الفصل الواحد والثلاثون

دخلت سعاد غرفة عهد التى لا تفارقها مطلقا ... وجدتها تعبث بهاتفها ... فبدأت تنظم أنفاسها حتى لا تنفعل عليها ...

اقتربت منها وقالت

:- قولت انتى مش عايزة تطلعى و تشوفينى ... اجى انا أتكلم معاكى شوية ...

إعتدلت عهد بجلستها و تركت الهاتف من يدها و غمغمت

:- مش كدة يا ماما ... حضرتك عارفه انى زعلانة ... و برده مصممين ما تحضروش الفرح ... عايزين تسيبونى لوحدى فى يوم زى دة ...

تنهدت سعاد وجلست بجانب ابنتها على الفراش و قالت وهى تمسد على شعرها

:- إنتى كنتى عارفة ان دة اللى هيحصل يا عهد ... بس صممتى على رأيك ... وعاندتى معانا ... كأنك بتقوليلنا اننا ملناش لازمة ... وجودنا من عدمه مش هيفرق ...

نظرت عهد لأمها بحزن و تحدثت

:- ازاى يا ماما بتقولى كدة ... انا مليش غيركو ...

صمتت قليلا فأدمعت عينيها و أردفت

:- بس انا بحبه يا ماما ... من و انا صغيرة معرفش غيره ... و صعب الاقى نفسى بعيدة و أنتو بتقرروا تنهوا كل حاجة ببساطة ...

ردت سعاد برزانة

:- انا مقدرة كل اللى بتقوليه ... بس انا يوم ما قررت أخدك انتى وأختك ونيجى هنا ... انتى كنتى واعية وفاهمة انا عملت كدة ليه ... و شوفتى وعيشتى هما كانوا بيعملوا ايه وبيتعاملوا معانا ازاى ...

تذمرت عهد بطفولية و قالت لأمها ...

:- نور هى السبب يا ماما ... لو وافقت تتجوز عماد مكنش حصل كل دة ... وكان زمانى زى اى عروسة بتفرح وسط أهلها ...

اعتدلت سعاد ونظرت لإبنتها بتمعن لتسأل

:- إنتى بجد شايفة نور السبب فى كل دة ... شايفة إنها لازم توافق على عماد علشان مشاكلنا تتحل ...

أجابت عهد بلهفة

:- تخيلى كدة يا ماما نور توافق و تتجوز عماد و انا طبعا هتجوز حازم ... هنرجع كلنا نعيش فى القصر و نرتاح من المسؤولية ونور نفسها هترتاح من الشغل ووجع القلب ...

ردت سعاد بجدية

:- انتى يا بنتى مفكراها بالبساطة دى .... دة انتى هتروحى وانا قلبى بيتقطع عليكى ... خايفة و مرعوبة وانتى هتكونى بعيد عنى و مش هقدر أحميكى منهم ... لكن بصبر نفسى واقول اهو حازم موجود و هيخلى باله منك ...

لكن عماد مش زى حازم ... رغم ان عماد كان كويس جدا بس مش عارفة ايه اللى حصلوا يخليه نسخة من أبوه ...

على العموم انا مش بجبرك على حاجة يا عهد وسيبتك تعملى اللى إنتى عايزاه ... بس مش هسيبك تحملى أختك مسؤولية إختيارك مهما حصل ...

تحدثت عهد بإستعطاف

:- يعنى يا ماما مفيش فايدة ... بردو هتسيبونى لوحدى فى يوم زى دة ...

احتضنت سعاد كتف ابنتها و قالت

:- سيبك من الكلام دة لأن انتى عارفة انى مش هغير رأيى .. وأنا متأكدة إنك مش هتتراجعى عن قرارك ...

أخفضت عهد رأسها بأسف فأردفت سعاد

:- قوليلى بقى هيجى يكتب الكتاب إمتى ؟

نظرت لها عهد بتعجب

:- أكيد فى الفرح يا ماما

تطلعت لها سعاد بإستنكار و قالت

:- فى الفرح ازاى ... وانا المفروض أسيبك تمشى من هنا معاه من غير كتب كتاب ؟

ردت عهد بحيرة ...

:- معرفش يا ماما ... بس إحنا ما اتكلمناش فى الموضوع دة قبل كدة ...

حركت سعاد رأسها بتفهم و قالت وهى تشير للهاتف

:- إتصلى بيه وقوليله انى عايزة أتكلم معاه ...

أمسكت عهد الهاتف بتوجس ... أتصلت به ليأتيها صوته يقول

:- عهد قلبى لحقت أوحشك ؟

:- ماما عايزة تتكلم معاك يا حازم

أحس من نبرتها أن هناك شئ فسألها

:- فى ايه يا عهد ؟ فى حاجة حصلت ؟

تلعثمت بالحديث و قالت

:- لا ابدا ... أهى معاك كلمها ...

إعتدل بجلسته كأنها ستراه و عندما سمع صوتها القى عليها السلام وسألها عن حالها فقالت

:- ايه يا حازم مش فى حاجات المفروض تكلمنى علشان نتفق فيها مع بعض ... استنيتك تكلمنى بس لقيتك متصلتش قولت مابدهاش بقى أتصل أنا ...

توتر من طريقتها فتحدث بمهادنة

:- حاجات ايه يا مرات عمى ... مش إحنا إتفقنا على كل حاجة ... دة الفرح فاضل عليه كام يوم !!

أكدت سعاد على كلامه و قالت

:- و لما انت عارف ان الفرح فاضل عليه كام يوم ... مجيتش ليه علشان تكتب الكتاب ؟

أجاب سريعا

:- لا يا طنط ما هو كتب الكتاب هيكون فى الفرح عادى ...

ردت عليه بحدة

:- إزاى يعنى يا حازم ... أنا بنتى مش هتطلع من بيتى غير ومكتوب كتابها ... بصراحة أمك وأبوك مش مضمونين ...

شعر حازم ان زمام الأمور تفلت من يده ... لا يعلم هل سيوافق والديه على هذا الأمر أم لا لكنه قرر ان يحاول مرة أخرى

:- ايوة يا طنط بس معنى كدة إن بابا و ماما مش هيحضروا كتب الكتاب !

أجابت سعاد بسخرية

:- و إيه المشكلة ما انا بردو مش هحضر الفرح ... معلش خليها مرة علينا و مرة عليكم ... مش كله علينا يا حازم ... و بعدين انا بيتى مفتوح لأى حد فى أى وقت ... عايزين ييجوا أهلا وسهلا ... أنا مش همنعهم ... بس انا بنتى مش هتتحرك خطوة غير و مكتوب كتابها و أظن دة حقى والحق ما يزعلش حد يا بنى و لا إيه ؟

رد حازم بإستسلام

:- اه طبعا حقك ... انا هتكلم معاهم و أرد على حضرتك ...

أومأت سعاد برأسها وأنهت الإتصال معه ... نظرت لإبنتها وجدت الحزن يطل من عينيها فتنهدت وقالت بنبرة هادئة تحمل مشاعر أمومة واضحة ...

:- انا مش عايزاكى تزعلى يا عهد ... متفتكريش انى بعمل كدة علشان أبوظلك الجوازة .... والله أبدا يا بنتى .... انا فعلا خايفة عليكى ... و بحاول أحميكى بأى طريقة أقدر عليها ... أنا تقريبا مطلبتش منه حاجة زى الناس ما بتعمل ... و لا شبكة ولا مهر ولا مؤخر ولا اى حاجة و طبعا دة علشان إنتى طلبتى منى دة ... مع إنه مش فقير علشان نراعى ظروفه ... هو كان المفروض يعمل الحاجات دى كلها من نفسه ... بس عديتها بمزاجى ...

صمتت قليلا تتنفس وأردفت بجدية

:- لكن شرع ربنا مفهوش كلام يا عهد ... دى الحاجة الوحيدة اللى مش هقبل فيها نقاش ولا كلمة واحدة من أى حد ... مش هآمن عليكى يكتبوا الكتاب هناك ... دول ناس ما يعرفوش ربنا يا بنتى ...

تطلعت لأبنتها بحب وقالت بنبرة باكية

:- و بعدين حتى كتب الكتاب مش عايزانى أحضره ... مش عايزانى أفرح بيكى يا عهد ...

مشاعر الحزن تأججت بقلبيهما فبكت عهد و ارتمت بحضن أمها ...

لتكمل بدموع

:- كان نفسى أشوفك وانتى عروسة ... أفرح بيكى والبسك فستانك بإيدى ... أسلمك لعريسك زى ما وعدت أبوكى الله يرحمه ...

:- اااه يا عهد على الوجع اللى حاسة بيه ... مهما وصفت ولا قولت مش هتحسى بالنار اللى فى قلبى وانا مش قادرة أفرح ...

كفكفت سعاد دموعها و زفرت بقوة تحاول كبت أوجاعها و قالت

:- أتمنالك السعادة يا بنتى .... و يارب أشوفك على طول مبسوطة ... و يخيب ظنى و يتعاملوا معاكى كويس ... علشان انا مش هستحمل وجع قلب عليكى تانى يا عهد ....

شددت عهد على حضن أمها وعلى صوت نحيبها فربتت أمها على ظهرها بحنو و قالت بمرح مصطنع

:- خلاص بقى يا بت كفاية نكد كدة عايزين نفرح شوية ...

أخرجتها سعاد من حضنها ... وأمسكت بوجهها بين كفيها و قالت برجاء

:- عايزاكى تصالحى أختك يا عهد ... أنتو ملكوش غير بعض يا بنتى ...

حركت عهد رأسها بموافقة ... فنهضت سعاد تمسك بيدها وتشدها خلفها ... فتشبثت عهد بوالدتها كطفلة صغيرة تخشى الضياع و اتجهوا الى غرفة نور ....

*******

كانت بغرفتها ... تشعر بوحدتها ... غياب الأحباب يأتى فى آن واحد ... أختها ستتركها بعد أيام ... و هو تركها منذ أيام ... تائهة هى بين دروب الحياة ... بين ماضٍ و حاضرٍ و مستقبل ... تحاول أن تبقى ... رغم الخذلان من الجميع ... لكنها اليوم المتهمة الوحيدة أمامه ... و عليها الصمود حتى تثبت بياض صفحتها من أى شوائب ...

لم تشعر بدخولهما ... فربتت عهد على كتفها بهدوء ... لتتلاقى عينيهما لنظرات عتاب ... فأخفضت عهد رأسها تشعر بالخجل من نفسها أمام أختها الكبرى ... كم كانت سيئة معها الفترة الماضية ... و رغم ذلك لم تجد منها سوى الحب ...

اعتدلت نور واستقامت من جلستها لترتمى عهد بين أحضانها و تبكى بندم على ما اقترفته بحق أختها ... على حب أخوى صادق كادت ان تؤدى به بسبب وساوس شيطانية من أعدائها ...

خرج صوتها أخيرا و قالت بتهدج

:- انا أسفة يا نور ... متزعليش منى ... انا مش عارفة كنت بعمل كدة إزاى ...

ربتت نور على كتفها بحب و أخرجتها من أحضانها وقالت بدموع

:- انا مش زعلانة منك يا عهد ... انا حاسة بيكى ... و مقدرة اللى انتى فيه ... مش عايزاكى انتى تزعلى منى لو زعلتك فى حاجة ... بس والله خوف عليكى مش أكتر ...

تحدثت عهد و هى تكفكف دموعها كالأطفال

:- انا مش بزعل منك يا نور ...

كانت تتطلع عليهم بقلب باكٍ و عيون دامعة ... تدعى ربها ان يحفظهما ... ان يبعد عنهما خبثاء النوايا ...

********