سهيل والعهد المكسور

اسمي سهيل، وما كنتش أصدق إن الكتب اللي بقرأها وأنا صغير هتتحول لمصير.

أنا مهندس من القاهرة، 27 سنة، حياتي كانت ماشية على خط مستقيم: شغل، بيت، قهوة مع صحابي يوم الخميس. لحد الليلة اللي وقعت فيها المخطوطة القديمة من كتاب "مرايا النسيان" في شنطتي.

المخطوطة كانت مكتوبة بحبر بني ريحته تراب قديم. أول سطر فيها كان:إذا قرأت هذا، فالباب انفتح. وإذا انفتح، فلا رجوع إلا بدفع الثمن.

ضحكت ساعتها قلت أكيد مقلب من صحابي.

بس تاني يوم صحيت لقيت نفسي في سوق اسمه سوق المقايضة تحت سماء لونها نحاسي، والناس بتبيع وتشتري بالذكريات بدل الفلوس.

أيوه، بالذكريات.

عايز تفاحة؟ ادفع ذكرى أول يوم جامعة.

عايز تعرف طريقك؟ ادفع ذكرى صوت أمك.

وهنا قابلت "هيام". بنت في عمري، عينيها لون العسل، وماسكة سيف خشب مكسور كأنه تاج.

هيام كانت من أهل "ميراث"، المدينة اللي محبوسة ورا جدار صمت من 100 سنة.

جديها كسر العهد القديم مع "حارس المرايا"، ومن ساعتها المدينة بتدفع تمنه: كل مولود جديد بيتولد من غير ذاكرة.

هيام قالت لي وأنا واقف مذهول:"إنت مش من هنا. ريحتك ريحة عالم حي. إنت اللي في النبوءة. اللي هيكسر القفل اللي جدي عمله.

بصيت لها وقلت:وأنا إيه مصلحتي؟

ابتسمت ابتسامة فيها وجع أكتر من شجاعة:مصلحتك إنك لو ما كسرتوش، المرايا هتكسرك. وهي أول حاجة هتاخدها منك ذكرى وش أمك.

وساعتها فهمت.

أنا زي خالد في زيكولا. غريب عن المكان، بس الذكي والعنيد اللي مش بيقبل يكون لعبة في يد قوانين ميفهمهاش.

بس الفرق إني مش بدور على حب. أنا بدور على طريقة أرجع بيها من غير ما أخسر نفسي.

هيام علمتني قوانين ميراث:

هنا الكذب ممنوع. لأن الكذب بيتسجل على جلدك ويظهر لونه أسود.

هنا الشجاعة بتتقاس بعدد الذكريات اللي تقدر تضحي بيها وإنت واقف قصاد الحقيقة.

وصلت لباب المرايا بعد 7 أيام.

حارس المرايا طلع مش وحش... طلع نسخة مني، بس أكبر بـ20 سنة، وشه كله ندوب.

قال لي:عشان تكسر العهد، لازم تدفع تمنه. إيه أغلى ذكرى عندك؟"

فكرت في أمي، في صوتها وهي بتغني لي وأنا صغير.

بس افتكرت كلام هيام: "لو نسيت، هتبقى زيهم. جسم بيمشي من غير روح."

فقلت للحارس:مش هديك ذكرى. هديك وعد. وعد إني لو رجعت، هخلي ناس عالمي يفهموا إن الذاكرة أغلى من الدهب. وإن اللي ينسى ماضيه، يستاهل يضيع.

المرايا اتشققت.

والجدار اللي حابس ميراث اتفتح.

وهيام جرت حضنتني وقالت:رجعت لنا الذاكرة يا سهيل.

بس أنا عارف إن الثمن لسه مدفوعش كله.

لأن وأنا خارج، سمعت صوت الحارس بيهمس:الوعد ليه تمن تاني وهتدفعه لما ترجع لعالمك.

رجعت القاهرة وأنا شايل على كتفي حاجة أتقل من أي شنطة سفر: وعد.

الناس شايفاني سهيل المهندس اللي اختفى 3 أسابيع ورجع، بس محدش فاهم إني كنت في مكان لو اتكلمت عنه هيقولوا عليّ مجنون.

أول حاجة عملتها إني روحت لأمي.

وقفت على باب أوضتها وسمعت صوتها وهي بتغني نفس الأغنية القديمة اللي كانت بتغنيها وأنا صغير.

وقفت وما دخلتش.

خفت.

خفت إني لو سمعت صوتها قريب، أحس إني دفعت تمن الوعد خلاص، وإن الحارس بتاع المرايا كان بيضحك عليّ.

عدى شهر.

ميراث رجعت لها الذاكرة، بس أنا ما رجعتش أنام مرتاح.

كل ليلة بحلم بالمرايا وهي بتتكلم:الوعد ليه تمن تاني يا سهيل وهتدفعه لما ترجع لعالمك.

وفعلاً، التمن جه بسرعة.

جالي جواب.

جواب من غير طابع بريد، اتحط تحت باب شقتي.

جواه ورقة واحدة مكتوب فيها بخط أعرفه:لو نسيت ميراث، هتنسى هيام.

هيام.