الفصل الرابع

تساقطت العبرات على خديها بغزارة، ودت لو منعته من ذلك التفكير، ودت لو طلبت منه أن يعطيها فرصة أخرى لكن ما فعلته به ليس بهين!

ألقى آخر كلماته على مسامعها قبل أن يذهب إلى حور ليحاسبها على ما فعلته مع هديل حيث قال بصوت يشوبه البكاء:

-أنا عمري ما كنت إنسان معندوش كرامة، وعمري ما اتعديت على حقوق غيري، ولا عمري هغصبك أو هغصب أي ست تعيش معايا! كل اللي حابب أقولهولك إنك كنتِ وما زلتي أمانة عندي بحميكي وبحافظ عليكي ولحد آخر يوم في عمري هفضل أحميكي حتى لو طريقنا مبقاش واحد.

تركها تبكي مُر البكاء، ذهب غاضباً ليتحدث مع حور التي وقفت تبكي أمام البحر هي الأخرى، رقت طباعه لصوت بكائها، غمغم بقلق:

- حور إنتِ بتعيطي! في إيه إنتي كويسه؟ إيه اللي حصلك؟

كفكفت دمع عينها بسرعة، هتفت بخنقة:

- لا أبداً دا بس هوا البحر بيعملي حساسية.

= هو أنا يعني معرفكيش! عيب عليكي دا إحنا عشرة عمر، إنتِ زعلانه مني صح؟

-مفيش حاجه يا أكرم لو سمحت أنا عندي شوية شغل لازم أخلصه قبل ما أمشي.

= هتمشي تروحي فين؟ هتسيبي المخيم!

-آه للأسف لازم أسيب المخيم، حاسه بإرهاق وتعب مش هقدر أكمل بالوضع دا لازم أمشي.

=حور أنا آسف.. أنا مش متظبط الأيام دي خالص حقيقي بعتذرلك من كل قلبي ونفسي إنك تقبلي إعتذاري وتسامحيني، إنتِ قلبك أبيض وعارف إنك هتغفري لأخوكي مش إحنا طول عمرنا زي الإخوات!

-إخوات! آه طبعا يا أكرم، صدقني مفيش حاجه أنا بخير ومش زعلانه منك، بعد إذنك عشان ألحق أخلص وأمشي.

أمسك أكرم بكفيها بحنان أخويّ، هتف بصوت هادئ:

- عشان خاطري متمشيش، أنا محتاجلك جمبي. إنتِ مش شايفه حالة هديل عاملة إزاي!

لمساته الدافئة أشعلت قلبها المنطفئ من جديد، لم تسمع ما قاله من فرط مشاعرها التي اندفعت لقلبها تزاحم بعضها البعـض، هزت رأسها بالموافقة دون أن تجيبه بصوتها، شكرها بفرحة ثم عاد إلى زوجته تاركًا حور تهيم بحبها الخفي له!

بعد أن اعتدلت وجهة هديل في الحياة ووصل إلى بصرها وبصيرتها الصورة الحقيقية للأشخاص من حولها لن تحتمل شعور الفقد مرة أخرى خصيصاً إن كان هذا الفقد لإنسان مثل أكرم قلما يوجد في تلك الحياة المزيفة.

بقلة إيمان وعقل متهور عزمت هديل على التخلص من الحياة برمتها، ذهبت إلى البحر لتحتضنه بشوق جثة متحركة للموت والسكون!

بحث أكرم عنها بالخيمة والجوار لكن أثرها إختفى من الناحية كلها وكأنما خلت الأرض منها، راح يصرخ بإسمها كالمجنون، تجمهر الناس من حوله وهم كل شخص لديه همة وشهامة بمساعدته في البحث عنها، لكن جميع محاولاتهم باءت بالفشل!

رآها أحد الأشخاص مغشياً عليها بجوار البحر فحملها للفريق الطبي المتواجد دائما في كل رحلات الإستكشاف ، إستطاع إنقاذها بأعجوبة بعد أن ضاقت أنفاسها من مياه البحر التي ومن حسن حظها أنها لم تتعمق به كثيراً، كُتبت لها النجاة من تلك المحاولة المتهورة للتخلص من حياتها!

ظلت تهتف بإسم أكرم فور إستيقاظها، وجدته بجوارها باكياً، محيطاً إياها بجسده بإحتواء وحنان بالغ.

مرت بعض الأيام بعد تلك الحادثة وتعلق هديل بأكرم بات تعلق مرضيّ، لا تسمح له بمغادرتها حتى لو لدقائق، لم يفهم حالتها تلك فظن أنها إنتكاسات نفسية لصدمتها العاطفية الشديدة مؤخراّ، لم يخطر بباله أنها تريد منه البقاء وتخشى أن تخبره بما يحدث بقلبها عندما يكون بجانبها!

لم يشعر أكرم بمغادرة حور للمخيم لإنشغاله بهديل، بذل قصارى جهده لكي يعيدها للحياة مرة أخرى، استجابت ببطئ لمحاولاته المستميتة، جلس بجوارها على مقاعد صغيرة أمام البحر، سألته بصوت منخفض:

-ممكن أعرف الحكاية كلها ومن الأول؟

=حكاية إيه يا هديل؟

-إنت وماجد و.. وأنا يا أكرم.

ضاق صدره لكنه عمل على أخذ الحديث لمسار هادئ، غمغم بتوتر:

-عايزة تعرفي إيه بالظبط يا هديل.

تنحنحت بتوتر بالغ قبل أن تقول بحذر:

-كل حاجه من أول الموضوع خالص، صداقتك بيه، معرفته بيا، معرفتك إنت بيا!

تنفس بعمق قبل أن يجيبها محاولاً أن يحافظ على كلماته التي تخرج من فمه كي لا يعيدها لحالتها السابقة:

-مالوش لزوم صدقيني متدوريش في اللي فات وخليكي في اللي جاي إقطعي الصفحة دي وارميها في أقرب سلة قمامة.

=أكرم لو سمحت دا طلبي الوحيد منك دلوقتي، أصلا كنت هحاول أفهم بأي طريقة لكن أنا حابه أسمع منك إنت ممكن؟

-تمام يا هديل، أنا طول عمري عايش مع أهلي بره مصر وحصلت ظروف سيئة جداَ مش حابب أفتكرها واللي بسببها خسرت أبويا وأمي للأبد!

اضطريت أرجع مصر وكنت وحيد جداً والدنيا سوده في عيني فوق ما تتخيلي، عدت عليا الأيام والليالي بصعوبة لحد ما أخدني إبن عمي وعرفني على صحبته اللي كان من ضمنهم ماجد!

الظروف أجبرتني إني أفضل طول الوقت معاهم عشان أحاول أنسى وجعي، شوفتك يا هديل، بنت جميلة مميزة تشد أي عين ليها، ضحكتك ورقتك وصوتك الهادي وسط أصحابك في كافيه المول أسروني، كنت حافظ مواعيدك وحافظ حركاتك، بتحبي إيه، بتكرهي إيه، بتاكلي إيه، الفراولة اللي بتعملك حساسية، والجرح اللي مبتحبيش شكله في إيدك اليمين، إحساسك بالبرد في عز الصيف، لونك الأبيض اللي مبتحبيش تلبسي غيره وممكن تدخليله أي ألوان تانية لكن يفضل هو الأساس... هاه أقول كمان ولا كفاية كدا!