الفصل الرابع

جال بصرها بين أرجاء الصالة حتى استقرت نظراتها على "عم حكيم" وهو يعمل خلف البار. اتجهت نحوه وجلست على المقعد العالي هامسة بلهفة:

— "عم حكيم.."

التفت إليها حكيم بابتسامة حانية؛ فهو يراها الابنة التي لم ينجبها منذ دخلت هذا المكان طفلة. كان هو من علّمها القراءة والكتابة سرًا بعدما رفضت والدتها إدخالها المدرسة، ومنحها حنان الأب الذي حُرمت منه.

رد بحنان

: — "يا اهلا يا اهلا الصالة نورت بالفنانة!"

تنهدت بضيق:

— "والنبي يا عم حكيم بلاش فنانة دي الله يخليك .."

رفع حاجبه مداعبًا

: — "هنكدب يعني ولا ايه ؟ أنتي موهوبة وبتحبي الرقص، ولولا حبك ليه مكنتيش بقيتي شاطرة كدة.. بس عنادك مع سلطان هو اللي كرهك في كل حاجة."

انقبض وجهها وقالت

: — "سلطان كرهني في الدنيا كلها.. صحيح عرفت إنه سافر ومش راجع غير بعد بكرة."

سألها بحذر: — "ناوية على إيه؟"

اقتربت منه أكثر وهمست:

— " عايزه اطلب منك طلب صغير .. عايزاك تخرجني من هنا."

اتسعت عيناه بصدمة:

— "أنتي اتجننتي؟! تروحي فين؟ من التيران اللي علي الباب وبعدين سلطان؟ ده ممكن يقلب المكان فوق دماغنا !"

امتلأت عيناها بالدموع:

— "تعبت يا عم حكيم.. والله هرجع تاني، بس عايزة أشم هوا.. نفسي أحس إني عايشة."

أكلت الشفقة قلبه فسأل : — "هتروحي فين؟"

ابتسمت بحماس طفولي:

— "نفسي أروح النيل.. أتمشى على الكورنيش وآكل درة وأشرب حمص الشام وهجبلك معايا والله ."

ضحك رغم قلقه:

— "ماشي يا ست درة.. هحاول ألهّيهم وأخرجك، بس بلاش تحطيني في وش مدفع مع سلطان انتي عارفه ان مافيش بينا عمار ."

قفزت الفرحة داخلها:

— "ولا بينا وحياتك.. أحبك يا عم حكيم!"

ابتعدت بخفة، بينما تابعها حكيم بنظرة قلقة، وقد قرر المجازفة لأجلها.

لكن عيونًا أخرى كانت تراقب. اقتربت شادية من البار وقالت بابتسامة صفراء:

— "كانت بتوشوشك بإيه الغندورة؟"

رد حكيم بجفاء: — "عادي.. هي أول مرة تتكلم معايا؟"

قالت بشك: — "بس باين إنها كانت بتقولك سر."

قاطعها بحدة: — "خليكي في حالك يا شادية."

احتدت نبرتها: — "مالك بتكلمني من تحت ضرسك كده ليه هو الحق عليا اني بسألك "

سخر منها بنظرة ثاقبة: — "إن جينا للحق.. أنا ليا عندك حقوق كتير أوي، بس ساكت."

تركها ومضى، بينما تجمدت هي مكانها بخوف؛ فهي تعلم جيدًا معنى تلك النظرات.

في الوقت نفسه، دلف سلطان إلى غرفة درة كعادته قبل كل "عملية". كانت تجلس مع "زيزي"، لكنه أشار بعينيه فأسرعت الأخيرة بالانسحاب.

أشاحت درة بوجهها، فمد يده نحو شعرها لكنها ابتعدت بضيق. انقبضت ملامحه وقال : ـ "أنا رايح."

ردت ببرود: ـ "طيب ما تروح."

قال بصرامة: ـ "بصيلي يا درة."

تجاهلته، فكرر بحدة: ـ "بصيلي بقول!"

التفتت إليه بضيق، فسألها فجأة: ـ "أنتي شايفاني؟"

عقدت حاجبيها باستغراب: ـ "هو أنا عامية؟"

خرج صوته مكسورًا: ـ "آه.. عامية من ناحيتي أنا وبس. بتشوفي الكل إلا سلطان."

انفجرت فيه: ـ "ومش عارف ليه ؟!"

قال بعصبية: ـ "افهمي أنا اترميت معاكي في نفس البلاعة افهمي بقا !"

هتفت بمرارة: ـ "بس فضلت فيها بكيفك! وحبستني جنبك."

أغمض عينيه بقوة: ـ "كنت أروح فين؟ الدنيا كانت هتقبلني كدة؟"

وأشار إلى عينه العوراء: ـ "كنت هبقى يا مسجون يا ميت."

سخرت: ـ "وأنت دلوقتي مش مسجون؟ الفرق إنك بتخرج وقت ما تحب.. إنما أنا السجينة الحقيقية."

قاطعها: ـ "اسكتي.. أنتي مش فاهمة."

ـ "أفهم إيه؟!"

ـ "ما تفهميش اسكتي خالص ."

تأففت: ـ "شايف أسلوبك وترجع تقول بعاملك وحش."

حاول تهدئة نفسه: ـ "ما أنتي بهيمة.. كل ما تشوفيني تنطحي فيا."

ردت بسرعة: ـ "وأنت طور يا سلطان !"

كور قبضته: ـ "يا بت همد إيدي عليكي."

لكنها فجأة خفضت صوتها بحزن مصطنع: ـ "مدها.. هي عادتك."

لان قلبه فورًا، واقترب منها يطوق وجهها بكفيه: ـ "خلاص ما تزعليش.. لما أرجع هعملك مفاجأة."

نظرت له بتساؤل :

ابتسم بخبث: ـ "لا لما أرجع هقولك."

ثم اقترب أكثر هامسًا: ـ "مافيش حاجة كدة؟"

انتفضت بعصبية: ـ "احترم نفسك و اطلع بره يا سلطان!"

ضحك بصوت عالٍ بينما تدفعه نحو الباب: ـ "طيب ما تزقيش!"

أغلقت الباب بعنف، تتنفس بسرعة. كانت تشعر بنفور خانق منه، بينما كان هو يقف خلف الباب مبتسمًا؛ ففي قلبه المظلم لم يحب أحدًا سواها.

غادر سلطان مع رجاله، وبقي آخرون لحراسة الكباريه. وما إن ابتعدت السيارات حتى تنفست درة الصعداء؛ فقد حانت اللحظة.

لم تكن تنوي نزهة قصيرة كما أوهمت حكيم، بل هروبًا بلا عودة.

في السيارة، قال سلطان بصوته الأجش: ـ "هندخل من الطريق التاني.. أبو سليمان مستنينا هناك."

هز الدوكش رأسه: ـ "تمام يا كبير.. بس الدنيا أمان؟"

رمقه سلطان بنظرة حادة. حاول الدوكش تخفيف التوتر وأخرج سيجارة: ـ "تعفّر يا كبير؟"

انفجر سلطان: ـ "شيل الهباب ده! عايزين نركز."

ألقى الدوكش السيجارة من النافذة بسرعة: ـ "السماح يا كبير."

وفي صحراء سيناء، كان "حمزة" يستعد للعملية. دوى صوت اللاسلكي: ـ "عمليات.. عمليات."

أجاب بثبات: ـ "تمام يا فندم."

كان "رامي" داخل السيارة يرتدي الدرع الواقي. سأله: ـ "باشا عرفت هيدخلوا منين؟"

أجاب حمزة وهو يراقب الطريق: ـ "الطريق التاني اتقفل.. هييجوا من هنا."

لاحظ رامي أنه لا يرتدي الدرع: ـ "مش هتلبس قميصك؟"

رد باقتضاب: ـ "مبحبوش."

ضحك رامي: ـ "هنا موصياني ألبسه.. خايفة أبقى عريس الجنة."

قال حمزة ببرود: ـ "اسمع كلام المدام."

ثم التفت إليه محذرًا: ـ "صحصح كدة.. مش وقت محن."

على الجانب الآخر، كانت درة تترقب. دخل عم حكيم إليها هامسًا: ـ "جاهزة يا درة؟"

أجابت بتوتر: ـ "جاهزة.. بس اللي على الباب؟"

ابتسم مطمئنًا: ـ "هتصرف."

ثم أخرج بعض المال ووضعه في يدها: ـ "خدي دول.. عشان تجيبي ذرة وحمص شام، وما تنسيش تجيبلي معاكِ."

اغرورقت عيناها بالدموع وارتمت في حضنه: ـ "كتر خيرك يا عم حكيم."

ربت على كتفها: ـ "أول ما تسمعي دوشة بره اطلعي جري."

في الصحراء، صاح الدوكش بصدمة: ـ "الطريق مقفول يا ريس!"

اشتعلت عينا سلطان: ـ "هنعدي من الطريق التاني."

أمسك هاتفه بسرعة: ـ "جهز سلاحك يا جابر هنلف من الطريق التاني "

كانت لحظات قليلة تفصل الجميع عن كارثة.

في مكان ما، كانت امرأة تتقلب في فراشها تطاردها الكوابيس.

وفي قلب الصحراء دوى صوت اللاسلكي عند حمزة ـ "استعدوا!"

سأل سلطان رجاله: ـ "جاهزين؟"

جاءه الرد جماعيًا: ـ "جاهزين يا ريس!"

وفي الكباريه، اقترب عم حكيم بيد مرتعشة من لوحة الكهرباء. ضغط الزر فانطفأت الأنوار فجأة، وغرقت الصالة في ظلام دامس. تعالت الصرخات والفوضى في كل مكان.

كانت تلك الإشارة المنتظرة.

فتحت درة باب غرفتها واندفعت تركض بكل قوتها نحو المجهول.. نحو الحرية التي حلمت بها طويلًا، تاركة خلفها كل شيء.