الفصل الرابع عشر...

تحرك جلال ببرود واتجه صوب رفعت، وقد اصطبغ وجهه بغموضٍ مخيف، ثم مال ليساند رفعت المنهار ويساعده على الوقوف، والتفت إلى رفيقه يامن ليُسلمه رفعت، ثم خطى بثبات نحو الأريكة وجلس فوقها واضعًا ساقًا فوق الأخرى، ورماهم بنظراتٍ ساخرة وهو يبتسم ببرود قائلًا:

_ ها.. ممكن أعرف بقى أنتم هنا بتعملوا إيه بربطة المعلم؟

لم يتحمل ممدوح هذا الاستعلاء، وفقد السيطرة على أعصابه لرؤية جلال يجلس في المكان وكأنه صاحب البيت الآمر الناهي، فقال بعصبية:

_ وأنت مين علشان تسائلنا؟ عمومًا إحنا هنا في بيت صاحبنا، إنما أنت بقى هنا ليه أساسًا؟

رمى جلال بنظراته نحو رفعت الذي كان يتلوى من الأم بين ذراعي يامن، في تلك اللحظة، فاتجه حسين نحو رفعت وسحبه بقوة من بين يدي يامن رغم اعتراض الأخير، وتنحى به بعيدًا عن مسمع الحاضرين وأردف بهمسٍ مسموم:

_ إيه اللي وداك لجلال يا رفعت؟ هو أنا مش إديتك الأمان؟ ليه بس يا صاحبي تروح لجلال برجليك وتعرفه مكانك؟ أنت ناسي إنه ليه تار عندك؟ بص اتصرف ومشيه علشان أعرف ألحقك، ولا عاجبك منظرك وأنت بتتوجع بالشكل ده؟ يلا يا رفعت خليه يمشي وأنا هتكلم مع ممدوح وأمير وأمشيهم، وبعد ما تظبط دماغك هاخدك ونروح نجيب ياسمين ونوديها مكان أمان بعيد عنهم كلهم.

فرك رفعت أنفه بقوة، وأخذ يسحب أنفاسًا متهدجة يُمني فيها نفسه باستنشاق جرعة المخدر التي تنهي عذابه، وضغط على ذراعه الذي بات يحرقه كلما تدفق الدم في عروقه، وزاغت عيناه بريبة بين وجه حسين وجلال، فلاحظ حسين هذه الريبة، وقبض على ذراع رفعت يضغط عليها بقوة وقال بصوت خفيض ولهجة تهديد مبطنة:

_ لو مش مديني الأمان ومخوني يا رفعت أنا همشي وأسيبك تصطفل مع جلال وممدوح لوحدك، أنا أساسًا فتحت معاك صفحة جديدة من وقت ما رجعنا صحاب ونسيت اللي فات، إنما واضح كدة إنك أنت اللي مش صافي، عمومًا أنا ماشي وخلص نفسك بمعرفتك.

أهمل حسين ساعد رفعت وتركه بلامبالاة، فأدار رفعت عينيه باضطرابٍ قاتل حوله؛ رأى نظرات البغض في عيني ممدوح وأمير، والغموض الذي يلمع في عيني جلال مع ابتسامته الساخرة، وحسين الذي أولاه ظهره مشيرًا لرجاله بالانصراف، هنا، اتخذ رفعت قراره الخاسر للمرة الرابعة في حياته، وأسرع في خطاه نحو حسين يعترض طريقه وعيناه تتوسله أن يرحم عذابه أولًا.

فأشار حسين إليه برأسه نحو الخلف باحتقار، فنكس رفعت رأسه بخزي واتجه بخطى ذليلة باتجاه جلال، وحاول أن يخرج صوته ليطرده، لكن الكلمات تجمدت فوق شفتيه حين وقف جلال أمامه فجأة ومال عليه ليهمس في أذنه بصوتٍ جليدي حطم ما تبقى من كرامته:

_ كنت عارف إنك كلب هتجري ورا شمة وتبيع لحمك، بس غلطتك يا رفعت إنك بعت لي الأول وأنا اشتريت، وجلال مبيسيبش اللي ملكه أبدًا، وأنا مش همشي من هنا إلا لما آخد البضاعة اللي اشتريتها.

ازدرد رفعت لعابه بمرارة، وابتعد بخوفٍ ملموس عن جلال كأنه يخشى الموت المحدق به بمجرد سماع صوته، والتفت إلى حسين ونظر إليه بعجزٍ تام، ليقطب الأخير حاجبيه مفكرًا بعمق؛ فقد أدرك حسين أنه إن أظهر وجهه الغاضب الآن، فسيخسر حتمًا كل ما رتبه بدقة، فهو لم يضع في حساباته تدخل جلال نهائيًا، وأيقن أن أي تصرفٍ أرعن تجاه جلال لن يمر مرور الكرام، فجلال يختلف كليًا عن والده "نور" في القوة والدهاء؛ ورغم سيره دون حرسٍ ظاهر أو تأمين، إلا أن الجميع يدرك أن هناك نخبة من الرجال ينتشرون سرًا في كل بقعة خلفه، فزفر بضيق وهو يفكر في سبيلٍ للخروج من المأزق الذي وضعه فيه ممدوح بتصرفه المتسرع، ولم يجد أمامه سوى الاستسلام المؤقت، فتحرك صوب ممدوح وأولى جلال ظهره قائلًا بنبرة حاسمة:

_ عاوزك تعرف إنك السبب في ضياعها المرة دي يا ممدوح وأنا مش هسامحك أبدًا، ودلوقتي لِمّ ابنك ورجالتك ويلا نمشي، وإياك تفكر تتحدى جلال؛ علشان أنا وأنت فاهمين كويس إن لو حد فكر يرفع أصبع واحد على جلال مش هيلحق ينزله، ومش معنى إنه هنا فوسطنا بطوله يبقى لوحده.

ازدادت تقطيبة ممدوح وهو يرمق جلال بنظراتٍ حاقدة، ثم أعاد نظره إلى وجه حسين وقال بنبرةٍ يملؤها الغل:

_ يعني إيه هنمشي وإيدينا فاضية يا حسين؟ لا البت مخرجتش من هنا، يعني لو دورنا كويس هنلاقيها وساعتها رفعت مش هيقدر علينا بحالته دي، ولو أنت خايف من جلال سيبه عليا أنا، وزي ما كـسرت أبوه زمان هكـسره دلوقتي ومش هيقدر يمنعنا، ولو أنت عامل حساب رجالته فإحنا رجالتنا أكتر و..

قطع فحيح أنفاس حسين الغاضبة استرسال ممدوح، ليخرج صوته من بين أسنانه محذرًا:

_ أنت عقلك خلاص راح منك! وانتقامك عماك ومش مخليك تعرف إن جلال غير نور، فوق يا ممدوح، إحنا لما كــسرنا نور وخسرناه اللي قدامه واللي وراه، كان معانا كبش فدى مخلناش نظهر في الصورة، إنما دلوقتي لو عملنا أي حركة هنبقى بنقول له إحنا أهو، وبدل ما يبقى رفعت هو كل هم جلال، هنبقى إحنا كمان دخلنا اللعبة وهيفكر إزاي ينتقم مننا ويرد اللي اتعمل في أبوه، ومأظنش إنك عاوز حاجة زي كدا تحصل.

لم يستسغ ممدوح الأمر، فشعر بالإهانة تنهش كبرياءه، فكور قبضته بقوة وعروقه بارزة، ونظر إلى ابنه أمير الذي وقف يتحدى جلال بنظراته؛ ناداه ممدوح بصوت غاضب، متمنيًا أن ينصاع الابن هذه المرة دون جدال، فقد استشعر الأب الخطر الحقيقي من ثبات جلال وهدوئه المريب، فجاءت صيحته مدوية:

_ أمير يلا بينا خلاص، المكان هنا مبقاش لينا، ولو على اللي ليك فأوعدك إنك هتاخده رغم كل حاجة حصلت.

التفت أمير إلى والده بدهشة استنكارية سرعان ما تحولت إلى حنق وسخط؛ فهو لم يتخيل أبدًا أن يعود خائب الوفاض، بعدما استعد بكل كيانه لينال من ياسمين ويشفي غليله منها، وهم بالاعتراض لكن نظرات والده الصارمة أفهمته أن التراجع الآن ضرورة وليس اختيارًا، حينها اتسعت ابتسامة جلال الساخرة، وغمز بعينه مستفزًا أمير الذي كظم غيظه بصعوبة بالغة.

فالتفت جلال إلى صديقه يامن، الذي كان يتابع الموقف بحيرة وقلق باديين على وجهه، خاصة بعدما أدرك هوية ممدوح؛ ولاحظ اضطراب صديقه لكنه آثر تأجيل الاستفسار، وربت على كتفه هامسًا بطلب صاعق:

_ انزل هات لي مأذون من تحت الأرض بسرعة وتعالى.

جحظت عينا يامن وشعر أن وتيرة الأحداث فاقت قدرته على الاستيعاب؛ دار ببصره في أرجاء الشقة المحطمة يبحث عن تلك "العروس" التي سيأتي المأذون من أجلها، فلم يفت جلال هذا الذهول، فابتسم ولكزه بمزاح قائلًا:

_ العروسة مش هنا يا يامن، ولا أنت ملاحظتش إن البيت مقلوب؟ بذمتك هي لو كانت هنا كنا هنلاقي الباشوات لسه موجودين ووشهم مسود من الغضب؟ المهم نفذ اللي قولت لك عليه وأنا هفهمك كل حاجة لما نبقى لوحدنا، وبعدين أنا عاوزك طول ما أنت جنبي متبقاش خايف.

صمت جلال لثانية ثم سأل يامن باهتمام:

_ إلا قولي، أنا لاحظت نظرات ممدوح ليك، هو أنت سبق لك وتعاملت معاه؟

ارتبك يامن وزفر بضيق وهو ينظر تجاه ممدوح قبل أن يجيب جلال:

_ ده يبقى الراجل اللي حكيت لك عنه، اللي كان عاوز يخلص مني علشان المستندات اللي وقعت في إيدي، صاحب الشركة إياه.

أخفى جلال دهشته باقتدار وهز رأسه بتفهم، مدركًا أن الخيوط بدأت تتشابك، وربت فوق كتف صديقه مجدداً:

_ واضح إننا عايزين نقعد مع بعض قعدة طويلة تحكي لي فيها كل حاجة بالتفصيل، بس كل ده مش وقته، المهم انزل هات المأذون بسرعة.

تردد يامن في ترك جلال بمفرده وسط هذا الجمع المعادي، وقال بريبة:

_ يا صاحبي راجع نفسك، أنت إزاي بس عايزني انزل وأسيبك لوحدك وسط الجيش ده؟"

انفجر جلال ضاحكًا على سذاجة صديقه وخوفه الزائد، ثم نظر إلى حسين وممدوح وقال بثقة:

_ الجيش ده في ظرف خمس دقايق بالظبط هيختفي، متقلقش أنت وروح اعمل اللي قولت لك عليه.

أشار حسين إلى ممدوح ليأمر رجاله بالانسحاب، وبالفعل انصاع الجميع للأمر، ووقف ممدوح وحسين أمام رفعت المنهار، وربت حسين على كتفه بتمثيلية متقنة قائلًا:

_ أنا لحد دلوقتي معاك، وأهو زي ما أنت شايف خليت ممدوح يمشي رجالته، ومتقلقش أنا هاخد أمير وممدوح وأمشي وأنت بقى صفي أمورك مع جلال بنفسك، أنا لحد هنا ومش هقدر أساعدك أكتر، وعلشان متقولش إني خليت بيك، فأنا هديلك اللي يظبط دماغك وهستناك يا رفعت لما تفوق تيجي لي نتكلم ونشوف هنصلح اللي أنت هببته ده إزاي؟

أخرج حسين ببطء لفافة صغيرة تحتوي على المخدر ووضعها في يد رفعت المرتجفة، ثم تحرك مبتعدًا وجذب أمير بقوة من ساعده رغمًا عنه ليتبعه ممدوح، وغادر الثلاثة شقة رفعت تاركين خلفهم دمارًا في المكان وحيرة في القلوب.