الفصل الثالث والثلاثون

يفكر طيلة الليل بما قالته ... وجد أن لديها كل الحق ... فقرر مصارحة والدته بما حدث وإتخاذ القرار سريعا ...

نهض من مكانه واتجه الى غرفة والدته فلم يجدها فإتجه الى الأسفل فوجدها تجلس مع والده وأخيه ... زفر بضيق فهو مضطر للحديث أمامهم ولكن عليه أن يحسم أمره الان ...

إقترب و جلس بجانبهم فقال عماد بسخرية

:- هو البيه قرر يحّن علينا و يشرفنا بقعدته معانا ولا الموضوع فى إن ؟

نظر له حازم شرزا و رد

:- انا فعلا جاى أتكلم فى موضوع ... علشان انا أصلا مبحبش أقعد معاك بسبب طريقتك دى معايا ...

تجاهله عماد فسأله والده

:- خير يا حازم موضوع ايه اللى عايز تتكلم فيه ...

إستجمع شجاعته و قال

:- مرات عمى كلمتنى إمبارح فى موضوع كتب الكتاب و قالت إنه لازم يكون هناك عندهم ...

هتفت زيزى بغضب

:- إيه دة هى هتتأمر علينا كمان ... جوازة إيه اللى ما يعلم بيها الا ربنا دى ...

رد حازم

:- دة حقها يا ماما ... مش معقول كانت هتسيبنى أخد بنتها كدة من غير أى حاجة تربطنى بيها ... مفيش أم كانت هتقبل بكدة ...

و بعدين إحنا علاقتنا مش أحسن حاجة علشان تبقى مطمنة وتسيبها معانا ....

فأكملت زيزى غضبها

:- إنت كمان بتدافع عنها .... و إحنا يعنى كنا هنعمل إيه ما كنا هنكتب الكتاب فى الفرح زى بقية خلق ربنا ...

خرج عماد عن صمته و قال

:- أنا كنت متأكد إنها هتعمل كدة دى مرات عمى وعارفها كويس ... و بصراحة عندها حق ...

نظرت له أمه بحنق

:- إنت كمان هتقولى حقها ... إنتم عايزين تجننونى

رغم إستغرابه من حديث أخيه المساند له رد على زيزى قائلا

:- متنسيش إنها مش هتحضر الفرح فمفيش مانع إنها تفرح ببنتها فى كتب الكتاب ...

تحدث رؤوف أخيرا بعد أن تحكم بغضبه فكان يحيك لهم المكائد و أراد مساوتهم على كتب الكتاب ... لكنها أفشلت مخططه ...

:- خلاص يا زيزى مش مشكلة ... أهى تفرح بنتها لإننا زى ما أنتى عارفة مش هنعمل فرح ... فيبقى حسستهم بالفرحة ...

هتفت بإعتراض

:- يعنى هى تفرح وأنا محضرش كتب كتاب إبنى ... إنت أكيد بتهزر يا رؤوف ...

سألهم عماد

:- يعنى إيه مفيش فرح ... طيب هيتجوز إزاى ... الناس هتعرف إزاى يعنى إنهم إتجوزوا ؟

رد عليه رؤوف بثبات

:- عادى فى ناس بتتجوز و محدش بيعرف عنها حاجة ... و بعدين ممكن نبقى نعملهم حفلة صغيرة كدة على أدنا كدة ...

رأى عماد التيه واضح بعين حازم ... فتنهد و تحرك من مكانه متصنعا اللا مبالاه و صعد الى غرفته ...

نظره له حازم بتمعن كأنه يرى به ضآلته عليه أن يتحدث معه ربما حان الوقت للإقتراب ...

فقال و هو ينهض من مكانه

:- أنا هتكلم معاها وأشوف الميعاد اللى يناسبهم لكتب الكتاب كدة كدة الموضوع مش هيفرق معاكم و خصوصا بعد ما لاغيتوا الفرح ...

و تركهم وتحرك الى غرفة أخيه التى لم يزورها منذ سنوات عدة ...

********

دخل غرفته ليبدل ملابسه ... فأقتحمت أفكاره ... زيها الرجالى لم يخفى جمالها عن خبير مثله ... لكن ليس جمالها وحده ما لفت إنتباهه ... لكن بها شئ جعل قلبه يشتاق لمشاكستها منذ أن رآها ...

أتصل برقمها الذى أخذه من إحدى زميلاتها بعد أن أخبرها أنه يريدها فى عمل هام ...

آتاه صوتها فقال بمشاكسة

:- الأستاذ جمال معايا ؟

نظرت للهاتف بتعجب لتقول

:- لا النمرة غلط

فأسرع ضاحكا قبل أن تغلق الهاتف

:- لا أنا متأكد إن النمرة مش غلط ...

تأكدت شكوكها عندما إستمعت لضحكته فهتفت

:- إنت ! إنت جبت رقمى منين ؟

تحرك ليفرد جسده على السرير و قال

:- لو عرفتى أنا مين مكنتيش هتسألى سؤال زى دة ...

فردت بتهكم

:- ليه إن شاء الله شغل فى المخابرات حضرتك ...

قهقه عاليا و قال

:- على فكرة إنتى كدة بتقللى من إمكانياتى و دى حاجة أنا مقبلش بيها أبدا ...

ردت بسخرية

:- و المفروض أعمل إيه يعنى ... إنت بتتصل ليه أصلا ..

قال بهدوء

:- مش لازم تعرفى ليه على فكرة ...

أكمل بهمس

:- أنا عارف إنك جميلة مهما حاولتى تخبى دة ... بس مكنتش أعرف إن صوتك بالرقة دى وللأسف مش هتقدرى تخبيه ...

إبتسمت بخفوت و قالت بتذمر مصطنع

:- ماشى شكرا ... متتصلش هنا تانى و يلا بقا علشان هرش مياه ...

ضحك عاليا فكادت ان تضحك فتمالكت نفسها وأغلقت الهاتف مسرعة ....

بينما هو هدأت ضحكته و هو يتعجب من حاله ... منذ متى و هو يطارد الفتيات على الهاتف ... لكنه الان تيقن ان لها بقلبه شئ تجعله ينبض بقوة ....

طرق على الباب جعله يستعيد بروده ... تفاجأ من دخول حازم و يبدو عليه الإرتباك

وقال

:- عايزك فى موضوع مهم

رد عماد بسخرية

:- و دة من إمتى إن شاء الله ...

قال حازم

:- أنا عارف إنى طول عمرى ببعد عنك بس دة علشان إنت دايما بتتريق عليا وشايفنى عيل و ما انفعش أتحمل المسؤولية ...

تحدث عماد ببرود

:- و دلوقتى جاى ليه ؟

:- عايزك تساعدنى ...

تطلع له عماد بإستفهام

:- عايز مساعدتى فى إيه

قال حازم بحيرة

:- مش عارف أعمل إيه مع عهد ... بابا وماما مصممين اننا منعملش فرح ... ومش عارف ليه شكيت فى سوء نيتهم من موضوع كتب الكتاب ...

رد عماد بصدق

:- مش هكذب عليك ... انا كمان حسيت بكدة بس صدقنى معرفش حاجة عن اللى فى دماغهم

إنت عارف إن عهد بالذات ليها معزة خاصة فى قلبى ... لأنها كانت قريبة مننا ... عايز منى نصيحة

أومأ له حازم برأسه سريعا ليردف عماد

:- إعمل كتب كتابك هناك و إعملها حفلة و فرحها وسط أهلها ... إشتريلها فستان وشبكة زى أى عروسة متحسسهاش إنها أقل من أى واحدة زيها ...متبقاش أنانى و عايز تفرح لوحدك بوجودها جمبك ... خليك أد حبها وفرحها معاك ...

شعر بالراحة من كلام أخيه ...لكنه تعجب من أخيه فسأله

:- إنت هتساعدنى مش كدة ...

إقترب عماد وربت على كتف أخيه و قال

:- مش هتصدق لو قولتلك إنى كنت مستنى اليوم دة ... اللى هشوفك فيه عريس ... ومتستغربش من كلامى ... أنا مش وحش يا حازم ... فى حاجات محدش يعرفها ... كان نفسى أكون جمبك فى يوم زى دة بس إنت عارف الظروف و علاقتى مع نور بايظة ... ومش هينفع أكون موجود ... بس هبقى معاك من بعيد علشان لو إحتاجت حاجة ...