البارت السادس

 وبعد فترة صعد عبد الحميد ومعه هاجر ليناما، بينما أخذ عمر ساندي إلى غرفتها بعد أن نامت على قدم أمل.

وبقيت أمل وفاطمة ومديحة جالسات في الصالون، أما ميرنا فكانت ممسكة بهاتفها، لا تهتم بأحد.

أمل بضيق: ـ إزي عفاف يا ميرنا؟ بقالي كتير مشوفتهاش.

رفعت ميرنا رأسها من الهاتف وقالت بلا اهتمام: ـ كويسة يا أنطي... هي مسافرة لندن تعمل شوبينج.

أمل باستغراب: ـ مش لسه راجعة من شهر من باريس؟ هي على طول مسافرة كده وسايباكم؟

ميرنا وهي تنظر إلى هاتفها: ـ مامي سيدة مجتمع يا أنطي، ولازم تهتم بنفسها وبشكلها، وعشان كده طول الوقت بتسافر.

تمتمت أمل في سرها: ـ سيدة مجتمع! الله يرحم أبوها.

ثم قالت بضيق:

ـ وأبوكي عامل إيه؟ هنا ولا مسافر هو كمان؟

ميرنا: ـ مش عارفة... بس تقريبًا هنا. مسمعتش إنه سافر.

أمل باستغراب: ـ متعرفيش أبوكي هنا ولا مسافر؟! وإنتوا مبتتقابلوش؟

تنهدت ميرنا بضيق من كثرة الأسئلة: ـ هو بينزل الصبح وأنا بكون نايمة، ويرجع بالليل وأنا بكون بره.

نظرت أمل إلى مديحة وفاطمة وكادت تنفجر من الغيظ.

أمل بغضب: ـ لا ونعمة التربية! وأختك مايا هنا ولا مع عفاف؟

ميرنا بملل: ـ هنا.

أمل: ـ ومين بياخد باله منها بقى؟

ضحكت ميرنا بسخرية: ـ ياخد باله منها ليه؟ هي بيبي؟ دي عندها 13 سنة، وتعرف تاخد بالها من نفسها. وبعدين هي طول الوقت مع أصحابها بره البيت.

وقفت أمل فجأة وهي تحاول السيطرة على أعصابها.

أمل: ـ أنا هروح أشوف عمر، وأخليه ييجي عشان يوصلك بيتكم.

ثم قالت بصوت منخفض لم تسمعه سوى فاطمة ومديحة:

ـ بدل ما مرارتي تفرقع.

ميرنا بسرعة: ـ لااا يا أنطي، خليه مرتاح. إنجي صاحبتي هتيجي تاخدني كمان شوية عشان خارجين نسهر.

كانت فاطمة تنظر إليها باستغراب شديد من كلامها وطريقة حياتها.

مديحة باستغراب: ـ تخرجوا تسهروا دلوقتي؟

ميرنا: ـ أيوه، هو لسه بدري. الساعة لسه 12. على ما نتجمع كلنا ونشوف هنسهر فين.

أمل بعصبية: ـ بدري إيه؟! الساعة 12! في بنت محترمة تخرج لوحدها في الوقت ده؟

ميرنا بغيظ: ـ كل الناس بتخرج في الوقت ده. أيامنا غير أيامكم يا أنطي. وإحنا أصلًا بنبدأ خروج من دلوقتي. ولا إنتِ عايزانا ننام زي الفراخ من الساعة 12؟

كتمت فاطمة ومديحة ضحكتهما.

مديحة همست لفاطمة: ـ الفراخ بقت بتنام الساعة 12؟ أيامنا كانت بتنام المغرب... شوفي التطور وصل لفين.

سمعت ميرنا صوت كلاكس سيارة بالخارج.

ميرنا: ـ إنجي وصلت... يلا باي يا أنطي.

وغادرت بسرعة.

ما إن خرجت حتى قالت أمل بغيظ:

ـ يا رب صبرني.

مديحة وهي تضحك: ـ معلش يا أمل، بكرة ربنا يهديه ويبطل عناد ويفوق لنفسه.

تنهدت أمل بحزن: ـ يا رب يا مديحة... يا رب.

ثم نظرت إلى فاطمة.

ـ معلش يا فاطمة، إنتِ مش غريبة، بس أهو شفتي وسمعتي بنفسك... الهانم اللي ابني عاوز يتجوزها.

فاطمة: ـ ربنا يهديها... بس عمر مش باين عليه إنه زيها كده.

أمل بحزن: ـ ولا زيها ولا يشبهها... بس فاكر إنه بيعاند فينا، وهو في الحقيقة بيعاند نفسه.

فاطمة باستغراب: ـ ويعاندكم ليه؟

أمل وهي تنهض: ـ احكيلها يا مديحة... على ما أطلع أشوف عمر.

ثم غادرت.

نظرت فاطمة إلى مديحة باستغراب.

فاطمة: ـ أنا مش فاهمة حاجة... وشكل أمل مش موافقة على جواز عمر من بنت أخوها.

مديحة: ـ دي مش طايقاها أصلًا. ومش هي لوحدها... كلنا مش موافقين، بس مش قادرين نتكلم عشان عمر.

فاطمة: ـ ليه؟ بيحبها؟

مديحة بسخرية حزينة: ـ هو بيعاند وبس... لا بيحبها ولا حاجة.

فاطمة: ـ بيعاند؟ طب ليه؟

هدت مديحة وقالت: ـ بسبب محمد أخويا الله يرحمه... بصي، أنا هحكيلك من الأول عشان تفهمي كل حاجة. :::

 مديحة بتنهدة طويلة:

ـ من ست سنين أنا ومحمد أخويا وكل العيلة نزلنا إجازة، ورحنا عند أبلة ماجدة أختي في البلد... فاكراها؟

فاطمة ضحكت: ـ آااه طبعًا... دي تتنسي؟ ده إحنا كنا بنترعب منها وإحنا صغيرين.

مديحة ابتسمت: ـ ولسه بترعب منها لحد دلوقتي، وحياتك.

ثم أكملت:

ـ المهم، وإحنا هناك فضلت تقول لمحمد إن عمر لازم يتجوز فرح بنتها.

وسكتت لحظة قبل أن تكمل بحزن:

ـ أصل فرح لما اتولدت كان عندها مشكلة في القلب، وأي مجهود كان خطر عليها. وعشان كده محدش كان بيتقدم لها، والكل كان خايف يتجوزها. ففضلت أبلة ماجدة تضغط على محمد وتقول له إن عمر أولى بيها، وإنه يتجوزها ويهتم بيها.

تنهدت بحزن.

ـ فضلت وراه لحد ما محمد حلف على عمر إنه يتجوزها.

فاطمة باستغراب: ـ ومحمد عمل كده؟

مديحة: ـ أيوه... وعمر وقتها رفض. بس محمد مكنش بيسمع لحد، لا لعمر ولا ليا ولا لأمل. كان بيسمع كلام أبلة ماجدة وبس.

وأكملت:

ـ ولما عرفت أبلة ماجدة إن أنا وأمل معترضين، بهدلتنا وحلفت إن لو وقفنا في طريق الجوازة مش هتدخل بيتنا ولا هندخل بيتها. فسكتنا كلنا، ومحدش وقف جنب عمر.

هزت رأسها بأسى.

ـ عمر فضل رافض ومستني حد يساعده أو يقف معاه... لكن كلنا سكتنا.

فاطمة: ـ يا حرام.

مديحة: ـ وفي الآخر عمر وافق غصب عنه. قال يخطبها دلوقتي ولما نسافر يبقى يحاول يقنع أبوه يفسخ الخطوبة.

ثم ابتسمت بمرارة.

ـ بس أبلة ماجدة كانت فاهمة هو ناوي على إيه.

فاطمة: ـ عملت إيه؟

مديحة: ـ رفضت تسافرنا غير لما عمر كتب كتابه على فرح ودخل عليها في البلد.

شهقت فاطمة.

ـ للدرجة دي؟

مديحة: ـ أيوه... وبعدها سافرنا كلنا، وفرح سافرت معانا.

وسكتت لحظات.

ـ فرح الله يرحمها كانت طيبة وغلبانة أوي، بس من كتر خوف أمها عليها مكنتش تعرف حاجة في الدنيا. لا خروج، ولا أصحاب، ولا حتى تهتم بنفسها أو بشكلها.

فاطمة: ـ ربنا يرحمها.

مديحة: ـ فضلوا عايشين مع بعض تلات سنين... لكن عمر كان بيهرب في شغله طول الوقت. يخرج من بدري ويرجع متأخر جدًا.

ثم قالت:

ـ ورغم كده فرح حبته من قلبها، واتعلقت بيه جدًا. أصل عمر عمره ما أهانها ولا زعلها، حتى وهو مش قادر يحبها.

تنهدت بحزن.

ـ وفي يوم فجأة عرفنا إنها حامل.

فاطمة: ـ يا ساتر!

مديحة: ـ اتصدمنا كلنا... لأن الحمل كان خطر جدًا عليها. فضلنا نترجاها تنزل الجنين وهي في الشهور الأولى، لكنها رفضت.

فاطمة: ـ ليه؟

مديحة: ـ كانت فاكرة إن الطفل هيخلي عمر يحبها أكتر ويتمسك بيها.

اغرورقت عيناها بالدموع.

ـ وتعبت طول الحمل، وإحنا كلنا حواليها... لحد يوم الولادة.

سكتت قليلًا ثم أكملت بصوت متهدج:

ـ جابت ساندي... وماتت هي.

وضعت فاطمة يدها على فمها من الصدمة.

ـ لا حول ولا قوة إلا بالله.

مديحة: ـ عمر وقتها اتكسر... وحس بذنب كبير. فضل يقول إن فرح ضحت بحياتها عشانه.

فاطمة بحزن: ـ الله يرحمها.

مديحة: ـ أما أبلة ماجدة... فكانت الصدمة عليها كبيرة.

فاطمة: ـ أكيد انهارت.

مديحة: ـ أكتر من كده.

ثم تنهدت بقوة.

ـ لما رجعنا بالجثمان عشان ندفنها، لقيناها واقفة على أول البلد ومعاها رجال كتير.

فاطمة بدهشة: ـ عملت إيه؟

مديحة: ـ وقفت العربيات، وأخدت نعش بنتها مننا، ورفضت تدخلنا البلد.

فاطمة: ـ إيه؟

مديحة: ـ وقالت إن إحنا السبب في موت بنتها، وإننا أخدناها منها عروسة ورجعناها جثة.

أخفضت رأسها بحزن.

ـ حرمتنا كلنا منها... وحتى ساندي رفضت تشوفها أو تعترف بيها.

فاطمة: ـ يا نهار أبيض!

مديحة: ـ ومحمد أخويا اتكسر بعدها. فضل حاسس بالذنب لأنه هو اللي أصر على الجوازة.

ثم أضافت:

ـ وعمر كمان اتغير تمامًا. بقى عصبي ومش طايق حد، وفضل يحمل محمد مسؤولية اللي حصل.

تنهدت بألم.

ـ ومحمد من كتر الحزن والتعب مرض... وبعد فترة توفى.

ساد الصمت للحظات.

فاطمة بحزن: ـ الله يرحمهم جميعًا.

ثم سألت:

ـ وساندي؟ أنا شايفة عمر متعلق بيها جدًا.

ابتسمت مديحة ابتسامة صغيرة.

ـ دلوقتي روحه فيها.

ثم أكملت:

ـ لكن بعد وفاة فرح، في أول الشهور، مكنش حتى قادر يسمع صوتها.

فاطمة بدهشة: ـ بجد؟

مديحة: ـ أيوه... كان كل ما يسمع عياطها يفتكر اللي حصل.

ثم ابتسمت بحنان.

ـ وأمل هي اللي كانت مربية ساندي في الأول. لحد ما في يوم البنت سخنت جدًا وكادت تموت.

فاطمة: ـ وبعدها؟

مديحة: ـ أمل جريت على عمر وقالت له: "البنت هتموت."

ابتسمت.

ـ شالها وجري بيها على المستشفى، وفضل معاها طول الليل لحد ما خفت.

ثم قالت بحب:

ـ ومن يومها اتعلقت بيه وهو اتعلق بيها... وبقت هي الدنيا كلها بالنسباله.

فاطمة ابتسمت : ربنا يخليها له ويبارك فيها......بس برده معرفتش هو خطب ميرنا..... ليه ويعاند في مين بعد موت محمد 

مديحه بضيق : كان بيعاند في محمد اخويا هو خطبها قبل ما محمد يموت بسنه وكان المفروض انه يتجوزه بس محمد الله يرحمه مات ف الفرح اتأجل ..... 

فاطمه : طيب واشمعني ميرنا اللي خطابها 

ـ

:::