الفصل الخامس والثلاثون

أخفض رأسه وزفر بالم يغزو بقلبه ... ثم أشار لها ان تدخل المكتب

:- إتفضلى

دلفت الى الداخل وجلست على المقعد المقابل للمكتب فقال

:- عايزة تقولى ايه يا نور ...

تنفست ببطء و تحدثت

:- كتب كتاب عهد أختى بعد بكرة ... وخطيبها عايز يعملها حفلة كمفاجأة يعنى ... فكنت عايزة أسألك لو تعرف مكان كويس واقدر احجز فيه لإن الوقت ضيق جدا ...

أومأ رأسه بتفهم و قال بإبتسامة ودودة

:- الف مبروك و ربنا يتمم بخير ... فى واحد صاحبى عنده مكان مفتوح بيعمل فيه حفلات و أعياد ميلاد ... ممكن أكلمه وتروحى تشوفى المكان ... دة لو تحبى طبعا ...

شكرته نور و إستأذنت منه بإحترام و توجهت للخروج و متابعة عملها ...

تنهد خالد بعد ان تبعها بعيناه حتى خرجت ... أسند ظهره للخلف و حك جبينه بيده كمحاولة للتفكير بالأمر ...

عينيها تقسم انها عاشقة ... صادقة .. لكن عقله يرفض تقبل الوضع ... يرفض مظهر ذلك الأحمق و هو يجذبها من ذراعها أمام عينيه و لم يستطع الحراك ... شعوره بالخذلان مؤلم ... أما شعور الغيرة قاتـــــــــل ....

أمسك هاتفه ليساعدها فيما طلبت ... أجرى إتصالا على صديقه و تبادلا السلام فسأله خالد

:- كنت عايز منك خدمة يا درش

:- تحت أمرك يا خالد ..

:- عايز أحجز عندك كتب كتاب

رد الاخر بمرح

:- إيه يا خلود نويت ولا إيه ؟

إبتسم خالد و قال بهدوء

:- لا انا لسة عليا شوية .... دة كتب كتاب حد من قرايبى ...

رد الأخر بترحيب

:- تحت أمرك إنت وقرايبك قوللى بس الميعاد إمتى و متشيلش هم ...

:- حبيبى يا درش ... بص هو الميعاد بعد بكرة ...

هتف

:- ايه ؟ حد يحجز مناسبة قبلها بيومين يا بنى ... دى الناس بتحجز قبلها بشهر ... دة أقل حاجة ...

تحدث خالد بإعتذار

:- معلش هو حصل ظروف خليتهم يقدموا الميعاد ... ياريت تقدر تتصرف ..

:- متقلقش يا خالد ... انا هشوف الحجوزات عندى وأكلمك ...

وافق خالد على ما قال و أنهي الإتصال ...

*********

دخل حسن الى غرفة جده عازما على ما قرر ... لن يترك ضغوطه النفسية تقف عائقا بينه وبينها ... سيتزوجها ... ليحل له الإقتراب ... وجودها بجانبه يشعره بالراحة ... فأرادها دوما أمامه ...

وجد جده يجلس كعادته يتلو من كتاب الله فأقترب منه بهدوء و جلس بجواره يستمع لما يريح قلبه ...

إستشعر الجد وجوده ... فأغلق المصحف و نظر له بإبتسامة بشوشة و سأله عن حاله فوجد حسن فرصته للحديث بما يجيش به صدره

:- أنا قررت حاجة يا جدى و جيت علشان أعرف رأيك فيها ...

أومأ له الجد ليسترسل فى الحديث فأردف

:- أنا قررت أقدم ميعاد الفرح ... أنا شايف مفيش داعى لموضوع الخطوبة سنة دى ...

تعجب الجد رضوان من قرار حسن فسأله

:- إنت متأكد من قرارك دة يا حسن ... الحاجات دى مفيهاش هزار يابنى ...

حرك حسن رأسه للتأكيد و رد

:- عارف يا جدى ..

فقال الجد مستفهما

:- ماشى يا حسن ... بس ايه اللى خلاك تاخد قرار زى دة ؟

رد حسن

:- حاسس ان المسافات بينا بتبعدنا عن بعض ... محستش بأى تغيير حصل من ساعة الخطوبة ... و أنا عارف نفسى يا جدى عمرى ما هاخد خطوة بجد فى القرب غير لما تكون مراتى و فى بيتى غير كدة هبوظ الدنيا ...

فهم الحاج رضوان وجهه نظر حفيده فإبتسم له وقال

:- أوعى يا بنى تكون فاكرنى لما قولتلك إلزم حدودك فى الخطوبة كان قصدى إنك تبعد بالطريقة اللى بتتكلم بيها ....

أنا قولتلك كدة رغم إنى كنت متأكد إنك عارف حدودك كويس ... بس يا بنى الشيطان شاطر و بيدخل للإنسان من نقطة ضعفه ... و مش هكذب عليك ... الراجل مننا بيضعف قدام البنت اللى ربنا كتبله تكمل معاه حياته ... و بيبدأ الشيطان يحلله الحرام و يزينه فى عينه ... وتلاقى دماغك بتودى و تجيب دى خطيبتك ... دى كلها كام شهر و تبقى مراتك ... وحاجات كتير إنت عارفها ... علشان كدة حذرتك ...

إبتسم حسن لجده و تحدث بحب

:- إنت عارف يا جدى إنى بحمد ربنا على وجودك فى حياتى ... على العموم ما تقلقش انا عارف كل اللى حضرتك قولته كويس اوى و حافظه صم ... دة أنا تربيتك يا حاج ... أنا بس فعلا محتاج أبنى حياة مع إنسانة تحبنى وأحبها و تفهمنى و تقدرنى ... محتاج دة بجد يا جدى ...

ربت الحاج رضوان على يد حفيده وقال

:- على بركة الله يا بنى ... بس عايزك تروح تكلم أبوك و تقوله على اللى إنت ناوى عليه ...

حاول حسن الإعتراض فقاطعه الجد برجاء

:- معلش ... علشان خاطرى أنا ... لازم حد فيكو يكسر الفجوة اللى بينكو دى يا بنى ... مهما عمل هو أبوك بردو ... خليها عليك يا حسن ...

أومأ له حسن ووافق على كلام جده وقرر مواجهة والده ...