فصل 17

كنت عاوزة تهربي بره مصر ؟!

دا الكلام اللي وجه وكيل النيابة لسها في القسم اللي بدورها هزت راسها و قالت و هي يتتصنع البراءة:-

أيوة يا حضرة الظابط أخواتي قالولي هنهربك قبل ما البوليس يجي ياخدك عشان شكلنا قدام الناس

شكلكم قدام الناس ؟!

قالها وكيل النيابة و هو بيبص لحسين و مصطفى اللي قالوا في نفس واحد :-

دي كدابة يا حضرت الظابط متصدقهاش

وكيل النيابة خرجهم بره و خلي سها بس قدامه و قال:-

قوليلي بقي مين اللي كان بيساعدك بالظبط

سها قعدت قدام وكيل النيابة من غير ما يسمح ليها لكنه اتغاضي عن الموضوع مؤقتاً لحد ما يخلص معاها

- قالت و هي بتبص ليه ببجاحة:-

مصطفي و حسين هما اللي ساعدوني ، تخيل يا حضرت الظابط كنت بتحايل عليهم عشان يسبوني أعترف على نفسي عشان تكون العقوبة مخقفه شوية لكن هنا اعترضوا و قالوا منظرنا قدام الناس اية ؟!

وكيل النيابة قام وقف و وجه كلامه لسها مره واحده

- قتلتي دلال ليه ؟!

سها أخدت نفس و قالت:-

عشان تستاهل إنها تموت ، بص يا حضرت الظابط أنا هقولك بس الكلام دا ميطلعش لحد عشان دي سمعت بنت بقي و إنت عارف الكلام بيكتر

دلال كانت بتخون أخويا ،وأنا كنت بسمعها بدوني ، حاولت كام مرة انصحها تبعد عن اللي بتعمله دا عشان غلط ، لكن هي بقت تتخانق معايا و تقولي خليكي في حالك

و تخيل يا حضرت الظابط قالت على أخويا مغفل

سها نزلت دمعتين و كملت و هي بتقول:-

أخويا اللي كان قايد ليها صوابعه العشرة شمع ، كان منغنغها في الفلوس مكنتش تطلب فلوس إلا و ابراهيم يديها و زيادة كمان

و كانت علطول تتبلي على أمي و تتخانق معاها عشان تبات إن هي الحلوة و الباقي كله وحش ، وإن أمي هي اللي جاية عليها في كل حاجة ، لكن في الأساس يا سيادة الظابط إنها مكنتش بس واحدة خاينه لا دي كمان كانت جبروت ماشية على الأرض كانت بتخلي أمي الست الكبيرة اللي مش بتقدر تخدم نفسها تخدمها و تخدم عيالها

بذمتك كدا متستاهلش الموت ؟!

وكيل النيابة بقي يبص لـ سهي بزهول من الكلام اللي بتقوله و كميه الحقد اللي جواها ، و البلا اللي بتتبلي بيه على دلال ، هي مكتفتش بقتلها لا دي بتلبسها قضية كمان

اتنهد بضيق و بصلها و قال:-

حتي لو اللي قولتيه كله صح ، حتي لو عملت اكتر من كدا ، دا مش مبرر إنك تقتليها مين اداكي الحق دا ؟!

سهي بصت ليه و رفعت حاجبها و قالت:-

وأنا لسة هستني حد يديني حق قتلها بعد اللي قولتهولك ، أنا طفح الكيل منها خلاص فديت الحق لنفسي بقتلها عشان تبقي عبرة لغيرها

وكيل النيابة بص ليها و وجه سؤال مباشر و سابه من كل اللي قالته:-

يعني إنت معترفه إنك قتلتيها ؟!

هزت راسها بايجاب من غير ما تتكلم لكنه قال بحده:-

معترفه إنك قتلتيها

صرخت بقوه و قالت:-

اه قولتلك اه قتلتها و بايدي دي شديت السكينه من طبق الفاكهة و قتلتها

وكيل النيابة بص للكاتب جنبه و قال :-

اكتب يبني

و لقد اعترفت القاتلة بارتكابها الجريمة و هي بكامل قواها العقلية و الجسدية و سيتم حبس المتهمه أربعه أيام لحين تحديد موعد المحاكمه و اقفل المحضر في ساعته و تاريخه

نادي وكيل النيابة على العسكري اللي واقف بره و قال:-

خدها يبني ارميها في الحجز و وصي عليها المعلمة

سها بصت للظابط باستغراب:-

يوصي عليا إزاي يعني هيحترمني ؟!

وكيل النيابة بصلها بخبث و قال :-

دول هيحترموكي احترام محدش احترمهولك قبل كدا ، دا إنت من الطبقة الراقية يا فندم يعني لازم تعامل خاص

هزت سها رأسها بتفهم و فرحت من جواها إنها قدرت تأثر على الظابط و مشيت مع العسكري و هي بتبص ليه بقرف و من فوق لتحت

أول ما خرجت من باب الاوضة لقت حسين و مصطفى واقفين بيبصولها بشفقة قربت منهم و قالت بصوت هامس :-

عشان تعرفوا إن فيا شئ لله أهو الظابط صدقني حتي قال للعسكري بتاعه وصي عليها يعني حتي وأنا في الحبس هكون أحسن منكم و في مستوي عالي

حسين بص ليها بسخرية و قال:-

أوي عالي أوي

وجه كلامه للعسكري و كمل :-

الحق خدها بقي على التخشيبه أصل امها وحشاها عاوزة تشوفها و تطمن عليها و أهو بالمرة تتطمن على المستوي العالي أوي و الرفيع اللي داخلة عليه

مصطفي بصلها بأسف على الحال اللي هي فيه و بص لحسين اللي قال ليه بصوت هادي و خالي من أي مشاعر:-

هي اللي اختارت يا مصطفى يبقي تتحمل نتيجة اختيارها

- مصطفى بص لحسين و قال:-

بس

لكن حسين مدلوش فرصة يتكلم و قال:-

مفيش بس تتحمل نتيجة اختيارها و لو لمرة واحدة ، و متقلقش عليها أمك جوه معاها

هز مصطفى رأسه بايجاب بقلة حيلة من غير ما يضيف حرف واحد و الاتنين قعدوا قدام غرفه وكيل النيابة مستنين دورهم يجي أو حد ينادي عليهم عشان يدخلوا

..........

كان العسكري واخد سها و ماسكها من دراعها و هي عمالة تتلوي منه و تقول:-

سيب ايدي إنت اتجننت بتمسك ايدي كدا ؟! إنت مش عارف أنا ابقي بنت مين أنا اقعدك في بيتك

العسكري بصلها من فوق لتحت و ضغط على اديها اكتر و سحبها زي البقره و هو بيقول:-

امشي وإنت ساكته مش عاوز اسمح حس ليكي ، هتكوني بنت مين يعني ، دي مش لكنه واحدة بنت ناس دي لكنه واحدة جاية من ورا الجاموسة

وقفت لحظة و هي بتشد اديها منه بعنف و بتقول:-

جاموسة تاكل رقبتك يا شيخ ، أنا مش هسكت على المهزلة دي

العسكري مسكها من اديها تاني و شدها بعنف و قال:-

أنا اللي مش هسكت على قلة ادبك دي ، و مش هروح النهاردة غير و صوتك العذب دا مسمع في ودني ، مشي قدامي يلا يا حليتها خلينا ننفض

سها مشيت معاه و هو على آخره منها لحد ما وصل لباب الزنزانة اللي كان في عسكري واقف حرس عليه

سلمها ليه و قال:-

أفتح خليني أقول للمعلمه توصيات وكيل النيابة

العسكري اللي حارس الزنزانة فتح الباب من غير ولا كلمه ، أما التاني حدفها جامد لحد ما وقعت على الأرض و شعرها كان مغطي وشها

- يا معلمة حضرت الظابط بيقولك اتوصي بالاستاذة شوية حلوين و مني أنا كمان توصيتين تلاته مش هروح النهاردة غير لما اتمزج

ضحكت المعلمة بصوت مرتفع و قالت:-

عيوني ليكي و لحضرت الضابط و بصت لأم ابراهيم اللي قاعدة تحت رجليها و بتغسلها:-

مبروك عليكي خدتي افراج بقيت اليوم النهاردة ، عشان جه اللي يحب محلك بس من بكره هترجوا تاني إنتوا الاتين

أم إبراهيم فرحت إنها خلاص أخدت إستراحة من الذل اللي هي عايشة فيه و بصت للبنت الجديدة يشفقة لكنها اتفاجئت لما لقت البنت بتوقف و بتشيل شعرها من على وشها بغضب و يتشتم في العسكري

أم إبراهيم بصوت منخفض يكاد يكون مسموع:-

سها ؟! بنتي ؟! اية اللي جابها هنا ؟! و كمان متوصي عليها الطف بينا يا رب

أم إبراهيم جريت على سها و هي بتاخدها بالحضن و يتقول:-

سهي بنتي اية اللي جابك هنا ؟!

سها بصت لأمها و بادلتها الحضن و قالت بلا مبالاة:-

أنا قتلت دلال مرات ابنك و مش انا وبس اللي هنا عيالك كلهم هنا يعني بالصلاة على النبي كدا إحنا الأسرة كاملة هنا أسرة في بعضينا

أم إبراهيم اتصدمت و قالت بصدمة:-

ايييه ؟!

أما المعلمة بصت ليهم و ضحكت بصوت عالي و قالت:-

أسرة في بعضيكم دا إنتوا أسرة بنت كلـ ـب واطية ، و يا مرحبا بيكم و رجعت تضحك تاني من جديد و صوت ضحكها كان مسمع في الزنزانة كاملة