الثالث

— "واحد ذوق"؟!!

أديلِك ساعة بتجولي: يا محمد يا محمد، وجيتي عندي وبجيت "واحد ذوق"؟!

وبنت الأبالسة طالعة منها "محمد" كيف الشهد! ماشي يا ست الناس، إن ما بطلتك تجولي "محمد" دي لحد غيري، مبجاش أنا العمدة "داود"!!

أفاق من شروده على صوتها وهي تقول:

— اتفضل الموبايل يا حضرتك... آه، وبالمناسبة، اسم حضرتك إيه؟

ثم أضافت بضحكةٍ خجلة:

— أصل أنا فضولية شوية، معلش.

— العمدة داود.

— محمد.

— أفندم؟؟؟؟!!!!

كانت الأولى من نصيب عم صالح، والثانية للعمدة، أما الثالثة فخرجت مذهولة من حسناء.

همّ داود أن يوضح لها ما يقصده، لكنها قاطعته فجأةً وهي تهب واقفة، وقد اتسعت عيناها حتى كادتا تخرجان من محجريهما، بينما فمها يكاد يلامس الأرض من شدة الدهشة، ثم صاحت بانبهار:

— هشام الجخ؟!!!!! ❤❤

استغرق الأمر من داود بضع لحظات حتى استوعب ما حدث.

التفت إلى حيث تنظر، فوجدها تقف بالفعل أمام هشام الجخ، تتحدث إليه بابتسامة تكاد تصل إلى أذنيها.

قالت بحماسٍ طفولي:

— حضرتك أنا مش مصدقة نفسي إني شايفاك دلوقتي! حضرتك متعرفش أنا بحبك قد إيه... ده أنا حافظة كل القصايد بتاعتك بلا استثناء!

في المقابل، كان الشاعر يقف مبتسمًا بسعادةٍ واضحة، ثم قال بمزاح:

— والله ده شيء يسعدني إن بنوتة جميلة زيك تتابعني وتحفظ جصايدي كمان... جوليلي طيب، أكتر جصيدة بتحبيها إيه؟

قالت بسرعةٍ ولهفة:

— "سري جدًا إلى البحر"، و"أيوة بغير"، و"متزعليش"، و...

قاطعها ضاحكًا:

— دنتِ متابعة جيدة فعلًا والله... اتبسطت جدًا.

— إنت مش متخيل مقابلة حضرتك كانت حلم بالنسبة لي، ومش مصدقة إن الحلم اتحقق.

ابتسم لها قائلًا:

— باين من كلامك إنك مش من أسوان.

— لا، أنا من الفيوم، وكنت جاية أسوان زيارة... وتخيل إني تايهة حاليًا وبدور على قرايبي!

ثم ضحكت بخفة وهي تقول:

— الله... دي أحلى مرة أتوّه فيها في حياتي بجد!

هو أنا ممكن أتصور مع حضرتك؟

ضحك قائلًا:

— يا خبر! ده شرف ليا.

— طب أستأذنك ثواني بس.

أما على الجانب الآخر، فكان داود يقف تتآكله النيران دون أن يفهم السبب.

هل من الممكن أن تكون تلك المشاعر الجديدة عليه كليًا... غيرة؟!

وهل من الطبيعي أن يغار على فتاةٍ لم يقابلها سوى منذ ساعات قليلة؟

قطعت شروده عندما وقفت أمامه وهي تقول برجاءٍ أذاب قلبه وأشعل إحساسه:

— هو أنا ممكن أطلب من حضرتك خدمة؟

ابتسم فورًا وقال:

— يا نهار أبيض... إنتِ تؤمريني أمر يا ست الناس.

ابتسمت بحرج:

— ربنا يخلي حضرتك... ممكن بس بعد إذنك أتصور بالموبايل بتاعك مع الجمال اللي بيحصل هناك ده؟!

قطّب حاجبيه متصنعًا الجهل:

— جمال مين؟

— أقصد هشام الجخ يعني.

تمتم بامتعاض:

— أمممم... هشام الجخ عاد؟! ضروري يعني؟

خفضت رأسها قائلة بخجل:

— خلاص، أنا آسفة، مش مهم.

أسرع يقول:

— لا، استني بس، أنا مجصديش حاجة... التليفون وصاحب التليفون تحت أمرك، اتفضلي.

ثم أضاف بتحذيرٍ متصنع:

— بس يعني متتلزجيش فيه، سيبي مسافة... عشان الكورونا وكده، مش أكتر يعني.

ضحكت قائلة:

— آه طبعًا، ما هو أكيد مش هلزق فيه يعني، أنا واخدة بالي.

تمتم داخل نفسه بحسرة:

— ياريتك كنتِ واخدة بالك يا حبة الجلب... كنتِ ريحتيني وطبطبتي على جلبي... بس أقول إيه بقى؟ نصيب.

ذهبت والتقطت صورة "سيلفي" مع الشاعر، ثم شكرته كثيرًا وعادت إلى داود الذي كان يقف يغلي ويزبد من الداخل، ثم أعطته الهاتف قائلة:

— شكرًا جدًا لحضرتك... أنا تقلّت عليك النهارده.

لو ممكن بس رقمك، عشان أبقى أكلمك تبعتلي الصورة واتس.

رفع حاجبه قائلًا بمكر:

— أوي أوي... هتكتبي الرقم على إيه طيب؟

بدأت تفتش داخل حقيبة يدها، لكنها لم تجد سوى كتاب، فأخرجته وقالت:

— هكتب على ضهر الكتاب وخلاص... قول الرقم.

بدأ يملي عليها الرقم، حتى انتهت وهي تقول:

— تمام كده... إن شاء الله لما نوصل وأفتح موبايلي، هبقى أبعتلك على الواتس عشان تبعتلي الصورة.

— إن شاء الله هكو...

لكنها قاطعته فجأةً بعدما ضربت جبهتها بكفها قائلة بشهقة:

— هييييه! يا خسارة... نسيت أقولّه يكتبلي إهداء!

تنهد داود قائلًا بغيظٍ لطيف:

— والله الخسارة هو اللي بتعمليه فيّا ده... بتندهشي أكتر ما بتتنفسي.

ضحكت ملء فمها ثم قالت بمشاكسة:

— طب إيه رأيك تكتبلي إنت الإهداء؟ بما إنكوا ولاد بلد واحدة، هتمشي برضه.

ابتسم قائلًا:

— يا سلاااام! هو أنا أفديك الساعة...

ثم أضاف باستغراب:

— بس غريبة يعني، شايلة جلم من غير ورق؟ يبجى فايدته إيه؟

أجابته بحماس:

— لأ، أصل عندي هواية كده... لما بكون بقرأ كتاب لازم أطلع منه رسالة لحد عزيز عليّا، وأديهوله، وهو بقى يطلع الرسالة بنفسه.

نظر لها بعدم فهم:

— كيف يعني؟ مش واخد بالي.

اقتربت منه ووقفت بجواره، ثم فتحت الكتاب قائلة:

— يعني بص... دي أول صفحة أهي، مكتوب فيها مثلًا عشرين سطر. أنا بقى بالقلم بحدد تحت الكلمات اللي تكوّن الرسالة اللي أنا عايزاها... وهكذا. وصلت؟

ثم رفعت عينيها إليه، لتتفاجأ بعينين لامعتين دامعتين تنظران إليها بنظرةٍ لم تستطع تفسيرها، لكنها سرت داخلها كرجفةٍ دافئة أربكت قلبها.

تنحنح داود سريعًا وقال:

— آه آه... وصلت. حلوة الفكرة.

ثم أضاف بمزاح:

— استني عليّا بس لما الإلهام يحضر.

ضحكت قائلة:

— إلهام مين؟

أجابها فورًا:

— إلهام أخت جمال.

انفجرت ضاحكة لدقيقةٍ كاملة، فبادلها الضحك، لكن ضحكاته كانت وقورة ذات نبرةٍ مميزة جعلتها تتمنى سماعها مرةً أخرى.

وبعدما هدأ ضحكهما، أخذ يخطّ كلمات الإهداء داخل الكتاب، ثم وقعت عيناه على عنوانه:

الآن نفتح الصندوق

فقال بإعجاب:

— العرّاب مرة واحدة؟! شكلك غاوية.

ابتسمت بحماس:

— جدًا... مش قادرة أوصفلك قد إيه بحبه، وبحب كمان أكتب. ده أنا حتى كتبت رواية على قدّي كده.

ضحكت بخجل، فبادلها الابتسام وهو يرى إشراق وجهها قائلًا:

— شيء عظيم... حلو جدًا إنك تشغلي وقتك بحاجة مفيدة ومسلية كمان.

ثم رفع يده بطريقةٍ مسرحية وهو يقول:

— إن شاء الله في يوم من الأيام هنسمع عنك، وهتكوني كاتبة قد الدنيا... الكاتبة الروائية "حسناء...؟!"

ابتسمت قائلة:

— محمد... حسناء محمد.

كم سُرّ قلبه لأن تكون على اسمه ولو صدفة.

ابتسم لذلك الخاطر المجنون الذي مرّ بعقله، ثم قال:

— عاشت الأسامي يا ست الناس.

ابتسمت هي لذلك اللقب الذي بدأ يصبح محببًا إلى قلبها، ثم قالت بلطف:

— تعيش... ربنا يحفظك و...

لكن كلماتها انقطعت مع وصول سيارة أجرة، نزل منها شاب وفتاتان وطفلتان صغيرتان.

وما إن نزلت إحدى الطفلتين حتى اندفعت نحو حسناء وارتمت بين أحضانها، فجثت حسناء على إحدى ركبتيها واحتضنتها بقوة، تغمرها بالقبلات واللهفة.

ثم رفعت رأسها لتنظر أمامها، فوجدت ثلاثة أزواج من العيون؛

الأولى حانقة حاقدة، والثانية مترقبة متلهفة، والثالثة لائمة خائفة.

قالت صاحبة النظرة الأولى بحدة:

— إنتِ إزاي تسيبينا وتمشي؟! هو إنتِ للدرجة دي عيلة صغيرة ومبتعرفيش تتصرفي؟!

فقاطعها صاحب النظرة الثانية قائلًا:

— في إيه يا مريم؟! هي يعني كانت قاصدة تسيبنا وتمشي؟

أما الثالثة فقالت بلوم:

— كده يا حسناء؟! يعني للدرجة دي مفيش عندك ثقة فينا؟! فكرانا ممكن نسيبك ونمشي بجد؟

لم تنطق حسناء بحرف، مما زاد توترهم جميعًا.

ثم حملت الطفلة الصغيرة وسارت خطوتين، لكنها توقفت فجأة، وعادت إلى داود قائلة بابتسامةٍ رقيقة:

— أنا متشكرة لحضرتك جدًا... فرصة سعيدة.

ابتسم لها ابتسامة خرجت من أعماق قلبه وقال:

— أنا الأسعد والله... في حفظ الله.

ثم استدارت وغادرت، وصعدت إلى السيارة وأغلقت الباب.

اقترب الشاب من داود وصافحه قائلًا على عجل:

— متشكرين لحضرتك جدًا.

هز داود رأسه بحنقٍ مكتوم وقال:

— الشكر لله... لا شكر على واجب.

ثم أخذ الآخر الفتيات وغادر.

وذهبت...

ذهبت دون وعدٍ بلقاءٍ آخر.

ذهبت مؤرقة منامه، ورفيقة أحلامه.

ذهبت... وهو لا يدري هل كُتب له أن يراها ثانية، أم كُتب عليه الشقاء بها إلى الأبد.