الفصل الواحد والعشرون

هذا الترحاب والمحبة الكبيرة أثارا غيرة ليلى الشديدة وحقدها، فهي لا تفهم أبداً سبب حب الجميع لعاليا رغم غيابها.

لمحت ليلى أختها وهي تقف عند ركن البوفيه وتمازح "عم سيد" الرجل المسن المسؤول عن المشروبات، فاشتعلت غضباً وذهبت مسرعة لتوبخها وتبسط سيطرتها.

كانت عاليا تقول لعم سيد بابتسامة بشوشة:

— عاليا: وأنت كمان وحشتني جداً والله يا عم سيد! أنا مبقتش أعرف أظبط دماغي وأعيش من غير مج الكابتشينو اللي بتعملهولي بإيدك.. قولي الحقيقة أنت بتحطلي فيه إيه بالظبط؟ ده أنا بفكر أسيب حسام وأتجوزك أنت من حلاوة عمايل إيدك، ولا إيه رأيك؟

ضحك عم سيد بجلجلة ودعاء من قلبه:

— عم سيد: ههههه شالله يجبر بخاطرك يا بنتي يا رب ويسعدك! لا طبعاً ودي تيجي إزاي؟ إحنا نقدر نزعل البشمهندس حسام كدا برضه؟

وفجأة اخترق صوتهما نبرة ليلى الحادة والمقززة وهي تصرخ بعم سيد:

— ليلى: أنت واقف بتعمل إيه عندك وسايب شغلك؟ شوف شغلك يلا وحسابك معايا بعدين! (ثم التفتت لعاليا بغيظ): وأنتي.. مش كفاية ضحك وهزار وقلة قيمة بقا في الممرات؟ اعرفي مقامك كويس واعرفي بتكلمي مين و...

قاطعتها عاليا بنظرة قوية باردة، ووقفت بصلابة لم تعهدها ليلى فيها من قبل، وقالت بصوت مسموع:

— عاليا: إيه ده؟ أنت بتقولي إيه وسامعة نفسك؟ وأنتي مالك أصلاً أتكلم إزاي ومع مين؟ ومقام إيه اللي بتتكلمي عنه ده فـوقي كدا واعرفي حدودك وبتقولي إيه! عم سيد واقف معايا أنا وبناء على رغبتي، وأنا اللي عاوزة أتكلم معاه.. بتتحشري في اللي مالكيش فيه ليه بجد؟ حاجة غريبة أوي! يلا يا عم سيد اتفضل معايا نروح مكتبي نكمل كلامنا ويسلم مج الكابتشينو.

نظر عم سيد للأرض بكسرة وخوف من المشاكل، وتمتم بصوت خفيض:

— عم سيد: مرة تانية بقا يا بنتي.. عندي شغل كتير في الدور التاني، عن إذنك.

تحرك عم سيد، فنظرت ليلى لظهره بتقزز وقالت بصوت مسموع:

— ليلى: بنتي؟! ده بيقولك يا بنتي وعنده حق طبعاً.. حازم معاه حق لما قال إنك بتصرفاتك البلدي دي وهزارك مع العمال هتفضحينا وتنزلي اسم عيلتنا في الأرض!

غمزت لها عاليا بطرف عينها بخبث وسخرية، وقالت:

— عاليا: غريب الحب مين فاهمه.. ومين يشهد للعروسة بقا يا ليلى؟

— ليلى (بضيق وعصبية): بقيتي بلدي أوي ومستواكي انحدر تماماً الفترة الاخيرة! ده شكل واحدة كانت عايشة بره مصر ومتربية في أوروبا؟ إيه الأسلوب والكلام ده؟

— عاليا (وهي تتحرك وتبتعد بدلال): مالها طريقتشي؟ ده أنا قمررر وعسل.. ناس معقدة ونفسيتها سودة اقسم بالله! تفضحينا تفضحينا إيييه بس!

بينما كانت عاليا تسير في الممر وهي تكلم نفسها ببرطمة وضيق، كادت فجأة أن تصطدم بجسد قوي أمامها، فرفعت عينيها لتجده حازم يقف ويبتسم.

— عاليا: سوري يا حازم مأخدتش بالي.

— حازم (بضحكة خفيفة هادئة): مالك ضاربة بوز كدا وبتكلمي نفسك ليه من النجمة وع الصبح؟

نظرت إليه عاليا بتعجب واستغراب شديد من هدوئه وضحكته، وقالت بتهكم:

— عاليا: هاه؟ لا أبدًا مفيش.. روح شوف خطيبتك المصونة ليلى واقفة هناك؛ عالم غريبة وسودتوا عيشتنا بجد!

— حازم (بابتسامة غامضة): خطيبتي مين؟ آه.. أنتي لسه متعرفيش التغيرات بقا؟

— عاليا: نعم؟ ليلي إيه؟ أنت جالك زهايمر ع الصبح ولا إيه يا حازم؟

اقترب حازم منها خطوة، ونظر في عينيها بجدية وثبات وقال بصوت خفيض:

— حازم: إحنا سيبنا بعض من فترة يا عاليا.. فركشنا الخطوبة تماماً وبشكل نهائي.

توترت عاليا وظهر الارتباك على ملامحها، وتراجعت خطوة للخلف:

— عاليا: إيه؟! سيبتوا بعض؟ ليه وعشان إيه؟

— حازم (وهو يتقدم نحوها وعيناه تلمعان بأمل جديد): وأنتي كمان سيبتي حسام وهربتي.. يمكن دي تكون فرصة تانية لينا عشان نصلح كل اللي انكسر ما بيننا ونرجع لبعض من جديد؟

تراجعت عاليا خطوة أخرى على أثر تقدمه، ولكن الصدمة زالت سريعاً وحل محلها كبرياؤها وقوة شخصيتها، فاستجمعت شجاعتها وقالت بحسم قاطع:

— عاليا: لا طبعاً.. أولاً إحنا اتصالحنا، قصدي أنا وحسام رجعنا لبعض ومفيش أي فراق.. ثانياً والأهم، حتى لو كنت سيبته، ده مش معناه أبداً إني ممكن في يوم من الأيام أرجعلك يا حازم! عن إذنك وراك و

ورايا شغل.

تركته ومشت مسرعة، تاركة إياه يقف مكانه بملامح يملؤها الندم.

وفي سياق آخر تماماً.. داخل شقة في منطقة أخرى:

كانت منة تمسك هاتفها بدموع وقلق وهي تتحدث بصوت باكٍ:

— منة: بكلمك بقالي يومين يا حبيبي ومش بترد عليا خالص.. في إيه بالظبط؟ قلقلتي عليك!

— الشاب (بنبرة باردة وجافة للغاية): معلش.. مكنتش فاضي وعندي ضغط شغل وحاجات تانية.

— منة: طيب هتيجي تقابل حسام أخويا إمتى عشان نحدد ميعاد الخطوبة الرسمي؟ هو كلمني وقالي خليه يجي الخميس.

— الشاب (بسخرية): وهو أخوكي فاضيلي أصلاً؟ كفاية عليه إنه يلف في المحافظات يدور على خطيبته الهربانة!

— منة (ببراءة): خلاص يا حبيبي هي رجعت وكل حاجة اتظبطت في البيت وبقوا تمام.. هتيجي إمتى؟

— الشاب (بتأفف وزهق): منة.. بقولك إيه؟ فكك مني بقا وانسيني خالص!

— منة (بصدمة وعدم استيعاب): يعني إيه؟ يعني إيه فكك وانسيني؟!

— الشاب: يعني خلاص.. إحنا اتسلينا واتبسطنا مع بعض يومين وخلاص كفاية كدا أوي، كل واحد يروح لحاله!

— منة (والدموع تنهمر على وجنتيها بكثافة): اتسلينا واتبسطنا يومين؟! يعني إيه؟ يعني أنت مكنتش بتحبني بجد يا أحمد؟ وكل الكلام والوعود ده كان كذب؟

— الشاب (بضحكة حقيرة وتقزز): بيبي.. أحبك إيه بس ونيلة إيه؟ هو أنتي مش شايفه الفرق الرهيب اللي بيني وبينك ولا إيه؟ أنتي فين وأنا فين؟!

ما إن قال كلماته الأخيرة وأغلق الخط في وجهها، حتى اسودت الدنيا تماماً في وجه منة، وشعرت بشلل في أطرافها وصدمة هزت كيانها. لم تكن تعلم أن كل هذا الحب والاهتمام كان مجرد خداع قذر، لقد كذب عليها ومثّل دور العاشق الولهان حتى وثقت به وسلمته قلبها النقي.. ماذا ستفعل الآن؟ وكيف ستواجه عائلتها وأخاها حسام بعد أن حدد له موعداً؟

دخلت منة في دوامة عنيفة من الاكتئاب الحاد، وانعزلت في غرفتها تبكي ليل نهار دون أن يعلم أحد بالسبب الحقيقي، وحاولت الأم وعاليا معها كثيراً لتعرفا ما بها لكنها كانت تلتزم الصمت والدموع.. لقد أحبته بصدق طفولي، بينما هو اتخذ من أحلامها وبراءتها وسيلة للتسلية والرهان مع أصدقائه.

وفي ذات مساء، دخل حسام غرفتها ووجدها تجلس في الظلام وعيناها متورمتان من البكاء، فاقترب منها وجلس بجوارها وقال بمزاح يحاول به إخراجها من حزنها:

— حسام: مالك يا حبيبتي وقاعدة لوحدك في الضلمة كدا ليه مش عوايدك؟ وبعدين فين عريس الغفلة اللي صدعتيني بيه بقالك شهر؟ خليه يجي عشان أرفضه ونخلص ههههه!

لم تجب منة، بل استمرت في الصمت والدموع تنزل بصمت رهيب أثار رعب شقيقها.

— حسام (بقلق حقيقي وهو يضمها ليديه): يا ساتر يا رب! دا إيه الصمت الرهيب ده؟ في إيه يا منة؟ إيه اللي حصل معاكي وضايقك كدا؟

أخذها حسام في حضنه الدافئ وطبطب على ظهرها بحنان الأخ والأب، وقال بصوت حنون:

— حسام: في إيه يا منة مالك؟ متقلقنيش عليكي أرجوكي.. في إيه احكيلي وفضفضي، وأي كان اللي حصل والله العظيم مش هعمل أي حاجة تزعلك ولا هلومك.. أنطقي يا حبيبتي.

انفجرت منة في بكاء مرير ونحيب قطع قلبه، وقالت من بين شهقاتها:

— منة: كان بيضحك عليا ويخدعني يا حسام!.. قالي بصي لنفسك وبصيلي، وقالي أنتي جاية من منطقة شعبية وعيشتك بسيطة وعربيتي الفخمة دي متعرفش تدخل شوارعكم أصلاً!.. طلع كان متراهن مع أصحابه في الكلية عليا إنه هيعرف يعلقني بيه ويوصل لقلبي، ودخلي من باب الجواز والرسميات وعشمني وخلاني أحبه من كل قلبي وكنت بشوفه ملاك!.. أنا عملت إيه لكل ده يا حسام؟ وذنبي إيه يتلعب بيا كدا؟ ربنا أخد حق عاليا فيا وبسبب اللي ماما عملته فيها.. بس الحمد لله إنكم رجعتوا لبعض ومتخربش بيتكم بسببي!