FROM OLD MAID TO BILLIONAIRE'S WIFE

Disclaimer: This is a work of fiction. Names, characters, businesses, events, and incidents are the products of the author's imagination. Any resemblance to actual persons, living or dead, or actual events is purely coincidental.

‼️Warning: RATED 18 ‼️

NALAGLAG ang bag na hawak ni Elorda habang nakatayo at nakatulalang nakatingin sa kanyang buong pamilya.

"E-Elorda..." sambit ni Elina, bigla siyang tumayo nang makita ang panganay na anak. Sumunod din sa kanya si Sicandro, ang kanyang asawa.

Tumatakbo na nilapitan ni Elina ang anak. "U-Uuwi ka pala, Elorda. Hindi ka nagpasabi...."

Nanatiling nakatayo si Elorda at 'di sumagot sa ina. Nakatulala lang siyang nakatingin sa dalawang tao na nakaupo sa harapan. May puting lamesa at ang buong pamilya niya ay kulay puti ang mga damit. May nakasulat na Harry and Elaine nuptial.

Dumaloy ang masaganang luha ni Elorda sa kanyang mga mata. Nanginginig ang kanyang tuhod at napahawak sa braso ng ina.

"El-Elorda..." garalgal ang boses ni Elina na tinawag ang anak. Nangingilid na rin ang luha sa kanyang mata nang makita ang sobrang sakit sa mga mata ni Elorda.

"A-Ano pong ibig sabihin nito? B-Bakit maraming tao at anong okasyon?" Mga tanong ni Elorda na nanginginig ang kamay na itinuro sina Harry at Elaine.

Natigilan si Harry, nahigit niya ang kanyang paghinga at hinawakan ang kamay ng asawang si Elaine na nasa ibabaw ng lamesa.

Katatapos lamang ng kasal nila ni Elaine at ang reception ay ginanap sa harapan lamang ng bahay ng mga Manalastas, ng kanyang naging asawa.

"Pumasok tayo sa bahay doon tayo mag-usap, anak," mahinang sabi ni Elina. Iginiya niya si Elorda patungo sa loob ng bahay nila, pero sinasalag ng anak niya ang kanyang kamay.

"Ayoko po... sabihin n'yo na sa akin! Ano ang ibig sabihin ng mga nakikita ko?" Tanggi ni Elorda, panay pa rin ang pagtulo ng kanyang mga luha.

"Please, Elorda. Huwag kang mag-eskandalo dito," pakiusap ni Elina sa anak.

Nabaling ang tingin ni Elorda sa ina. Matapang ang anyo na pinunasan niya ang mga luha niya. "Sa akin po kayo nakikiusap na 'wag mag-eskandalo? Nay, kauuwi ko lang po. Hindi ko sinabi sa inyong lahat na uuwi ako dahil gusto ko kayong i-sorpresa lahat. Alam ko na matutuwa kayo. Pero, ano po ito? Ano itong sorpresa n'yo sa 'kin? Wala ni isa inyo ang nagsabi na kasal pala ito ng kapatid ko at ng boyfriend ko!"

Nagbulungan ang mga tao. Lahat ng mga bisita ay natuon ang mga mata sa kanilang mag-ina.

Napayuko si Elina at napaluha. Yumugyog ang kanyang mga balikat.

Lumapit na si Sicandro at nakatiim na hinatak si Elorda papasok sa loob ng bahay nila.

"Tatay..." habol na sabi ni Elina sa asawa. Napapadaing naman si Eloeda sa higpit ng hawak ng ama sa kanyang braso.

Isinalya ni Sicandro ang anak paupo sa sopa.

"Pinakiusapan ka na ng Nanay mo na dito sa loob ng bahay mag-usap! Gusto mo pang pag-piyestahan tayo ng mga kapitbahay natin dahil sa pag-e-eskandalo mo, Elorda!"

"Ako pa po ang may mali, 'tay? Niloko po ako ni Harry, at ang masakit. Kapatid ko pa ang ipinalit niya sa akin. Sana ipinaalam n'yo man lang para hindi ako naging parang t*nga. Alam n'yo po ba kung gaano kasakit ang tinaraydor ng sariling pamilya? Sobra pong sakit... nadudurog ang puso ko ngayon. Lahat kayo, tinatraydor ako!"

Napayuko si Elorda at humagulhol ng malakas na iyak.

"B-Buntis na si Elaine. Kaya wala na kaming nagawa kundi ang ipakasal sila ni Harry," mariing paliwanag ni Elina.

Umangat ang tingin ni Elorda. Nagulantang siya sa nalaman. Gumuho ang mundo niya sa kaalamang matagal na pala siyang niloloko ng kanyang kapatid at boyfriend. Ang masakit pa, nagbunga ang panloloko sa kanya ng dalawang taong pinagkakatiwalaan niya.

"B-Buntis na si Elaine... kahit kailan ay hindi naman kami nag-away ni Harry. Pa-Paanong nangyari 'yon?"

Isang malaking katanungan na hinahanapan ni Elorda ng sagot. Paanong nagawa siyang lokohin ni Harry

Pumasok si Harry sa loob ng bahay, kasunod si Elaine. Napadako ang tingin ni Elorda sa kanyang nobyo, dating nobyo na pala. Asawa na ito ng kapatid niya, kakasal lang nila.

Nilapitan siya ni Harry. Nakatuon lang ang mata ni Elorda sa dating nobyo.

"I'm sorry, Elorda. Hindi kita nahintay. Kasalanan ko 'to. Nakikita kita araw-araw kay Elaine. Natukso ako. Kaya ako lang ang dapat na sisihin mo. Sa akin ka lang dapat na magalit hindi sa pamilya mo..." paghingi ng tawad ni Harry. Inako rin niya ang kasalanan.

Mariing napatiim si Elorda. Malakas na sinampal si Harry.

"Walang hiy* ka! Iyan lang ang rason na sasabihin mo sa akin. Natukso ka! G*go ka ba! Harry, nagtatrabaho lang ako sa para sa pamilya ko. Nangako naman ako sa'yo na tatlong taon na lang. Magpapakasal tayo. Pagkatapos, ipagpapalit mo ako sa kapatid ko pa talaga! Wala kang kwentang lalaki!"

Muli niyang pinagsasampal si Harry. Hindi umiwas ang dating nobyo at tinanggap ang lahat ng kanyang galit.

"Ate, tama na! Wala ka nang magagawa. Buntis na ako at kasal na kami ni Harry. Kung sana hindi mo siya iniwan, e, 'di sana hindi siya natukso sa ibang babae," pagtatanggol ni Elaine sa asawa.

"Anong sabi mo, Elaine? Natukso si Harry o tinukso mo? Alam ko naman na may gusto ka sa boyfriend ko noon pa. Pero hindi ko iyon pinansin dahil alam ko na hindi mo magagawang sulitin ang boyfriend ko sa akin. Dahil din sa kapatid mo 'ko kaya malaki ang tiwala ko sa'yo at kay Harry. Mali pala ako ng akala, e. Isa ka rin palang maharot, inakit mo ang boyfriend ko para mabuntis ka. Ako pa na kapatid mo ang niloko mo talaga na walang ginawa kundi ibigay ang lahat ng inyo!" Bulyaw na tugon ni Elorda.

"Pasensiya ka na, Ate. Hayaan mo na lang kami. May anak na kami. Kawawa naman ang magiging anak namin kung mawawalan siya ng ama..." humina ang boses ni Elaine. Para na itong nakikiusap na hayaan na lang ni Elorda sila.

Marahas na huminga ng malalim si Elorda. Gusto niya pang magwala. Pero wala na siyang magawa. Lulunukin na lang ba niya lahat ng sakit na nararamdaman?

"Ito ang pinakamasakit... Isinakripisyo ko ang lahat sa inyo... ibinigay ko ang mga kapritso ninyong lahat! Ultimo pambili ng mga underwear n'yo, ako pa ang bumibili. Pero, ano? Ano ang sukli sa lahat ng sakripisyo ko? Ito ba? Panloloko, pag-traydor at sakit ng kalooban," hinanakit na sabi ni Elorda at nagmamadaling lumabas ng bahay nila, dala ang maleta niya.