الفصل التاسع والعشرين

امتدت يد ليلى المرتعشة لتمسك بهاتفها في ساعة متأخرة من الليل، ضغطت على زر الاتصال بالرقم الغامض الذي بات مأواها الوحيد وسرها الدفين، وما إن أتاها صوته حتى سألته بنبرة متهدجة تنضح بقلة الثقة لأول مرة:

— ليلى: هو أنا صحيح مغرورة وشايفة نفسي يا...؟

— الشخص (بصوت هادئ ومبتسم): بصراحة؟ جداً يا ليلى.. بس للأمانة، واحدة في جمالك وشياكتك ونسبك، حقها تتغر على الدنيا كلها وتشوف نفسها!

— ليلى (بضيق): مش عاوزة كلام مجاملات رخيصة دلوقتي أرجوك.. أنا بسألك بجد، هو فعلاً ممكن يكون في حد بيحبني من قلبه بس خايف يقرب مني أو يصارحني بسبب أسلوبي؟

— الشخص: وحد ليه؟ ما أنا أهو قدامك وبحبك وبموت فيكي كمان ومستعد للدنيا عشانك!

— ليلى (بتنهيدة خذلان): متفكرش إني هصدق الكلمتين دول بالسهولة دي.

— الشخص: ومتصدقيش ليه يعني؟ مش مالي عينك ولا مش شبهك؟ ولا أنتي اللي كالعادة متقبليش بواحد زي حكايتي وبتتكبري عليا؟

— ليلى: مش قصدي كدا خالص والله.. بس أنا قدام عينك ومن زمان جداً وفي نفس المحيط، ليه مقلتش الكلام ده دلوقتي بالذات؟

— الشخص: عشان زمان كان في حازم مالي مكان ومسيطر على تفكيرك، دلوقتي حازم مابقاش موجود في حساباتك، أو بمعنى أصح مبقتيش عاوزاه يبقى موجود أصلاً.. فقلت لنفسي وليه لأ؟ الفرصة جاتلي.. بس قوليلي، مين اللي شقلب كيانك كدا وخلاكي تسألي الأسئلة دي؟ دي أول مرة في حياتي أحس إن ليلى مترددة، وشاكة في نفسها وفي جمالها!

— ليلى (بصوت مكسور وعينين دامعتين): عاليا.. عاليا هي اللي واجهتني بحقيقتي البشعة النهاردة وفلقتني نصين.. دي أول مرة في حياتي أشوف نفسي وحشة وعرة كدا في عيونها! حتي الموقف التاني اللي عملته عشان أوقع بينها وبين حسام، اكتشفت إنها كانت عارفااه وسامحتني عليه قبل كدا.. ودلوقتي هي زعلانة مني أوي ومقهورة، وقالتلي كلام فوقني وصحاني على حاجات عمري ما كنت شايفاها في مرايتي!

— الشخص (بنبرة هادئة وماكرة): هي عاليا فعلاً طول عمرها كانت بريئة وطيبة، وأنتي اللي دايماً كنتي...

— ليلى (مقاطعة بدموع تذرف): أيوة.. أنا اللي الغيرة عمتني وقتها، وعمتني تاني دلوقتي وكل وقت! دايماً كنت بشوفها أحلى مني، وأطيب مني، ومحبوبة من كل الناس في البيت والشركة أكتر مني.. افتكرت بخبث إنها بتصنع ده وبتتعمد تبان ملاك عشان تكسرني وتبان أحسن.. بس النهاردة اكتشفت إن العيب والسرطان كله كان فيا أنا مش فيها!

— الشخص (بصوت ناعم يملؤه السُم): ولا تزعلي نفسك يا جميل ولا تشغلي بالك، كل حاجة في الدنيا ليها حل وبتتصلح.. ولو مفيش حد في الكوكب بيحبك زي ما بتقولي، فأنا بحبك قد الدنيا دي كلها وزيادة.. روقي كدا.

مرت الأيام وتوطدت علاقة ليلى بهذا الشخص المجهول بشكل متسارع؛ باتت تثق فيه ثقة عمياء كأنها غريق وجد طوق النجاة، تحكي له كل تفاصيل حياتها اليومية، تفاصيل بيتها، ومشاكل عملها في الشركة، ودقائق يومها. كانت سعادتها بالغة لمجرد وجود شخص يهتم لأمرها ويستمع لعقدها، ورغم غموضه الشديد أحياناً واختفائه المفاجئ، إلا أنها لم تكن تهتم، مادام يعاملها بلطف ويداعب أنوثتها الجريحة.

وفي أحد الأيام، تحدث إليها بنبرة ملحة عبر الهاتف:

— الشخص: إيه يا ليلى؟ مش هنتقابل النهاردة ونشوف بعض ولا إيه؟ وحشتيني.

— ليلى: لأ مش هينفع خالص النهاردة.. عندنا فرح ابن صاحب بابا وعمو عبد الله، وكلنا رايحين ومجبورين نحضر.

— الشخص: طيب ما تزوغي أنتي من الحفلة دي؟ لازم يعني تروحي معاهم كلكم؟

— ليلى: لأ مش هينفع أزوغ بالذات النهاردة.. عاليا مسافرة برة القاهرة شغل تبع الشركة، وحازم هيفضل في البيت لوحده عشان مستنيها ترجع متأخر وماتجيش تلاقي الفيلا فاضية.. أصلها بتخاف جداً من الضلمة والبيت الفاضي ههههه، فمش فاضل غيري أنا وعمو وطنط وماما ومفيش مجال للهروب، الحركة محسوبة عليا.

— الشخص (بصوت تغيرت نبرته فجأة ولمعت عيناه خلف الشاشة): خلاص ماشي.. مع إني كنت محتاج أشوفك، وحشتيني جداً.

— ليلى (بحرج وأنوثة): خلاص معلش مجتش من يوم.. تتعوض الأيام الجاية إن شاء الله.

عند حسام.. في المطار:

كان حسام يقف خلف حاجز الزجاج ينتظر خروجها بلهفة عاشق، أمسك بهاتفه واتصل بها:

— حسام: إيه يا حبيبي؟ طيارتك هتوصل إمتى بالظبط؟ أنا واقف مستني.

— عاليا (عبر الهاتف بصوت متعب وحنون): لسه فاضل حوالي ساعة على ما الإجراءات تخلص والشنط تطلع.. أنت عارف إنك وحشتني جدااااا؟ وكل حاجة في مصر وحشتني.. الأسبوع اللي قضيتة في السفرية دي عدا عليا كأنه سنة كاملة مش سبع أيام!

— حسام (بابتسامة): أنتي اللي وحشتيني وبقيتي بتوحشيني وأنتي معايا أصلاً.. اعملي حسابك بقا، السفرية الجاية برة مصر مش هتكون شغل خالص، دي هتكون لشهر العسل بتاعنا.. هاه، بقولك أهو وبحذرك عشان ترتبي نفسك!

— عاليا (بضحكة خجولة): ههههه لسه بدرييييي على الكلام ده.. المهم، هتستناني في المطار بجد ولا هتزهق وتمشي؟

— حسام: طبعاً هستناكي.. هو أنا ليا مين غيرك أستناه؟

أقلعت الطائرة من المطار الداخلي ووصلت عاليا أخيراً إلى صالة الوصول، وبالفعل وجدت حسام يقف في المقدمة وعيناه تلمعان فرحاً برؤيتها. بعد تبادل سلام حار مليء بالشوق، اصطحبها بسيارته وذهبا معاً ليحتسيا شيئاً دافئاً في مقهى قريب من المطار قبل العودة للمنزل.

عند حازم.. في الفيلا:

كان يجلس في الصالة الواسعة بمفرده والهدوء يلف المكان بعد رحيل ابيه وعائلته للفرح، رن هاتفه برقم صديقه السوء مازن:

— مازن: ألو.. إيه يا بروو؟ مش بنشوفك يعني ومختفي تماماً عن الساحة؟

— حازم (بتنهيدة ضيق): معلش يا مازن.. مشغول شوية في حوارات الشغل والبيت.

— مازن: طب ما تيجي نخرج النهاردة؟ هسهرك سهرة حلوة وفوق الخيال من بتوع زمان.. ونروق الأعصاب المشدودة دي!

— حازم: لأ يا عم مش هينفع أخرج النهاردة من البيت خالص.. فوتها.

— مازن: خلاص يا سيدي.. طالما مش هتعرف تخرج، أنا اللي جيلك لحد عندك في الفيلا، عاوزك في موضوع مهم جداً ولازم نتكلم فيه.

— حازم (بتوجس وتفكير): تجيلي فين يا مازن؟ أنا في البيت لوحدي ومفيش حد هنا خالص.. ومينفعش أستقبل حد، والموضوع اللي بتقول عليه ده مايستناش لحد بكرة في المكتب أو الكافيه؟

— مازن: وفيها إيه يعني يا معلم لما أجيلك البيت؟ إيه المشكلة وإحنا إخوات؟ لأ.. الموضوع خطير وميستناش لبكرة خالص ولازم تسمعه النهاردة!

— حازم (بإحراج وضيق): بصراحة أنت عارف يا مازن، أنا مش بقابل حد من أصحابي هنا في الفيلا عشان بنات عمي وعيب وكدا.. ومبحبش المشاكل.

— مازن: ما أنت لسه قايل بعضمت لسانك إن مفيش حد والبيت فاضي! وبعدين يعني هو أنا هاكلهم؟ ما أنت راجل وموجود أهو في البيت وسادد!

— حازم (بإحراج وضيق): عاليا جاية من السفر وهتوصل كمان ساعتين بالظبط.. هو بس لو جيت، تعمل حسابك تمشي فوراً قبل ما هي توصل وتدخل، أنا مابحبش أدخل حد غريب عنهم البيت وهي لوحدها.

— مازن (بمكر وغمزة خبيثة لم يرها حازم): عيب عليك يا بروو.. أنا غريب برضه؟ ولا أنت عاوز الجو يفضى ويخلو ليك معاها لما توصل في البيت لوحدكم؟ هاه.. أه يا خلبوص يا كبير!

—