الفصل الثلاثون

نحلق بعالم أحلامنا ... نرسمها بخفة فى سماءنا ... نعيش تفاصيلها بدقة .... و نتقن دوما طريق الوصول ...

لتأتى رياح عاتية ... فتسقطها كأمطار على رؤسنا ... وترتطم بأرض واقعنا ... و تصير سرابا منثورا ....

عادت الى بيتها بقلب حزين ... و روح أهلكتها الحياة ... كانت على أمل رؤياه ... أن تشرح له ما حدث ...

لكن لم يأتِ !!

كانت سعيدة بمجاورته ... وجوده معها يشعرها بوجودها ... نظراته الحانية .... ابتسامته الهادئة ... طلته البهية ...

كل هذا مهلك لجميع حصونها ...

لمحت نظرة عينه لامعه ... فأصابها بسهام عشقه ... فتمنت أن يبادلها نفس شعورها ... و قد رأت إعترافه يلوح بالأفق فى مشهدهم الأخير ... و لكن جاء الماضى ليوقظها ... وأيقظها على أسوء مشهد لم تتمناه أبدا ...

نظرته المُدينة لها ... نظرة خاوية ... رسمت معنى الخذلان أمامها ...

بعد أن بدلت ملابسها ... وقفت أمام شرفتها تتذكر ما حدث ...

فأمسكت بهاتفها تبحث عن رقم سجلته فى حفلة خطبة حسن لكنها لم تستخدمه قط ... و الان حان وقته ...

جاءها صوت أنثوى هادئ فإبتسمت بخفوت وتبادلوا التحية

فقالت نور

:- كنت فاكرة إنك مش هتعرفينى ... أو نسيتى تسجلى رقمك ...

فتحدثت أميرة مسرعة

:- لا أبدا ... أنا سجلته على طول ... إحنا اتفقنا نكون صحاب مش كدة ...

ابتسمت نور و ردت بمشاكسة ...

:- و لما إنتى فاكرة متصلتيش بيا ليه نتكلم مع بعض ..

توترت أميرة وتلعثمت كأنها تجاهد للحديث ... تنهدت بخفوت وقالت أخيرا ...

:- أنا مش بعرف أتعامل يا نور ... أو يمكن بعرف بس بخاف ...

بخاف أبوظ الدنيا لو قُلت كلمة تضايق اللى قدامى ... مع إنى عمرى ما ضايقت حد ... او يمكن علشان أصلا مليش علاقة بحد ... مش عارفة

شعرت نور بما تحمله أميرة من ضغط نفسى فحاولت تهدئتها و تحدثت

:- مش كدة يا أميرة ... لازم تثقى فى نفسك أكتر من كدة ... محدش هيقفلك على غلطة عملتيها ... او هيحاسبك على كلمة قولتيها غصب عنك ... الدنيا أبسط من كدة ... وصدقينى مش مستاهلة دة كله

ابتسمت أميرة بسخرية و ردت

:- أثق فى نفسى ! أنا أصلا معنديش ثقة فى أى حاجة بعملها أو بقولها .... حاسة انى على طول غلط ... و دايما بقول كلام يزعل ... فبسكت ...

قالت نور بصدق

:- إنتى ! دة إنتى قمر يا ميرو ... و الله ارتحت معاكى جدا فى الكلام ... ومن أول ما شوفتك قولت هنبقى أصحاب ...

ابتسمت أميرة وحاولت ان تترك توترها جانبا و تحدثت

:- أنا ما عنديش أصحاب يا نور ... عايشة لوحدى ... ولما شوفتك يوم الخطوبة اتمنيت اننا نكون أصحاب بس خوفت ... خوفت أبوظ الدنيا ... علشان كدة مكلمتكيش ... ولما جيتى قولتيلى ينفع نبقى أصحاب ... فرحت أوى ومصدقت ان أخيرا هيكون ليا صاحبة وأحكيلها كل حاجة من غير ما تزهق منى ...

ردت نور

:- على فكرة أنا كمان مليش صحاب ... كنت فى شغلى طول الوقت ...

صمتت قليلا ثم أردفت بحزن

بس عندى أختى الصغيرة ... كانت صحبتى وكل حياتى ... بس خلاص هتتجوز بعد كام يوم وهتسيبنى وتمشى ....

خرجت من حزنها و أكملت بصدق

و ما صدقت بقى انى شوفت حد و أرتاحله كدة من أول مرة ... فقولت لا بقى مش لازم أضيع الفرصة ...

ضحكت أميرة على حديثها فباغتتها نور بسؤالها

:- مستر حسن و مستر خالد عاملين ايه ؟

ردت أميرة بتلقائية

:- كويسين الحمد لله ... هو إنتى مش بتشوفيهم فى الشركة ...

تلعثمت نور قليلا وقالت

:- انا مش بشتغل معاهم فى الشركة ... انا مساعدة مستر خالد فى المكتب الجديد بتاعه ...

هزت أميرة رأسها بتفهم و تحدثت

:- مممم فهمت ...

هتفت نور مستفسرة

:- هو إنتى فى كلية ايه يا أميرة

:- اخر سنة فى تجارة قسم إدارة أعمال ...

:- حلو أوى ... ما تيجى تشتغلى معانا هنا فى المكتب ...

إنتابها شعور بالحيرة ...

:- مش عارفة يا نور ... انا لسة بدرس وخايفة أبوظ الدنيا ...

قالت نور مشجعة ..

:- تبوظى ايه يا بنتى ... متخافيش انا معاكى ... صدقينى يا أميرة الموضوع دة هيفرق جدا معاكى ... هيحسسك ان حياتك لها معنى وهتخرجى نفسك من دايرة الإتهام اللى حاطة نفسك فيها طول الوقت ...

ابتسمت أميرة بحماس رغم ما يشوبها من قلق من رد فعل المحيطين بها ولكنها وافقت وقالت

:- خلاص ماشى ... هقولهم ... وأشوف خالد كمان هيقوللى ايه ...

على ذكر اسمه ... ارتجف قلبها ... و انتابها الحزن مجددا ... اشتاقت له حقا ... فإعتادت على رؤياه يوميا ... حاولت نفض كل ذلك وغمغمت بخفوت

:- تمام شوفى هتعملى ايه وانا معاكى ...

أومأت أميرة لها وأنهت الإتصال ... متحمسة للفكرة .... لكن خائفة مما سيحدث !!!

يجلس خلف مكتبه يتابع عمله بشغف ... دخلت عليه جميلة تناوله بعض الملفات التى طلبها منها منذ قليل ... تركتهم أمامه على المكتب فأشار لها بالإنصراف ... أخذ يتطلع على الملفات أمامه ليقطع ذلك صوت هاتفه ... نظر له ليجدها هى ... توتر قليلا .. وأخذ نفساً عميقاً و رد عليها قائلا

:- إزيك يا رؤى ... عاملة ايه ؟

أجابته بإرتباك

:- أنا بخير ... معلش يا حسن لو ممكن أتكلم معاك شوية ؟

ضيق عينيه وإستغرب طريقتها فسألها

:- مالك يا رؤى ... فى حاجة ؟ إنتى كويسة ؟

حاولت ان تخفى إرتباكها

:- لأ مش كويسة يا حسن ... و محتاجة أتكلم معاك ...

نظر للملفات الموجودة أمامه و تحدث

:- طيب ممكن نتكلم بعد الشغل لأنى عندى شغل كتير جدا معلش ...

شعرت بالحزن يغزو قلبها .... فتجمدت الكلمات بحلقها ... و زرفت عينيها الدموع ... حاولت الحفاظ على كبريائها أمامه فقالت

:- خلاص مش مهم ... اسيبك تكمل شغلك ... مع السلامة ...

وأغلقت الهاتف ولم تنتظر منه الرد ... فنظر للهاتف بإستغراب

فإنتابه الشعور بالضيق ... رمى الهاتف على المكتب بإهمال ... وفك عقدة عنقه ... رمى جسده على الكرسى ليستند عليه بظهره ...

ماذا يفعل ؟

هل أخطأ بحقها ؟

هل عليه أن ينسى ما يفعله والده به لأجلها ...

وخز بقلبه تمكن منه ... لم يطاوعه كى يستمر بالعمل فتحرك سريعا من مكانه وخرج عازما أمره على الذهاب اليها ....

توجه الى جميلة وقال

:- انا همشى دلوقتى ... ولو حد سأل عليا قوليله إن جالى مشوار مهم ...

سألته

:- يعنى حضرتك مش هترجع تانى انهاردة

رد بإستعجال

:- لأ مش هعرف أرجع ...

والقى عليها السلام و انصرف ...

*********

أمام لوحتها تجلس تتطلع بها بحزن ... رسمت ملامحه بدقه ... كالمرسوم بذاكرتها تماما ... كالمحفور بين ثنايا قلبها ....

أخذت تتحدث مع صورته أمامها ...

:- طول عمرى وأنا بحبك و كاتمة فى قلبى و ساكتة ... بحلم بس أشوفك لو حتى من بعيد ... كنت بروح النادى مخصوص علشان المحك ... و يوم ما تبقى خطيبى ... تبقى بعيد عنى بالشكل دة ... معقول تكون مغصوب على الخطوبة دى ... طيب أدينى فرصة ... مش يمكن تحبنى ... لو تعرف انا بحبك أد ايه ... عمرك ما هتفكر تزعلنى ...

قطع حديثها دلوف والدتها بإبتسامتها الصافية تقول

:- ايه يا حبيبتى بتكلمى نفسك ولا ايه ؟

ارتبكت رؤى ووقفت تدارى بجسدها اللوحة حتى لا تراها والدتها ... فقالت بتلعثم

:- لا ابدا يا ماما ... هو فيه حاجة ؟

ابتسمت أمها وقالت

:- اه فيه .... اللى فى الصورة دة ... قاعد تحت وبيسأل عليكى ...

نظرت رؤى للوحة ببلاهة وأعادت النظر الى أمها مرة أخرى و سألت

:- قصدك مين ؟

اقتربت منها وأمسكت بكتفيها وأدارتها لتنظر للصورة وأردفت ...

:- قصدى دة ... حسن

تحدثت رؤى بخفوت

:- حسن تحت بجد يا ماما ؟

أومأت لها برأسها و ردت

:- أيوة يا قلب ماما ... حسن قاعد مع باباكى تحت وبيسأل عليكى ... يلا غيرى هدومك علشان تنزلى تقابليه ...

خرجت والدتها وتركتها تائهة ...

هل أتى حقا لأجلها ؟

أم أغضبته عندما أغلقت الهاتف دون ان يرد ؟

هل أتى ليتحدث معها كما أرادت ؟

أم أتى لينهى كل شئ ؟

أسرعت تبدل ملابسها البيتية بأخرى محتشمة ... وارتدت حجابها وأحكمته حول رأسها ثم نزلت لتقابله ...

رأته يجلس مع والدها يتبادلا أطراف الحديث ... وجهه مرهق رغم إبتسامته ... إقتربت لتلقى عليهم السلام ...

إستقام عند رؤياه ... شئ بداخله ينبض لا يعلم ما هو ... شعور مستجد عليه ... عدل هندامه و رد عليها السلام فتحدث والدها قائلا

:- تعالى يا حبيبتى أقعدى مع حسن شوية علشان هو هيتغدى معانا انهاردة ...

إعتذر حسن بلباقة

:- معلش يا عمى مش هقدر ... أنا شوية وهمشى على طول

نهض سليم من مكانه وقال

:- انا هسيبها هى تتصرف معاك ....

ثم نظر لإبنته وأردف

:- إنتى وغلاوتك عنده بقى يا يقعد يتغدى معانا او لا

وأنصرف من أمامهم تاركا لهم المجال للحديث بحرية ...

تطلع لها حسن ببعض التوتر ... وجدها تنظر للأرض و تفرك يديها بإرتباك ...

انتقل من مكانه ليجلس على الكرسى بجانبها وسألها عن حالها ... يحاول تخفيف توتر الموقف

استجمعت شجاعتها ... فأهملت سؤاله وباغتته بسؤالها وهى تنظر بعمق لعينيه

:- جيت ليه يا حسن ؟ ... يا ترى خلصت شغلك ... ولا إنت أصلا مكنش عندك شغل بس مش عايز تشوفنى ....

نظر لعينيها و تحدث بصدق

:- أنا كنت مشغول فعلا يا رؤى ... عندى شغل كتير و مكنش ينفع يتأجل ... بس لما لقيتك زعلانة مقدرش أكمل ... وسيبت كل حاجة وجيت ...

زارتها الإبتسامة فزينت محياها المليح ... وزادتها فوق جمالها جمالا ... فسألته

:- يعنى إنت فعلا سيبت الشغل اللى عندك علشانى ...

تطلع لها وابتسم بهدوء و رد عليها بمرح

:- على فكرة انا عمرى ما عملت كدة ... و خصوصا بعد ما قفلتى فى وشى السكة ... ولا فكرانى ما أخدتش بالى ...

نظرت له بأسف و قالت

:- انا اسفة ... بس انا قولتلك مع السلامة على فكرة يعنى ما قفلتش فى وشك ولا حاجة ...

ضحك على طريقتها الطفولية فقال

:- خلاص يا ستى انا مسامح ... بس قوليلى بقى مالك ؟... كنتى عايزة تتكلمى معايا فى ايه ؟

تلاقت عينيهما لتقول بنبرة حانية

:- كنت عايزة أتكلم معاك يا حسن ... اتكلم معاك زى أى اتنين مخطوبين ... أتكلم معاك فى أى حاجة وفى كل حاجة ....

نتكلم وأحكيلك اى حاجة بتضايقنى ... بس إنت بعيد اوى يا حسن ... وبتبعد أكتر ... و مش عارفة ايه السبب ؟

أخفض رأسه بألم ثم رفعها ليتلاقى بزيتونية عينيها وقال

:- مش هقولك بيتهيألك أو محصلش .... فى حاجات كتير إنتى متعرفيهاش يا رؤى ... انا مش اللى انتى شايفاه بيضحك ويهزر دة ... صدقينى جوايا واحد تانى خالص ...

حاول ان يتمالك نفسه فأردف

:- مش عايز أشغل دماغك بكل دة ... أنا بس عايزك تفهمى إن مشكلتى مش معاكى ... انا بس بحاول أمشى أمورى وأفوق من اللى انا فيه ...

شعرت بالشفقة على حاله ... لم تره من قبل هكذا ... شئ بداخلها يدفعها لمعرفة المزيد عنه ... سبر أغوار نفسه ... فتحدثت

:- يعنى ايه مش عايز تشغل دماغى ... أنا خطيبتك يا حسن ... متحاولش تبنى بينا حواجز هيكون صعب نهدها بعد كدة ..

حاول ان يعبر عما بداخله فقال بتيه واضح فى عينيه

:- انا تايه يا رؤى ... لما بكون جمبك ببقى مش عايز أبعد .... ولما بكون بعيد بخاف أقرب .... بخاف أضعف و دة فى حد ذاته مضايقنى ...

رغم ان ألمتها كلماته لكنها قررت الصمود لتخرجه من توهانه الذى أعترف به صريحا الان ...

:- طيب إيه الحل

:- إننا نتجوز ...

نظرت له بإستغراب ... و قالت

:- نتجوز إزاى يا حسن ... الخطوبة معمولة علشان نقرب من بعض قبل الجواز ... لكن للأسف دة محصلش ... تروح قايلى نتجوز طيب إزاى

رد بصدق

:- أنا قولتلك انى مش عايز أقرب ... خايف أتعدى حدودى ... علشان كدة ببعد ... لكن لما تبقى مراتى كل حاجة هتتغير ...

فكرت فيما قاله قليلا ف ردت

:- طيب ممكن تسيبنى أفكر ...

:- اه طبعا حقك ... هسيبك يومين تفكرى

نظرت له بإستغراب لتقول

:- يومين ؟

هتف سريعا

:- كتير صح ... خلاص من هنا لبعد ما نتغدى تكونى فكرتى وتردى عليا قبل ما مشى

ابتسمت وغمغمت بخفوت

يعنى انت خلاص وافقت تتغدى معانا

ابتسم لها أيضا وقال بمرح

:- ايوة ... عمى سليم قال إنتى وغلاوتك عنده ...

أردف بنبرة حانية

:- وانتى غالية عندى اوى يا رؤى ...

وأكمل بمرحه المعتاد

:- دة انا سيبت اللى ورايا وجتلك ... والله ما عملتها مع حد قبل كدة ...

هتفت بحنق مصطنع

:- خلاص يا حسن انت هتزلنى ...

ضحك عاليا فإبتسمت بخجل ... و شعرت أنه محق عليهم الإقتراب وهذا من الواضح انه لن يحدث سوى عندما تكون ببيته ...