الفصل الثاني

لم يعطها اي اهتمام نهائيا، أعاد رأسه على مسند المقعد، أغمض عينيه فشعرت بغضب ووقفت امامه مباشرةً، قالت بعصبية هادرة:

- هو انا مش بكلمك .. في ايه بالظبط كنت فين وإيه اللي مبهدلك بالشكل دا من حقي أفهم على فكرة!

هتف ببرود ونبرة صوته كانت تخرج من فمه بوهن:

- كنت عند حبيبتي!

شقهت ووضعت كفيها على فمها، هزت رأسها بعدم تصديق فاعتدل في جلسته، قال بهدوء:

- اه كنت عند حبيبتي وكل يوم هروحلها ،مالكيش دعوة بيا.

أجابته بانفعال غاضبة:

- إيه الطريقة دي وبعدين تعالى هنا فهمني بقا لما إنت عندك حبيبة أمال ليه اتجوزتني وأخدتني من حبيبي إنت كل لحظة بتسقط من عيني أكثر وأكثر.

نظر لها شذرًا ولم يجبها، لم تلاحظ تلك العبرات التي امتلأت بها مقلتيه، فأردفت قائلة:

- أنا مقبلش على كرامتي إني أكون متجوزة واحد وهو بيحب واحدة تانية، إنت قبلت دا على نفسك دي مشكلتك لكن متفكرش إن أنا هعديلك اللي بتعمله معايا دا.

لأول مرة يصرخ بها أن تصمت وإلا نهض وفعل بها ما لا يحمد عقباه كأن يضربها أو يسمعها ما لا تحبذ سماعه، عاندته وارتفع صوتها عليه وتفننت في إرسال الكلمات المقللة من شأنه كرجل، فاض به الكيل فصرخ بصوت جهوري:

- ارحميني بقا! إنتي ليه مصممة إنك تدفعيني ثمن حبي ليكي بالشكل القاسي دا؟ ليه مصممة تخليني أبقى عايز أخرجك من قلبي وأقسى عليكي كدا؟

= هو دا اللي أنا عايزاه؛ إنك تطلقني وتسيبني أروح للي قلبي إختاره لو عندك دم وكرامة تطلقني دلوقتي، أصلا مش فاهمة حب إيه دا اللي بتتكلم عنه إنت لسه حالا راجعلي من عندك حبيبتك الغامضة دي!

- حبيبتي دي تكون أمي رحمة الله عليها أنا كنت عند أمي في المقابر، كدا ارتحتي بقا سيبيني دلوقتي وادخلي أوضتك ونكمل كلامنا بكره ربنا يهديكي.

= ربنا يهديني أنا! ربنا يهديك إنت وتبطل البرود دا يا شيخ بقولك عايزه أتطلق، أنا بحب ماجد سامعني بحب ماجد وعايزاه هو وعمري ما هشوفك يا أكرم إزاي تقبل على نفسك أصلا إنك تاخدني من صاحبك وتكون غدار كدا؟!

صمت طويل؛ كان هو الرد على حديثها الخالي من المشاعر، الملئ بالقسوة، كسر حاجز الصمت أخيرا عندما هتف قائلا بقلة حيلة:

- أنا هسيب الشقة وأنزل عشان معملش حاجه أرجع أندم عليها بعدين.

إبتلعت ريقها بصعوبة من فرط توترها لأنها تمتلك الكثير من طباع الخوف من المكوث بأي مكان وحدها، صرخ قلبها متوسلًا إياه كي يبقى ويعانده عقلها مطالبًا إياه بالرحيل وانتصر العقل كالعادة!

استغلت تلك الفرصة لتحادث ماجد مرة أخرى فأجابها على الفور، هتفت بلهفة وشوق:

- ماجد! وحشتني أوي، كدا بردو يا ماجد تسيبني أتجوز صاحبك ليه محاربتش عشان مضيعش من ايديك، ليه محاولتش تكلمني طول الفترة اللي فاتت دي ليه محاولتش تتصرف، أنا بموت كل لحظة وأنا على ذمة راجل غيرك.

اختنقت بالبكاء فتوقفت عن الحديث ليقول هو بشوق مصطنع:

- ديلا! وحشتيني أوي، أنا بعدت عشان فكرتك موافقة وعايزه تتجوزيه مكنتش عارف إن قلبك لسه معايا، أنا دلوقتي أقدر أعمل المستحيل عشانك وأنا مطمن إنك لسه عايزاني أنا، هو فين عريس الغفلة؟

بصوتٍ باكٍ أجابته:

- خرج أنا مش قادره أكمل معاه ولا لحظة يا ماجد أنا مش طايقاه وهو شخص بارد جدا، تصور عملت فيه كل حاجه ممكن تخليه يطلقني لكن هو مبيحسش حقيقي!

حك ماجد ذقنه بخبث قبل أن يقول بنبرة ذات مغذى:

- حلو أوي أنه خرج، بقولك إيه يا حبيبتي أنا هجيلك اشوفك خمس دقايق وأمشي بسرعة قبل ما يرجع.

دق قلبها دقات غير منتظمة عندما سمعت تلك الكلمة، شعرت بأنها ستقدم على فعل شنيع بخيانتها لزوجها حتى لو كانت تبغضه وتكرهه فطبع الخيانة ليس من شِيَمها، صاحت بجدية:

- لا مش هينفع لأنه ممكن يرجع في أي وقت وكمان أنا مقدرش أدخل حد البيت وهو مش موجود أو ميعرفش بيه، بقولك إيه أنا حابه أشوفك في الكافيه اللي دايما بنشوف بعض فيه إيه رأيك؟

= صدقيني مش هتأخر عندك هكلمك وأديلك حاجه من على الباب في السريع كدا محدش هيشوفني لأني مش هطول أصلا.

ما بين شوقها له وإلحاحه الشديد اضطرت للموافقة على اتفاق مبرم بينهما بأنه سيتحدث إليها من الخارج فقط بضع دقائق لا أكثر!

بعد أن إنتهت من مكالمته ببضع دقائق إنقطعت الكهرباء فجأة فصرخت فزعة من الظلام، شرعت في البكاء بخوف شديد، ما هي إلا دقائق معدودة وإنفتح الباب وإنطلق أكرم مسرعًا بإتجاهها قاطعًا الظلام بكشاف هاتفه، وجدها في حالة يرثى لها، إقترب منها بسرعة، ركضت نحوه ليجد نفسه بين أحضانها وصوت نحيبها يرتفع، ربت على كتفها بحنو قائلًا برفق:

- أنا آسف حقك عليا مش هسيبك لوحدك تاني أبدًا، أنا أصلا كنت قاعد تحت أدام العمارة مقدرتش أبعد وأسيبك في الليل كدا تاني، طلعت لك جري لما الكهرباء انقطعت.

توترت هديل من إحساسها بالأمان الذي غلفها بمجرد قربه منها، إبتعدت عنه ببطئ وهي تردد بإرتباك:

- أنا بخاف من الضلمة أوي بس خلاص دلوقتي مبقتش خايفة عشان…

=عشان أنا هنا مش كدا؟

تنحنحت بتوتر، زادت المسافة بينهما بإبتعادها عنه بعض الخطوات، قالت بصوت هامس:

- صح، بس دلوقتي الكهرباء تيجي بعد إذنك أنا هدخل أوضتي.

أسرعت لتهاتف ماجد كي تحثه على العودة من حيث أتى ألا يفكر في القدوم إليها الليلة أبدا، لكن سبق السيف العزل، لم تتلقى منه أي رد والمسافة بين بيته وبيت أكرم صغيرة جدًا، رن جرس الباب فركضت لتمنع أكرم من فتحه صارخة بفزع:

- إستني يا أكرم متفتحش دا بتاع الدليفري أنا كنت طالبة أكل هفتحله أنا!

إبتسم برفق، نهض متوجهًا للباب قائلا بهدوء:

- خليكي أنا هفتحله عيب أكون موجود ومراتي تفتح الباب لحد غريب دا إنتي المفروض متفتحيش لحد أصلا سواء أنا موجود أو لأ!

دق قلبها بعنف، كاد الخوف أن يقتلها، فركت كفيها بتوتر بالغ، راقبت ما سيحدث بأعين جاحظة، صعق أكرم عندما رآه أمامه ذلك الشاب الذي سمم حياته بالماضي وينهيها الآن في حاضرها!