Ang Misis Kong Astig

"Harriet... tulungan mo ako... papatayin nila ako..."

Nanginginig ang kamay ni Harriet Villaverde habang hawak niya ang cellphone. Basang-basa pa ng pawis ang itim niyang tactical suit galing sa labing-anim na oras na operasyon kontra gun-running syndicate. May mantsa pa ng dugo sa manggas niya.

"Margaux? Ano nangyayari sayo? Nasaan ka ngayon?" Mabilis siyang lumabas ng briefing room ng safehouse nila, hindi na pinansin ang mga operatiba na nakatingin sa kanya.

"May sumusunod sa akin... Harriet... hindi ko na alam gagawin ko..." Umiiyak ang boses ni Margaux sa kabilang linya, halos hindi na makahinga.

Alam ni Harriet na hindi ganito ang kambal niya. Oo maarte si Margaux, pero hindi siya yung tipong nagpapanic nang walang dahilan.

"Makinig ka sa akin. I-send mo sa akin ang location mo. I-share mo ngayon din," utos ni Harriet, pilit pinapakalma ang boses.

Walang sagot, mabilis lang ang hinga ni Margaux na rinig na rinig niya.

Tapos biglang may malakas na busina ng truck. Sunod-sunod na tunog ng preno.

Isang malakas na kalabog ang umalingawngaw sa linya.

"Margaux!"

"Harri—!"

Naputol ang tawag.

"Margaux, sumagot ka! Margaux!"

Tinawagan niya ulit. Unreachable na ang numero. Tinawagan niya ulit nang paulit-ulit, pero wala na.

"Chief, may problema?" Lumapit ang isa niyang operative.

Hindi na sumagot si Harriet. Hinablot niya ang susi ng sasakyan sa lamesa at tumakbo palabas ng safehouse.

Kinabukasan, isang patrol ang nakakita ng sasakyang wasak sa ilalim ng tulay, kulay puti na Range Rover. Registered under Margaux Villaverde-Montemayor.

Wasak ang unahan, nakalubog ang kalahati sa ilog. Walang bangkay na nakuha, wala ding survivor.

Nasa opisina ng NBI si Harriet nang dumating ang initial police report. Binasa niya ang tatlong salita na paulit-ulit na nakalagay sa huling pahina.

Body not recovered.

"Hindi pwede ito," sabi ni Harriet at ibinagsak ang folder sa lamesa.

"Chief, may mali ba?" tanong ng deputy director niya.

"Kayo na mismo tumingin sa report na ito. Sobrang linis, sobrang bilis ng conclusion. Parang may nagmamadali na isara agad ang kaso," sagot ni Harriet.

Pinatawag niya ang buong team sa conference room. Inilatag sa malaking screen ang lahat ng nakalap na ebidensya.

"Chief, na-review na namin CCTV sa highway. May nawawalang labing-isang minuto sa footage. Parang nabura," sabi ng analyst nila.

"Impossible na mabura yun nang kusa," sagot ni Harriet at mas humigpit ang hawak niya sa folder.

"May nagbura, at hindi lang yun. Manipulated din ang traffic camera sa may tulay. Nawawala ang dashcam footage ng sasakyan. Pati oras ng pagresponde ng emergency team, binago," dagdag pa ng isa.

Nagtinginan silang lahat at walang nakapagsalita ng ilang sandali.

"May naglinis," sabi ni Harriet. "Hindi ito ordinaryong aksidente, may taong may koneksyon, at may kapangyarihan na gustong palabasin na aksidente ang lahat."

"Chief, may isa pa," sabi ng deputy at naglapag ng litrato sa lamesa. Family picture iyon. Nasa gitna si Margaux, katabi si Rayver Montemayor, at karga si Madeline na limang taon.

"Ano koneksyon ng pamilya Montemayor dito?" tanong ni Harriet.

"Wala pa kaming hawak na matibay. Pero hindi namin pwedeng i-disregard. Si Rayver ang asawa ni Margaux," sagot ng deputy.

"Then find one, hanapin niyo lahat ng koneksyon," utos ni Harriet.

Tumayo siya at naglakad papunta sa malaking salamin ng conference room. Tanaw mula doon ang buong syudad. Sa loob ng maraming taon, ngayon lang siya nakaramdam ng ganito. Hindi siya Chief ng Black Operations ngayon. Kapatid siya na hindi nasagot ang huling tawag ng kambal niya.

Tatlong araw ang lumipas na walang linaw ang kaso. Ipinatawag siya sa emergency meeting ng Director.

"Harriet, may proposal kami," sabi ng Director.

Naupo si Harriet at nakinig.

"Alam ng taong nasa likod ng pagkawala ni Margaux na buhay siya bago nangyari yung sa tulay. Pero wala sa public record na may kambal siya," paliwanag ng Director.

Napatingin si Harriet sa kanya. Iyon ang sikreto na matagal nilang tinago ni Margaux. Kahit ang pamilya Villaverde hindi alam na may kakambal siya. Kahilingan mismo ni Margaux iyon noon. Ayaw niyang may kahati sa atensyon ng bago niyang pamilya. At pumayag si Harriet dahil mahal niya ang kapatid niya.

"Kung idedeklara nating patay si Margaux ngayon, magtatago ang pumatay. Alam niyang tapos na ang ginawa niya," patuloy ng Director.

Nagkatinginan ang mga nasa loob ng silid.

"Pero kung palalabasin natin na buhay pa si Margaux... lalabas din siya para tapusin ang hindi niya natapos. Mapipilitan siyang gumalaw ulit," dagdag ng Director.

Napatingin ang lahat kay Harriet. Hindi na kailangan pang ipaliwanag.

"Chief... ikaw lang ang pwede pumalit sa buhay niya," mahinang sabi ng deputy. "Kamukha mo siya. Boses mo kapareho niya. Wala nang ibang pwede."

Napapikit si Harriet nang mariin. Kapag tinanggap niya ito, hindi lang pangalan ni Margaux ang kukunin niya. Pati asawa nito, anak nito, at buong buhay nito kailangan niyang angkinin.

Kapag nagkamali siya, hindi lang misyon ang mawawala kundi pati sarili niyang pagkatao.

Pagkalipas ng ilang segundo, iminulat niya ang mata. Buo na ang desisyon niya.

"Prepare the operation."

Huminto siya sandali bago idinugtong ang mga salitang magsisimula ng pinakamapanganib na misyon sa kanyang buhay.

"Simula ngayon ako na si Margaux Villaverde-Montemayor"