الفصل الرابع والثلاثون

2054 كلمات

الفصل الثالث و العشرون

يجلس خلف مكتبه يتابع عمله رفع سماعة الهاتف الخاص بالمكتب و قال

:- ابعتيلى الملف بتاع صفقة الحديد ...

بعد لحظات أحضرت ساندى الملف و وضعته على المكتب و قالت بميوعة

:- تؤمر بحاجة تانى مستر عمر ؟

تجاهل نبرتها التى لم تغفل عنه و طريقتها المستفزة التى تتبعها منذ ان عملت بالشركة ... و تحدث

:- لأ إرجعى مكتبك ...

إقتربت من مكتبه أكثر و مالت بجسدها على المكتب و قالت بدلال

:- يعنى حضرتك مش محتاج أى حاجة ؟

رفع رأسه ببطء ليرميها بنظرة باردة ... محذرة ... فقال ببرود

:- أكيد لو عايز حاجة هقول مش محتاجك تفكرينى ...

إستمرت على وضعها و قالت بهمس

:- طيب أنا برا لو إحتاجت أى حاجة رن بس عليا هتلاقينى بقولك شبيك لبيك عبدك و بين إيديك

قالت كلماتها و قد بدأت يدها تتسلل الى ياقة قميصه ...

يتابعها بنظرات فهد محترف ... يعلم ما ترمى عليه ... لكنه أيضا يعلم ما يجب عليه فعله ...

شعر بيدها تقترب من قميصه فأمسكها بقوة كادت أن تمزق أوردتها و تسحق عظامها ... ثم جذبها بعنف محافظا على المسافة بينهم فقال وقد تغاضى عن تأوهاتها المتألمة

:- إيدك دى قطعها على إيدى إن شاء الله ... لمى نفسك أحسنلك

علشان إنتى مشفتيش الوش التانى لعمر مراد ...

ثم رماها بنظرة محتقرة و دفعها بعيدا عنه ... فترنحت فى وقفتها لكنها أستعادت إتزانها سريعا و عدلت من هندامها بتوتر فأكمل و هو ينظر للملفات أمامه ..

:- اه ياريت من بكرة ما اشوفكيش بالمنظر المقرف دة ... إنتى شغالة فى شركة محترمة مش فى كباريه ...

نظرت لملابسها بإرتباك وتحركت للخروج من أمام عينيه الثاقبتين التى تشعر بالإهانة أمامهم ...

لكن أتاها صوته مجددا

:- اه و عايزك تقولى للى باعتك ... الطريقة دى رخيصة أوى ... وللأسف مش هتنفع معايا ... خليه يفكر فى حاجة أنضف من كدة ... ميسترخصش علشان اللى هو عاوز يوصله غالى أوى ...

شعرت بدنوها أمام كلماته فترنحت الدموع بعينيها .. حاولت ان تدافع عن نفسها لكنه لم يمهلها فرصة فقال بحزم و حدة

:- روحى مكتبك يا ساندى و ياريت تفكرى فى كلامى كويس ... و مهما كان المعروض عليكى ... ميستاهلش إنك ترخصى نفسك علشانه...

أصابتها قذائفه ... فأحسن التصويب كقناص ماهر لم تحيد كلماته عن هدفها مطلقا ... بل أحتضنها منتصف الهدف بقوة كمن كان يحتاج لصفعة كى يفيق من غيبوبته ..

هرولت من أمامه و عيناها تزرفان الدموع ... تنهد براحة بعد ذلك الموقف ... فلا يعلم كيف تحكم بغضبه ...

نظر لهاتفه الخاص و إبتسم إبتسامة حانية لمجرد انها زارت خاطره ... فوأددت كل الغضب الذى كان يستشعره منذ قليل ...

أخذ يعبث قليلا فى هاتفه وإبتسم بحب وأرسل لها رسالته كعادته فى الأيام الماضية ...

*************

تجلس مع نور بمكتبها يتابعان ما أمرهم به خالد ... شعرت نور أن أميرة ليست إنطوائية و لكنها فقط مهزوزة الثقة ...

إجتاح أميرة شعور بالراحة و القوة فى آن واحد ... شعرت بحماستها للعمل ... إندمجت مع نور بسلاسة لم تخطط لها

قطع إسترسالهم فى العمل صوت هاتف أميرة معلنا عن رسالة جديدة ...

فتحتها أميرة سريعا فوجدتها من ذلك الرقم الخاص

أخبي روحي فين

أهرب أروح لمين

دا عيونها زي القدر

حكم على سنين

الناس قالولي انسى

جربت و أجرب لسة .

أتاريها جوه قلبي و معاي في كل همسة

همسة همسة معاي فكل همسة

حبيت يازمان و إيه ذنبي

دا بان علي و بخبي

و البنت الحلوة اللي هوتها

مشداريا بالنار اللي في قلبي

يا دنيا صبرك عليا

أهم حبايبي حوليا

ألئيهم جنبي و اتبسم

و أنا شايل دمعي في عنيا

مالك ياليل بتهرب

تعبت معاك و لا بتتعب

بلائي فيك حبيبي

يسئيني المر و اشرب

حبيت يازمان و إيه زنبي

دا بان علي و بخبي

و البنت الحلوة اللي هوتها

مشداريا بالنار اللي في قلبي

إبتسمت أميرة بتوهان ... باتت تنتظر رسائله ... شئ يجعلها تشعر أنه هو فتصيب الكلمات قلبها ... لاحظت نور حالتها التى تبدلت تماما فسألتها بإستفسار ...

:- مالك يا أميرة فى حاجة ؟

إنتبهت أميرة لوجود نور فتلعثمت قليلا وقالت

:- لا .... أ أبدا مفيش حاجة ...

نظرت لها نور بشك فتحدثت أميرة بعد أن أخذت نفسا عميقا ... فقد قررت انها ستحكى لنور كل شئ لعلها تساعدها ...

إبتسمت لها نور بمرح بعد ان علمت القصة كاملة

:- أيوة يا سيدى ... عاشق ولهان نفسه ينول الرضا

طالعتها أميرة بتذمر طفولى ... فضحكت نور عاليا و أكملت

:- خلاص خلاص هسكت أهو ...

ردت أميرة

:- أنا مش بحكيلك علشان تسكتى يا نور ... أنا عايزاكى تقوليلى اعمل ايه ... واللى انا بحسه دة صح ولا غلط ...

أجابت نور بهدوء

:- أنا شايفة إن دة حد بيحبك بجد ... مفيش واحد هيفضل يتصل بيكى كل يوم بس علشان يسمع صوتك ... او هيبعتلك كل يوم أغنية يعبرلك فيها عن اللى بيحسه ... صدقينى دة بيحبك ...

سألتها أميرة بحيرة

:- تفتكرى ممكن يكون عمر ؟

ردت نور

:- مش عارفة يا أميرة ... انا معرفش عمر علشان أقدر أقولك إذا كان هو ولا لأ ...

صمتت قليلا تفكر ثم أردفت

:- طيب ما جربتيش تتكلمى معاه ؟

هتفت أميرة

:- مع عمر ؟

ردت نور

:- لا قصدى الرقم الخاص

قالت أميرة

:- هتكلم معاه إزاى يا نور بقولك بقعد أقول الو الو محدش بيرد فبقفل السكة ...

:- جربى بدل ما تقولى الو .... إنك تكلميه وتساليه مين هو وكدة و أكيد هيرد عليكى ...

تحدثت أميرة بتوجس

:- أنا خايفة يا نور يطلع حد بيعمل فيا مقلب ساعتها هتكون بجد صدمة بالنسبالى .... أنا أصلا مش متخيلة إن يكون فى حد بيحبنى بالشكل دة ... مش جميلة اوى علشان اللاقى اللى يحبنى كدة ... أنا عادية يا نور ... عادية اوى كمان ...

إعتدلت نور بجلستها و نظرت لها بحزن

:- إيه يا بنتى اللى بتقوليه دة ... مين قال إنك مش جميلة بالعكس ... إنتى حلوة أوى على فكرة ملامحك جميلة وجذابة ولازم تحبى نفسك زى ما هى ...

ثانيا بقى اللى بيحب حد مش بيحبه علشان جماله ... تبقى غلطانة لو فكرتى بالطريقة دى ... الحب بيجى من غير سبب ... حاجة بتخطف قلبك من غير مبررات او سابق إنذار ... اللى بيحب بيشوف اللى بيحبه أجمل واحد فى الدنيا حتى لو هو مش كدة ... مش هيحبك علشان إنتى جميلة ... دة بيبقى إسمه إعجاب و تقدير للجمال مش أكتر .... و النوع دة غالبا بتدمر علاقتهم مع أول مشكلة بتقابلهم ....

أخذت تفكر أميرة بما قالته نور لا تنكر أنها أضاءت بقعة بداخلها أظلمت لسنين طويلة ... لكنها لازالت تشعر بالخوف من المجهول ... لم تنتبه لرنين هاتف نور التى هتفت بإستغراب

:- حازم !

جاءها صوته متوترا

:- عاملة ايه يانور؟

ردت عليه سؤاله بهدوء ... وجدته مرتبكا لا يعلم ماذا يقول فبادرت

:- فى حاجة يا حازم ؟

إجابها بتلهف

:- عايز أعمل مفاجأة لعهد ومحتاج مساعدتك ...

فرحت لأجل أختها ... فسألته

:- أقدر أساعدك إزاى ... إنت عارف إنى مش هقدر اجى عندك ...

فأسرع قائلا

:- لا لا مش كدة ... إنتى عارفة إن طنط سعاد كلمتنى علشان كتب الكتاب يبقى عندكم فى البيت ... فأنا شايف إنى أعملها حفلة فى البيت و أجيبلها فستان الفرح و إنتو تعزموا قرايبكم و نفرح مع بعض ...

راقت لها الفكرة و شعرت بالإمتنان له فقالت

:- خلاص يا حازم انا موافقة أساعدك ....

زفر براحة وقال بحماس

:- شكرا اوى يا نور مش عارف أقولك إيه ...

ردت بإبتسامة هادئة

:- متقولش حاجة يا حازم ... إحنا طول عمرنا إخوات بس لولا الظروف بقى ...

غمغم بخفوت و قد إستشعر الحرج من أفعال والديه

:- عارف يا نور ... المهم دلوقتى هبعتلك صورة كذا فستان تختارى منهم واحد لعهد ... وأنا هكون عندك إن شاء الله بعد شوية عايزين نشوف مكان نعمل فيه الحفلة ...

أومأت برأسها و قالت

:- ماشى يا حازم هستناك ...

أنهت نور الإتصال وإستدارت لتجده يقف خلفها ... ينظر لها بغموض فإقتربت بحذر وقالت بعتاب

:- ممكن أخد رأيك فى حاجة ولا هتقولى بردو موضوع شخصى ...