Chapter 005

Napahinto si Reina sa narinig. Bahagya siyang napakunot-noo habang nakatingin kay Dr. Lucas.

Sino ang tinutukoy nito? Si Marco ba?

Pero posible naman.

Dahil sa loob ng isang taon, nakita mismo ni Reina kung paano halos maubos ang oras at pera ni Marco sa paghahanap ng doktor na makapagpapagaling sa pandinig niya. Halos nalibot na nila ang iba't ibang ospital sa Pilipinas. Ilang espesyalista na ang nakausap nila. Ilang beses na rin siyang umasa at nabigo. Pero nanatili si Marco sa tabi niya sa bawat check-up at bawat therapy.

Hanggang anim na buwan na ang nakalipas, nang si Dr. Lucas ang humawak sa gamutan niya. Mula noon, unti-unting bumalik ang pandinig niya. Akala niya noon, isa lang iyong bunga ng tiyaga at pagmamahal ni Marco.

Pero ngayon, parang may mali.

Kung si Marco nga ang tinutukoy ni Dr. Lucas, bakit parang hindi naman magkasundo ang dalawa?

Naalala niya ang bawat check-up niya noon. Tahimik lang si Marco habang kausap ang doktor, pero kapansin-pansin ang malamig na pakikitungo ni Dr. Lucas rito. Minsan, ni hindi man lang ito ngumingiti kay Marco. Para bang may hindi ito nagugustuhan sa lalaki.

Lalong naguluhan si Reina.

May bagay bang hindi niya alam?

Dahan-dahan siyang napatingin kay Dr. Lucas. Puno ng tanong ang mga mata niya, pero bago pa siya makapagtanong, bahagya lang itong ngumiti. 

"Sige. Magpahinga ka na. Kailangan mong gumaling."

Tumango si Reina bilang pasasalamat kay Dr. Lucas. Ngumiti lang ito nang bahagya bago tumalikod at tahimik na lumabas ng silid. Muling nabalot ng katahimikan ang buong kuwarto. 

Ilang sandali pa, biglang nag-vibrate ang cellphone sa tabi ng unan niya. Dahan-dahan niya itong kinuha at tiningnan ang screen. Sunod-sunod ang mensahe ng mama niya.

[ Nakapag-book ka na ba ng flight? ]

[ Anong oras ka uuwi ng Cebu? Nag-aalala na kami rito. ]

Tinignan ni Reina ang oras. Alas-tres ng madaling-araw ipinadala ang mga unang mensahe. Ang huli naman ay alas-siyete ng umaga.

Huminga siya nang malalim bago nag-reply.

[ Ma, may nangyari lang dito. Uuwi ako sa loob ng dalawang araw. ]

Kakapindot lang niya ng send nang muling mag-vibrate ang cellphone.

Mensahe iyon mula kay Marco.

[ Reina, kumusta ka? Malubha ba ang sugat mo kagabi? Pupuntahan kita mamaya. Ano ang gusto mong kainin? Dadalhan kita. ] 

Matagal na nakatitig si Reina sa mensahe. Unti-unti siyang napangiti, pero puno iyon ng pait. Kagabi, iniwan siya ni Marco kung kailan kailangan niya ito. Ngayon, saka lang ito magtatanong kung kumusta siya at kung ano ang gusto niyang kainin.

 Dahan-dahan niyang binuksan ang chat box at saka nag-type ito.

[ Marco, maghiwalay na tayo. ]

Pagkatapos pindutin ang send, agad niyang bina-block ang numero ni Marco. Sunod niyang dinelete ang buong conversation nila, na parang gusto niyang burahin ang lahat ng alaala tungkol dito.

Tahimik niyang ibinaba ang cellphone sa tabi ng kama saka ipinikit ang mga mata. Wala na siyang balak pang balikan ang desisyong ginawa niya.

***

Samantala, mabagal na umaandar ang isang itim na SUV sa gitna ng trapik. Biglang nag-vibrate ang cellphone ni Marco. May isang kamay siya sa manibela habang kinuha ang cellphone gamit ang isa.

Pagkabasa niya ng mensahe, bigla siyang napakunot-noo sa nabasa niyang text message ni Reina.

Hindi niya namalayang huminto na ang sasakyan sa harap niya.

Screech!

Malakas na kumiskis ang gulong sa kalsada nang bigla niyang inapakan ang preno. Napasubsob sa upuan ang lalaking katabi niya at muntik pang mabitawan ang hawak nitong kape.

"Mukhang gusto mo akong patayin, ah!" reklamo ni Gelo habang halos matapon ang hawak niyang kape. "Ano bang iniisip mo?"

Hindi sumagot si Marco. Nakatitig lang siya sa screen ng cellphone. Lalong kumunot ang noo niya.

Napansin iyon ni Gelo.

"Anong nangyari? Si Reina ba ang nag-message?"

Hindi pa rin nagsalita si Marco. Tahimik niyang ibinaba ang cellphone at muling pinaandar ang sasakyan.

Dahil hindi ito sumagot, alam na ni Gelo ang sagot.

Napabuntong-hininga siya. "Marco, huwag mo namang sisihin si Reina. Kahit sino ang nasa kalagayan niya kagabi, siguradong masasaktan."

Tahimik lang si Marco. Mas humigpit lang ang hawak niya sa manibela.

"Pero huwag kang mag-alala," dugtong ni Gelo. "Mahal na mahal ka ni Reina. Konting suyo lang, ayos na 'yan. Bilhan mo ng bulaklak, samahan mo sa ospital, tapos lambingin mo nang kaunti."

Tahimik pa rin si Marco.

"Hindi ba? Noon pa man, kahit anong gawin ni Sophia sa kanya, hindi ka niya iniwan. Lahat tiniis niya dahil mahal ka niya."

Biglang nagsalita si Marco. "Gusto niyang makipaghiwalay."

Natigilan si Gelo at napakunot ng noo. "Ano?"

"Nag-message siya. Gusto na niyang makipaghiwalay," sagot ni Marco.

Ilang segundo siyang napatitig kay Marco. Pagkatapos ay napatawa siya.

"Huwag ka ngang magbiro dyan, Marco. Si Reina? Makikipaghiwalay sa'yo? Naku imposible ‘yon."

"Mahal na mahal ka no'n. Hindi ka nga iniwan kahit halos sirain ni Sophia ang buhay niya. Dahil lang ba sa nangyari kagabi, makikipaghiwalay na siya? Hindi ako naniniwala," dugtong ni Gelo.

Walang sinabi si Marco, tahimik lang siyang nakikinig. Hanggang sa tinapik lang siya ni Gelo sa balikat.

"Nagtatampo lang 'yan. Puntahan mo mamaya sa ospital. Konting suyo lang, magiging okay na ulit kayo."

Sandali itong tumahimik bago muling nagsalita.

"Isa pa, wala namang ibang maaasahan si Reina rito sa Manila kundi ikaw."

Nanatiling tahimik si Marco habang nagmamaneho siya. Gayunpaman, hindi niya maalis sa isip ang mensaheng natanggap niya kay Reina.

Makalipas ang halos tatlumpung minuto, huminto ang sasakyan sa harap ng ospital.

Tatanggalin na sana ni Marco ang seatbelt niya nang biglang may tumakbo papunta sa sasakyan—si Sophia.

"Kuya Marco!"

May suot itong maluwag na sweater at maikling palda. May benda sa paa niya kaya mas lalo siyang mukhang kawawa.

Napakunot-noo si Marco. "Bakit ka lumabas? Hindi ba masakit ang paa mo?"

Tumango si Sophia at ngumuso. "Masakit pa rin..." mahina nitong sagot.

Pero bago pa ito makapagsalita, biglang nag-ring ang cellphone niya. Nanlaki ang mga mata ni Sophia nang makita ang caller ID.

"Si Daddy!" Kinabahan siya. "Kuya Marco, ikaw na lang ang sumagot… please."

Huminga nang malalim si Marco bago kinuha ang cellphone.

"Hello, Dad..."

[ Marco? ] tanong ng ama ni Sophia. [ Nasaan si Sophia? Malubha ba ang sugat niya? ]

"Wala naman pong seryoso. Maliit lang ang sugat."

[ Mabuti naman kung gano’n]

Huminto sandali ang lalaki.

[ Narinig ko ang nangyari kagabi. Totoo bang sinampal ni Reina si Sophia nang dalawang beses pa? ]

Humigpit ang hawak ni Marco sa cellphone.

"Dad... hindi po ganoon ang nangyari."

[ Wala akong pakialam. ]

Matigas ang boses ng matanda.

[ Kapatid ang turing mo kay Sophia, hindi ba? Utang natin ang buhay natin sa ama niyang si William. Kaya hindi ko hahayaang may mang-api sa kanya. ] 

Napapikit si Marco. Paulit-ulit na lang niya itong naririnig.

[ Isa pa, kakauwi lang ni Sophia. Dalhin mo siya sa bahay. Miss na miss na siya namin ng mommy mo. ]

Hindi na nakapagsalita si Marco dahil pinutol na ng matanda ang tawag.

Tahimik siyang nakatingin sa cellphone hanggang sa hinila ni Sophia ang manggas niya.

"Kuya Marco... huwag ka na pong magalit sa akin. Pangako, magiging mabait na ako. Susundin ko na ang lahat ng sasabihin mo."

Napabuntong-hininga si Marco.

"Huwag mo nang sasaktan si Reina dahil siya ang mapapangasawa ko."

Nakanguso si Sophia. Pero agad din itong ngumiti at kumapit sa braso niya.

"Miss na ako nina Mom at Dad, di ba? Umuwi na tayo," wika ni Sophia.

Napatingin si Marco sa itaas ng ospital. Bigla na lang niya naalala ang mensaheng ipinadala ni Reina na gusto na itong makipaghiwalay sa kanya.

Napapikit siya.

Hayaan na muna niya ito. Siguro galit lang si Reina sa kanya.

Kapag kumalma na ito, magiging maayos din ang lahat.

Sa pag-aakalang ganoon ang mangyayari, ibinalik niya ang cellphone kay Sophia.

"Tara na."

Masayang sumunod si Sophia. Tahimik na isinara ni Marco ang pinto ng sasakyan.

Bago niya iyon ibinulsa, nag-type muna siya ng isang mensahe.

[ Reina, may mahalagang pag-uusapan kami ni Daddy. Pupuntahan kita mamaya. Magpahinga ka muna. ]

Pinindot niya ang send, hindi niya alam na matagal na pala siyang naka-block ni Reina kaya hindi na naipadala ang mensahe.