابي، وكل اللي يهمني عمر وأنتم.

ثم نظرت إلى عمر وأكملت:

ـ يلا نلحق ساندي والعيلة ونقعد معاهم.

ثم أمسكت بيد عمر وسحبته معها وغادرت.

---

كانت ريم تمشي وهي في غاية الضيق، تحدث نفسها:

ـ بيتسلى بيا... فاكرني لعبة بيلعب بيها وخطيبته مش موجودة! بس أنا الغلطانة... ولازم أقفه عند حده ويعرف مين ريم.

ثم عادت وجلست على الطاولة.

وبعد لحظات، لحق بهم عمر وميرنا وأمل وشريف.

قالت ميرنا بابتسامة:

ـ هاي... إزيكم؟

ثم اقتربت من ساندي الجالسة على ساق ريم، وحاولت حملها.

لكن ساندي صرخت فجأة واختبأت في حضن ريم.

قالت ميرنا بضيق:

ـ ممكن تسيبيها عشان أبوسها؟

ردت ريم ببرود:

ـ أنا مش مسكاها... هي اللي مسكة فيا.

حاولت ميرنا جذب ساندي بالقوة، لكن الصغيرة تمسكت بريم أكثر وبدأت بالبكاء.

قالت أمل بضيق:

ـ خلاص يا ميرنا، سيبيها.

وأضاف عمر بضيق:

ـ سيبيها براحتها يا ميرنا... ساندي ما بتحبش حد يبوسها بالعافية.

قالت ميرنا بغيظ:

ـ أنا عاوزة أقرب منها، بس ريم مسكاها. مش عاوزني اخدها

تدخل شريف بغضب:

ـ ريم مش مسكاها... هي اللي مسكة ريم. وخلاص سيبيها، هي مش عاوزة تجيلك.

قالت أمل بغضب:

ـ ميرنا، اقعدي بقى... الناس بتبص علينا.

جلست ميرنا وهي متعصبه، ثم أمسكت يد عمر وأجلسته بجوارها.

أما هو، فكانت عيناه معلقتين بريم، التي لم تفكر حتى في النظر نحوه.

وفي المقابل، ذهب شريف وجلس بجوار ريم...

وذلك ما أشعل الغيرة داخل عمر أكثر.

---

مر بعض الوقت وهم يتحدثون في مجموعات صغيرة، ثم طلبوا الغداء.

عادت ساندي إلى طبيعتها، لكنها أصرت على الجلوس فوق ساق ريم واللعب معها.

في تلك الأثناء، بدأت ريم تقلق بسبب تأخر حسن.

لاحظ شريف قلقها، فاقترب منها.

شريف:

ـ مالك يا ريم؟

ريم بخوف:

ـ حسن اتأخر أوي... أنا قلقانة عليه.

شريف:

ـ تحبي نقوم ندور عليه؟

ريم:

ـ ياريت لو سمحت.

نهضت ريم، وأعطت ساندي لأمل، ثم تحركت مع شريف.

---

ما إن رآهما عمر يغادران حتى قال بضيق وغيرة:

ـ على فين يا ريم؟

نظرت إليه ريم، لكن قبل أن ترد كان شريف قد سبقها بالكلام.

قال شريف وهو يقصد إغاظته فغمز له عمدًا:

ـ هنروح نتمشى شوية ونظر الي ريم 

ـ يلا يا ريمو.

شعرت ميرنا بغيرة عمر الواضحة.

فقالت بخبث:

ـ شريف شكله معجب بريم... وهي كمان شكلها معجبة بيه. عارف؟ إحنا ممكن نتجوز كلنا سوا في نفس اليوم.

اشتعلت الغيرة داخل عمر أكثر، وأصبح يريد أن يذهب خلفهما ويعيد ريم فورًا.

---

كانت ريم تسير بجوار شريف وهي شاردة ومضايقة.

قال شريف مطمئنًا:

ـ متقلقيش، أكيد واقف مع واحد من زمايله وبيهزر.

قالت ريم:

ـ أنا قلقانة بس... ليكون بيدور علينا ومش عارف مكاننا.

ضحك شريف وقال:

ـ إنتِ محسساني إنه ابنك مش أخوكي.

ابتسمت ريم وقالت:

ـ هو فعلًا ابني... من بعد موت بابا، الله يرحمه، أنا اللي بقيت مسؤولة عنه.

قال شريف:

ـ عارفة؟ إنتِ وعمر شبه بعض جدًا على فكرة.

تغيرت ملامح ريم فور سماع اسم عمر.

لاحظ شريف ذلك فقال:

ـ بس عمر اتغير بعد اللي حصله... وبقى فريسة سهلة لميرنا، اللي ظهرت وقت صدمته واستغلته عشان تقرب منه وتخليه يتجوزها.

ثم توقف ونظر إليها مباشرة وأكمل:

ـ لكن من أول ما ظهرتِ إنتِ، بدأ يرجع عمر بتاع زمان.

وسألها:

ـ إنتِ عارفة إنه فسخ خطوبته من ميرنا امبارح؟

نظرت إليه ريم بصدمة وقالت:

ـ إزاي؟! أمال هي معاه النهارده ليه؟ وواضح إنهم كانوا متفقين يتقابلوا!

هز شريف رأسه نافيًا وقال:

ـ لا خالص... دي جت عشان تكمل استغلالها ليه. عمر فسخ خطوبته منها امبارح قدامنا.

ثم نظر إليها وقال:

ـ هو إنتِ تعرفي حكاية عمر ومين هي مامت ساندي؟

هزت ريم رأسها بالنفي.

فقال شريف:

ـ أنا هحكيلك... يمكن تلاقي حل يساعدنا.

ظل شريف يحكي لريم كل شيء عن عمر...

حكى لها عن كل ما مر به خلال السنوات الست الماضية من حياته، وعن إحساسه الدائم بالذنب بسبب وفاة فرح، وكيف أنه عندما كان مصدومًا ويُلقي اللوم عليهم بسبب زواجه منها، استغل خاله وميرنا حالته النفسية، واقتربا منه حتى تمكنا من دفعه إلى خطبة ميرنا.

لكنه أوضح لها أن عمر لم يحب ميرنا يومًا، وأنه خطبها عنادًا فيهم فقط، لأنها لم تكن تشبه فرح في شيء، بل كانت مختلفة عنها تمامًا.

ثم حدثها عن علاقته به، وكيف كان عمر يعتبره أخًا وصديقًا مقربًا، وكيف وقف بجواره وعلمه العمل خطوة بخطوة، بل كان يعامله وكأنه أب له وليس مجرد أخ أكبر، رغم أن فارق العمر بينهما لم يكن كبيرًا... تمامًا كما تعامل هي حسن.

كما حكى لها عن علاقته بأمل، ومدى بره بها واهتمامه بها، وعن علاقته بساندي، التي أصبح لها الأب والأم وكل شيء في الحياة.

ثم أخبرها كيف أنهم جميعًا لاحظوا التغيير الذي طرأ على عمر خلال الأسبوعين الماضيين، وكيف بدأ يعود تدريجيًا إلى شخصيته القديمة، ويستعيد روحه التي فقدها منذ سنوات.

وحكى لها أيضًا كيف أنه ترك ميرنا وفسخ خطبته منها، وأخبرها بما حدث أمامهم جميعًا، وكيف هددته ميرنا بالانتحار حتى تمنعه من الابتعاد عنها.

تنهد شريف وقال:

ـ دي كل حكاية عمر...

ثم توقف ونظر إليها مباشرة وأكمل:

ـ صدقيني يا ريم، أنا ما زودتش حاجة من عندي... ولا قولت حاجة ما حصلتش.

ابتسمت ريم ابتسامة هادئة وقالت:

ـ مصدقاك يا شريف... بس عمر عايش صراع جواه. صعب جدًا اللي مر بيه... مكنش سهل أبدًا عليه.

هز شريف رأسه موافقًا وقال:

ـ عشان كده يا ريم، أنا وماما فرحنا جدًا لما شفنا عمر بيرجع لطبيعته... ورجع عمر بتاع زمان.

ثم نظر إليها نظرة ذات معنى وأردف:

ـ وكنتي إنتِ سبب ده.

اتسعت عينا ريم قليلًا وقالت بخجل:

ـ أنا؟

ابتسم شريف وقال:

ـ أيوه، إنتِ يا ريم...

ثم تابع وهو ينظر إليها بثقة:

ـ إنتِ البنت اللي عمر طول عمره بيحلم بيها. نفس المواصفات اللي كان دايمًا يتكلم عنها زمان.

وأخذ يسترجع كلماته القديمة:

ـ كان يقول إنه عاوز بنت جميلة بجمال طبيعي... مش مزيف بأدوات التجميل. وتكون محترمة، لبسها محتشم وتغطي نفسها. وعاوزها تكون صاحبة قلب كبير... تدي من غير ما تستنى تاخد. وتقف جنبه وقت الجد، ووقت الضحك والفرح تملى البيت حب وجنان.

ابتسم ابتسامة واسعة وأكمل:

ـ ودي كلها مواصفاتك يا ريم...

ثم أردف بنبرة صادقة:

ـ عمر كان بيتمنّاكي من قبل حتى ما يشوفك. وأول ما شافك... الغشاوة اللي كانت على عينيه اتشالت، وبدأ يرجع لنفسه من جديد.

صمت للحظة، ثم قال وهو ينظر إلى عينيها:

ـ ريم... أنا حاسس إن مش عمر لوحده اللي حس بيكي... وإنك إنتِ كمان حسيتي بيه.

فتحت ريم فمها لترد، لكنه قاطعها بلطف:

ـ أنا مش عاوز رد يا ريم...

ثم أكمل بجدية:

ـ كل اللي عاوزه منك إنك تدي لعمر فرصة... ومتسبيش ميرنا تنتصر... وتاخده مننا.