البارت التاسع عشر

ركضت ريم إلى شقتهم وهي تكاد لا تشعر بالأرض تحت قدميها. كان وجهها متوردًا من الخجل، وقلبها يدق بعنف بعد اعتراف عمر بحبه لها.

دخلت الشقة بسرعة، فوجدت حسن جالسًا أمام مكتبه يذاكر.

حسن بقلق:

ـ مالك يا ريم؟ بتجري ليه؟ ووشك أحمر كده ليه؟ إنتِ تعبتي تاني؟

ابتسمت ريم محاولة إخفاء ارتباكها:

ـ لا يا حبيبي، أنا كويسة. طمني، أخبار المذاكرة إيه؟

حسن بضيق:

ـ أهو بذاكر... بس اتخنقت وزهقت أوي.

اقتربت منه ريم وربتت على كتفه بحنان.

ـ هانت يا حبيبي... يلا خد راحة شوية، وانزل شوف سيمبا.

حسن باستغراب:

ـ سيمبا مين؟

ريم بابتسامة:

ـ الكلب الجديد بتاع ساندي.

قفز حسن من مكانه بحماس.

ـ كلب بجد؟! أنا بحبهم أوي!

ثم اندفع خارج الشقة جريًا لينزل إلى الجنينة.

أما ريم فدخلت غرفتها، صلت، وغيرت ملابسها، ثم نزلت إلى الأسفل.

---

بدأ الجميع يجهزون للاحتفال بعيد ميلاد ساندي.

وكان عمر كلما اقترب من ريم ينظر إليها مبتسمًا، فتخفض رأسها خجلًا وتبتعد عنه، فيزداد هو سعادة كلما رأى ارتباكها.

وبعد أن جلسوا جميعًا وتناولوا العشاء وسط أجواء من المرح والضحك...

دخلت ريم إلى المطبخ لتحضر التورتة.

وما إن حملتها واستدارت لتخرج، حتى فوجئت بعمر يقف أمام الباب.

حاولت المرور، لكنه تحرك ليمنعها.

ريم بخجل وهي تنظر إلى الأرض:

ـ ممكن أعدي؟

عمر بابتسامة واسعة:

ـ لااا... انسي إنك تعدي، قبل ما تقولي ردك على اللي قولته الصبح.

احمر وجهها أكثر.

ـ كلام إيه؟

ضحك عمر وقال:

ـ ده إنتِ عاوزاني أقوله تاني بقى؟

ريم بخجل:

ـ لا... بس الكلام ده أصلًا ما ينفعش أرد عليه.

ابتسم عمر وقال:

ـ طيب... نقول حاجة تانية ينفع تردي عليها؟

ثم اقترب خطوة منها.

أما هي فازدادت خجلًا وتراجعت للخلف.

نظر إليها مباشرة وقال:

ـ تتجوزيني؟

تجمدت ريم مكانها، وانخفض رأسها أكثر وهي تبتسم بخجل شديد.

ـ ودي كمان ما ينفعش أرد عليها... إلا لو ماما وعمي هما اللي سألوني.

اتسعت ابتسامة عمر وهو يقول بفرحة:

ـ يعني أكلم عمي عبد الحميد وأطلبك منه؟

رفعت ريم عينيها نحوه لحظة، ثم قالت بخجل:

ـ ما أعرفش...

ثم أسرعت بالخروج من أمامه.

كانت وجنتاها تشتعلان احمرارًا، ويداها ترتجفان من شدة التوتر.

اتجهت إلى الجنينة ووضعت التورتة على الطاولة المجهزة للاحتفال.

اقتربت منها تقي وهي تبتسم بمكر.

ـ هو إيه النظام؟ ومال وشك أحمر كده ليه؟

ابتسمت ريم بخجل.

ـ ولا أحمر ولا حاجة... إنتِ اللي بيتهيألك.

تقي وهي تغمز لها:

ـ آه طبعًا... بيتهيألي! يا بت، أنا برضه؟ اعترفي بسرعة.

ريم ضاحكة:

ـ أعترف بإيه بس؟ يلا اشتغلي وسيبيك من الرغي.

---

في تلك الأثناء...

كان عمر قد أمسك هاتفه واتصل بعبد الحميد.

وبدون أي تردد طلب منه يد ريم.

فرح عبد الحميد فرحة كبيرة ووافق فورًا، ثم أخبر فاطمة بالأمر.

ففرحت هي الأخرى بشدة، لكنها قالت:

ـ لازم نعرف رأي ريم الأول.

---

خرج عمر إلى الجنينة وهو يبتسم، ثم اتجه مباشرة نحو ريم.

وقف أمامها ومد لها الهاتف.

عمر بابتسامة:

ـ ريم... عمي عبد الحميد عاوزك.

اتسعت عيناها بصدمة، ونظرت حولها إلى الجميع.

عمر ضاحكًا:

ـ هتاخدي الفون... ولا أفتح الاسبيكر؟

خطفت الهاتف من يده بسرعة، بينما وقف هو أمامها يبتسم.

أما الباقون فكانوا ينظرون باستغراب.

أمل بقلق:

ـ في إيه يا عمر؟ فاطمة كويسة؟

عمر مطمئنًا الجميع:

ـ الحمد لله، طنط فاطمة بخير... بس عم عبد الحميد بياخد رأي ريم في طلب أنا طلبته منه.

انفجر الجميع بالضحك، وفهموا المقصود فورًا.

أما ريم فكانت تمسك الهاتف بخجل شديد.

لاحظ عمر أنها ما زالت صامتة، فقال مبتسمًا:

ـ هو صحيح المكالمة دولي، وأنا بدفع في الدقيقة فلوس كتير... بس فداكي، ومعاكي للصبح كله... لحد ما تقولي موافقة.

ثم جلس أمامها مباشرة على الأرض، وقد ضم ساقيه ووضع ذقنه فوق كفه، وظل ينظر إليها بحب واضح.

فضحك الجميع على منظره.

ماجد ضاحكًا:

ـ وإنت فاكر بقعدتك دي هتعرف ترد؟ دي لو كانت هتعرف تنطق حرف مش هتعرف دلوقتي. قوم يا واد وسيبها براحتها.

فضحك شريف، ثم جلس بجوار عمر مقلدًا له.

شريف:

ـ لا، كلنا هنقعد هنا... وهنعمل اعتصام لحد ما تقول موافقة.

وفعلت تقي الشيء نفسه.

ثم جلس حسن.

ثم ساندي وهاجر اللتان قلدتا الكبار وهما تضحكان.

وخلال لحظات كان الجميع جالسين أمام ريم ينتظرون ردها.

عماد ضاحكًا:

ـ مهمتك صعبة أوي يا ريم... بس مفيش مهرب، مش هيسيبوكي.

---

وضعت ريم الهاتف على أذنها.

كانت يداها ترتجفان، وقلبها يدق بقوة، وعيناها تلمعان بالدموع من شدة التأثر والخجل.

ريم بصوت منخفض:

ـ أيوه يا عمي...

عبد الحميد بفرحة:

ـ أيوه يا حبيبة عمك... عمر طلب إيدك مني، وفاطمة وافقت. بس المهم رأيك إنتِ.

ثم ضحك بصوت عالٍ وأضاف:

ـ وهو مش صابر أصلًا، ومصمم يعرف ردك دلوقتي... ها؟ قولتي إيه؟

ازدادت نظرات الجميع تعلقًا بها وهم ينتظرون إجابتها.

مرّت ثوانٍ طويلة...

ثم قال عبد الحميد بقلق:

ـ إيه يا ريم؟ ساكتة ليه؟ أقوله إيه؟

ابتسمت ريم بخجل شديد، ثم قالت بصوت بالكاد سمعه من حولها:

ـ اللي حضرتك وماما تشوفوه يا عمي...

وما إن أنهت جملتها...

حتى دوّى التصفيق في أنحاء الجنينة.

أطلق شريف وعماد صفيرًا عاليًا، بينما علت الضحكات والتهاني من الجميع.

أما ريم فخفضت رأسها أكثر، وارتسمت على وجهها ابتسامة خجولة جميلة.

وفي المقابل...

ألقى عمر بنفسه على الأرض من شدة الفرح، وفتح ذراعيه على اتساعهما وهو يضحك بسعادة لم يشعر بها من قبل، وكأن الدنيا كلها أصبحت ملكه في تلك اللحظة.

ريم بخجل:

ـ بس...

وما إن نطقت بتلك الكلمة حتى ساد الصمت المكان كله.

توقف الجميع عن الضحك، ورفع عمر جسده نصف رفعة من فوق الأرض، مستندًا على كوعه، ونظر إليها بخوف وترقب.

أما هي فابتسمت برقة وأكملت:

ـ مفيش أي حاجة رسمية هتحصل... غير لما ماما وحضرتك وطنط ترجعوا بالسلامة.

تنفس الجميع الصعداء في اللحظة نفسها، ثم تعالت الضحكات من جديد.

أما عمر فظل ينظر إليها بحب، وعلى وجهه أجمل ابتسامة.

عبد الحميد بفرحة:

ـ طبعًا يا حبيبتي، وإن شاء الله هنرجع قريب ونفرح بيكم. مبروك يا ريم... خدي، ماما ومديحة عاوزين يباركولك.

وبدأت التهاني تنهال على ريم من الجميع.

أما فاطمة فكانت تبكي من شدة السعادة، فهذا اليوم الذي حلمت به طوال عمرها، أن ترى ابنتها سعيدة ومطمئنة وبجوار من يحبها ويحافظ عليها.

---

مرّ اليوم كله وسط فرحة وسعادة غمرت البيت بأكمله.

وظلت أجواء البهجة تملأ المنزل خلال الأيام التالية.

أما عمر، فكان كل فترة يتحجج بأي سبب ليقترب من ريم أو يتحدث معها.

بينما كانت هي كلما رأته تشعر بالخجل، فتتهرب منه بسرعة.

وللهروب منه أكثر، اتخذت من مذاكرة حسن حجة دائمة، فكانت تقضي أغلب وقتها في شقتهم بعيدًا عنه.

---

وجاء يوم الأحد...

وعادت ريم إلى العمل بعد انتهاء إجازتها.

ما إن دخلت الصيدلية حتى أسرعت نهى إليها.

نهى بفرحة:

ـ وحشتيني أوي يا ريم.

ريم بابتسامة:

ـ وإنتِ كمان يا حبيبتي. معلش غيبت عنك وسيبت الشغل كله عليكي، أكيد تعبتي.

نهى:

ـ المهم سلامتك يا حبيبتي... وبعدين هالة استجدعت معايا وكانت بتطلع تساعدني.

وفي تلك اللحظة دخلت هالة الصيدلية.

هالة بابتسامة:

ـ أنا سامعة حد بيجيب في سيرتي.

ثم اقتربت منهما.

ـ حمد لله على سلامتك يا ريم.

ريم بجمود خفيف:

ـ الله يسلمك، متشكرة يا هالة.

نظرت إليها هالة بحزن واضح.

ـ إنتِ زعلانة مني يا ريم؟

تنهدت ريم وقالت بأسف:

ـ لا يا هالة... أنا زعلانة عليكي. إنتِ بقيتي واحدة تانية أنا معرفهاش. سهر وخروج وحاجات كتير ما بقاش ينفع تتقال عليكِ بعدها إنك هالة صاحبتي اللي أعرفها.

انخفضت عينا هالة، وامتلأتا بالدموع.

هالة بحزن:

ـ أنا عارفة إن عندك حق يا ريم... وصدقيني هحاول أرجع لنفسي تاني. بس متسبونيش... خليكي جنبي.

وسقطت دموعها وهي تكمل:

ـ أوعي تتخلي عني يا ريم... أنا محتاجاكم أوي. فضلي فوق راسي، وسمعيني كلامك اللي بيفوقني... لحد ما أرجع لنفسي.

ابتسمت ريم واقتربت منها، ثم وضعت يدها على كتفها بحنان.

ـ ومدام إنتِ عاوزة ترجعي... يبقى إحنا مش هنسيبك. وهنرجعك حتى لو هنكتفك ونضربك علقة موت ونرجعك غصب عنك.

ضحكت هالة وسط دموعها، وضحكت نهى معهما.

وبعدها ظللن يتحدثن ويضحكن لبعض الوقت، قبل أن تغادر هالة وتترك ريم ونهى تتابعان العمل.

---

وقبل أن تدخل هالة مكتبها...

سمعت صوت سمر وهي تتحدث في الهاتف، وذكرت اسم ريم أثناء المكالمة.

فتوقفت مكانها دون أن تشعرها سمر بوجودها.

سمر بضيق:

ـ أيوه، رجعت النهارده... وإيه السعادة اللي هتنط من عينيها دي!

جاءها صوت ميرنا من الطرف الآخر.

ميرنا بغضب:

ـ وإحنا مش عاوزين السعادة دي تستمر أكتر من كده. إنتوا مستنيين إيه؟

سمر بابتسامة خبيثة:

ـ كنا مستنيينها ترجع... وهي رجعت. والنهارده هنبدأ أول خطوة في الخطة.

ميرنا:

ـ هو حازم جاب الهكر ولا لسه؟

سمر:

ـ أيوه، كلمني وقال إنه في الطريق... وعلى ما أجيب تليفونها يكون وصل.

ميرنا:

ـ وإنتِ هتعرفي تجيبي تليفونها بسهولة؟

سمر بثقة:

ـ عيب عليكي... دي أنا سمر.

ميرنا:

ـ طيب، هسيبك تشوفي هتعملي إيه. ابقي طمنيني.

وقبل أن تنهي المكالمة سألتها سمر:

ـ ميرنا... صحيح، جبتي مواعيد تمارين حسن أخوها من أختك؟

ميرنا:

ـ أيوه، هبعتهالك على الواتساب.

سمر:

ـ ماشي، يلا سلام.

وأغلقت الهاتف.

---

كانت هالة واقفة في مكانها وقد سمعت الحديث كله.

لكنها لم تفهم معظم ما قيل.

كل ما فهمته أن ريم هي محور الكلام، وأن هناك شيئًا يتم التخطيط له بمشاركة سمر وحازم وفتاة تدعى ميرنا.

شعرت بقلق شديد دون أن تعرف السبب.

هالة في نفسها:

ـ استرها يا رب...

ثم عقدت حاجبيها وهي تفكر.

ـ يا ترى بتخططوا لإيه يا سمر إنتِ وحازم؟ ومين ميرنا دي؟ أنا لازم أعرف هما بيعملوا إيه.

---

دخلت هالة المكتب بعد أن أخفت قلقها خلف ابتسامة عادية.

هالة:

ـ إيه يا سمورة؟ بتعملي إيه؟

رفعت سمر رأسها وابتسمت بسرعة.

ـ ولا حاجة... كنت بكلم واحدة صاحبتي. نزلتي من عند أصحابك على طول يعني؟

جلست هالة على المقعد وقالت:

ـ أيوه... انشغلوا. ما إنتِ عارفة أول الشهر، والشغل بيبقى كتير عندهم.

نهضت سمر من مكانها وهي تلتقط حقيبتها.

ـ آه، ربنا يعينهم.

ثم ابتسمت وأضافت:

ـ هقوم أتمشى شوية وأجيب حاجة أشربها... عاوزة حاجة؟

هالة بابتسامة هادئة:

ـ لا، شكرًا.