CHAPTER 6

CHAPTER 6

LUCAS INFANTE

Kinabukasan naman ay maagang nagising si Lucas dahil kailangan niyang pumasok ng maaga sa kanyang opisina ngayon. Gustuhin man niya na matulog pa dahil napagod din talaga siya sa kasal nila kahapon ni Athena ay hindi naman pwede na hindi siya dumalo sa meeting nila ngayon dahil napakahalaga ng meeting na iyon para sa kanyang kumpanya.

Bago tumayo si Lucas mula sa kanyang pagkakahiga  ay saglit pa siyang napatitig sa maamong mukha ni Athena na mahimbing pa rin na natutulog ngayon. Hindi rin niya maiwasan na mapangiti habang nakatitig dito dahil kahit siya ay hindi rin makapaniwala na asawa na niya ito ngayon. Ipinagpasalamat na lang din talaga niya na hindi na ito nangulit pa kagabi na matulog sa ibang silid.

Hindi na rin napigilan pa ni Lucas na haplusin ang makinis na pisngi ni Athena at saka siya napabuntong hininga habang pinapakatitigan niya ito. 

“Sana lang talaga ay hindi ako nagkamali sa desisyon ko na pagpayag sa gustong mangyari ng iyong ama. At sana lang din ay matutunan mo akong mahalin sa kabila ng agwat ng edad nating dalawa,” mahinang sabi ni Lucas at saka niya hinalikan sa noo ang kanyang asawa.

Hindi na rin naman nag aksaya pa ng oras si Lucas at agad na rin siyang nag asikaso ng kanyang sarili upang makaalis na rin siya kaagad dahil ang ayaw niya sa lahat ay ang nalalate. Uminom lamang din ng kape si Lucas at agad na rin siyang umalis ng mansyon at ibinilin na lamang din ni Lucas sa kanyang kasambahay si Athena dahil hindi na nga siya makakapagpaalam pa rito dahil mahimbing pa itong natutulog ngayon.

Pagkarating na pagkarating ni Lucas sa kanyang kumpanya ay agad na siyang dumiretso sa kanyang opisina upang basahin ang ilang papeles na inihanda ng kanyang sekretarya. Iyon kasi ang ilan sa mga mahahalagang pag uusapan sa naturang meeting kaya kailangan niya iyong mabasa muna.

Hindi naman nagtagal at nagpunta na rin si Lucas sa conference room at nadatnan na nga niya roon ang ilan sa mga investors ng kanyang kumpanya at maging ang ilan sa mga kasosyo niya sa negosyo ay naroon na rin. Kaya naman hindi na rin nagtagal at sinimulan na rin kaagad ang naturang meeting at talagang umabot iyon ng tatlong oras.

Matapos naman ang meeting na iyon ay agad na rin na bumalik si Lucas sa kanyang opisina. Pabagsak pa nga siyang naupo sa kanyang swivel chair at tila ba napagod talaga siya sa tagal ng meeting na iyon.

Habang nagpapahinga siya ay nakarinig naman siya ng mahinang pagkatok sa pinto ng kanyang opisina.

“Come in,” sabi ni Lucas at hindi na siya nag abala pa na tumingin doon.

“Grabeng sipag naman talaga ng manugang ko na ito. Isipin mo kakakasal mo pa lang kahapon pero heto ka at pumasok na kaagad sa opisina. Ibang klase talaga ang sipag mo. I’m very proud of you,” sabi ng bagong dating na walang iba kundi si Timothy habang may nakakalokong ngiti sa labi nito.

Naipikit naman ng mariin ni Lucas ang kanyang mga mata ng marinig niya ang boses ng kanyang kaibigan na ngayon nga ay byenan na niya. Nag angat naman siya ng tingin at saka siya napabuntong hininga.

“Kumusta naman ang buhay ng bagong kasal? Kumusta ang anak ko? Nagpasaway ba siya sa’yo magdamag? Well, I think hindi naman siguro dahil nakapasok ka pa ngayon sa opisina,” sabi pa ni Timothy at saka ito naupo sa katapatna upuan ni Lucas.

“Ang daldal mo,” seryoso naman na sabi ni Lucas at napapailing na lang talaga siya habang nakatingin kay Timothy.

“Tsk. Baka nakakalimutan mo na byenan mo na ako ngayon at hindi mo na ako basta kaibigan lang. Kaya matuto kang gumalang sa akin. Ano na lang ang sasabihin ng mga makakarinig kapag ganyan mo ako kung kausapin. Dapat may paggalang pa rin,” daldal pa rin ni Timothy.

Matalik na magkaibigan kasi talaga si Timothy at Lucas at kahit pa napakaseryoso at kinakatakutan si Timothy ng kanyang mga rmpleyado at ilangmga nakakakilala sa kanya ay meron pa rin talaga itong ugali na mapagbiro lalo na kapag kaharap nito si Lucas. Habang si Lucas naman ay madalas na seryoso talaga at mahirap talaga itong biruin at tanging si Timothy lang ang nakakapagbito ng ganito rito lalo na kapag sila lamang na dalawa.

“Ganon ba? Kung gayon ay ano pala ang itatawag ko sa’yo? Hindi naman magandang pakinggang kung tatawagin lang kita na Timothy o bro gayong byenan na kita. Ano ba ang gusto mong itawag ko sa’yo sumula ngayon? Dad? Papa? Tay?” sagot ni Lucas kay Timothy.

“Tsk. Hindi ko maimagine na ganon ang magiging tawag mo sa akin,” naiiling naman na sagot ni Timothy at bigla nga siyang napaisip kung ano nga ba ang itatawag sa kanya ni Lucas. “Ang mabuti pa ay kapag may kaharap tayo na ibang tao ay dad ang itawag mo sa akin pero kapag tayo tayo lang naman ay kahit Timothy na lang,” pagpapatuloy pa niya.

“Sige. Sabi mo e,” sagot ni Lucas  habang dahan dahan pa itong tumatango.

“Kumusta ang anak ko? Hindi ba naman sya nagpasaway?” tamong pa muli ni Timothy kay Lucas.

Umayos  naman ng kanyang pagkakaupo si Lucas at saka siya bumuntong hininga.

“Tulog pa si Athena noong umalis ako ng mansyon. Pero wag kang mag alala dahil ibinilin ko naman siya sa aking kasambahay doon,” sagot ni Lucas dito. “Kagabi nagpupumilit siya na sa ubang silid matulog pero hindi ako pumayag dahil kapag pinagbigyan ko siya sa gusto niyang mangyari ay baka paulit ulit na lang siyang ganon,” dagdag pa niya.

“Tama lang iyan,” sagot ni Timothy at saka siya bumuntong hininga. “May tiwala ako sa’yo na mapapatino mo siya kaya sa’yo ko siya ipinagkatiwala. Kaya nga sobrang pasasalamat ko na pumayag ka sa gusto kong mangyari. Alam ko na hindi biro ang hiniling ko na iyon sa’yo pero pinagbigyan mo pa rin ako kaya sobrang pasasalamat ko talaga sa’yo,” pagpapatuloy pa niya.

Seryoso naman na napatingin si Lucas kay Timothy at muli niyang naalala ang pag uusap nila noong makiusap ito sa kanya na pakasalan niya ang nag iisang anak nito.