الحلقة الاولى

كانت تقف أمامه بغضب..

ـ إنت اتجننت يا غيث؟! إيه الهبل اللي إنت بتقوله ده؟

ـ هبل؟! أمال اللي إنتي بتعمليه ده إيه؟! إنتي عاوزة تتجوزي واحد قد أبوكي يا فاطمة؟

نظرت له بغضب وانفعال..

ـ وإنت مالك؟ دي حياتي الخاصة! أمال عاوزني أفضل في الحي ده كل عمري؟! أنا مش عاوزة أفضل هنا.

نظر لها بسخرية..

ـ تقومي تبيعي نفسك، صح؟.. صااااح.. إنها كلماته وهو يصرخ بها.

علت صوتها بغضب...

ـ وإنت مالك؟! إنت مين في حياتي؟ أنا حرة! إنت لا جوزي ولا خطيبي ولا أي حاجة يا غيث!

اقترب منها..

ـ أنا بحبك ومستعد أتجوزك.

نظرت له، ومن ثم..

ـ ههههههه مستعد تتجوزني؟ وإنت عندك إيه علشان أوافق عليك؟ إنت حالك زي حال أهلي، وأنا تعبت وقرفت من الفقر. الراجل اللي قد أبويا ده هيطلعني لفوق.

مسك يدها بترجٍ..

ـ إسمعيني، أنا قربت أخلص ثانوي، آخر سنة أهي، وبعد كده هدخل الجامعة وأتخرج وأشتغل وأكبر، وساعتها هخليكي ملكة يا توتا، كل أحلامك هتكون أوامر.

ـ فين؟! على حسب كلامك ده محتاج فوق 10 أو 15 سنة! ياه عمر تاني! يعني هفضل هنا ووضعي نفسه؟! لا، أنا آسفة يا غيث، مش هقدر على كده. أنا الأسبوع الجاي فرحي، اتمنالي الخير.

ـ لا، أرجوكي، خليكي معايا، أنا بحبك والله، بحبك يا فاطمة، أنا وإنتي كبرنا مع بعض، حبيتك من وإنتي لِسه بضفاير. سنين وإحنا بنكبر مع بعض، سنين بتعدي وأنا بحبك أكتر من السنة اللي قبلها، ليه عاوزة تكسري قلبي يا توتا؟ ليه؟

ـ أديك قلت يا غيث، كنا عيال وخلاص كبرنا. بقى عندي 15، وإنت 17، سن مناسب للجواز. أبويا قاللي إن ده أنسب سن للجواز. إنساني يا غيث، أنا من حقي أتجوز وأحب وأتحب. إنساني...

أنهت كلماتها وذهبت من أمامه، تركته يبكي بحرقة على كسرة قلبه. ضحّت به من أجل المال، وهي التي كانت كل حياته. كبروا معًا تحت حبه الطفولي لها، والذي تحوّل مع الوقت إلى حب، والآن تم كسر قلبه بنجاح.

® --------------

بعد أيام، كان يجلس على فراشه بألم داخل غرفته، يبكي وهو يستمع إلى صوت الزغاريط وأصوات الاحتفالات، فاليوم زواج من عشق قلبه. ألم لا حد له. تدهورت حالته من أيام واحتاروا به أهله.

كان أخوه الأصغر منه يجلس على الكرسي الوحيد في الغرفة، بعيدًا عنه، ينظر إليه بحزن وغضب دفين على حال شقيقه الكبير، فهو يكره رؤيته بتلك الحالة.

دلفت إليه والدته وهي تنظر له بحزن على حاله، ومن ثم اقتربت منه وبيدها صينية الطعام..

حنان..

ـ جبتلك الأكل يا ضنايا.

تحدث من بين دموعه..

ـ مليش نفس يا ماما.

اقتربت منه وهي تضع يدها على وجنته...

ـ يا بني ليه بتعمل في نفسك كده؟ فهمني مالك يا ضنايا، متوجعش قلب أمك عليك يا غيث.

نهض سهيل بغضب..

ـ هي السبب! هي! أنا بكرهها!

نظرت له بعدم فهم..

ـ مين السبب يا سهيل؟

غيث بألم...

ـ اسكت يا سهيل، أنا مش ناقص.

سهيل بغضب...

ـ اسكت ليه وأنا شايفك كده؟!.. نظر إلى والدته.. ابنك بيحب فاطمة بنت عمه محمود!

ـ حب إيه يا غيث وإنت في السن ده؟ يا بني إنت بتتوهم.

ـ طيب ما هي اتجوزت في السن ده!

ـ يا حبيبي هما أحرار، بنتهم وهما حرين.

ـ بس أنا بحبها يا ماما، ليه هي رفضتني علشان تتجوز واحد قد أبوها؟ ليه يا ماما؟ ليه؟ أنا قلتلها تستناني أخلص جامعة واشتغل وأعمل كل اللي أقدر عليه وأخليها ملكة، بس هي رفضتني.

ـ وده اسمه حب يا غيث؟ إنت حبيت، وهي باعت يا حبيبي. اللي يبيعك بيعه، اللي يقدّر قلبك هو اللي يستاهل حبك. احمد ربك إنه بعدها عنك من دلوقتي، دي طماعة هي وأهلها، عاوزين يكبروا على حساب بنتهم، باعوها لواحد أكبر من أبوها علشان ها ياخدهم من هنا لمكان أحسن.

نظر إلى الأرض ببكاء.

اتجهت له بحزن، ومن ثم قبّلت جبينه وضمته بحنان.

ـ عوض ربنا هيكون كبير يا قلب أمك.

® -------------- ®

 

تمر الأيام وتمر سنة على زواج فاطمة، وبعد رحيلها بشهور قدر غيث يتعافى من حزنه وانتبه لدراسته، ودخل الجامعة في عمر 18، ونزل الشغل مع أبوه اللي ساب شغله كموظف حكومي وقرر يشارك كل فلوسه مع أخوه الأصغر صلاح ويشتغلوا في الأخشاب وصنع الأثاث، وخلال سنة من التعب والجد والسهر والتعاون بين أحمد وصلاح وأولادهم الاتنين البكر غيث وأنس، كانوا من أشهر شركات الأثاث والخشب من مصانعهم، والأثاث من تصميمهم، والشغل كان عالِ جدًا، وبفضل ربنا كبروا بسرعة وانتقلوا من الحي اللي كانوا فيه إلى الزمالك. اشترى كل منهم فيلا بجوار بعضهم، وكانت حياتهم كويسة أوي مع أولادهم، حيث الحب المتبادل بين العائلتين المكونة من..

(تعريف عن ممثلين الأحداث) ده التعريف الحالي للأبطال بعد مرور 17 سنة، اللي حصل خلالهم هنعرفه مع سرد الأحداث إلى وقتهم الحالي..

أحمد الجيار وأخوه صلاح الجيار

أحمد أكبرهم من حيث السن والعقل، لديه شابين وفتاة،

الفتاة تدعى ملك 30 عام، كانت متزوجة من أسرة معروفة، ولكن زوجها توفى في حادثة غامضة، تملك شركة أدوية بشراكة بين صديقتها من الجامعة وابن عمها وليد.

والثاني غيث 35، جدي، حازم في أفعاله بعض الأحيان، ماسك شغل العيلة حيث إن الكل بيشتغل نفس الشغل: مصانع خشب ومصانع أثاث.

لقد وضعوا كل ما يملكون في ذلك الحِمل، واجتهدوا حتى أصبح من الأشهر في المجال تحت مسمى مجموعة الأخوات، والتي أصبحت ملحقة بشركات استيراد وتصدير لجميع الدول، فهم يهتمون بالجودة على أعلى مستوى.

من لا يحب الجودة الممتازة في كل مشترياته؟

أصبحت إدارة المجموعة بين يدي كل من غيث ابن أحمد وأنس ابن صلاح.

الابن الثاني لأحمد: سهيل، 27 سنة، دكتور بشري، مرح، مجنون، طيب القلب.

وثانيًا: صلاح الجيار، أخو أحمد، أصغر منه بأعوام، طيب القلب، بشوش، عونٌ لأخيه في كل شيء، من صغره يعتمد كل الاعتماد على شقيقه في كل شيء.

لديه ولدين وبنتين:

أكبرهم أنس، 34 سنة، يعمل في ذات مجال والده وعمه، هو يد بيد مع غيث.

والابن الثاني وليد، أصغر من أنس، 29 سنة، شريك ثالث في شركة ملك بنت عمه وصديقتها. هو في الأصل دكتور نفسي، لكنه أحب مجال الأدوية.

أما البنت الكبيرة دنيا، فهي بنت هادئة جدًا، تحب الكتابة، وهي مدرسة حديثة التخرج، مجتهدة، ودائمًا في حالها.

والبنت الثانية، ذات 17 عامًا، مجنونة جدًا وتكره المذاكرة بشدة.

عائلة محمود الرويعي مكونة من:

محمود، شخص جشع، وكل ما يهمه في الدنيا المال، وكيف يكون غنيًا فقط.

وزوجته إنجي، كانت تحبه عندما تزوجته، لكن مع مرور الوقت واكتشافها حقيقته، ندمت على الزواج منه، ولكن لا ينفع الندم، فبينهم أربعة أولاد: شابين وبنتين.

أكبرهم كريم، نسخة من والده، طماع بدرجة كبيرة.

والثاني ساجد، لا يكره شيئًا في حياته كما يكره أباه وكونه من تلك الأسرة.

والابنة الأولى فاطمة، التي زرع والدها بها حب المال حتى هلكت.

والصغيرة روح، 20 عامًا، مثل أخيها ساجد، تحاول الابتعاد عن أهلها قدر ما تستطيع، بعد أن شاهدت هلاك أختها، وهي تكره والدها بشدة.

مجالهم مثل مجال عائلة الجيار.

---

® -------------- ®

فلاش باك قبل 17 سنة (1):

كان خارجًا من الجامعة، وهو يتحدث في الهاتف مع بير أسراره أنس ابن عمه.

ـ أنا خلصت المطلوب مني يا غيث

ـ تمام، وأنا هكمل في التصاميم وأبعتها للمصنع

ـ تمام، البضاعة الجديدة فيها نواقص

ـ اممم، الغِ طلب من الشركة دي، نشوف مكان تاني

ـ إحنا لسه في البداية يا غيث، لسه بنكبر، لازم ناخد بالنا، أبوك وأبوي معتمدين علينا

ـ متقلقش، امشي بس ورايا وأنا هتصرف

ـ ماشي، أقفل، المندوب وصل

ـ طيب، أنا جاي لك في الطريق

بعد إنهاء المكالمة، كان ماشي لحد الطريق كي يوقف أحد سيارات الأجرة من أجل الذهاب إلى العمل، ككل يوم: من الجامعة إلى العمل إلى المنزل،

لم يعد كما كان: رحلات وفُسح وغيره، بعد حادثة تحطيم قلبه لم يعد يقوى على كل شيء، ولكنه يُخفي ألمه في العمل.

أوقف تاكسي وذهب، طوال الطريق وهو ينظر إلى الشوارع بصمت، يتألم وحده ولا يشعر به أحد،

جراء والدته وأخوه الصغير.

كم مؤلم ذلك الحب!

لقد مر عامٌ كامل منذ آخر مرة تقابل بها مع تلك التي كبرت على يده،

بعدما كان يراها كل يوم وفي أي لحظة يريد،

لكن مر عام ولا يعرف عنها شيء.

فقط كان يتمنى لها الخير والسعادة،

يدعو الله عند تأدية فرضه بأن يحفظها ويشفي قلبه من ألم اشتياقه لها،

لعل الزمن يداوي جروحه...

                ® ____________®