الفصل الثاني والثلاثون

هتف حازم بنبرة يملؤها الذهول والإنكار: "لا يا فندم أنا كنت قافله ومعرفش كمان عاليا دخلت إزاي! ولا هي أصلاً كان معاها مفاتيح للمنزل ولا لا ".

ردّ عليه الضابط بهدوء حذر وعينان تفحصان المكان: "كلها يوم وتقرير المعمل الجنائي والطب الشرعي يطلعوا وكل حاجة هتبان. بس مبدئياً كدا.. الباب مفيش عليه أي آثار عنف، يعني اتفتح بالمفتاح بتاعه! يبقى إزاي دخلت؟ فيه خيوط كتير ناقصة، والقضية فيها غموض كبير".

بين زيارة تُدفع دفعاً نحو غياهب الحجز، وزيارة أخرى تفيض دمعاً في أروقة المستشفى، كانت الأسرة تعيش تشتتاً ممزقاً. تائهون في حيرتهم، يعتصر قلوبهم العجز وهم غير قادرين على استيعاب ما حدث، ولا يصدقون أن يكون الفاعل واحداً منهم، في حين أن أصابع الاتهام تحيط بهم من كل صوب، وتشير إليهم بقوة لا ترحم.

نظرت ليلى إلى حازم، وعيناها تبحثان عن الحقيقة وسط الركام، وقالت بنبرة متحشرجة: "قولي الحقيقة يا حازم.. أنت اللي عملت كدا؟".

"إيه يا ليلى اللي بتقوليه ده؟! أنا مش مجرم ولا يمكن أفكر حتى إني أأذي عاليا!".. قالها حازم بعصبية شديدة وثورة عارمة، والدموع تحتبس في عينيه.

تابعت ليلى بمحاولة بائسة لتفسير الكابوس: "ولا حسام كمان ممكن يعمل كدا.. طيب ما يمكن كنت شارب يومها ومحستش باللي بتعمله؟".

قاطعها حازم بسرعة: "ليلى! أنا مبطل من زمـ...".

توقفت الكلمة في حلقه متحجرة، عندما تذكر وجود والده، فالتفت ليجده يرمقه بدهشة صاعقة؛ إذ لم يفهم الأب لأول وهلة معنى تلك الجملة المبهمة التي قيلت أمامه.

خطا عبد الله خطوات نحو ابنه، والوجوم يكسو وجهه: "يعني إيه مبطل؟ وشارب إيه؟! واضح إن في حاجات كتير أنا مش دريان بيها بتحصل في بيتي! حاجات راحت ضحيتها البنت المسكينة دي، اللي كل مرة بتتأذي بسبب حاجات ملهاش أي ذنب فيها!".

انفجر حازم بالبكاء، وسكب أمام والده مرارة السنين ومعاناته القاسية مع الإدمان، وتحدث بخزي وانكسار يقطع الأنفاس، وأقسم له باكياً أنه تعالج منذ فترة ليست بالقصيرة، وأعطاه عنوان المصحة واسم الطبيب المعالج لكي يتأكد من صدق قوله. في تلك الأثناء، نظرت ليلى إلى الأسفل في خجل شديد وندم، بعد أن علم عمها بفعلتها هي الأخرى، وأنها كانت تعلم كل شيء منذ البداية وتكتم السر.

مضى عبد الله بخطوات مثقلة نحو والدة حسام يواسيها في مصيبتها الفاجعة، وأخبرها بنبرة يقين: "أنا واثق من براءة حسام زي ما أنا واثق من براءة ابني حازم بالظبط. لا بد إن في حاجة خفية إحنا مش فاهمينها، ويمكن يكون سارق دخل البيت وهو اللي عمل الجريمة البشعة دي. أملنا الوحيد دلوقتي هو الدعاء لعاليا بالسلامة.. ولما تفوق، اللغز ده هيتحل وكل حاجة هتبان".

اليوم التالي:

أدى العسكري التحية قائلاً: "الظرف ده وصل للتو يا فندم".

التقطه الضابط بلهفة: "كويس جداً.. ده تقرير المعمل الجنائي، وأكيد هيحل لغز كبير من القضية".

حثه الضابط الآخر بفضول: "طيب افتحه يلا ونشوف مستني إيه".

في المقهى:

في تلك الأثناء، كانت ليلى تجلس في أحد الكافيهات، برفقة شخص وعلامات التوتر تكسو ملامحها.

قالت ليلى بعتاب مرير: "كنت مختفي فين؟ وإزاي تسيبني في الظروف اللي أنا فيها دي لوحدي؟ وحازم ده مش صاحبك برضه؟".

أجابها ببرود مصطنع وهو يتهرب من نظراتها: "كنت مسافر تبع شغل ومكنتش أعرف خالص باللي حصل ده".

لمحت ليلى يده، فقالت بقلق: "سلامة ايدك.. اتعورت من إيه؟".

تلعثم في حديثه، واضطربت نبرته: "ده.. ده إزاز العربية اتخبط وعورني".

عقدت ليلى حاجبيها بدهشة: "اتخبط إزاي؟ ما هو سليم وزي الفل أنا شفته وأنا داخلة!".

رد عليها بحدة وتوتر ملحوظ: "في إيه يا ليلى مالك؟ ما أنا غيرته! الله.. في إيه؟ أنا ماشي!".

استوقفته ليلى وقد بدأت الشكوك تساورها: "إيه يا ابني أنت مالك متوتر كدا ليه؟ اهدي شوية.. أنا بس قلقانة على عاليا أوي، لسه مفاقتش ومش عارفة مين ممكن يكون عمل كدا".

سألها وعينه تزيغ يمنة ويسرة: "هما لسه متهمين حازم؟".

أجابت ليلى بصدق: "حازم ميعملهاش ولا حسام كمان، بس حظهم جه كدا.. أو حظها هي إنهم لحقوها في الوقت المناسب. آه لو أعرف مين عمل كدا.. كنت قتلته بإيدي!".

نظر إليها بنظرة غريبة وقال: "من إمتى الحب ده كله؟".

استنكرت ليلى قائلة: "قصدك إيه بكلامك ده؟".

أجاب بمواربة: "مقصدش حاجة.. بس يعني مستغرب".

وقفت ليلى وجمعت أشياءها قائلة بحسم: "إحنا إخوات.. بنتخانق ساعات ونشد قصاد بعض بس مش معني كدا إننا بنكره بعض أو نتمنى الأذى لبعض. أنا همشي".

قال لها: "ما بدري!".

ختمت ليلى الحديث وهي تمضي: "هروح لعاليا.. يارب تكون فاقت وتقولنا مين اللي عمل فيها كدا".

في مكتب الضابط:

كان الضابط يقرأ التقرير بتمعن ثم قال: "التقرير بيقول إن الباب اتفتح بالمفتاح، وفي فعلاً بصمات لحسام عليه وعلى سور البلكونات زي ما وصف في أقواله بالظبط.. بس المفاجأة، إن فيه آثار دم غير دم المجني عليها! وزي ما هو واضح، حسام وحازم مفيش فيهم أي جروح أو خدوش. كدا في شخص رابع كان موجود في الفيلا، استغل نوم حازم ودخل.. بس دخل وخرج إزاي ومفيش أي آثار عنف أو تسلق لشخص تاني؟".

عقب الضابط الآخر متسائلاً: "وليه ميكونش حد منهم ساعده يدخل؟ حازم مثلاً هو اللي كان جوه، أو أختها.. زي ما عرفنا من التحقيقات قبل كدا إن كان بينهم مشاكل كتير وعملت حاجة مشابهة لدا؟".

في أروقة المستشفى:

وصلت ليلى إلى المستشفى، ووقعت عيناها على والدتها الواقفة أمام زجاج غرفة أختها، تتأملها وتبكي بحرقة تفتت الصخر. شعرت ليلى بشفقة بالغة ومزقها المنظر.

اقتربت منها وضمتها قائلة: "اهدي يا ماما وخليكي قوية.. عاليا لا يمكن تسيبنا، إن شاء الله هتخف وهتطلع من هنا بالسلامة. إنتي عاوزاها تقوم تلاقيكي عاملة في نفسك كدا؟".

همست الأم برعب دفين: "خايفة أوي يا ليلى.. داخلين على أسبوع اهو ومفيش أي جديد، لا فاقت ولا اللي عملها اتمسك! يعني ممكن أوي يجي هنا ويعمل فيها حاجة ثانية!".

طمأنتها ليلى بحزم: "وعلشان كدا مش لازم نسيبها خالص. إحنا هنقسم نفسنا ونقعد معاه بالتناوب؛ روحي إنتي يا ماما ارتاحي وأنا مش هتحرك من هنا".

نظرت إليها الأم بعينين مغرورقتين بالدموع: "بتحبيها يا ليلى وخايفة عليها فعلاً؟".

انفجرت ليلى بالبكاء: "يا ماما دي أختي! مهما حصل واتخانقنا بنرجع نتصالح، ومش هحب حد في الدنيا دي قدها ولا حد هيخاف عليها زيي. لما تفوق.. هتلاقي حاجات كتير اتغيرت، ومش هزعلها مني أبداً".

احتضنتها الأم بدفء: "ربنا يحفظك ليا يا بنتي ويقومها بالسلامة يارب".

انتحت ليلى جانباً، ونظرت لعاليا عبر الزجاج، وهمست بنبرة مثقلة بالندم: "أنا آسفة على كل حاجة زعلتكِ فيها وتعبتي مني بسببها. عارفة كمان إني مكنتش الأخت اللي إنتي بتتمنيها، وخذلتكِ كتير.. فوقي وارجعي وكل حاجة هتكون كويسة، وأنا هتغير زي ما إنتي عاوزه بالظبط".

عودة إلى مكتب التحقيق:

كان الضابط يقلب الأوراق بتركيز شديد: "مفيش أي مفقودات في البيت، ولا بصمات في أي مكان تاني لحسام داخل الغرفة المواجهة، كلها كانت قدام الباب بس لما حصل دفع للباب وزق المجني عليها.. مهلاً! هات لي تقرير البصمات تاني كدا!".

سأله زميله بلهفة: "إيه.. في إيه؟".

قال الضابط الأول وعيناه تتسعان ذهولاً: "في حاجة مخدتش بالي منها كويس.. وجود بصمات على باب المنزل من الداخل هي نفسها اللي على باب الأوضة! وآثار الدم اللي كانت على الباب هي نفسها الموجودة فوق! والمفاجأة بقى.. إنها هي نفسها اللي على الشوكة والأطباق! واكتشفوا كمان وجود منوم في كوباية العصير، وده بيأكد كلام حازم إنه كان صاحي مدروخ ومش في وعيه!".

تابع الضابط بتحليل دقيق: "الشخص اللي زاره كان مرتب لكل حاجة ومخطط صح، بس اللي معملش حسابه هو وجود حسام، ! وده بوظ الخطة تماماً.. وكمان صريخ الضحية خلاه يتوتر ويخبطها فنزفت بغزارة.. وهو كمان اتجرح من الازاز بس ده ممنعوش يكمل لحد ما سمع صوت حسام، ساعتها خرج بسرعة وهرب قبل ما يدخل".

ثم صرخ الضابط في العساكر: "هات لي حازم من الحجز بسرعة! لازم نعرف مين اللي كان عنده في البيت!".