الفصل السابع: قيد روح

مريم فاقت على برودة بتمشي في عضمها، كأن الملاحة كلها دخلت تحت جلدها. لما فتحت عينها، ملقيتش دخان ولا نار.. لقيت "ثبات مرعب".

​في نص الحفرة اللي كان فيها القبر، كان فيه كيان واقف ضهره لمريم. الكيان ده كان يونس، بس كتافه بقت أعرض بمرتين، وجلده مابقاش جلد بشر.. بقى عبارة عن "تروس حديد مصدية" طالعة من تحت لحمه. لما لف وشه، مريم كتمت صرختها بإيدها؛ يونس مكنش

لابس قناع، وش يونس نفسه كان "بيتمسح" وبيتحول لكتلة معدنية صلبة، والفتحة اللي في جبهته كانت بتبلع الضوء اللي حواليها.

​"يونس؟" همست مريم وهي بتزحف لورا، وصوتها كان بيترعش من الخوف.

​يونس مردش بصوته، رد بصوت "احتكاك سلاسل" طالع من صدره. مد إيده ناحية الأرض، وفجأة السلاسل اللي كانت بتطارد غنيم وصانع الأقفال القديم طلعت من "تحت ضوافره" هو. السلسلة لفت حوالين الصندوق النحاسي ورفعته في الهوا كأنه ريشة.

​"يونس.. بصلي.. أنا مريم!" صرخت وهي بتحاول تقرب منه رغم الرعب. "إنت عملت كدة عشان تحميني.. متسيبش الحديد ياكل قلبك!"

​يونس وقف مكانه للحظة، والسلاسل اللي في إيده "اهتزت" كأنها بتتردد.

ملامح وش يونس اللي كانت بتختفي ظهرت لثانية واحدة، وعينه دمعت "مداد أسود"، وقال بصوت طالع من قاع بئر:

​"مريم.. اجري.. 'العهد' مبيقبلش الفراغ.. السجان القديم مات.. وأنا اللي بقيت القفل والمفتاح!"

​وفجأة، السلاسل اتجننت وبدأت تضرب في الأرض حول مريم، كأن فيه "إرادة تانية" جوه يونس هي اللي بتتحكم فيه. يونس قبض على راسه بإيده وبدأ يصرخ صرخة معدنية هزت أركان الملاحة، وجسمه بدأ يطلع منه "مسامير" حديد بتقفل على أي حتة بشرية فاضلة فيه.

​الحاج غنيم ظهر من ورا جِذع الشجرة المحروق، وكان بيضحك بانتصار وهو شايف يونس بيتحول:

​"فات الأوان يا بنت المرسي! يونس مابقاش يملك نفسه.. يونس بقى عبد

الملاحة' الجديد. السجان ملوش قلب يحب، السجان له 'أمانات' يحرسها.. وإنتي أول أمانة فيهم!"

​يونس (صانع الأقفال الجديد) شاور بصباعه ناحية مريم، والسلاسل اندفعت ناحيتها زي التعبان عشان تقيدها. مريم ملقيتش قدامها غير إنها تمد إيدها اليمين (اللي ناقصة صوابع) وتلمس "صدر" يونس بالظبط فوق مكان قلبه المحبوس تحت التروس.

​أول ما جلد مريم لمس الحديد اللي

طالع من يونس، حصلت "نفضة" كهربائية قوية. مريم شافت في عقلها لمحات من اللي يونس حاسس بيه؛ شافت "سجون" من الضلمة، وشافت أرواح أهل الكفر

وهي بتنهش في روح يونس عشان تخرج.

​"مش هسيبك يا يونس!" مريم ضغطت على جرحه وهي بتنزل دموعها فوق الحديد. "لو بقيت سجان.. هبقى أنا السجينة بتاعتك.. بس مش هسيب

الملاحة تبلعك لوحدك!"

​يونس مسك إيد مريم بقوة كأنه هيحطمها، ورفض إنه يسيبها، والتحام إيد مريم بجسمه الحديدي بدأ يطلّع دخان أبيض ريحته "بخور مريم".. وكأن صراع النور والضلمة بدأ يترسم على جلودهم هما الاتنين.

يونس قبض على إيد مريم بقوة كانت هتكسر عضمها، وعينه اللي بقت عبارة عن فجوات سودة بدأت تطلع "شرار" أحمر. مكنش شايفها مريم، كان شايفها "أمانة" هربانة من القبر ولازم يرجعها للسجن.

​يونس رفع إيده التانية، وفجأة الملح اللي تحت رجليهم طار في الهواء وبدأ يتشكل على هيئة "سلاسل بيضاء" حامية زي الموس، لفت حوالين وسط مريم ورفعتها عن الأرض.

​"يونس.. فوق!" مريم صرخت وهي حاسة إن السلاسل بتعصر ضلوعها. "بص في عيني.. أنا اللي استنيتك مية سنة في الضلمة.. أنا اللي دمك صحاني!"

​يونس (صانع الأقفال الجديد) مال براسه ناحيتها، وطلعت من رقبته أصوات "تزييق" تروس بتلف عكس بعضها.

ملامحه البشرية كانت بتختفي تحت طبقة من المعدن السائل اللي بينشف ويتحول لدرع صلب.

​"مفيش.. مريم.." الصوت طلع من جواه مكتوم، كأن يونس الحقيقي محبوس في أوضة ضلمة ورا جدران حديد. "فيه.. عهد.. ولازم.. يكتمل!"

​غنيم قرب بخطوات واثقة، وعينه بتلمع

بالغل وهو شايف مريم بتتعذب:

​"اضغط يا سجان! دي الروح اللي خلت جدك يبيعنا للملاحة! دي اللي بسببها فضلنا محبوسين في صناديق النحاس والصدأ! خلصنا منها عشان الملاحة تفتح لنا بوابات 'الكنوز السبعة'!"

​يونس زق مريم بقوة خلت ظهرها يخبط في جذع الشجرة المحروق، وتقدم ناحيتها وهو بيجر وراه سلاسل تقيلة بتطلع من تحت جلده وتتحفر في الأرض. كل خطوة كان بيمشيها كانت بتهد جزء من إنسانيته؛ حتى ريحة "المداد" اللي كانت بتميزه اختفت، وحلت محلها ريحة "زيت المكن المحروق".

​مريم، رغم الوجع، مدت إيدها المقطوعة وغمستها في الجرح اللي لسه "بينزف" في صدر يونس وسط الحديد. هي عرفت إن دي نقطة ضعفه الوحيدة، المكان اللي لسه فيه "لحم" ملمسوش المعدن.

​"لو عايز تموتني.. موتني وإنت يونس!" صرخت وهي بتغرس صوابعها في جرحه. "مش هسيبك تبقى 'آلة' في إيد الملاحة يا ابن المرسي!"

​أول ما لمست اللحم الحي، جسم يونس كله اتنفض. السلاسل اللي كانت لافة على مريم "ارتخت" فجأة، وصانع الأقفال الجديد وقع على ركبه وهو بيمسك صدره بوجع حقيقي.

​يونس الحقيقي صرخ من تحت القناع اللي بدأ يتكون:

​"مريم.. اهربي! أنا مش قادر.. السلاسل بتسحب عقلي! غنيم.. غنيم معاه 'مفتاح الغلق'.. هو اللي بيتحكم في 'العهد' الجديد!"

​مريم بصت لغنيم، لقت في إيده "خاتم" قديم كان مخبيه، الخاتم ده كان بيطلع منه نبضات لونها أزرق باهت، وكل نبضة كانت بتخلي الحديد يزحف أكتر على جسم يونس.

​غنيم وشه اتغير وبدأ يتراجع لورا وهو بيخبي الخاتم:

​"إنت بتهذي يا سجان! الخاتم ده هو اللي هيحكم الكفر كله!"

​يونس كان بينازع، وعينه اليمين اللي رجعت بشرية للحظة أخيرة لمعت بدموع سودة وهو بيبص لمريم بصة وداع تقطع القلب، بص لها وكأنه بيودع الدنيا فيها، وصرخ بصوت مبحوح طالع من وسط تزييق التروس:

​"اكسريه يا مريم.. الخاتم اللي في إيد غنيم.. اكسريه عشان أتحرر!"

​مريم مكدبتش خبر، رمت نفسها بصرخة انتحارية على الحاج غنيم اللي كان واقف بيضحك بنشوة وهو رافع إيده بالخاتم. الهجمة كانت مفاجئة وقوية لدرجة إن غنيم اختل توازنه، ومع خبطة كوع مريم وقوة اندفاعها، الخاتم اتزحلق من صباعه ووقع على صخرة "المذبح" اللي كانت جنب القبر.

​"لأ! الخاتم!" غنيم صرخ برعب وهو بيترمي على الأرض عشان يلحقه.

​لكن مريم كانت أسرع من البرق؛ لمحت نصل الفأس المكسور المرمي تحت رجليها، خطفته ونزلت بكل ثقلها وقهرها فوق فص الخاتم الأسود اللي كان لسه بيدور على الصخرة.

​"طاااااخ!"

​مع صوت الكسر، طلع من الخاتم "نور باهت" ريحته زي ريحة الورق المحروق، وانفجرت موجة باردة خلت المكان كله يتهز. يونس أطلق صرخة أخيرة، بس المرة دي كانت صرخة "راحة"، وبدأ جسمه "يتفكك" قدام عين مريم؛ الحديد والتروس اللي كانت نابتة في لحمه بدأت تصدأ وتتحول لتراب، ويونس نفسه بدأ

يتلاشى كأنه ضباب بيتبدد في الهوا، لحد ما اختفى تماماً ومبقاش فاضل مكانه غير "شنطته الجلدية" وهي بتقع على الملح بدبّة تقيلة.

​مريم كانت بتصرخ وهي بتخربش في الملح، حاسة إن عقلها هيطير.

كانت في حالة من الوجع والجنون ؛ مريم اللي كانت "ميتة" وشبعت موت، ويونس هو اللي رجع فيها الروح بعهده، دلوقتي حاسة إنها ميتة أكتر من الأول.. بس المرة دي ميتة وهي "حية" بتتنفس. يونس اللي كان "النبض" اللي بيحرك جسمها البارد، سابها وتلاشى، ورجعها تاني لمجرد "جثة" بتمشي على الأرض بس بقلب بيتحرق.

​"لا يا يونس.. إنت اللي قومتني من القبر.. متمشيش وتخليني قبر ماشي على رجليه!"

يونس! رد عليا.. إنت روحت فين؟" صرختها كانت بتشرخ صمت الملاحة المرعب، وهي بتخربش في الملح بجنون كأنها بتحاول تطلعه من تحت

الأرض.

​الصرخة كانت طالعة من حنجرتها محشرجة بالملح والدموع. مريم مكنتش قادرة تستوعب هي "إيه" دلوقتي؟ هل هي لسه مريم؟ ولا هي مجرد "بقايا" من عهد انكسر؟ بدأت تبص لإيدها برعب، خايفة تلاقي جلدها بدأ يدبل أو يقع زي ما يونس تلاشى، ​

في وسط الانهيار ده، مريم فتحت عيناها على الشنطة الجلدية اللي يونس سابها قبل ما يتمسح من الوجود. الشنطة وقعت على الملح بـ "دبّة تقيلة"، كأن جواها وزن جبل مش شوية ورق وأدوات. زحفت مريم وشالت الشنطة، وضمتها لصدرها وهي بتشهق من العياط.. كانت ريحتها "حبر قديم" وصدا حديد.

​وهي بتفتح الشنطة بإيد بتترعش، لقت جواها "المفتاح الحديد" بتاع البيت، وجنبه ورقة قديمة، الورقة دي مكنتش "رسالة وداع"، دي كانت "شهادة وفاة".. بس مكنتش لمريم ولا ليونس. كانت شهادة وفاة للشيخ فوزي، وتاريخ الوفاة كان من أسبوع فات.

​مريم وقفت مكانها، والدموع جمدت في عينيها من الصدمة.

​"ميت؟ الشيخ فوزي ميت من أسبوع؟" الكلمة نزلت عليها زي الصاعقة. افتكرت يونس وهو بيحكي لها عن كلام فوزي وتوجيهاته، وافتكرت الكيان اللي ساح قدامهم وتحول لمداد أسود. في اللحظة دي مريم فهمت اللعبة؛ يونس مكنش بيحارب بشر، يونس كان بيحارب "خيال" رسمته الملاحة عشان توقعه في فخ "صانع الأقفال".

​قامت مريم ونفضت الملح عن جلبيتها، وبصت للشنطة اللي في إيدها بـ "غل" ووجع رهيب. مسحت وشها وقالت بصوت طالع من قاع القبر:

​"يعني إنت كنت بتحارب سراب يا يونس؟ غدروك قبل ما تبدأ يا حبيبي.."

​بدأت تمشي بخطوات مهزوزة ناحية القرية، بس المرة دي مكنتش لوحدها. حست بـ "نفس" بارد بيمر جنب ودنها، وبدأت تلاحظ خطوات مبللة بالميّة والتراب بتظهر جنب رجليها مع كل خطوة بتمشيها، خطوات بتختفي بسرعة بس أثرها "أسود" زي المداد. يونس مسبهاش، يونس بقى "العلقة" اللي هتحميها وهي داخلة لـ "عش الدبابير" في ورشة غنيم.

​مريم عرفت إن غنيم هو اللي فاضل، وإن السر الحقيقي وراء وفاتها ووفاة يونس "

الإنسانية"، مدفون جوه خشب التوابيت اللي غنيم بيصنعه في الورشة دي.

​مريم مكنتش بتمشي، كانت "بتزحف" بروحهَا المكسورة فوق رمل الملاحة، والشنطة الجلدية في حضنها كأنها "جثة" يونس اللي مش عايزة تسيبها. الصدمة مكنتش بس في تلاشي يونس، الصدمة كانت في الورقة اللي لقيتها في الشنطة.. الشيخ فوزي ميت من أسبوع! يعني كل اللي حصل كان "تمثيلية" من صنع

الملاحة، ويونس كان مجرد ضحية لكيان سحب روحه بالتدريج.

​بصت مريم للسما اللي بدأت تلون بلون "المداد الأسود"، وصرخت صرخة أخيرة مكتومة:

​"والله ما هسيب حقك يا يونس.. لو كان اللي فاضل مني مجرد 'علقة' في الدنيا، فالعلقة دي هتحرق الورشة باللي فيها!"

​وفجأة، الصمت خيم على المكان، بس كان صمت "مريب". مريم حست بـ برد شديد بينخر في عضمها، وبدأت تلاحظ إن الخطوات المبللة اللي ماشية جنبها مابقتش مجرد أثر، دي بدأت "تطلع صوت". صوت تزييق تروس خفيف جداً، كأن يونس "صانع الأقفال" لسه بيلف حواليها، بيحرسها بكيانه الجديد اللي ملوش ملامح.

​مريم وصلت لأول بيوت القرية، والضباب كان بيلف البيوت كأنه كفن رمادي بيستعد لجنازة كبيرة. عينيها وقعت على ورشة الحاج غنيم من بعيد؛ النور فيها كان قيد، وصوت "دق" منتظم كان طالع منها.. "دب.. دب.. دب".

​فتحت الشنطة وطلعت المفتاح الحديد، ولأول مرة، المفتاح "سخن" في إيدها وبدأ ينزف مداد أسود. في اللحظة دي، مريم مسمعتش صوت غنيم، ولا صوت فوزي.. سمعت صوت "همس" جاي من ورا ضهرها، صوت يونس وهو بيقول كلمة واحدة هزت كيانها:

​"افتحي يا مريم.. السر تحت الخشب!"

​مريم لفت راسها بسرعة، ملقتش حد، بس شافت خيال يونس مرسوم بالمداد على حيطة الورشة للحظة واحدة واختفى.

​بقلب ميت، وإيد بتنزف سواد، مريم قربت من باب الورشة.. ومدت إيدها بالمفتاح. الحكاية مخلصتش في الملاحة، الحكاية لسه بتبدأ جوه "بيوت الموتى".