الفصل الحادي والعشرون

نظرت الى الحاج رضوان الذى امتقع وجهه حزنا على حفيدته وقالت له وهى تشير بيدها للدرج

:- شايف يا عمى البت وقلة أدبها

هدر بها رضوان عاليا

:- لمى لسانك يا حنان انا معنديش حد قليل الأدب ....

أجفلت من صوته العالى وأخفضت عينيها أرضا أمامه ثم أردف بحدة

:- إنتى كنتى عايزاها تعمل ايه يعنى ما هو من كتر ما بتضغطى عليها كان لازم تفرقع فى وشك وتدوقى من اللى بتدوقيهولها كل يوم .... ساعات بحس انك لما بتبقى متضايقة بتروحى تفشى غضبك فيها .... مع انى عمرى ما بشوفك واخداها فى حضنك مرة ولا تضحكى وتهزرى معاها ولا دعوة حلوة زى ما كل الأمهات بتعمل ....

إستقام الجد من جلسته واقترب منها فرمقها بنظرات حانقة وأكمل

:- وبعدين انتى عايزة حفيدة عيلة رضوان تتعلم ازاى تصطاد عريس .... ليه ان شاء الله؟

لو انتى فاكرة ان علشان محدش بيدخل من الباب دة (وأشار على باب المنزل) يبقى مبيجلهاش عرسان تبقى عبيطة ... الباب دة بيخبط عليه كتير اوى لو عرفتيهم هتتكسفى من نفسك من اللى بتقوليه لبنتك ...

بس انا اللى برفض .... شايفها لسة بتكبر قدام عينى ... عايز أتونس بيها جمبى ... أميرة دى حتة من قلبى .... يعنى يوم ما هجوزها أجوزها للى أكون متأكد انه هيصونها ويحافظ عليها ويحطها جوة عينيه .... مش أرميها لأى حد وخلاص ...

هقولك اللى قولته لجوزك قبل كدة راجعى نفسك قبل ما يفوت الاوان و تندمى ونرجع نقول ياريت اللى جرا ما كان ....

أدهشها كلامه لم تكن ابدا ترى الموضوع بهذه الطريقة لكن حاولت ان تدارى حرجها وقالت

:- وانا عملت ايه يا عمى ما انا أمى طول الوقت كانت بتعمل معايا كدة وأهو طلعت زى الفل ولا جالى إكتئاب ولا مرة زعقت لأمى زى ما هى عملت دلوقتى

زارت ابتسامة ساخرة فم الجد ورد عليها

:- ومين قالك انك طلعتى زى الفل .... مين قالك انك مطلعتيش عندك كلاكيع جواكى ... والدليل أهو ... علاقتك ببنتك ..... بتحاولى تطلعى عليها اللى والدتك كانت بتعمله فيكى .... بس لازم تفهمى ان احنا بشر ومش كلنا زى بعض ... وطبيعى يكون ردود أفعالنا مختلفة أتمنى تكون رسالتى وصلت ....

تركها فى صدمتها من الحقيقة التى قذفها بوجهها وانتبه لعمر الذى إقترب يجاهد ان يقول شئ ولكنه مرتبك فسأله الجد

:- فى ايه يا عمر

فدنى منه عمر وقال متلعثما

:- كنت بقول يعنى أطلع أشوف أميرة ... من على الباب طبعا أكيد مش هدخل أوضتها .... وبالمرة أشوف الاساتذة اللى فوق دول خلصوا ولا ايه ....

فابتسم له الجد بمكر وأومأ له موافقا ثم قال محذرا

:- ما تتأخرش...

أكد عمر على كلام الجد وصعد للأعلى بخطوات حاول جعلها متزنة رغم خفقاته التى تضاعفت...

اقترب من غرفتها وطرقها برفق لتفتح الباب وتطل عليه بهيئتها الملائكيه رغم الدموع التى كست وجهها لكنه ابتسم له واخرج من جيبه منديل ومده اليها

اما هى فتطلعت له ببلاهة

هل هو هنا ..... على باب غرفتها ...

اخفضت عينيها للأسفل حرجا وتناولت المنديل من يده وبدأت تجفف دموعها برفق و هى تحاول كبح رغبتها فى الأرتماء بين ذراعيه تبكى بقوة وتشتكى له من كل شئ يؤلمها...

حاول ان يظهر صوته عاديا لكن فرط مشاعره واضطرابها جعله يبدو كهمس ضعيف

:- متعيطيش تانى يا أميرة علشان خاطرى ...

رفعت عينيها تتطلع اليه ليرى وجهها الذى تخضب حمرة من خجلها فابتسم بهدوء وقال بشئ من المزاح

:- وبعدين ثقة ايه اللى اتهزت اومال المراية العشرة متر اللى جوة دى بتعمل ايه .... مقالتلكيش مثلا إنك زى الشمس اللى بتنور حياتنا ومن غيرك نموت من الضلمة وقلة الدفا

غاص بكحلة عينيها غير قادر على السيطرة على نفسه واكمل بهمس

:- او مقالتلكيش بردو انك زى القمر او أميرة الحكايات او

... أميرتى أنا ....

شعرت انها غير مدركة تماما لما يدور او ما يقول كم نعتت غبائها الذى جعلها تسرح بزيتونيته المهلكة و لكن وقع كلماته على قلبها جعلته يرتجف خجلا من معناها

هزت رأسها يمينا ويسارا بحركة نفى ليبتسم هو قائلا

:- لا ايه مقالتلكيش؟

فكررت حركتها مرة أخرى مما جعله يقهقه عاليا

:- ملهاش حق ....

انتبه لخالد الذى اقترب منهم بهدوء قائلا بتوجس مزيف

:- انت بتعمل ايه هنا

تلعثم قليلا ليرى لمحة المكر بأعين رفيقه فرد عليه بحنق

:- انت عايز ايه

فابتسم خالد له بهدوء ووجه كلامه لأميرة وقال

:- إدخلى ... لو عايزة تعملى حاجة علشان هنتحرك ....

دخلت مسرعة وأغلقت الباب تلوح بيدها أمام وجهها حتى تهدأ حمرته ولو قليلا ...

اما خالد فأراد ان يشاكس عمر قليلا فوضع يده على كتفه جاذبا إياه ليتحركا بإتجاه الدرج وقال

:- إيه رأيك فى لستة العرسان اللى الحاج كان بيتكلم عليهم تحت

نظر له عمر بحذر وتكلم وهو يضع يده بجيب بنطاله

:- مالهم يعنى ... أكيد جدى بيقول كدة بس علشان طريقة مرات عمى

أعتدل خالد بوقفته وضحك بسخرية .... فقد تيقن انه تلقى الأمر مجرد جبر خواطر لأميرة فقط .... لا بأس عليه ان يخبره الحقيقة الان ...

:- غلطان يا صديقى ... دى اللستة اللى انت سمعت عنها دى كلها بقابلهم بنفسى وبطفشهم بإيدى ...

عدل خالد من ساعته الجلدية التى تزين معصمه ثم أردف

:- بس معتقدش انى هفضل أطفش فيهم كتير ... فيا تخلى عندك دم وتنطق يا اما هجوزها لأول واحد أشوفه مناسب ... وابقى عد الجمايل

وأنهى كلامه بغمزة من عينيه ... وتركه ساهما وهبط الى الأسفل

لن يتحمل فكرة أن تكون لشخص أخر ... فهو ضائع بين المجهول الذى لا يعلم عنه شيئا ... تنهد بضيق وقرر ان يفكر بالموضوع جديا وعليه أن يتخذ قراره ....