البارت 22

...وفي الليل، اجتمعت سمر وميرنا وحازم، ومعهم الهاكر.

ميرنا بخبث:

- عاوزاك تعمل الصور بطريقة مظبوطة... وأهو عندك صورها مع أخوها كلها أحضان وبوس. شيل أخوها وحط حازم مكانه.

سمر:

- وتغيّر خلفية المكان... وبعدين عاوزين شوية كلام بينهم على الإيميلات، ومواعيد كأنهم كانوا بيتقابلوا فيها.

حازم:

- بس الأول عاوزين بيت أو شقة نستخدمها ونكتب عنوانها، ويكون في مكان مقطوع. مش هينفع شقتي، عشان اليوم اللي تيجي فيه لو صرخت الناس هتتلم، وساعتها الخطة هتبوظ.

سمر:

- فعلًا، عاوزين مكان يكون في حتة بعيدة، وتبقى دي الشقة اللي بيتقابلوا فيها، ونكتب عنوانها في الرسائل ونحطه في خلفية الصور.

ميرنا بابتسامة خبيثة:

- أنا عندي مكان... إنجي عندها فيلا في مزرعة في .......... مكان هادي، وحواليه زرع، وكل اللي حواليه فيلات أصحابها ما بيروحوش غير للاستجمام كل فترة. كنا بنروح نعمل سهرات هناك. هاخد من إنجي المفتاح، وأقول لها إني هكون مع حد هناك، وهي هتعرف البواب اللي بيشتغل هناك، وهتبعده عن الفيلا وقتها. محدش ساعتها هيعرف يلحق الهانم... حتى لو صرخت للصبح.

سمر مبتسمة:

- قولي هو أنت تعرف تغيّر رقم على التليفون، بس يفضل بنفس الاسم؟

الهاكر بثقة:

- أنا بعمل أي حاجة على تليفونها دلوقتي بمزاجي... أغيّر، أقفل، أفتح... كله بقى على اللاب قدامي.

ميرنا:

- أنتِ عاوزة تغيّري رقم مين؟

سمر:

- رقم حسن أخوها. لازم يتغير يومها على تليفونها ويتحط أي رقم إحنا نشتريه ونقفله. عشان لما نبعت لها الرسالة إنها تلحقه، أكيد أول حاجة هتعملها إنها هتحاول تكلمه. فلازم تتصل وما يردش، أو يبقى مقفول. ساعتها ما يبقاش قدامها غير إنها تروح.

حازم:

- طيب افرضي اتصلت بحد تاني عشان يروح معاها؟

الهاكر:

- أنا ممكن أمنع وصولها لأي جهة اتصال، وأخلي التليفون يسقط شبكة. وكده أضمن إن حتى لو حد اتصل بيها يبقى تليفونها مغلق.

سمر بخبث:

- يبقى كده الخطة ماشية صح. معادنا كمان أربعة أيام... آخر يوم امتحانات أخوها. وتكون أنت ظبطت الصور والإيميلات، وأنا أخدت تليفون عادل صاحبه، ونتحرك كلنا في ثانية واحدة.

الجميع:

- اتفقنا.

---

وفي اليوم التالي بالمستشفى...

كانت هالة تجلس مع سمر، تحاول كسب ثقتها ومعرفة ما الذي تخطط له. لكن الأمور كانت تبدو طبيعية، وسمر لم تأتِ على ذكر حازم أو ريم.

وبينما كانتا تتصفحان مجلة للموضة، رن هاتف سمر.

سمر:

- أيوة يا ميرنا، إزيك؟

ثم نهضت وأخذت الهاتف ووقفت خارج المكتب.

أما هالة، فقامت بهدوء محاولة سماع ما يدور.

سمر:

- حلو يعني وافقت... طيب ابعتيلي عنوان الفيلا عشان أبعته لحازم.

ميرنا:

- ............

سمر:

- تمام كده... أنا هتصل بحازم دلوقتي وأبلغه العنوان عشان يحطوه في الإيميلات، وإنتِ ابعتيلي صور المكان.

كانت هالة تستمع، لكنها لم تفهم ما المقصود بالفيلا أو الإيميلات.

بعد دقائق اتصلت سمر بحازم.

سمر:

- أيوة يا حازم... خد عنوان الفيلا، وابدأ الشغل بسرعة. فيلا مزرعة رقم 85 في ............

استمعت هالة جيدًا للعنوان، وبدأت تبحث عنه على التطبيق الموجود في هاتفها. كانت تريد معرفة ماهية المكان، لكنها لم تجد سوى طريق يؤدي إلى مزارع ومنازل متفرقة.

وما إن وجدت سمر تغلق الهاتف حتى عادت إلى مكانها بسرعة.

هالة تحدث نفسها:

- إيه العنوان ده؟ ومين ميرنا؟ وإيه علاقتها بحازم وسمر؟ ويا ترى الفيلا دي والإيميلات ليهم علاقة بريم؟ بس أنا ما سمعتش اسم ريم في المكالمة. هي كانت بتقول لهم يخلصوا الشغل بسرعة... يمكن بيعملوا مشروع سوا بعد ما حازم اترفد. بس أنا ليه قلقانة كده؟ يا رب استرها.

---

وفي فيلا عبد الحميد...

وصل هشام على العشاء، وتعرّف على عمر وشريف.

عمر مبتسمًا:

- أنا مش عارف أشكرك إزاي، خصوصًا إنك ساعدتنا إن الرجالة دول يبقوا شهود ويخرجوا من القسم.

هشام مبتسمًا:

- مفيش شكر بينا. وبعدين ده واجبي وشغلي. بس بصراحة أنا مش فاهم ليه قلتوا إنهم رجالتكم وبيشتغلوا معاكم، وإنهم كانوا بينفذوا أوامركم عشان يوقعوا صاحب الشركة؟

شريف:

- أولًا عشان ما يعترفوش على خالي، مع إني كنت نفسي يتعاقب. لكن عشان خاطر أمي وصلة الرحم. وبعدين إحنا وعدناهم إننا مش هنسجنهم، وإننا نوفر لهم شغل محترم يعيشوا منه هم وأولادهم.

هشام:

- بس اللي زي دول الخيانة في دمهم، وممكن يخونوكم في أي وقت.

عمر:

- بالعكس. لما ننفذ وعدنا ليهم، ويشتغلوا شغل محترم، ويطمنوا على ولادهم، هيبقى ولاؤهم لينا. وبعدين إحنا مش هنمسكهم الشركة ولا أماكن يقدروا يخونونا منها. هنشغلهم شغل بعيد عن أي طمع، وهنعمل لهم رواتب محترمة، ونساعد أولادهم في التعليم... وعيننا هتفضل عليهم برضه.

هشام مبتسمًا:

- أتمنى يقدّروا ده ويمشوا سليم.

وفي تلك اللحظة دخلت ماجدة وأمل.

ماجدة:

- أهلًا يا هشام يا ابني، منورنا.

وقف هشام سريعًا.

هشام:

- ربنا يخليكِ يا ست الكل.

ثم اقترب منها وقبّل رأسها.

- عاملة إيه؟ وإزي صحتك؟

ماجدة وهي تربت على كتفه:

- الحمد لله يا حبيبي. وإزي الأهل كلهم؟

هشام:

- بخير الحمد لله.

ماجدة:

- ده هشام بقى يا أمل... متربي مع عماد من وهم صغيرين، وطول ما عماد مسافر، أول ما ينزل البلد لازم ييجي يطمن عليّ.

أمل مبتسمة:

- أهلًا وسهلًا، تشرفنا بيك، ومتشكرة جدًا لوقفتك مع ولادي.

هشام:

- متشكرة على إيه بس؟ ده واجبي يا فندم. والله أنا مبسوط إني اتعرفت عليكم.

أمل:

- وإحنا أكتر. ومن النهارده أنت واحد من ولادنا، وبيتنا مفتوح ليك في أي وقت.

هشام:

- دايمًا عامر بأهله.

وظلوا يتحدثون ويتعرفون إلى بعضهم أكثر.

وفي تلك اللحظة دخلت تقى.

تقى:

- السلام عليكم.

رفع هشام عينيه نحو مصدر الصوت، وتوقف لثوانٍ وهو ينظر إليها، ثم خفض بصره سريعًا.

هشام:

- وعليكم السلام ورحمة الله وبركاته.

تقى:

- اتفضلوا... العشا جهز.

ماجدة:

- يلا يا ولاد... اتفضل يا هشام يا ابني.

---

وبعد العشاء...

خرج هشام ليغسل يديه، وأثناء مروره في الحديقة اصطدم بتقى.

هشام مبتسمًا:

- أنا آسف جدًا... ماخدتش بالي.

تقى بخجل:

- حصل خير... اتفضل.

هشام بإعجاب:

- حضرتك أخت عمر وشريف؟

تقى:

- هم زي إخواتي وأكثر... إحنا متربين سوا، بس أنا بنت عمتهم.

هشام مبتسمًا:

- اتشرفت بيكي يا آنسة...

تقى بخجل:

- تقى... اسمي تقى.

ثم انصرفت سريعًا وهي تبتسم.

أما هو فظل يتابعها بعينيه حتى اختفت.

ثم ابتسم وهو يحدث نفسه:

- شكلك هتتجوز يا هشام... وعقدتك هتنفك يا ابن المحظوظة.

---

وفي المطبخ...

ريم باستغراب:

- إيه مالك يا تقى؟ مبتسمة كده ليه؟

تقى بسعادة لا تعرف سببها:

- أصلي مبسوطة أوي.

ريم مقلدة صوتها:

- ومبسوطة أوي ليه؟

تقى:

- مش عارفة... بس مبسوطة، وقلبي عامل... بم تك توك!

ريم ضاحكة:

- لا والله!

ومرت الأيام بشكل طبيعي، وازدادت علاقة ريم وعمر قوةً وتعلقًا. أما هالة فكانت ما زالت تحاول معرفة ما الذي تخطط له سمر، وتستمع إلى مكالماتها يوميًا، لكنها لم تصل إلى شيء واضح.

وقبل يومٍ واحد من تنفيذ الخطة...

كانت هالة جالسة في غرفتها، تنظر إلى العنوان الذي سجلته في هاتفها، وكلما حاولت إقناع نفسها بأن الأمر لا يستحق القلق، عاد ذلك الشعور المزعج يسيطر عليها من جديد.

هالة لنفسها:

أكيد في حاجة غلط... سمر عمرها ما كانت بتتكلم بالطريقة دي. وصور وإيميلات وفيلا في مكان مقطوع... ليه كل ده؟

ظلت تفكر طويلًا، ثم قررت أن تذهب في اليوم التالي بعد العمل إلى ذلك المكان بنفسها لتطمئن.