الفصل الثامن والعشرين

فتحت المحاداثات لتصعق وتتسع عيناها بذهول ورعب مما رأت!

كانت ليلى ترسل لحسام رسائل ومقاطع صوتية كثيرة في منتهى الوقاحة، وقلة الذوق، والتحقير من شأنه ومستواه المادي:

"أنت مش قادر ولا هتقدر في يوم تعيش عاليا في نفس مستواها اللي اتعودت عليه!"

"أنت فين وهي فين يا بشمهندس؟ فوق لنفسك!"

"ده مصروفها الشهري واللبس بتاعها قد مرتبك في سنة كاملة وأكتر!"

"عاوز تاخدها تسكنها فين؟ في العشوائيات وحواريكم؟"

"أختي بتتكسف منك ومش بتحب تحرجك وتصغرك بس!"

"عاليا لسه بتحب حازم لحد النهاردة، وواخداك أنت مجرد تسلية وكارت عشان تغيظه وتندمه، وهترجع لحازم أول ما تتاح لها الفرصة.. وأنت في الآخر هتطلع الخسران الوحيد والملعوب بيه!"

"أنا وأنت زي بعض بالظبط.. اتضحك علينا من نفس الشخص!"

"عاليا مش ملاك وزي ما أنت شايفها ومغفل.. أنا أختها وأدرى منك ببلاويها!"

"أنت عارف هي وحازم سابوا بعض ليه أصلاً؟ أكيد مقالتلكش الحقيقة الشنيعة!"

والكثير والكثير من الرسائل المكتوبة، والمقاطع الصوتية التي وجدت من بينها المقطع المسجل لحوارها مع أمها عن الشقة! لم يسعفها الوقت لتقرأ أو تسمع كل هذا الكم الهائل من السموم لأن حسام كان عائداً، لكنها وبسرعة البرق أخذت لقطات شاشة (اسكرين شوت) بهاتفها لبعض الرسائل والمقاطع الصادمة.

والغريب والمبهر في الأمر.. أن حسام لم يقل لها أي شيء عن هذا أبداً، ولم يتغير في تعامله معها قط، ولم يرد على رسائل ليلى بحرف واحد بل كان يتجاهلها تماماً كأنها حشرات! لم يداخله الشك فيها بل زاد تمسكاً بها. تنهدت عاليا بعمق وشعرت أن حبه يعلو في قلبها أكثر وأكثر؛ فهو رجل يستحق العشق وبجدارة.

أفاقت عاليا من شرودها ودموعها المكتومة على يد حسام وهي تهز كتفها برفق وقلق:

— حسام: عاليا.. مالك يا حبيبتي سرحانة في إيه كدا وعينيكي لمعت؟ الشغل برضه؟

— عاليا (وهي تحاول الابتسام): هاه؟ لا أبدًا مفيش حاجة.. هنمشي ولا إيه؟

— حسام: تعالي نروح نتمشى شوية على الكورنيش ونشم هواء نظيف.

— عاليا: اوكي.. يلا بينا.

خرجا للتمشية معاً، وبعد فترة قصيرة من الوقت الحالم، أوصلها حسام بسيارته حتى باب الفيلا، وودعها وذهب هو الآخر متجهاً لمنزله.

دلفت عاليا إلى الفيلا بخطوات ثقيلة مجهدة، وعلامات الحزن والكسرة بادية على وجهها الرقيق. لمحتها الأم نادية وهي تجلس في الصالة، فنهضت وقالت بقلق:

— الأم: تعالي يا عاليا.. مالك يا بنتي داخلة كدا وشك مقلوب؟ أنتي اتخانقتي مع حسام برا ولا إيه؟ وشك متغير خالص ومتدمرة!

— عاليا (بنبرة مخنوقة بالدموع): لأ يا ماما.. متخانقناش خالص، وحسام حتى لو اتخانقنا مستحيل يسيبني أمشي أو أنام وأنا زعلانة منه.. حسام طيب أوي.

— الأم: طيب في إيه بالظبط؟ تعبانة؟ حاسة بأي وجع يا حبيبتي؟

انفجرت عاليا في بكاء مرير وارتمت في حضن أمها تختبئ من غدر العالم، وقالت بصوت متقطع:

— عاليا: تعبانة أوي.. تعبانة أوي من جوايا يا ماما! قلبي بيوجعني!

وفي هذه اللحظة بالذات، كانت ليلى تهبط درجات السلم بكبرياء، ففوجئت بعاليا تبكي بحرقة في حضن والدتها، فابتسمت بسخرية وتهكم وقالت بصوت مرتفع:

— ليلى: أهو.. بدأنا كالعادة حنان الأمومة الدافي اللي مش بنشوفه في البيت ده ومعمول ومخصص بس للهانم عاليا! نفسي أعرف بجد يا بت أنتي.. بتتسهوكي وتتمسكني عليهم كلهم إزاي كدا؟ علميني الصنعة طيب عشان أعرف أعمل زيك ويحبوني!

رفعت عاليا رأسها من حضن أمها، وعيناها حمراوان وتفيضان بالدموع الغاضبة، لكن ملامحها تحولت فجأة إلى القوة والصلابة الزائفة. مسحت دموعها، وجذبت هاتفها بسرعة من حقيبتها، وفتحت الصور والرسائل التي نسختها من هاتف حسام، ووجهت الشاشة مباشرة أمام وجه ليلى المصعوق! وفتحت مقطع صوتي بصوت ليلى وهي تحقر من حسام وتكذب.

— عاليا (بصوت حاد قوي زلزل الصالة): حاضر.. هعلمك حالا وثواني! شوفي الصور والرسايل والتسجيلات دي كويس.. وواضح فيها صوتك وأنتي بتسجليني أنا وماما وبتوقعي بيني وبين جوزي! عرفتي بقا أنا بتسهوك إزاي يا ليلى؟! وعرفتي مين فينا اللي مريض وناقص؟!

تغير وجه ليلى تماماً، وتراجعت خطوة للخلف شاحبة اللون بعد أن كُشف سترها وبانت قذارتها أمام أمها، واختفت ابتسامتها الساخرة تماماً وحل محلها الرعب. تتابعت كلمات عاليا بقهر وبكاء:

— عاليا: ليه يا ليلى؟ أنا عملتلك إيه في حياتك عشان تؤذيني بالمنظر المقرف ده؟! سيبتلك الشغل وسيبتلك البيت وسيبتلك حازم وماضيي ومستقبلي كله واختارت إنسان تاني خالص، بعيد تماماً عنك وعن مستواكي وعن حياتك وعن عقدك! إنسان حبني وحبيته من قلبي وصان كرامتي.. ليه عاوزة تفرقي بيني وبينه وتخربي بيتي وتظهريني خاينة وبتاعت مصلحة؟ ليه عاوزة تفرقي بيني وبين أي حاجة بحبها وبفرح بيها في الدنيا دي؟! أنا أختك من دمك!

صرخت ليلى بدفاع مستميت وهي تبكي بغيظ وقهر متراكم من طفولتها:

— ليلى: عشان أنتي اللي شايفه نفسك أحسن مني دايماً!.. كلكم في البيت ده وفي الشركة شايفين عاليا الملاك وأحسن من ليلى بمليون مرة! اشمعنى هي وجنبها بتتـحب من أول نظرة والكل بيموت فيها وأنا لأ؟! اشمعنى أنا دايماً على الهامش ومنبودة ومفيش حد بيحبني لذاتي؟!

نظرت إليها عاليا بنظرة شفقة حقيقية، وهدأت نبرتها وقالت بوعي ونضج مس قلب أمها:

— عاليا: عشان أنتي اللي حطاني في دماغك زيادة عن اللزوم يا ليلى وفوق الطبيعي.. ليه دايماً حطانا في مقارنة وحرب مستمرة ووهمية؟ أنتي أختي الكبيرة، والمفروض الطبيعي إنك تتمنيلي الخير وتفرحيلي من قلبك، وبكرة نصيبك وسعدك يجي لحد عندك.. أنتي جميلة أوي يا ليلى وملامحك تجنن، بس المشكلة الكبيرة فيكي إنك متكبرة وشايفة نفسك على الخلق! لو في حد محترم وبيحبك بجد ويقرب منك، هيخاف أصلاً من طريقتك ويبعد!

— ليلى (بصدمة وذهول): يخاف يقرب مني؟! أنتي قصدك إيه وبتقولي إيه؟!

— عاليا (بحنان وأصل طيب): ليلى يا حبيبتي.. متفهمنيش غلط وأرجوكي اسمعيني بعقل.. بس أنتي طريقتك وأسلوبك في التعامل مع الناس والعمال والموظفين فيها تعالٍ وفوقية أوي، وبتحسسيهم دايماً إنهم أقل منك وعبيد ومهما عملوا مش عاجبينك.. مبتديش فرصة أو مساحة حقيقية لأي حد يكلمك أو يتعامل معاكي بآدمية أصلاً! يبقى إزاي بقا في شاب يقدر يتقرب منك أو يعبر عن إعجابه بيكي وهو شايف نفسه في نظرك أقل وأقل؟ لازم تفهمي وتقتنعي إننا كلنا سواسية ومفيش حد أفضل من حد.. ولو ربنا سبحانه وتعالى موسعها علينا بالفلوس والجاه، فده جه بعد تعب سنين وشقى من بابا وعمنا، والمفروض نساعد غيرنا ونكسب قلوبهم، مش نتكبر ونشوف نفسنا عليهم ونقرفهم!

تركت عاليا كلماتها الأخيرة تدق كالمطارق في أعماق روح ليلى، وصعدت إلى غرفتها بصمت، تاركة شقيقتها تقف في وسط الصالة تتخبط في حيرتها وصدمتها النفسية الشديدة.. هل يعقل حقاً أن تكون المشكلة الكامنة والأذى نابعاً منها هي؟ أيعقل أن أسلوبها وتكبرها هما سبب وحدتها ونفور الجميع عنها؟ شعرت ليلى لأول مرة بخلل في جدار كبريائها، وبدأت تفكر بعمق: "هل علي حقاً إعادة النظر في حياتي وأسلوبي مع الناس من جديد؟".