الفصل الثالث

ضغطت بأصابع مرتجفة على زر الجرس، ونبضات قلبها تتسارع مع كل ثانية تمر. وبعد برهة قصيرة، فُتح الباب لتطل منه والدتها، وما إن رأتها حتى بادرتها بلهفة وعتاب خفيف: "إيه ده؟ جيتي بدري يعني؟ مش كنتِ قلتي لي الصبح إنك هتتأخري في الجامعة؟".

لم تكد الأم تُنهي جملتها حتى وقعت عيناها على الشاب الطويل الواقف بجوار ابنتها في الممر، فتبدلت ملامحها وتوجست ريبة، وسألت بنبرة حائرة: "مين ده يا ياسمين؟".

أجابتها ياسمين بتوتر واضح محاولةً مداراة الموقف: "عدّيني بس يا ماما ندخل جوه وهفهمك كل حاجة..".

وما إن بدأت تخطو أولى خطواتها نحو الداخل، حتى انزاح ذيل فستانها الطويل كاشفاً عن قدمها المغطاة بالجبس الأبيض. تيبست الأم في مكانها، وشخصت عيناها بصدمة، ثم أطلقت شهقة فزع مزقت سكون الشقة: "يا لهوي! إيه اللي حصل لرجلك؟! إيه ده يا بنتي!".

أمسكت بيديها بلهفة وجنون، وأجلستها على أول مقعد في الصالون، وعلى وقع صرخات الأم المذعورة، هرع الأب من غرفته وعلامات القلق تكسو وجهه. في تلك الأثناء، قالت ياسمين بصوت مهتز ومتحشرج تحاول طمأنتهما: "اتفضل يا دكتور إسلام، ادخل جوه لو سمحت.. اهدي بس يا ماما أرجوكي، أنا كويسة والله والحمد لله جت سليمة".

صاح الأب بنبرة هلع وعصبية: "كويسة إزاي والجبس مغطي رجلك؟! إيه اللي حصل ونزل بيكِ كده؟ مين الحمار اللي خبطك ده؟ أنا هوديه في داهية ومش هسيبه! تعالي بس أطمن عليكي الأول ونروح لدكتور كبير نشوف ماله الكسر ده..".

وقاطعتها الأم بصوت باكٍ حانق: "لحقتي تاخدي نمرة العربية يا ياسمين؟ قولي لي إنك صورتيها!".

وسط هذه العاصفة من الخوف والاهتمام، رفعت ياسمين يديها قائلة: "بابا.. ماما.. أرجوكم اهدوا شوية واسمعوني! أنا لسه جاية من المستشفى حالا وعملت الجبس، والدكتور إسلام واقف أهو، كتر ألف خيره هو اللي أسعفني بنفسه، ووداني المستشفى وجابني لحد هنا ومسابنيش لحظة واحدة.. اهدوا بقى علشان أقدر أتكلم".

تنهد الأب بوجع وضيق، وتمتم: "الحمد لله على كل حال.. طب واللي خبطك ده اتمسك ولا هرب زي غيره؟".

هنا نكست الأم ذراعيها والتفتت لزوجها قائلة بعتاب: "مش تشكر الجدع الأول يا أبو ياسمين على وقفته الشهمة دي مع بنتك، بدل ما إنت داخل وعمال تزعق كده؟".

شعر الأب بالحرج وضرب كفاً بكف قائلًا: "عندك حق يا أم ياسمين، أنا آسف يا ابني فوتني الأصول.. بس اتلخمت واتفزعت لما شفت البنت ورجلها.. تشرب إيه يا دكتور؟".

رد إسلام بنبرة خجولة وعينين مطأطأتين أرضاً: "لا ولا حاجة يا عمي، الشكر لله.. أنا اللي آسف والله العظيم..".

نظرت إليه ياسمين بحذر، وحركت رأسها مشيرة إليه بكلتا عينيها ليصمت ولا يخبرهما بالحقيقة، لكن ضميره الحي دفعه لإكمال كلماته بلا خوف: "أنا.. أنا اللي خبطتها بالعربية يا عمي.. بس والله العظيم..."

لم يمهله الأب ليكمل جملته أو يبرر ما حدث؛ إذ اندفعت الدماء في عروقه بغضب عارم، واقترب منه بسرعة خاطفة ليمسك بياقة قميصه بكلتا يديه، وصاح في وجهه بعيون تشتعل شرراً: "أنت؟! أنت اللي خبطتها وجايلك عين لحد هنا تقف في بيتي وتكلمني بكل بجاحة؟! ده أنا مش هسيبك..".

وقبل أن يتطور الأمر وتتحول ثورة الغضب إلى تشابك بالأيدي، صرخت ياسمين بدموع منحبسة وصوت قاطع: "استنى يا بابا! على الأقل الأستاذ وقف، وشالني ووداني المستشفى، وجابني لحد هنا بنفسه.. وحي الله هي رجل مكسورة وكسر بسيط، مسبنيش مرمية في دمائي وهرب! هتعاقبه هو؟! إذا كان اللي سابني مرمية زمان لما اتعرف في المحضر ومجاش عليه حكم يتعاقب.. وده ضيع رجلي خالص وخلاها حتة حديد، وضيع معاها روح بني آدمة تانية وكسر حياتنا!".

سقطت الكلمات كالصاعقة على قلب الأب، وتجمدت يداه فوق ياقة إسلام. نزلت الدموع حارة من عيني أب يعتصر قلبه العجز وقلة الحيلة، فترك إسلام ببطء والندم ينهشه، وذهب نحو ابنته ياسمين، وجثا عند قدميها وضمها إلى صدره بقوة وهو يبكي بنشيج مرير: "حقك عليا يا بنتي.. حقك على عيني ورأسي.. أنا عارف إني معرفتش أرجعلك حقك زمان، بس أنتِ عارفة ومقدرة إنه مكنش بإيدي يا ياسمين.. القانون والورق خذلونا يابنتي..".

مسحت ياسمين دموع أبيها بيديها وقالت بنبرة حنونة: "متزعلش يا بابا ومتحملش نفسك فوق طاقتها، ده نصيب وقدر ومكتوب لنا من زمان.. أنا بس بعرفك إن في فرق بين الناس.. وعلی فكرة، أنا اللي غلطانة النهاردة، الكتاب وقع مني وجيت قدام عربيته فجأة وهو ملحقش يقف".

في هذه الأجواء المشحونة بالحزن والدموع، تنحنح إسلام بحرج كبير، وشعر برغبة عارمة في تقديم أي شيء يكفر به عن ذنبه، فقال بصوت صادق: "أنا آسف مرة تانية يا عمي، وعارف ومقدر إن أسفي مش هيفيد بحاجة قصاد الوجع ده.. بس أنا مستعد أعمل أي حاجة في الدنيا علشان أصلح غلطتي.. أنا دكتور هنا في المستشفى ومستعد أتابع معاها الحالة والعلاج الطبيعي خطوة بخطوة، وأوديها وأجيبها كل يوم لعربيتي لأي مكان تحب تروحه لحد ما تخف تماماً ورجلها تفك الجبس".

قاطعته ياسمين بنبرة خجولة ورافضة: "مفيش داعي لكل ده يا دكتور، أنا..".

لكن الأب قاطعها فجأة ملتفتاً إلى إسلام: "متشكرين لحد كده يا ابني، كتر خيرك لحد هنا ومقصرتش".

نظر إليه إسلام برجاء حار تلمع به عيناه: "صدقني يا عمي.. أنا مش هيرتاح لي بال ولا هعرف أنام غير لو عملت كده، وده الشيء الوحيد اللي هيحسسني إنكم بجد سامحتوني من قلبكم.. أرجوك وافق".

صمت الأب لبرهة، وتبادل مع زوجته نظرات طويلة ومترددة حائرة، ثم تنهد وقال: "خلاص يا ابني.. أنا موافق تتابع معاها الحالة وتوصلها الجامعة وتجيبها، بس لحد ما تخف وبس عشان منتقلش عليك.. ودا لسبب واحد؛ إني مضطر أسافر الأسبوع الجاي تبع الشغل بره المحافظة، ومكنتش هبقى مطمن عليها تروح وتيجي في مواصلات متبهدلة وهي بالحالة دي..".أخرج إسلام هاتفه من جيبه بنوع من الارتياح، ودَوّن رقم هاتفها بعناية، ثم سألها بنبرة هادئة عن موعد خروجها ومحاضراتها في اليوم التالي ليكون أمام منزلها في الوقت المحدد، وبعد أن ودّع والديها بكل احترام، استأذن وانصرف.

دلت ياسمين إلى غرفتها وهي تجر قدمها المصابة بثقل وألم ينهش جسدها؛ تنهدت بتعب وهي تبدل ملابسها بصعوبة، ثم ارتمت على سريرها، مغلقة عينيها في محاولة مستميتة للنوم والهروب من الأفكار الصاخبة التي باتت تملأ رأسها منذ تلك الصدفة الصباحية.

وفي الجانب الآخر من المدينة، فُتح باب منزل دافئ، ودلف منه إسلام والإنهاك يرتسم على كل ملامحه. جلس على أقرب مقعد قابله في الصالة، وأرجع رأسه إلى الخلف مغمض العينين بتعب شديد؛ فقد كانت نهاراً طويلاً مشحوناً بالمشاعر المتقلبة.

أتت من خلفه بخطوات مرحة وخفيفة فتاة في مقتبل العمر، وقالت بنبرة يملؤها القلق: "تأخرت كده ليه يا أبيه؟ أنا قلقت عليك جداً النهاردة!".

التفت إليها إسلام وارتسمت على وجهه ابتسامة حانية تمحو تعبه، وقال: "متقلقيش يا حبيبتي، أنا كويس والحمد لله.. قولي لي، نازلة إمتى؟".

أجابت بلهفة وهي تنظر إلى ساعة الحائط: "عندي درس دلوقتي حالا يا أبيه".