البارت 21

وصل عمر وشريف وعماد إلى المخزن، وما إن دخلوا حتى وجدوا خمسة رجال مقيدين ومكتفين.

شريف للأمن:

- تسلموا يا رجالة.

أحد أفراد الأمن:

- رجالتكم يا باشا. إحنا لقيناهم بياخدوا الأدوية وبيحطوها في العربيات دي، وكان معاهم بنزين وكانوا ناويين يولعوا في المخزن.

اقترب عمر منهم ونظر إليهم بحدة.

عمر:

- مين اللي بعتكم؟

ساد الصمت، ولم يرد أحد.

عماد:

- شكلكم حابين تشيلوا الليلة لوحدكم. أنتم فاكرين إن اللي بعتكم هيصرف على بيوتكم وعيالكم؟ ده أنتم هتتسجنوا من هنا، وأهاليكم وعيالكم مش هيلاقوا حد يسأل عليهم ولا يأكلهم، وولادكم هيطلعوا حرامية زيكم. واللي بعتكم هيفضل قاعد في مكتبه المكيف، يحط فلوسه في البنوك، ويسفر عياله يتعلموا ويتفسحوا بره... وأنتم عيالكم هيضيعوا.

أحد الرجال بضيق:

- ما أنتم كده أو كده هتسلمونا... وهنتسجن وعيالنا هتضيع. تفرقوا إيه عنهم يعني؟

عمر:

- أنا عندي استعداد أتنازل وأقف جنب اللي عاوز يتوب منكم، ويشتغل ويأكل ولاده بالحلال. هشغله وأوفر له حياة محترمة هو وأولاده، وهقف جنبه وجنب عياله. واللي عنده ابن شاطر في الدراسة أو الرياضة هساعده لحد ما يحقق حلمه، واللي ملوش في التعليم هعلمه مهنة يعيش منها بدل ما يبقى مصيره السجن.

أحدهم:

- وإيه اللي يضمن لنا كلامك ده؟

شريف بضيق:

- وأنتم إيه اللي ضمن لكم كلام اللي بعتكم تسرقوا وتحرقوا؟ ما كده أو كده هتدخلوا السجن ومستقبل عيالكم هيضيع. لكن إحنا رجالة وقد كلمتنا، وهنقف معاكم لو عاوزين فعلًا تتوبوا وتعيشوا بالحلال، وهناخد في عيالكم ثواب.

أحد الرجال:

- أنا هقولك يا باشا... إبراهيم عليوة هو اللي بعتنا، وطلب مننا نسرق الأدوية ونسيب الصناديق في المخزن عشان يتقال إنها اتحرقت، ونحط جردل البنزين ونعمل ماس كهربائي عشان المخزن ينتهي.

عماد:

- وكنتم هتاخدوا الأدوية فين؟

الرجل:

- كنا هنطلع بيها على شركة... ونسلمهم الأدوية.

عمر:

- ومين هيستلم منكم هناك؟

الرجل:

- صاحب الشركة بنفسه مستنينا في المخزن بتاعه.

عماد:

- حلو الكلام... هو يعرف شكلكم؟

الرجل:

- يعرفني أنا يا باشا، عشان قابلته مرة مع إبراهيم بيه، وهم مستنيين مني تليفون.

عماد:

- عمر... تعال أنت وشريف، عاوزكم.

ابتعدوا قليلًا عن الرجال.

عماد:

- دلوقتي أنا ممكن أكلم هشام صاحبي، هو ظابط في مباحث القاهرة، وأرسيه على الحكاية، ويعتبر الرجالة دول شهود عليهم. بس كده خالكم هيتسجن، لأن أكيد صاحب الشركة هيعترف عليه.

شريف بعصبية:

- يتسجن؟! ما هو لازم يتربى.

عمر بضيق:

- لا يا شريف... عشان ماما، وعشان ما يتقالش إن إحنا سجنا خالنا. كلم صاحبك يمسك صاحب الشركة وهم بيسلموا الأدوية، وإحنا مش هنقدم بلاغ غير فيه هو، وهنوصي الرجالة ما يجيبوش سيرة إبراهيم. يمكن يتعدل لما يعرف إن إحنا منعنا سجنه... مين عارف.

وبالفعل اتصل عماد بهشام واتفق معه، وتحركت العربيات بصناديق فارغة، وعند الاستلام هاجمت الشرطة المكان وألقت القبض عليهم.

---

في فيلا إبراهيم...

كان إبراهيم يتحدث في الهاتف بغضب:

إبراهيم:

- اتقبض عليهم إزاي؟! ومين بلغ البوليس؟

في تلك اللحظة دخل عمر إلى الفيلا.

عمر بصوت مرتفع:

- أنا اللي بلغت.

سكت إبراهيم ووضع سماعة الهاتف.

عمر:

- وأكيد البوليس هييجي دلوقتي لما أصحابك يعترفوا عليك.

إبراهيم بجمود:

- أصحاب مين؟ ويعترفوا على إيه؟ إيه الكلام الفارغ اللي بتقوله ده؟

في تلك اللحظة كانت ميرنا تنزل السلم، وما إن رأت عمر حتى اقتربت.

عمر بسخرية:

- الإنكار ده هينفعك هناك في القسم... وسط المجرمين والحرامية، مش هنا.

ميرنا باستغراب:

- في إيه؟ وقسم إيه؟ أنتم بتتكلموا عن إيه؟

عمر بغضب:

- قولها... قول لبنتك إنك رحت كلمت عمتي اللي مقاطعاني من سنين أنا وبنتي، وقلت لها كلام كدب وافترى عليّ، وكانت بسببك هترفع قضية وتاخد مني بنتي. قولها إنك بعت ناس تسرق مخازن الأدوية وتولع فيها، واتفقّت مع أكبر منافس ليا في السوق عشان توقعني وتبعت له الأدوية، وأخدت منه عشرة مليون جنيه.

ميرنا متصنعة الصدمة:

- لا طبعًا... بابي مستحيل يعمل كده.

عمر:

- الرجالة اللي بعتهم اعترفوا عليه، وصاحب الشركة كمان اعترف. وعمتي جات عندي البيت وكانت ناوية تاخد ساندي، بس ربنا ستر والحمد لله.

ثم نظر إلى إبراهيم وقال:

- أنا بس عاوز أعرف... بتعمل كده فينا ليه؟ ده إحنا ولاد أختك.

إبراهيم بغضب:

- عشان أرجعكم شحاتين زي أبوكم قبل ما يتجوز. لو ما كانش أبويا جوزه أمل اللي باعت دهبها عشان تقف جنبه، ما كانش عمل الفلوس دي كلها، وكان فضل شحات يكنس في شوارع كندا. وفي الآخر، بعد كل اللي أختي عملته عشانه، يرفض يشركني ويروح يشارك عبد الحميد! وأنتم تكملوا بعده... لا وكمان تسيب بنتي، وعاوز تتجوز واحدة تانية من اهل ابوك!

ميرنا بدموع مصطنعة:

- ليه تعمل كده يا بابي؟! عاوز تؤذي عمر؟! أنت مش عارف أنا بحبه قد إيه؟ وإن أي حاجة توجعه كأنها بتموتني... حرام عليك.

إبراهيم متصنعًا الحزن:

- يا بنتي، ده فسخ خطوبته منك، وراح يخطب واحدة من الحرمية اللي بيضحكوا عليهم.

ميرنا بحزن:

- المهم إنه سعيد... أنا مش عاوزة غير سعادته.

تأثر عمر بكلامها، ثم قال لإبراهيم:

- أنا مش هقدم فيك بلاغ، والرجالة مش هيعترفوا عليك... بس ده مش علشانك، ده علشان صلة الرحم، وعلشان بناتك.

ثم استدار وغادر.

ما إن خرج حتى ارتسمت على وجه ميرنا ابتسامة خبيثة.

إبراهيم ضاحكًا:

- بنت أبوكي... إيه يا بت كل ده؟ ده أنا صدقتك.

ميرنا بابتسامة شريرة:

- ولازم هو كمان يصدقني... عشان لما يرجع يبوس رجلي أبقى أعرف أربيه.

---

وفي فيلا عبد الحميد...

أمل بحزن:

- حسبي الله ونعم الوكيل.

ماجدة:

- الحمد لله يا ولاد، ربنا قدر ولطف، وكويس إنكم لحقتوهم.

تقى بضيق:

- بس كان لازم تبلغوا عنه ويتقبض عليه. ده ما عملش اعتبار لا لأخته ولا لولادها ولا لصلة الرحم، وأنتم بتعملوا اعتبار ليه ليه؟

ريم بحزن:

- يا تقى، مهما حصل ده خالهم. وإن شاء الله ربنا يهديه، والنفوس تهدى، ويعرف غلطه ويعتذر.

أمل:

- إبراهيم عمره ما هيعتذر. طول عمره أناني وطماع. مش مكفيه ميراثي اللي أخده مني وأنا ما طالبتش بيه، دلوقتي عاوز ياخد اللي عند ولادي ويؤذيهم كمان.

ماجدة:

- ربنا يهدي له نفسه يا أمل، ويمكن يقدّر اللي عمله الولاد عشانه النهارده ويبعد عنهم.

شريف:

- والله لو عمل حاجة تاني ما هرحمه، وهطلع الجديد والقديم عليه وهسجنه عمره كله.

عمر:

- خلاص يا جماعة... حصل خير وربنا لطف.

ثم نظر إلى عماد.

- واشكرلنا صاحبك يا عماد، بجد ما اتأخرش لحظة علينا.

عماد مبتسمًا:

- هشام ده صديق عمري من أيام البلد، وجدع جدًا ومبيحبش الفساد. أنا عزمته على العشا هنا بكرة، بعد إذنكم طبعًا، عشان يتعرف عليكم.

أمل:

- إذن إيه يا عماد؟ البيت بيتك يا ابني. اعزم اللي أنت عاوزه، وبعدين ده أقل حاجة نقدمها له عشان نشكره.

عماد:

- متشكر يا طنط.

ثم غيّر الموضوع لشعورهم بحزن أمل.

- هي فين ساندي وحسن؟ مش شايفهم.

ريم:

- حسن بيذاكر  عنده امتحان  بكرة، وساندي كانت بتلون هي وسيمبا.

ماجدة:

- ما بتسيبش الكلب أبدًا. حتى الحمام بتاخده معاها... هتجنني.

عمر مبتسمًا وهو ينظر إلى ريم:

- بس عمري ما شوفتها فرحانة وسعيدة زي الأيام دي. ريم عارفة إزاي تفرحها... عقبال ما تفرح أبوها وتحن عليه بكلمة حلوة.

فضحك الجميع، بينما ابتسمت ريم بخجل ونظرت إلى الأرض.

---

وفي الليل...

اجتمع سمر وميرنا وحازم ومعهم الهاكر...